ቅዳሜ፡- ሚያዝያ 4 ቀን 2017 ዓ.ም

የኮሌጁ EASTRIP ፕሮጀክት የስራ አፈፃፀም ግምገማ ውይይት ተካሄደ!!

የጀነራል ዊንጌት ፖሊ ቴክኒክ ኮሌጅ EASTRIP ፕሮጀክት የ9 ወር የስራ አፈፃፀም ግምገማ በሐዋሳ ከተማ ተካሄደ፡፡

በዚህ የስራ አፈፃፀም ግምገማ ውይይት ላይ በቢሮ ኃላፊ ማዕረግ የአዲስ አበባ ከተማ አስተዳደር ስራ እና ክህሎት ቢሮ ምክትል ቢሮ ኃላፊ ዶ/ር አበራ ብሩን ጨምሮ ሌሎች የቢሮው የስራ ኃላፊዎች ፣ ከተለያዩ ኢንዱስትሪዎች የተውጣጡ የኢንዱስትሪ አድቫይዘሪ ቦርድ አባላት፣ የተለያዩ ኮሌጆች ዲኖች እንዲሁም የኮሌጁ ዲኖች፣ ማናጅመንት አባላትና የዲፓርትመንት ተጠሪዎች ተገኝተዋል፡፡

በዕለቱ በኮሌጁ ዲን አቶ መለሰ ይግዛው እና ዶ/ር አበራ ብሩ አማካኝነት የእንኳን ደህና መጣችሁ የመግቢያ ንግግር ከተደረገ በኋላ ተቋማዊ የፕሮጀክቱ አጠቃላይ የስራ አፈፃፀም ሪፓርት በፕሮጀክት ጽ/ቤቱ አስተባባሪ አቶ ጀማል ሐሰን አማካኝነት ቀርቧል፡፡  

አጠቃላይ የኮንስትራክሽን ስራው ሂደት ምን ይመስላል የሚለውን ደግሞ በፕሮጀክት ጽ/ቤቱ የኮንትራክት አዲሚኒስትሬሽን ኤክስፐርት በሆኑት ኢ/ር ዘውዴ ሽፈራ አማካኝነት ገለፃ ተደርጓል።

በሌላ በኩል ተቋሙ የዉስጥ ገቢውን ለማሳደግ ይረዳ ዘንድ የተቋቋመው ኃላ/የተ/የግል ድርጅት ለቀጣይ ያሉት ተስፋዎች፣ ያመጣው ፋይዳና ያሉበት ክፍተቶችን የሚያሳይ ጥናታዊ ቀርቧል።

በመጨረሻም በቀረቡት የስራ አፈፃፀም ሪፖርት እና ጥናታዊ  ጽሑፍ ሰነዶች መሠረት ከተሳታፊዎች ጥያቄ ተነስቶ እና ገንቢ አሰተያየት ተሰጥቶ የዕለቱ መድረክ ተጠናቋል።
 
     ‹‹በላቀ አገልግሎት የመረጃ ተደራሽነት››

ረቡዕ:- ሚያዚያ 8 ቀን 2017 ዓ.ም

በከተማ ደረጃ በተደረገው የአሰልጣኞች ተግባራዊ ጥናትና ምርምር ውድድር ጀነራል ዊንጌት ፖሊ ቴክኒክ ኮሌጅ አሸነፈ!!

የኮሌጁ አሰልጣኞች በተቋም እና በክላስተር ደረጃ የተወዳደሩበት የተግባራዊ ጥናትና ምርምር ሰነድ በላቀ ውጤት አሸናፊ የነበረ ሲሆን በከተማ ደረጃ በተደረገውም ቀዳሚነቱን ይዞ አጠናቋል።

በውድድሩ ርዕሰ ጉዳዩ አንገብጋቢ ችግር መሆኑ፣ ከችግሩ ጋር የተሰናሰለ ዓላማ መቀረጹ፣ ችግሩን ለመፍታት የተደረገው ርቀት፣ በምርምር ሂደቱ የተገኙ ውጤቶች፣ ወዘተ የሚሉ መስፈርቶች ተካተዋል።   

የኮሌጁ አሰልጣኞች የሰሩት ጥናትና ምርምር ርዕስ በስልጠና መጨረሻ ዓመት ላይ በሚሰሯቸው ፕሮጀክቶች እና ድህረ ልምምዶች ላይ የሰልጣኞችን ልል ክህሎት  እንዲት ማሳደግ ይቻላል? የሚል ነበር፡፡

ባለፈው ዓመትም በአሰልጣኞች የተሰራው ተግባራዊ ጥናትና ምርምር በከተማ ደረጃ አንደኛ ደረጃን ይዞ ማጠናቀቁ አይዘነጋም፡፡ 

በሌላ በኩል በተያያዘ በሰልጣኞች መካከል ሲደረግ የነበረው የክህሎት ውድድር እንደ ከተማ በ4 ሙያዎች 1ኛ ደረጃ፣ በ2 ዘርፎች 2ኛ ደረጃን እና በ1 ሙያ ደግሞ 3ኛ ደረጃን ይዞ በማጠናቀቅ 7 ሜዲያሊዎችን ማግኘት ተችሏል።
 
"በላቀ አገልግሎት የመረጃ ተደራሽነት"