2024香港天氣及風暴追擊 (Since 2017)

Forwarded from 風巴音樂廳－聆聽音樂 ♫ 聆聽心事♪ (Windseasonbro 暴風雨)

#姜濤 #蒙着嘴說愛妳 #二零年代

嗱，呢篇文，除咗介紹新歌，重有我對樂壇嘅睇法，希望大家睇下

私底下認識我嘅人，都知道我係一個好Old school嘅老套怪，中意嘅歌手係張學友、黎明、張國榮等。

早幾年，TVB製造大量歌手，如Fred、吳業坤，又如吳若希、菊芷喬等人。呢堆人唱大量罐頭歌，後兩者為甚，幫千篇一律嘅大陸劇唱千篇一律嘅Theme song，結果好多人同我呢個老鬼一樣，覺得香港樂壇已死。

其實唔單止係TVB，又如黎明捧嘅人都太過一式一樣: Janice 同佢家姐衛詩、JW、JC，然後閻奕格同李倖倪，係仔細聽先會留意到有乜分別...

壞孩子系列就一早玩爛咗：謝霆鋒、陳冠希、余文樂、吳浩康、周柏豪...

近年就係一大堆Band：Mr,Kolor, RubberBand, Dearjane(呢隊嘢都好耐下，但近年更活躍)，講真真係好難分。

有時候歌手把聲同唱法都好有問題。劉浩龍、吳浩康初初出道時被人講把聲都似Eason，當然而家唔似，但係如MR嘅布志綸把聲似Eason一樣，難免會減低獨特性。

八九十年代，歌手嘅聲線好獨特，就算好似唔係好識唱歌嘅鄭伊健(佢唔係壞孩子系列，佢係黑社會系列)，你聽佢d歌都會有種獨特性，而獨特性正正係而家樂壇好缺乏：

零零年，興K歌，所以一味出K歌；
一零年，想搞下其他主題，想認真玩音樂(我認同band 唔同Hkpop)，但結果好似兩頭唔到岸。

所以，我係一個一直都會覺得香港樂壇已死，而唱K永遠唱舊歌嘅老鬼。我唔係無試過聽新歌，不過真係覺得八九十年代嘅歌先係我杯茶，所以我成長階段經常同當時時代脫節，朋友唱緊「夕陽無限好」嘅時候，我重係一個人J緊十鳩幾年前當時都有十鳩幾年歷史嘅黎明嘅「傻痴痴」、「無名份的浪漫」等等歌。

但近年因為無乜新歌好聽，所以又聽返「零零年新歌」，又覺得幾好聽。

所以我覺得，可能係我哋太封閉自己。

我一直覺得，欣賞音樂有幾個層面：

1⃣ 歌手聲線辯識度
2⃣ 首歌嘅旋律
3⃣ 首歌嘅歌詞
4⃣ 歌手嘅唱功
5⃣ 歌手個人魅力
6⃣ 歌手同首歌嘅配合度

我一直認為，八九十年代嘅歌手係頂峯，不過我亦知道呢一代香港人唔會中意九十年代太情情塔塔嘅改編歌。

但我今次要幫下姜濤Promote下佢首歌，我唔係撐佢或者點，不過我覺得大家唔應該拎八九十年代嘅標準去睇今日香港樂壇，時代係唔同咗。

八九十年代，張學友黎明都係新人，佢哋唔係第一隻碟就爆紅，而我相信而家大家對新歌手嘅要求係唔同咗。

我永遠都係中意八九十年代嘅香港歌，但係如果我哋一直逢新必反，咁香港永遠唔會有人紅到。

今日聽過姜濤首歌，不過不失，但唔應該以我哋老鬼嘅角度去睇呢件事。

我都會以更開放心態聽下香港新歌，你都可以試下😉。

https://youtu.be/f5NzXpC8tdU