မရမ်းကုန်းမြို့နယ် အမှတ် ၁ ရပ်ကွက် အုပ်ချုပ်ရေးမှူးရုံးတွင် မပေါက်ကွဲသေးသည့် ပြင်းအားမြှင့်မိုင်း ၁ လုံးရှိနေ၍ ပြည်သူများ ရှောင်ရှား သွားလာကြရန် UG ရဲဘော်များ အသိပေး

ရန်ကုန်၊ ဖေဖော်ဝါရီ ၁၂

ရန်ကုန်မြို့၊ မရမ်းကုန်းမြို့နယ် အမှတ် ၁ ရပ်ကွက် အုပ်ချုပ်ရေးမှူးရုံးတွင် မပေါက်ကွဲသေးသည့် ပြင်းအားမြှင့်မိုင်း ၁ လုံးရှိနေ၍ ပြည်သူများ ရှောင်ရှား သွားလာကြရန် Yangon UG People Army-YUPA အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယမန့် ဖေဖော်ဝါရီလ ၁၁ ရက်နေ့ ည ၉ ခန့်တွင် မရမ်းကုန်းမြို့နယ်၊ ဘုရင့်နောင်ကားဝင်းအတွင်းရှိ အမှတ် ၁ ရပ်ကွက်အုပ်ချုပ်ရေးမှူးရုံးကို Yangon UG People Army-YUPA အဖွဲ့က ပြင်းအားမြှင့်မိုင်း ၁ လုံးဖြင့် ဖောက်ခွဲ တိုက်ခိုက်ခဲ့သော်လည်း မိုင်းပစ္စည်းချို့ယွင်းမှုကြောင့် ပေါက်ကွဲမှု မရှိခဲ့ကြောင်း သိရသည်။

ထို့ကြောင့် ပြည်သူများ အနေဖြင့် အမှတ် ၁ ရပ်ကွက်အုပ်ချုပ်ရေးမှူးရုံးအနီးကို သွားလာခြင်းမပြုလုပ်ရန် အကြမ်းဖက် စစ်ကောင်စီ တပ်သားများရှိရာ နေရာများကို ရှောင်ရှားသွားလာကြရန် Yangon UG People Army-YUPA အဖွဲ့က အသိပေး ပြောဆိုထားသည်။

"ပြည်သူတွေအနေနဲ့ အမှတ် ၁ ရပ်ကွက်အုပ်ချုပ်ရေးမှူးရုံး အနီးကို သတိထား သွားလာကြဖို့နဲ့ ဆက်လက်ပြီး ကျနော်တို့ အနေနဲ့ မြို့ပြမစ်ရှင်တွေကို အရှိန်မြှင့်လုပ်ဆောင်သွားမှာဖြစ်တယ်လို့ အသိပေးပြောချင်ပါတယ်" ဟု Yangon UG People Army-YUPA အဖွဲ့မှ တာဝန်ရှိသူ တစ်ဦးက ပြောဆိုသည်။

YUPA ရဲဘော်များ အနေဖြင့် ဘေးကင်းစွာ ပြန်လည်ဆုတ်ခွာနိုင်ခဲ့ပြီး မြို့ပြမစ်ရှင်များကို အရှိန်မြှင့် လုပ်ဆောင်မည် ဖြစ်၍ ပြည်သူများအနေဖြင့် အကြမ်းဖက် စစ်ကောင်စီ တပ်သားများရှိရာ နေရာများကို ရှောင်ရှားသွားလာကြရန် Yangon UG People Army-YUPA အဖွဲ့က အသိပေး နှိုးဆော်ထားသည်။

ဓာတ်ပုံ - မရမ်းကုန်းမြို့နယ် အမှတ် ၁ ရပ်ကွက်အုပ်ချုပ်ရေးမှူးရုံး

ညောင်ရွှေမြို့နယ်၊ ရေပူရွာအနီး တိုက်ပွဲတွင် စစ်တပ်ဘက်မှ တပ်ကြပ်ကြီး ၁ ဦး အပါအဝင် ၄ ဦး သေဆုံး

ရန်ကုန်၊ ဖေဖော်ဝါရီ ၁၂

ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ ရေပူကျေးရွာအနီး ဖြစ်ပွားသော တိုက်ပွဲအတွင်း အကြမ်းဖက် စစ်တပ်ဘက်မှ တပ်ကြပ်ကြီး ၁ ဦး အပါအဝင် ၄ ဦးသေဆုံးခဲ့ကြောင်း အင်းလေးပြည်သူ့ကာကွယ်ရေးတပ် - IPDF က ပြောဆိုသည်။

ဇန်နဝါရီလ ၃၀ ရက်နေ့တွင် ညောင်ရွှေမြို့နယ် ၊ ရန်ကင်းကျေးရွာ၊ ထီရီးကျေးရွာ နှင့် ထမင်းချိုဓာတ် ဘုရား စခန်းကုန်းတွင် တပ်စွဲထား‌သော အကြမ်းဖက် စစ်တပ်နှင့် ပအိုဝ်းပြည်သူ့စစ် PNA ပူးပေါင်းတပ်က အင်အား ၁၅၀ ဝန်းကျင်ဖြင့် ရေပူရွာ အရှေ့ဘက်ရေချောင်းအထိ စစ်ကြောင်းထိုး ဝင်ရောက်လာ၍ တော်လှန်ရေးပူးပေါင်းတပ်ဖွဲ့များနှင့် တိုက်ပွဲဖြစ်ပွားခဲ့ကြောင်း သိရသည်။

ယင်းတိုက်ပွဲသည် ၁၅ မိနစ်ခန့် ကြာမြင့်ခဲ့ပြီး အကြမ်းဖက် စစ်တပ်ဘက်မှ တပ်ပျက်၍ ထီရီးကျေးရွာ အတွင်း ပြန်လည် ဆုတ်ခွာသွားကြောင်း၊ ထိုသို့ ဆုတ်ခွာသွားသည့် အကြမ်းဖက် စစ်တပ် စစ်ကြောင်းကို တော်လှန်ရေး ပူးပေါင်းတပ်ဖွဲ့များက ဒရုန်းများဖြင့် လိုက်လံတိုက်ခိုက်ခဲ့ရာ အကြမ်းဖက် စစ်တပ်ဘက်မှ တပ်ကြပ်ကြီး ၁ ဦး အပါအဝင် ၄ ဦး သေဆုံးခဲ့ပြီး စစ်ကောင်စီ တပ်သား ၂ ဦး နှင့် PNA အဖွဲ့မှ ၁ ဦး စုစုပေါင်း ၃ ဦး ထိခိုက် ဒဏ်ရာရရှိခဲ့ကြောင်း သိရှိရသည်။

အဆိုပါ တိုက်ခိုက်မှုကို အင်း‌လေးပြည်သူ့ကာကွယ်ရေးတပ် (IPDF) အမှတ် 1009 တပ်ရင်း၊ ဖယ်ခုံ မြို့နယ် ပြည်သူ့ကာကွယ်ရေးတပ် PK PDF-2 အမှတ် 1006 တပ်ရင်း ၊ (Bee Coloum) ပျားစစ် ကြောင်းနှင့် SSRY တပ်ဖွဲ့ များပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။

သိမ်ဇရပ် အခြေစိုက် ခမရ ၂၀၇ တပ်ရင်းနှင့် ချောင်းဦးရှိ ပျူစောထီး စခန်းကို ဒရုန်းဖြင့် ဗုံးကျဲ တိုက်ခိုက်မှု စစ်ကောင်စီ တပ်သားများ ထိခိုက်သေဆုံးမှုရှိ

ရန်ကုန်၊ ဖေဖော်ဝါရီ ၁၂

မွန်ပြည်နယ်၊ သိမ်ဇရပ်မြို့ အခြေစိုက် ခမရ ၂၀၇ တပ်ရင်းကို ဒရုန်းဖြင့် ဗုံးကျဲတိုက်ခိုက်ခဲ့ကြောင်း Taung Nyo Column - တောင်ညိုစစ်ကြောင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဖေဖော်ဝါရီလ ၉ရက်နေ့ နံနက် ၁၁ နာရီ ၄၅ မိနစ်ခန့်တွင် သိမ်ဇရပ်မြို့ အခြေစိုက် ခမရ ၂၀၇ တပ်ရင်း အတွင်းကို ဒရုန်းဖြင့် ဗုံးကျဲတိုက်ခိုက်ခဲ့ခြင်းဖြစ်ကြောင်း၊ ထိုတိုက်ခိုက်မှုအတွင်း အကြမ်းဖက် စစ်ကောင်စီ တပ်သား ထိခိုက်သေဆုံးမှု အရေအတွက်ကို အတည်ပြုနိုင်ခြင်းမရှိသေးဘဲ တော်လှန်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်းသိရှိရသည်။

အဆိုပါ တိုက်ခိုက်မှုကို တောင်ညို စစ်ကြောင်းနှင့် အင်းတကော် (ပကဖ) တို့က ပူးပေါင်းလုပ်ဆောင်ခဲ့ခြင်းဖြစ်ကြောင်း သိရသည်။

အလားတူ စစ်ကိုင်းတိုင်း၊ ချောင်းဦးမြို့နယ်ရှိ အကြမ်းဖက် စစ်တပ် အထိုင်ချ တပ်စွဲထားသော ကံကြီးကုန်းရွာရှိ စစ်စခန်းကို ဒရုန်းဖြင့် ဗုံးကျဲ တိုက်ခိုက်ခဲ့ကြောင်း ချင်းတွင်းဒိုင်းနမိုက် ပြည်သူ့ကာကွယ်ရေးတပ်ဖွဲ့ (Salingyi) ခေါင်းဆောင် ကိုဗိုက်က ရန်ကုန် ခေတ်သစ်သတင်းဌာနထံသို့ ပြောဆိုသည်။

ဖေဖော်ဝါရီလ ၇ ရက်နေ့ နံနက် ၉ နာရီ ၅၀ မိနစ်ခန့်တွင် ချောင်းဦးမြို့နယ်ရှိ အကြမ်းဖက် စစ်တပ်က အထိုင်ချ တပ်စွဲထားသော အင်းအား ၁၀၀ ခန့်ရှိသော ကံကြီးကုန်းရွာ စစ်စခန်းကို ဒရုန်း အစီး ၂၀ ကျော်ဖြင့် ဗုံးကျဲချ တိုက်ခိုက်ခဲ့ခြင်းဖြစ်ပြီး အကြမ်းဖက် စစ်ကောင်စီ တပ်သားများ ထိခိုက်သေဆုံးမှုရှိသော်လည်း အရေအတွက်ကို အတည်ပြုနိုင်ခြင်းမရှိသေးကြောင်း သိရသည်။

"စစ်ခွေး သေစာရင်းမသိရသေးဘူး။ ကျွန်တော်တို့ကိုလည်း မဟာမိတ်တွေက လှမ်းမပြောသေးဘူး။ သူတို့ ခွေးကုန်း အထိုင်ချတဲ့နေရာတွေကို စစ်ခွေး စစ်တပ် အင်အားမှန်းလို့တော့ မရဘူး။ သူတို့က ပျူတွေနဲ့ ရောနေတာဆိုတော့ ပထမ စခန်းသိမ်းတော့လာပို့တဲ့ အကောင်တွေရော ရှိတာဆိုတော့ စစ်ခွေးအင်အားကတော့ ကျွန်တော်တို့ ခန့်မှန်းတာကတော့ ၁၀၀ လောက်ရှိမယ်။ ပျူတွေရောဆိုရင် အဲဒီရွာကများမှာပါ။ ဒရုန်းကတော့ များတယ်။ အစီး ၂၀ လောက်ရှိမယ် နှစ်နေရာခွဲပြီးတိုက်ခိုက်ခဲ့တာ" ဟု ချင်းတွင်းဒိုင်းနမိုက် ပြည်သူ့ကာကွယ်ရေးတပ်ဖွဲ့ (Salingyi) ခေါင်းဆောင် ကိုဗိုက်ကပြောဆိုသည်။

အဆိုပါ တိုက်ခိုက်မှုအတွင်း တော်လှန်ရေး တပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း၊ ဒရုန်း ဆုံးရှုံးမှုများ ရှိခြင်းကြောင့် ပြည်သူများအနေဖြင့် ဒရုန်း ပြန်လည် တပ်ဆင် ဝယ်ယူနိုင်ရန်အတွက် ဝိုင်းဝန်း ကူညီထောက်ပံ့ပေးကြရန် မေတ္တာရပ်ခံကြောင်း ချင်းတွင်းဒိုင်းနမိုက် ပြည်သူ့ကာကွယ်ရေးတပ်ဖွဲ့ (Salingyi) ခေါင်းဆောင် ကိုဗိုက်က ဆက်လက် ပြောဆိုသည်။

နွားထိုးကြီးမြို့နယ်ရှိ ကျေးရွာ ၂ ရွာနှင့် ကလေးမြို့နယ်ရှိ ကျေးရွာများကို စစ်တပ်က လေယာဉ်ဖြင့် ဆက်တိုက် ဗုံးကျဲ တိုက်ခိုက်မှု ပြည်သူများ ထိခိုက်မှုရှိ

ရန်ကုန်၊ ဖေဖော်ဝါရီ ၁၂

မန္တလေးတိုင်း၊ နွားထိုးကြီးမြို့နယ်ရှိ ကျေးရွာ ၂ ရွာကို အကြမ်းဖက် စစ်တပ်က လေကြောင်းဖြင့် ဗုံးကျဲ တိုက်ခိုက်ခဲ့ကြောင်း နွားထိုးကြီးမြို့နယ် ပြည်သူ့ကာကွယ်ရေးတပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဖေဖော်ဝါရီလ ၁၂ ရက်နေ့ မွန်းလွဲပိုင်းတွင် နွားထိုးကြီးမြို့နယ် အတွင်းရှိ ပဲချက်ရွာ နှင့် နပဲမြစ်ရွာ တို့ကို အကြမ်းဖက် စစ်တပ်က လေယာဉ်ဖြင့် ဗုံးကျဲ ပစ်ခတ် တိုက်ခိုက်ခဲ့ခြင်းဖြစ်ပြီး ပြည်သူများ ထိခိုက်မှု အခြေအနေနှင့် နေအိမ်များ ပျက်စီးဆုံးရှုံးမှု ရှိမရှိကို အတည်ပြုနိုင်ခြင်းမရှိသေးကြောင်း သိရသည်။

" စစ်ခွေးတွေ လေကြောင်းနဲ့ ဗုံးကျဲ တိုက်ခိုက်သွားတာတော့ သိရတယ်။ ပြည်သူတွေ ထိခိုက်မှု အခြေအနေနဲ့ နေအိမ်တွေ ပျက်စီးဆုံးရှုံးမှု ရှိမရှိကို ကျနော်တို့ ဆက်လက် စုံစမ်းနေပါတယ်" ဟု နွားထိုးကြီးမြို့နယ် ပြည်သူ့ကာကွယ်ရေးတပ်ဖွဲ့မှ တာဝန်ရှိသူ တစ်ဦးက ပြောဆိုသည်။

အလားတူ စစ်ကိုင်းတိုင်း၊ ကလေးမြို့နယ်ရှီ ကျေးရွာများကို အကြမ်းဖက် စစ်တပ်က လေယာဉ်ဖြင့် ဆက်တိုက် ဗုံးကျဲ တိုက်ခိုက်ခဲ့ကြောင်း ဒေသတွင်း သတင်ရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဖေဖော်ဝါရီလ ၁၂ ရက်နေ့ နံနက်ပိုင်းကစတင်ပြီး အကြမ်းဖက် စစ်တပ်က ကလေးမြို့နယ်အတွင်းရှိ ကျေးရွာများကို လေယာဉ်ဖြင့် ဗုံးအမြောက်အများ ကျဲချ တိုက်ခိုက်နေခြင်းဖြစ်ပြီး ပြည်သူများ ထိခိုက်မှုရှိပြီး နေအိမ်များ ပျက်စီးမှုများလည်းရှိကြောင်း သိရသည်။

"လေယာဉ်ကတော့ မျိုးစုံနဲ့ကို ကျဲနေတယ်။ ပြည်သူတွေလည်း ထပ်ပြီး တိမ်းရှောင်နေရတယ်။ ဆက်တိုက်ကိုကျဲချနေတာ လေယာဉ်တွေလည်း ပျံဝဲနေတုန်းပဲ ပြည်သူတွေ ထိခိုက်မှုရှိတယ်လို့ သိရပေမယ့် အတည်မပြုနိုင်သေးဘူး။ ကျနော်တို့လည်း တိမ်းရှောင်နေရတုန်းပဲ ရွာတွေကိုကျဲတာ ဘယ်ရွာတွေဆိုတာကတော့ မနက်လောက်မှ အတည်ပြုနိုင်မယ်" ဟု ဒေသတွင်း သတင်းရင်းမြစ်ကပြောဆိုသည်။

အကြမ်းဖက် စစ်တပ်က ဇန်နဝါရီလပိုင်ကလည်း ကလေးမြို့နယ်ရှိ ကုက္ကိုလ်ရွာ စာသင်ကျောင်းရှိ ယောဒေသ စစ်ဘေးရှောင်စခန်းကို လေကြောင်းဖြင့် ဗုံးကျဲ တိုက်ခိုက်ခြင်းကြောင့် အသက် ၅ နှစ် အရွယ် မောင်ဖြိုးမောင်မောင် ၊ အသက် ၈ နှစ် အရွယ် မဖြူဖြူပွင့် ၊ အသက် ၃၆ နှစ်အရွယ် မသန်းစု၊ အသက် ၁၂ နှစ် အရွယ် မမဲတူစိန် ၊ အသက် ၂၅ နှစ်အရွယ် မမှတ်စာ ၊ အသက် ၄၀ နှစ် အရွယ် မအေးတင် ၊ အသက် ၁၇ နှစ်အရွယ် မအိဇင်မိုး ၊ အသက် ၄၆ နှစ်အရွယ် ဒေါ်ချိုမာဝင်းနှင့် အမည်မသိ ပြည်သူ ၃ ဦးတို့ သေဆုံးခဲ့သည်။

ငါန်းဇွန်မြို့နယ်တွင် စစ်တပ် စစ်ကြောင်းကို မိုင်းဆွဲ တိုက်ခိုက်မှု စစ်ကောင်စီ တပ်သားများ ထိခိုက်သေဆုံးမှုများပြား

ရန်ကုန်၊ ဖေဖော်ဝါရီ ၁၂

မန္တလေးတိုင်း၊ ငါန်းဇွန်မြို့နယ်တွင် အကြမ်းဖက် စစ်တပ် စစ်ကြောင်းကို မိုင်းဆွဲ တိုက်ခိုက်ရာ စစ်ကောင်စီ တပ်သားများ ထိခိုက်သေဆုံးမှုများပြားကြောင်း Tiger Brother မြစ်သား PDF မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇန်နဝါရီလ ၂၂ ရက်နေ့တွင် ငါန်းဇွန်မြို့နယ် မိုင်းထောင်ရွာနှင့် ဂွေကြီးရွာ အကြားတွင် အကြမ်းဖက် စစ်တပ် စစ်ကြောင်းကို တော်လှန်ရေး တပ်ဖွဲ့များက မိုင်းဆွဲ တိုက်ခိုက်ခဲ့ခြင်းဖြစ်ကြောင်း သိရသည်။

ယင်းတိုက်ခိုက်မှု အတွင်း အကြမ်းဖက် စစ်ကောင်စီ တပ်သား ၁၈ ဦးသေဆုံးပြီး တော်လှန်ရေး တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။

"ငါန်းဇွန်မြို့နယ် မိုးထောင်ကျေးရွာနဲ့ ဂွေကြီးကျေးရွာ အကြားမှာ စစ်ခွေး စစ်ကြောင်းကို မိုင်းဆွဲတိုက်ခိုက်ခဲ့တာပါ။ စစ်ခွေး ၁၈ ကောင်သေဆုံးတယ်။ ကျနော်တို့ တော်လှန်ရေး ရဲဘော်တွေတော့ အထိအခိုက်မရှိ ဆုတ်ခွာနိုင်ခဲ့တယ်" ဟု Tiger Brother မြစ်သား PDF မှ တာဝန်ရှိသူ တစ်ဦးက ပြောဆိုသည်။

အဆိုပါ တိုက်ခိုက်မှုကို Tiger Brother မြစ်သား PDF၊ FREE DOM FIGHTERS နှင့် GOLDEN EAGLES အဖွဲ့က တို့ ပူးပေါင်းလုပ်ဆောင်ခဲ့ကြောင်း ၊ ပြည်သူ့ကာကွယ်ရေး တပ်ဖွဲ့များအနေဖြင့် ပြည်သူလူလူထုကို ညဉ်းပန်း နှိပ်စက် သတ်ဖြတ်နေသော အကြမ်းဖက် စစ်ကောင်စီတပ်ဖွဲ့ဝင်များနှင့် စစ်ကောင်စီ ဒေါက်တိုင်များကို ဆက်လက်တိုက်ခိုက်သွားမည်ဖြစ်ကြောင်း Tiger Brother မြစ်သား PDF မှ တာဝန်ရှိသူ တစ်ဦးက ဆက်လက် ပြောဆိုသည်။

ကျောက်ကြီးမြို့နယ်၊ နတ်သံကွင်း - ကျောက်ကြီး လမ်းပိုင်းရှိ စစ်စခန်းမှ စစ်ကောင်စီ တပ်သားသစ် ၂ ဦး သေနတ် ၁ လက်ယူဆောင်လာပြီး အလင်းဝင်

ရန်ကုန်၊ ဖေဖော်ဝါရီ ၁၂

ပဲခူးတိုင်း၊ ကျောက်ကြီးမြို့နယ်၊ နတ်သံကွင်း - ကျောက်ကြီး လမ်းပိုင်းရှိ စစ်တပ်စခန်းမှ စစ်ကောင်စီ တပ်သားသစ် ၂ ဦး သေနတ် ၁ လက်ယူဆောင်လာပြီး အလင်းဝင်ရောက်ခဲ့ကြောင်း ပဲခူးခရိုင် ၊ အမှတ် - ၂ တပ်ရင်း ၊ P2-3702 မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဖေဖော်ဝါရီလ ၁၂ ရက်နေ့တွင် ကျောက်ကြီးမြို့နယ်၊ နတ်သံကွင်း - ကျောက်ကြီး လမ်းပိုင်းရှိ အကြမ်းဖက် စစ်တပ်စခန်းမှ စစ်ကောင်စီ တပ်သားသစ် ၂ ဦး သေနတ် ၁ လက် ယူဆောင်လာပြီး ပြည်သူ့ကာကွယ်ရေးတပ်မတော် ၊ ပဲခူးခရိုင် ၊ အမှတ် ( ၂ ) တပ်ရင်း ၊ P2-3702 ထံကို အလင်းဝင်ရောက်ခဲ့ကြောင်း သိရှိရသည်။

အလင်းဝင်လာသော အကြမ်းဖက် စစ်ကောင်စီ တပ်သားသစ် ၂ ဦးသည် MA-3 သေနတ် ၁ လက် ၊ ကျည်ဘောက် ၃ ခု ၊ 5.56 ကျည် ၁၉၇ တောင့် တို့ကို ယူဆောင်လာပြီး အလင်းဝင်ရောက်လာသောကြောင့် ငွေကျပ် ၁၀ သိန်း ချီးမြှင့်ငွေ အဖြစ် ပြန်လည်ချီးမြှင့်ခဲ့ပြီး ပြည့်သူ့ ရင်ခွင်နှင့် ချိတ်ဆက်၍ လိုအပ်သည်များကို ဆက်လက်ဆောင်ရွက်လျှက်ရှိကြောင်း သိရသည်။

"ကျွန်တော် တပ်ရင်းအနေနဲ့ ကနဦး ချီးမြင့်ငွေ ဆယ်သိန်းကိုတော့ ကျွန်တော်တို့ တပ်ရင်းအနေနဲ့ ချီးမြှင့်တာဖြစ်ပါတယ်။ အဲဒါတော့ လက်နက်နဲ့ အလင်းဝင်လာတဲ့သူတွေကို တပ်ရင်းအနေနဲ့ ချီးမြှင့်တာဖြစ်ပါတယ်။ ကျွန်တော်တို့ တပ်ရင်းကို ချိတ်ဆက်ပြီးတော့ ကြိုပြီး ချိတ်ဆက်ပြီး ဝင်လာတာမျိုး မဟုတ်ဘူး။ သူတို့ တာဝန်ကျတဲ့ နေရာကနေပြီးတော့။ ပြေးလာပြီးတော့ ကျွန်တော်တို့ ပြည်သူ့ကာကွယ်ရေးတပ်ဖွဲ့တွေရှိတယ်ဆိုတဲ့ဘက်ကို သူတို့ ဦးတည်ပြီးပြေးလာတာ ပြေးလာပြီးတော့ စိုးမိုးနယ်မြေထဲကို ရောက်တဲ့အခါမှာ သူတို့ အလင်းဝင်ချင်လို့ပါ ဆိုပြီး တွေ့တဲ့သူကို ဆက်သွယ်ပြီးတော့။ သူတို့ အလင်းဝင်ချင်လို့ပါဆိုပြီး ကျွန်တော်တို့ လှမ်းပြီးတော့ပြောတဲ့ ပုံစံမျိုးပါ ကြိုတင်ချိတ်ဆက်ထားမျိုး မရှိပါဘူး" ဟု ပဲခူးခရိုင်၊ အမှတ် - ၂ တပ်ရင်း ၊ P2-3702 မှ တာဝန်ရှိသူတစ်ဦးက ပြောဆိုသည်။

အကြမ်းဖက် စစ်ကောင်စီက အတင်းအဓမ္မ ခေါ်ဆောင်ခံခဲ့ရသူများအနေဖြင့် တော်လှန်ရေးတပ်ရင်း ၊ တပ်ဖွဲ့များကို အမြန်ဆုံး ချိတ်ဆက်ပြီး အလင်းဝင်ကြရန် အလင်းဝင်လာသူများ အနေဖြင့် https://www.facebook.com/profile.php?id=61552261812842 ဆက်သွယ်နိုင်ကြောင်း ပဲခူးခရိုင် ၊ အမှတ် - ၂ တပ်ရင်း ၊ P2-3702 မှ တာဝန်ရှိသူတစ်ဦးက ဆက်လက် ပြောဆိုသည်။

မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၃၅ ဦးသေဆုံး

ရန်ကုန်၊ ဖေဖော်ဝါရီ ၁၂

မြန်မာနိုင်ငံတစ်ဝန်း ဖေဖော်ဝါရီလ ၁၂ ရက်နေ့ ရရှိထားသော အချက်အလက် များအရ စစ်ကောင်စီတပ်ဖွဲ့ဝင် ၃၅ ဦးသေဆုံးကြောင်း ပြည်သူ့ကာ ကွယ်ရေး တပ်ဖွဲ့များ၏ ထုတ်ပြန်ချက်နှင့်ပြောဆိုချက် များ အရ သိရှိရသည်။

ရန်ကုန်ခေတ်သစ်အနေဖြင့် နေ့စဉ် စစ်သား သေဆုံးမှု စာရင်းများကို ထုတ်ပြန် ရာတွင် ဒေသကာကွယ်ရေးတပ်ဖွဲ့များ၏ ထုတ်ပြန်ချက်များနှင့် ပြောဆိုချက် များကို စုစည်းဖော် ပြရခြင်းဖြစ်ပြီး မြေပြင် အခြေအနေတွင် အမှန်တကယ် စစ်သားများ သေဆုံးမှု ရှိ၊ မရှိ ကွင်းဆင်း အတည်ပြုနိုင်ခြင်း မရှိသည်ကို သိစေအပ်ပါသည်။