[ نعي الليلة الثامنة من محرم ]
ــــــــــــــــــــ
إثنين إبگلب ابو السجّاد لسهام
إلـ مّثلث و الآخر مــوت جسّـام
چا مات الحســين شلون ينـلام
شاف الحسن طاح وعالترب نام
ــــــــــــــــــــ
يگلّه الموت عمي وياي شتشوف ؟
گله العسـل مُرّ وحـلوه لسـيوف
هيچ اعله الشهاده وياك ملهوف
آنه اليوم غيرك كلشي ماشوف
ــــــــــــــــــــ
إلـ شمع جسام مو ياهو اليجي وذاب
إلـ يعيش المصيبـه اللّي فگد شـاب
حسين احتار يحسب چم گمر غاب
كل ساعه و جِنازه اعله الخيم جاب
ــــــــــــــــــــ
مهدي التقي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات

الليلة الثامنه  القاسم ع

اصد يبني اعله طولك چنت…… ورباي
يجاسم راح ذاك التعب………… ورباي
قسم يبني ببوك الحسن……… ورباي
لنوح بغيبتك صبح ومسية
____
يمن برباك اليه اضلوع………. حنيت
مانه امك يجاسم والك……… حنيت
يبني مانسيتك چذب………… حنيت
اچفوفك بالدمه وحنيت ادية
______
وحق العينه الباري……… وصانه
لهذا اليوم والدنه………. وصانه
حفظ شبل الحسن عهده… وصانه
وصاح اني يبن حامي الحمية
__
چنت احلم ابعرسك وتاني
وضميتلك حنه وصواني
طف كربله بسهمه رماني
الله واكبر يازماني____
غير التربي اوحيدها اتنول
تگعد وعنها ايشيل الحمول
شتگول ياجسام شتگول
هذا اليصير اوياي معقول
__

    الشاعر حيدر الخفاجي

https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات

ابو ذيات الليله الثامنه

الليالي ابچبدتي تطحن ... رحه الها
اوعيني امن الدمع مامش .. راحلها
اشلون اوليد هل ليله ...... راح الها
ابليلة زفته او ذبحوه أميه

جدامي انذبح ضامي ... وشفتاه
يخر الدمه من نحره ..... وشفتاه
يجاسم شفت كل لوعه ... وشفت آه
منها الموت اشوه او اخف ليه ...

الحزن ما دام لحد ... دام عليها
اهل دمعه اعله بنها .. دمعه ليها
لگت أثياب عرسه ..... دم عليها
عمت عيني اصرخت راح امن اديه

ابو فاطمة الطائي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات

((ابوذيات ليلة القاسم ع))
__
جرح دنياي عذبني.........وحنيت
المصايب عوگت ظهري......وحنيت
عجنت الحنه يايمه...........وحنيت

وزفك للحرب بثنين اديه
****
صحت يا قاسم بحيدر.....وشابيت
يحلوه ارسومه بالوجنه....وشابيت
ييمه اشگد كبر حزني......وشابيت

اگومن وعثر بدمع الرزيه
****
ذبحني الدهر بفراگه........ومتناه
حنيت الظهر وانه انظر......ومتناه
صحت يايمه بغيابك........ومتناه

يريت الموت يلفيني المسيه
*****
يوسف الفتلاوي

https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات

نعي القاسم عليه السلام
،،،،،،،،،،،،،،،،،،،،،،،،،

احلفك بيش يوليدي يجسام
ينور عيوني فرحة ذيچ الايام
ذبحني الدهر تاليهه بالسهام
عشت بالاه وانه اتموت الاحلام

تانيني صرت دمعه
ذوبني العمر شمعه
صحت بس صوتي شيسمعه ييمه

بعد من رحت من عندي شتاني ؟
الضوه البلدنيا يمدلل عماني
شجاني وعدله ليهسه شجاني
عجيبه العيشه من بعدك ثواني

آخره مره اودعنك واشمك
واخر مره اگعد ريت يمك
صعبه وحيل تصعب هاي منك
ازفك للعرس والنوب ادفنك

اريد انعه لحد موتي
لحد ما يندفن صوتي
بيدك يحدي تابوتي....... ييمه

يبعد امك توادعنه وگعدنه
تعبنه من الدمع والله تعبنه
الف دمعه وتموت ارواح عدنه

جرح دنياي عذبني.........وحنيت
المصايب عوگت ظهري......وحنيت
عجنت الحنه يايمه...........وحنيت

وزفك للحرب بثنين اديه

●●●●●●●●●●●●●●●●●●●●●●
يوسف الفتلاوي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات

*((القصيدة من ديوان📚 مسير الفواطم لإرض المظالم جزء٢))*
*قصيده للقاسم عليه السلام(يبني جسام)*
❥━──➸➽❥❂❥━──➸➽❥❂
     شلون اودعك للحرب
     يمه  يا  بعد  الگلب
يبني جسام      يبني جسام
❥━──➸➽❥❂❥━──➸➽❥❂
يمه يا بعد الگلب يا گرة العين
عليك حاربني زماني ودهري والبين
شلون بيه لو رحت انطي الوجه وين
وين اروح ليا مكان ... عگبك اذاني الزمان
يبني جسام       يبني جسام
❥━──➸➽❥❂❥━──➸➽❥❂
عگبك اذاني زماني ودهري ذبني
والله يخنگني النفس لو صحت يبني
عليك اون ويفت حته الصخر وني
ليلي ونهاري اون ... روحي غاطيهه الحزن
يبني جسام      يبني جسام
❥━──➸➽❥❂❥━──➸➽❥❂
عليك انوحن يالولد صبح ومسيه
ردت ازفك للعرس بثنين اديه
تالي ازفك بالچفن للغاضريه
وعرسك دموم ودمع    بيك دلالي انفجع
يبني جسام       يبني جسام
❥━──➸➽❥❂❥━──➸➽❥❂
عرسك آهات ومناحه وحزن ودموع
وبيك عمك يالولد دلاله مفجوع
وبدمع عيني يغالي طفت الشموع
طفت يمه شمعتك ... صار عرسك موتتك
يبني جسام    يبني جسام
❥━──➸➽❥❂❥━──➸➽❥❂
الموت يبني والعرس صارن سويه
انتحب واعليك اون ونه شجيه
ليش حاچيني اگطعت هالگطعه بيه
راح حيلي من رحت … يالولد يبني صحت
يبني جسام            يبني جسام
❥━──➸➽❥❂❥━──➸➽❥❂
*بقلم ✍🏻خادمة اهل البيت*
*الشاعرة العلوية مريم النور نسألكم الدعاء الفاتحه الى روح اختي ولإمواتكم:*

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعية للقاسم (ع)( اندهولي الولد) 

✦❥※❥※✿✿※❥※❥※✿✿※❥※❥✦

اندهولي الولد لاموش اله النومه

نايم عالتراب امغيره ارسومه

✦❥※❥※✿✿※❥※❥※✿✿※❥※❥✦

نايم عالتراب امسلهم عيونه
عاف امه عليه اليوم محزونه
وحنات العرس بدماه معجونه

ويهفي عليه الذاري وسمومه

✦❥※❥※✿✿※❥※❥※✿✿※❥※❥✦

من ذاري التراب الحوف المچنه
تمنيت الولد بيديه ازفنه
خذاه الموت مني وايست منه

عمت عيني عليه من جابوا  علومه

✦❥※❥※✿✿※❥※❥※✿✿※❥※❥✦

عليه اعيوني تعمه الميت امحسر
بسيوف الاعادي اوليدي اموذر
نايم يالشباب وحالك امغير

ما ردت الوداع ولا ردت يومه

✦❥※❥※✿✿※❥※❥※✿✿※❥※❥✦

ما ردت الوداع اوياك يا مدلل
لو غمضت اعيونك بعد ماتسأل
راح الفكر مني ودربي ما اندل

من شفت الولد غرگان بدمومه

✦❥※❥※✿✿※❥※❥※✿✿※❥※❥✦

غرگان الولد بدمومه من شفته
لو ينسام ابني بروحي چا سمته
تعب عمري ورباتي لكربله شلته

يا جيت الگشره اعلينه ميشومه

✦❥※❥※✿✿※❥※❥※✿✿※❥※❥✦

تمت والحمدلله ✍ خادمة أم أبيها الشاعرة أم علي الحلفي (من ديوان مصارع الكرام الجزء الأول) لا أجيز شرعاً حذف الأسم اوتغير الكلمات


                      نسألكم الدعاء

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

قصيده فزاعيه  للقاسم «ع»

على العريس     خل ننصب تعازينه

شباب اعله الرمل وسفه غفت عينه


خـل ننصب عـزانه الليلـه للقاسم
يا شبل الحسن  اعله الرمل نـايم
گلب امه عليه ياويلي  ضل هايم

نواسيهـه //     بمصابـه  الليل

رمله تنتحب ياشيعه واسوهه
طفوا شمعة  العريس طفوهـه
والحنه بدموع العين عجنوهه

عريس بدمه    //    محنينـه

نـايـم عـالثره عـريس  يمحسر
مخظب بالدمه والجسم متوذر
يالچـنك ورد  بـالگـاع  مـطـشر

مطروح  القاسم  //  بالحومه

سكنه تنتحب وتصيح  يا يابه
القاسم اتحنه  من دمه خضابه
نـاره  بـالگـلب تستـعر  الهابـه

يانـار  القاسم   //  تجـويهـه   

ياشبل الحسن ويلي على مصابه
الله يعين گلب حسين من جـابـه
شالـه  للخـيم  والدمعه  سجابـه 

يـون حسـين  //  اعـله مصـابـه

الطمي  عـالصدر والونـه عليهه
عالقاسم  الليله  رملـه  عازيهـه
واسيهه على العريس واسيهـه

الحزنانـه  //     واسيهه اليـله

تمـت بـعـون الله تعالـى
بـ✍️خادمـة الحسين "عليه السلام"
الملـه أم مـجتبـى 
نسالكـم الدعـاء بتعجيل الفـرج لصاحـب الزمـان( عـج)

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

قصيدة لفقد الشباب
—————————————————

وين الفاگده الشبان خل تهل مدامعهه
بيوم القاسم المحزون هموم الوالده تفلهه

😢😢😢😢😢😢😢😢😢😢

وين الراح منهه الزين شال وخله بس ونه .
يالوحيّد ييمه تصيح رمله من مشت عنه.
وابدال الفرح يبني حبيبي بدمه امحنه
يا فتشه ظوه اعيوني .... تهد امك مواجعهة..

يافتشة ضوة العينين امك لا تخليهة
حدر ضلوعها ونات تكتل لو تناعيهة
تكلة يلعزيز اكعد امك من يباريهة
ياسلوة حياتي كوم .... تهد امك مواجعهة

ياسلوة وبعد عمري أنشدك ليش تثكلني
انة امك واون ضليت من يوم الغبت عني
ردتك للوكت يلشاب ماحسبت تهجرني
اشوفك عَل رمل مطروح .... تهد امك مواجعهة

تشوف ابنالحسن هالشاب عريس بخضب دمه.
شنهو انطيك ياجمال بس خليني اضل يمه .
لو راح الولي ياناس منهو ايباري الحرمه.
تضل تنعاك حد الموت .... تهد امك مواجعهة

الك حسرة بوسط ضلعي ماتكعد يلوليد
وناري بلكلب تسعر و ماضن يومهة تهيد
اون اعليك يوليدي وتدري النوح ميفيد
ماصدك تفاركني .... تهد امك مواجعهة

ارثي ابن الحسن وانحب اله وهليوم ممنونة
اجت هاي الخدم تنخاك يامولاي محزونة
عليك الغربن للشام والضامي البقة بكونة
تحفظ كل ولدنة نريد ... تهد امك مواجعهة


—————————————————

بقلم الشاعرة والملا رغد البهادلي
ذمة عدم حذف الاسم وغير مبرئ الذمة كل من ياخذ من الكلام وينسبه له

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

نزله للقاسم عليها السلام على لحن 👇

هاي الخيل شد واشتد يميمرها


لحومة الميدان جسام اعتنه
الحومة الميدان جسام اعتنه

من الخيم لن صوت يسمع جاي من عمه الحبيب
ايصيح يا فرسان هاشم ماكو من عدكم مجيب
هزته الغيرة اعله عمه وطلع غضبان و رهيب
صاح عمي حسين ابشر هاذ أنه
الحومة الميدان جسام اعتنه

من اخذ رخصه ترجل للحرب ذاك النفل
ابد ميهاب المنايه اسيوف لاكاها ونبل
ال اميه و كل حشدها عنده جن شِسع نعل
لوصل لحدوده شبل حيدر فنه
الحومة الميدان جسام اعتنه

كلهم اهنا يا الاميه انتم انتم و انه هاذ
اليوم اطوقها عليكم للشرد مامن فاذ
ارتعبت الفرسان منه كل شخص بحصانه لاذ
خوفاهم صاحو العباس ضنه
الحومة الميدان جاسم اعتنه

من حمل ضنوة الهادي و كام باحومه يصيح
من الوجل روس الاعادي ابلا ضرب كامت تطيح
اتنشرت بذيج البوادي وضيك اعليها الفسيح
مثل عمه الگمر مادنگ الراس وحنه
الحومة الميدان جسام اعتنه

رمله خاطرهه تهنه يوم شد عالغانمه
اتكله للحومه تعنه وسوي بالطف ملحمه
خلي راسي ارفعه ابحظرت امك فاطمه
رفعي راسج يارمله بالمجنه
الحومة الميدان جسام اعتنه



تم قلم الشاعرة #رهف الكعبي

الشاعر سيد ناصر الموسوي

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

لطمية للقاسم ابن الحسن عليهما السلام (( عريس بعدك يبني ))


عريس بعدك يبني     واهدوم عرسك ذني
بالچفن ليش امحزم     تدري الچفن يفجعني


تدري الچفن يفجعني      الچفن ليش اتلبسه
ماشفت مثلك عريس      مذبوح ليلة عرسه
گلبي انمرد يوليدي      وگلبي انفطر من هسه
كلساع عمك ينخاك     كلساع يضعف حسه
ماتگعد اتشيل الهم     عن الفريب وعني


ماتگعد اتشيل الهم     عن گلبي وعن گلبه
ماتنوصف بغيابك     حالتنه كلش صعبه
هاك الدمع يوليدي      ماعدنه ماي اتشربه
ماتنحسب طعناتك     وبراسك چم ضربه
متحني موش بحناك     بدماك شو متحني


بدم الجروح امحنه     عفت الشموع وحناك
ماريد روحي اخلافك     خليني اموتن وياك
صوب دليلي وحيلي     سهم المنيه وفرگاك
انته العزيز وغالي     واشلون چا گلي انساك
بعد وبعد يسبيني      امصابك ويهضمني


بعد وبعد تچويني     نار الهجر واغيابك
عريس عمك وداك     غرگان بالدم جابك
ياهو اليگوم ايزفك     كلهم ضحايه اصحابك
والبين واگف وگفه     والموت لازم بابك
لافرح لاهلهوله     لملمت حزني اوني



ملتهيه بالنوح اليوم     لافرح لاهلهوله
للحسن روحوا ناديت      ابنك وگع گلوله
طبروا جبينك نصين      عدوان عمك ذوله
چنك غصن تتمايل      مابيك خله ولوله
ماحسبت هيچ اتنام     وتضيع بالطف مني


ماحسبت هيج اتنام     يالموش الك هالنومه
تنشد عليك وتبچي      بت عمك المهضومه
اشلون اگلهه امطبر     وامخربات ارسومه
مو بالخيم عرسك صار     صار العرس بالحومه
كون الگبر ماضماك     الگبر كون يضمني



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

لطمية للقاسم ابن الحسن عليهما السلام (( جيبولي الولد ))


جيبولي الولد ... خلوني ازفنه
حضرت الشموع وعاجنه الحنه


حضرت الشموع وبانيه الكله
تلطم عالجبين وحشمت رمله
عرس ابن الحسن ماصح عرس مثله
مانسمع هلاهل نسمع الونه
جيبولي الولد ... خلوني ازفنه


محد هلهلت نتلاطم وننعه
جاسم وين لاجاسم ولاربعه
انه امه وشريت الياس والشمعه
افرح من يرد سالم واشوفنه
جيبولي الولد ... خلوني ازفنه


افرح من يرد سالم الصيوانه
شنهو العطل اوليدي بميدانه
مدري اشمال گلبي تفور نيرانه
ياجمر المصايب بيش ابردنه
جيبولي الولد ... خلوني ازفنه


ياجمر المصايب يحرگ افادي
ابو السجاد انصبن فاتحه اينادي
كلشي ولاوگع جسام بالوادي
ميت مو عدل رده الغريب النه
جيبولي الولد ... خلوني ازفنه


ميت مو عدل من الحرب جابه
ضل بس الشمع والياس واثيابه
شيحمل فرگته وشيحمل اغيابه
ماريد العمر والموت اريدنه
جيبولي الولد ... خلوني ازفنه


ماريد العمر واليوم اريد الموت
اصيح بصوت يبني ولايگعده الصوت
ضميته الكبرتي وموش للتابوت
ضاع ارباي ذاك شحصلت منه
جيبولي الولد ... خلوني ازفنه


بس ضيم وتعب ماحصلت كلشي
مدري اشلون اعوفه بمصرعه وامشي
ولچ ياروح نوحي وبالحزن بلشي
بعد شمتانيه ومچتول المچنه
جيبولي الولد ... خلوني ازفنه



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

لطمية للقاسم ابن الحسن عليه السلام (( ياعريس بالدم ))


ياعريس بالدم ... ليش حنوك
موش الخيمتك للموت زفوك


للميدان من زفك بچه حسين
شبت نار بضلوعي وچوانين
اخاف اعليك ياجاسم امن البين
صوبين العده شعدهم تلگوك
ياعريس بالدم ... ليش حنوك


بسيوف العده اتلگوك واسهام
يتراجف دليلي امن الرعب گام
اريدنك عدل ترجع للخيام
ربعك يالولد مچتول جابوك
ياعريس بالدم ... ليش حنوك


اموذر للخيم جابوك ربعك
ياعريس ازفك لو اشيعك
گلبي اشلون ينساك ويضيعك
يمك خل يدفنوني اليدفنوك
ياعريس بالدم ... ليش حنوك


يمك كون يدفني اليدفنك
گلبي انحيل ماشبعان منك
يالبعدك ولد وازغير سنك
من شم العذب والماي حرموك
ياعريس بالدم ... ليش حنوك


من شم العذب حرموك والماي
توجع ونتك يهلال دنياي
نوم الگاع عوفه وگوم وياي
الطبروا هامتك بيمن يطلبوك
ياعريس بالدم ... ليش حنوك


بيش ايطلبك الظالم يطبرك
ياجسام من عمري اعله عمرك
عمك ضل يون وانحنه بكترك
حسين وعمتك زينب يريدوك
ياعريس بالدم ... ليش حنوك


زينب عمتك وحسين يبچون
ضيعناك ياجاسم يگولون
اجروح اهواي بفادك يشوفون
مايرهم دوه وبيمن يداووك
ياعريس بالدم ... ليش حنوك



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

نعي للقاسم ابن الحسن عليهما السلام


من الحرب جابوك مچتول
يحلو الجهامه وياحلو الطول
وامك عليك اليوم شتگول


امك عليك شگالت اليوم
تصرخ بفجعه وگلب مهضوم
الموت عوفه وللعرس گوم


عريس يبني اليوم اريدك
وامبدل وحناك بيدك
دمك تفايض من وريدك


اجروحك چثيره وفاض دمك
واشلون اشمك خاف الچمك
كون اندفن بالگبر يمك


كون اندفن بالگبر وياك
كلش صعب يالولد فرگاك
گلبي انفجع ماگدر ينساك


اشلون الگلب ينساك ويهود
مفجوع وامصوب وممرود
ظلمه الليالي اخلافك وسود


اخلافك صفت ظلمه الليالي
شحصلت من ارباك تالي
بس التعب والضيم فالي


بس التعب والهم جنيته
وبفرگتك حيلي گضيته
صيوان عرسك هدميته


بصيوان عرسك بعد شلي
صبح وحش واظلم ويخلي
چا بيش اصبر الروح گلي


چا بيش اصبر الگلب والروح
كلساع اون شينفع النوح
عيني انعمت والحمل مطروح



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

فزاعية للقاسم ابن الحسن عليهما السلام (( موش بخيمته الليله ))


بالميدان جاسم بات
موش بخيمته الليله


جاسم بات بالحومه
وامه اتصيح مهضومه
ليش تنام هالنومه
وروحي اخلافك انحيله


روحي االيوم خلصانه
انه امك يبعد انه
گلبي اتفور نيرانه
مايبرد شسويله


گلبي يفور مايبرد
اصد الراسك امرد
عفت حسين ماله احد
حاير وانهدم حيله


حيران اوحيد حسين
من عنده خذاك البين
ماتگدر تفك العين
ونعشك جيت افييله


اجيتك للحرب يبني
اصيح وماتجاوبني
اشلون بكربله تذبني
اگعد للحمل شيله


اگعد لاتخليني
انته ابني ونضر عيني
صيوانك يبچيني
وكلهه امكدره العيله


كلهه امكدره وتنعه
عفت الياس والشمعه
توحد مهجة البضعه
ويودع مداليله



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

لطمية للفاسم ابن الحسن عليهما السلام (( ياعريس شو نايم ))


ياعريس شو نايم بالگبور
نار امصيبتك ماتخمد اتفور


نار امصيبتك يسعر جمرها
امك يالولد نافذ صبرها
اشلون اتعوفهه وتكسر ضهرها
يبني اتصيح ضهري اعليك مكسور
ياعريس شو نايم بالگبور


تلطم عالوجه واتصيح يبني
اگعد شوف ضهري اشلون محني
ليش تعوفني وتشيل عني
رايدتك تچيه وعين ناطور
وياعريس شو نايم بالگبور


اريدنك تچيه وعين والي
من يوم الرحت شليت حالي
نايم بالگبر والبيت خالي
طاح البيت كله وغرب السور
ياعريس شو نايم بالگبور


طاح البيت كله بروحتك هاي
اشلون تعوفني يزماط دنياي
چا ياهو البعد يتسامر اوياي
ماشوف الدرب وامفارگه النور
ياعريس شو نايم بالگبور


لاشوف الدرب لاگوم ضليت
اموت اوياك يوليدي تمنيت
شنهو العطلك وابعيد ضليت
بغيابك زماني يدور ويجور
وياعريس شو نايم بالگبور


عليه ايجور بغيابك زماني
اصيحن يالولد يومك گضاني
عمك تهمل ادموعه اجاني
جاسم عالجبين ايگوم مطبور
ياعريس شو نايم بالگبور


ايسي يگول من جاسم يرمله
گومن خل نشد راسه ونعدله
باچر عمك الظالم يچتله
يبات بمصرعه والنحر منحور
ياعريس شو نايم بالگبور



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

فزاعية للقاسم ابن الحسن عليهما السلام (( والله اوياك يوليدي ))


روح افدي العمر لحسين
والله اوياك يوليدي


اريدك راسي ترفعه
وتنصر مهجة البضعه
عوف العرس والشمعه
وهاك السيف من ايدي


اخذ سيف الحسن مني
واطلع للحرب يبني
اريدنك تفرحني
وگلي اتنومسي وهيدي


گومي اتنومسي گلي
ياجاسم يبعد اهلي
اريدك للهضم تجلي
يارجواي ياعيدي


يارجواي ياسلوه
صول وصولتك حلوه
انزل عالخصم بلوه
روح وعوفني اوحيدي


روح وشد ضهر عمك
اريدن حنتك دمك
اسمعه ايصيح ويحشمك
وينخه ياصناديدي


صاح حسين ياشبان
وضل اوحيد بالميدان
ياهو اليحرس الصيوان
لو گربت مواعيدي


گربت ساعته ويومه
وضل اوحيد بالحومه
ويعاتب الجيدومه
تنام اشلون يعضيدي



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

هوسات للقاسم ابن الحسن عليهما السلام


مره اتگوم مره اتطيح اجت رمله
تعاتب بالولد وتنوح وتگله
اگعد للهوه ونوم الحرب خله
(( چا ليش اتنام وتنساني ))


گالت عالرمل بالشمس ليش اتنام
عفت امنصتك والعرس ياجسام
ضميتك ضخر تالي الضخر مادام
(( حسبالي تضل سور وهيبه ))


حسبالي تضل هيبه وسگف عالي
تباريني وتشيل الحمل يالوالي
بالطف فرهدك مني الدهر تالي
(( ردتك للضيج وللعازه ))


للعازات ردتك موش للتربان
يالطولك حلو وچنك غصن ريحان
حيلي يموت كله لو شفت شبان
(( وانشدهم عنك يوليدي ))


عليك انشد وانوح وماابطل النوح
لو شفت الشباب اتروح مني الروح
مدري اشلون اعوفك بالحرب مطروح
(( عنك ماروحن لو بيدي ))


لو بيدي لضل بالمعركه وياك
اغطيك بعباتي امن الشمس وانعاك
نايم عالتراب اشفت من دنياك
(( وچفوفك بالدم حنوها ))



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

هوسات للقاسم بن الحسن عليه السلام


من ابعيد شفت ابني وتلگيته
ضميت الشمع والدمع طشيته
لزمت ايده وعله المظلوم وصيته
( حب ايدي وگال امن عيوني )


حب ايدي ويگلي ادللي وممنون
والله ارباچ ماضيعه واهز الكون
راح اهجم واخلي اعداي يحتارون
( فدوه انه لعمي وعماتي )


ابوي المجتبى لليوم ضماني
اشيل السيف وافني اجيوش عدواني
عفيه ابني صحت صول وشمتاني
( گدام الزهره ارفع راسي )


اليوم اليوم اريدنك تعوض ارباي
مثل عباس اعرفك بالعمر وفاي
ابو السجاد انصره وشيل راسي بهاي
( يستاهل عمك يوليدي )


ماريدك تشيل اجنازتي ونعشي
روح ابساع ضحي العمك بكلشي
شلك بالعرس عوف العرس وامشي
( عرسك بالجنه امحضرينه )


تبارك بالشهاده وموش بالزفه
اريدن چبد ابوك بفزعتك يشفه
كل عريس خلوا حنته بچفه
( واچفوفك بالدم حنيهه )



✍شاعرة اهل البيت
ام غصون العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345

هوسة مع فزاعية ختامية مجلس للقاسم بن الحسن عليهما السلام والشهداء والشبان ( ناموا بالتراب )


صدگ ماتنحمل يافرگة الشبان
تعمي العين وتخلي الگلب تعبان
ضل امچانهم ماينچهب حزنان
چا ليش الورد يندفن بتربان



    ( نزلة الفزاعية )


وناموا بالتراب ... الچنهم اورود
شعدهم حملوا ماردوا اردود
     وناموا بالتراب
اشماله الموت بيهم صاح فرهود
     وناموا بالتراب
ندگ ياباب شو كل باب مسدود
     وناموا بالتراب
گلب الفارگاهم صار ممرود
     وناموا بالتراب
نحچي بزودهم وانريدهم زود
     وناموا بالتراب
شو كلمن نوده اليوم مفگود
      وناموا بالتراب
(( احا يفراگ الشالوا     مر مانهواه ))



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر


https://t.me/amhejran12345