የብልፅግና ፓርቲ ወጣቶች ሊግ ማእከላዊ ኮሚቴ ስብሰባ ነገ ይጀመራል

ሰኔ 26/2014 (ዋልታ) የብልፅግና ፓርቲ ወጣቶች ሊግ ማእከላዊ ኮሚቴ ስብሰባ በነገው እለት በደብረብርሀን ከተማ ይጀመራል።

ስብሰባው ለ2 ቀናት የሚቆይ ሲሆን በዋናነት በሊጉ የተሰሩ ሥራዎችን በመገምገም ለቀጣይ ተግባራት አቅጣጫ እንደሚያስቀምጥ ተገልጿል።

በተለይም ምግቤን ከጓሮዬ በተሰኘው መሰል የወጣቶች ንቅናቄ የተሰሩ ሥራዎችን መስክ ድረስ ወርዶ በመጎብኘት ተጨማሪ ድጋፍ እንደሚደረግ ከሊጉ ጽሕፈት ቤት የተገኘው መረጃ ያመለክታል።

ከዚህም ጎን ለጎን ከ6 ሚሊዮን በላይ ወጣቶች የሚሳተፉበት የ2014 የክረምት በጎ ፍቃድ ማስጀመሪያ መርኃ ግብር ይካሄዳል ተብሏል።

በተጨማሪም የብልፅግና ፓርቲ 1ኛ የወጣቶች ሊግ ጉባኤ የሚካሄድበት ቀን እና ቦታ በማእከላዊ ኮሚቴው ውይይት ተደርጎበት እንደሚወሰን የብልፅግና ፓርቲ ወጣቶች ሊግ ፕሬዝዳንት እና የጽህፈት ቤት ኃላፊ አክሊሉ ታደሰ ገልፀዋል።

ለፈጣን መረጃዎች፦
ፌስቡክ https://bit.ly/3Ma7QTW

በሊጉ ጨዋታዎች ላይ የተፈጠሩ ክስተቶችን ተከተሎ ለጨዋታ ታዛቢዎች፣ ዳኞችና የቡድን መሪዎች ጥሪ ተደረገ

ሰኔ 26/2014 (ዋልታ) ቤትኪንግ የኢትዮጵያ ፕሪሚየር ሊግ ጨዋታዎች ላይ የተፈጠሩ ክስተቶችን ተከተሎ ለጨዋታ ታዛቢዎች፣ ዳኞችና የቡድን መሪዎች ጥሪ ተደርጓል።

የኢትዮጵያ ፕሪሚየር ሊግ ውድድር አመራርና ሥነ ሥርዓት ኮሚቴ ዛሬ ባደረገው ስብሰባ የተደረጉ ፕሪሚየር ሊግ ግጥሚያዎች ከዳኞች እና ከታዛቢዎች የቀረቡለትን የዲሲፕሊን ሪፖርት ከመረመረ በኋላ የተለያዩ የዲሲፕሊን ውሳኔዎችን አስተላልፏል።

በተጫዋቾች ዳንኤል ተሾመ (አዲስ አበባ ከተማ)፣ አብዱልባሲጥ ከማል (ሃዋሳ ከተማ) እና ጀማል ጣሰው (አዳማ ከተማ) በ5 ጨዋታዎች የቢጫ ማስጠንቅቂያ ካርድ የተመለከቱ 1 ጨዋታ እንዲታገዱና በተጨማሪ የገንዘብ ቅጣት 1 ሺሕ 500 ብር እንዲከፍሉ ተወስኗል።

በ30ኛ ሳምንት በተደረጉ ጨዋታዎች ላይ የተፈጠሩ ክስተቶችን ተከተሎ ለጨዋታ ታዛቢዎች፣ ዳኞችና የቡድን መሪዎች የኢትዮጵያ ፕሪምየር ሊግ ውድድርና ሥነ ሥርዓት ኮሚቴ ለማነጋገር በኢትዮጵያ ፕሪምየር ሊግ አክሲዮን ማኅበር ጽ/ቤት እንዲገኙ ጥሪ ተላልፏል።

በዚህም ለሦስት የጨዋታ ታዛቢዎች ሻለቃ በልሁ ኃይለማሪያም፣ ሰላሙ በቀለ እና አበጋዝ ነብየልዑል ሲሆን ከዳኞች ለኢንተርናሽናል ዳኛ ኃይለየሱስ ባዘዘው (ፒኤችዲ)፣ ለኢንተርናሽናል ዳኛ አሸብር ሰቦቃ፣ ለፌዴራል ዳኛ ኤፍሬም ደበሌ፣ ለፌዴራል ዳኛ ባህሩ ተካ ለፌዴራል ዳኛዮናስ ካሳሁን እና ለፌዴራል ዳኛ እያሱ ፈንቴ ጥሪ ቀርቧል።

https://www.facebook.com/wmccwaltamediaandcommunicationcorporate/photos/a.489214534492666/5571310619616340/?type=3&app=fbl

በሶማሌ ክልል በሙስና በተጠረጠሩ 168 የመንግሥት ሰራተኞች ላይ ክስ ተመሰረተ

ሰኔ 26/2014 (ዋልታ) የሶማሌ ክልል ፍትህ ቢሮ ኃላፊነትን ለግል ጥቅም በማዋልና በሙስና ወንጀል በተጠረጠሩ 168 የመንግሥት ሰራተኞች ላይ ክስ መሰረተ፡፡

የክልሉ ፍትህ ቢሮ ኃላፊ አህመድ ሃጂ እንደገለጹት በገቢ ማሰባሰብ ሥራ ላይ የተሰማሩ ሰራተኞች ላይ በተደረገ የኦዲት ምርመራ 93 ሚሊየን ብር ጉድለት እንደተገኘ የሶማሌ ክልል ጠቃላይ ኦዲት ጽ/ቤት ለአቃቤ ህግ በላከው ሪፖርት አረጋግጧል። ይህን ተከትሎም በገንዘብ ምዝበራው ተሳትፎ አላቸው በሚል በተጠረጠሩ 168 የመንግሥት ሠራተኞች ላይ ክስ ተመስርቷል፡፡

ቢሮው ከፖሊስ ጋር በመተባበር በወሰደው እርምጃም እስካሁን ከተለያዩ ግለሰቦች 15 ሚሊየን ብር ተመላሸ ሆኖ ወደ መንግሥት ካዝና መግባቱን ጠቁመዋል።

በተመሳሳይ የሶማሌ ክልል የሥነ ምግባርና ፀረ ሙስና ኮሚሽን በሶማሌ ክልል ንግድና ትራንስፖርት ጽ/ቤት ሰራተኛ ሆነው የመንግሥትና የሕዝብ ሃብትን ለግል መጠቀሚያ በማድረግና በሙስና በተጠረጠሩ 14 ሠራተኞች ላይ ክስ የመሠረተ ሲሆን ከተከሳሾቹ መካከል ሁለቱ ዳይሬክተሮች መሆናቸውን ኃላፊው ገልፀዋል።

ከነዚህ 14 ግለሰቦች መካከል 4ቱ በቁጥጥር ስር ውለው ምርመራ የቀጠለ ሲሆን ቀሪዎቹን ለህግ ለማቅረብ ክትትል እየተደረገ መሆኑን ጠቁመው ከተጠርጣሪዎቹ ጋር በግብረአብረነት ተሳትፎ እንዳላቸው በተጠረጠሩ 17 ነጋዴዎች ላይም ክስ መመስረቱን ተናግረዋል።
https://www.facebook.com/wmccwaltamediaandcommunicationcorporate/photos/a.489214534492666/5571417646272304/?type=3&app=fbl

የኢትዮጵያ እና ሱዳንን ሕዝቦች ሰላማዊ ግንኙነት ለማጠናከር ልዩነቶችን በሰላማዊ መንገድ መፍታት ይገባል ተባለ

ሰኔ 26/2014 (ዋልታ) የኢትዮጵያን እና የሱዳንን ሕዝቦች ሰላማዊ ግንኙነት ለማጠናከር ልዩነቶችን በሰላማዊ መንገድ መፍታት እንደሚገባ በሱዳን የኢትዮጵያ ባለሙሉ ስልጣን አምባሳደር ይበልጣል አዕምሮ ገለጹ፡፡

አምባሳደር ይበልጣል አዕምሮ ከሱዳን ምክትል የውጭ ጉዳይ ሚኒስትር አምባሳደር ደፋኣላ አልሃጅ ጋር በኢትዮጵያና በሱዳን ወቅታዊ ሁኔታ ላይ ተወያይተዋል፡፡

በውይይታቸውም በሁለቱ አገራት ሕዝቦች መካካል ያለው ግንኙነት ለዘመናት የዘለቀና በመልክዓ ምድር፣ ባህል፣ ታሪክ እና ሃይማኖት የተሳሰረ መሆኑን አምባሳደር ይበልጣል አዕምሮ አውስተዋል።

በሁለቱ መንግሥታት መካከል ልዩነቶች ቢከሰቱም እንኳ ዘላቂና ስትራቴጂካዊ ጥቅሞቻችንን ግምት ውስጥ በማስገባት በሰከነና በሰላማዊ መንገድ ልዩነቶችን ለመፍታት መስራት አስፈላጊ ነው ሲሉ አስረድተዋል።

አምባሳደር ደፋኣላ አልሃጅ በበኩላቸው የሁለቱን አገራት ሕዝቦች ሰላማዊ ግንኙነት ለማጠናከር በሁለቱ መንግሥታት መካካል የሚነሱ ልዩነቶችን በውይይትና በሰላማዊ መንገድ ለመፍታት ሱዳን ዝግጁ ናት ማለታቸውን በሱዳን የኢትዮጵያ ኤምባሲ ያገኘነው መረጃ አመላክቷል፡፡

ለፈጣን መረጃዎች፦
ፌስቡክ https://bit.ly/3Ma7QTW

ቢሮው ከመንግሥት የተሰጠውን መመሪያና ደንብ የጣሱ 8 የነዳጅ ቦቴዎችን ወረሰ

ሰኔ 26/2014 (ዋልታ) የአዲስ አበባ ከተማ አስተዳደር ንግድ ቢሮ ከመንግሥት የተሰጠውን መመሪያና ደንብ ችላ በማለት ከሕግ ውጪ ነዳጅ የጫኑ ስምንት የነዳጅ ቦቴዎች መውረሱን አስታወቀ፡፡

ሆን ብለው የነዳጅ እጥረት እንዲከሰትና ከመንግሥት የተሰጠውን መመሪያና ደንብ ችላ በማለት ከሕግ ውጪ ነዳጅ የጫኑ ቦቴዎች ወደ ከተማ እንዳይገቡ ያደረጉ ስምንት የነዳጅ ካምፓኒዎች ቦቴዎች በዛሬው እለት በፀጥታ ኃይሎችና በኅብረተሰቡ ጥቆማ ተወርሰዋል፡፡

የተወረሰው ነዳጅም በነዳጅ ማደያዎች በኩል እንዲከፋፈል ማድረጉን ቢሮው አስታውቋል።

የአዲስ አበባ ከተማ አስተዳደር ንግድ ቢሮ ምክትል ኃላፊ መስፍን አሰፋ ሕግ አክብረው በማይሰሩና በትክክል ስራቸውን በማይወጡ የነዳጅ ካምፓኒዎች ላይ የሚወሰደው እርምጃ ተጠናክሮ ይቀጥላል ማለታቸውን ከቢሮው ያገኘነው መረጃ ያመላክታል፡፡

ለፈጣን መረጃዎች፦
ፌስቡክ https://bit.ly/3Ma7QTW

ጠ/ሚ ዐቢይ መሰናክሎች የዕድገት እና የመሻሻል ዕድሎች ናቸው አሉ

ሰኔ 27/2014 (ዋልታ) በመንገዳችን ላይ የሚያጋጥሙንን ችግሮች ተቋቁመን ማለፍ ከቻልን መሰናክሎች የዕድገት እና የመሻሻል ዕድሎች ናቸው ሲሉ ጠቅላይ ሚኒስትር ዐቢይ አሕመድ ገለፁ።

ጠቅላይ ሚስትሩ በማኅበራዊ ትስስር ገፃቸው ላይ ባሰፈሩት መልዕክት በተለያዩ ችግሮች ውስጥ ባለፍንባቸው ጊዜያት ጎን ለጎን በጎ ነገሮችንም መፍጠር ችለናል ብለዋል።

የተለያዩ መሰናክሎችን በመቋቋም ጭምር በኢትዮጵያ እየተከናወኑ ያሉ ሜጋ ፕሮጀክቶች የጠንካራ ሥራ ውጤቶች ናቸው ሲሉም አክለዋል።

ፕሮጀክቶቹ የበለፀገች ኢትዮጵያን እውን ለማድረግ የተሰነቀው ራዕይ ማሳያ ምልክቶች ናቸውም ነው ያሉት።

ለፈጣን መረጃዎች፦
ፌስቡክ https://bit.ly/3Ma7QTW

ኢንስቲትዩቱ በአንዳንድ አካባቢዎች ከባድ ዝናብና ቅጽበታዊ ጎርፍ ሊከሰት እንደሚችል አሳሰበ

ሰኔ 27/2014 (ዋልታ) የክረምት ዝናብ ተጠቃሚ በሆኑ አንዳንድ አካባቢዎች ላይ እርጥበት አዘል አየር በአጭር ጊዜ ተጠናክሮ በሚቀጥሉት ቀናት ከባድ ዝናብ በመፍጠር ቅጽበታዊ ጎርፍ ሊያስከትል ስለሚችል ኅብረተሰቡ ጥንቃቄ እንዲያደርግ የኢትዮጵያ ሜቲዎሮሎጂ ኢንስቲትዩት አሳሰበ።

በኢንስቲትዩቱ የአየር ሁኔታና የአየር ጸባይ ትንበያ ዳይሬክተር ጫሊ ደበሌ እንደገለጹት ከደቡባዊ ንፍቀ ክበብ ወደ ኢትዮጵያ የሚገባው እርጥበት አዘል አየር ካለፉት ሳምንታት በበለጠ በቀጣዮቹ ሳምንታት ሊጠናከር እንደሚችል ትንበያዎች ያሳያሉ።

በዚህም የጎርፍ አደጋ ሥጋት ያለባቸው አካባቢዎች ላይ አደጋ እንዳይፈጠር ከወዲሁ የመከላከል ሥራ ማከናወን እንደሚገባ አስገንዝበዋል።

በተለይ ለጎርፍ አደጋ ተጋላጭ በሆኑ ወንዞችና ተዳፋታማ አካባቢዎች የሚገኙ የኅብረተሰብ ክፍሎች የተጠናከረ የጥንቃቄ እርምጃ ሊወስዱ እንደሚገባም አሳስበዋል።

በተለይ በከፍተኛ ቦታዎችና፣ በደጋ አካባቢ የሚዘንበው ዝናብ በዝቅተኛ አካባቢዎች ላይ የጎርፍ አደጋ ሊያስከትል ስለሚችል አስፈላጊውን ጥንቃቄ ማድረግ እንደሚገባ ገልጸዋል።
https://www.facebook.com/489211707826282/posts/pfbid02WehphEmXX2bTU9SHHVRWH9QNTc6r88p7VDwA7a1rbm3sdttdvKbzyYjPP3SwDovSl/?app=fbl