⚡️Артыста ансамбля арыштавалі на 15 сутак

Артыста беларускага ансамбля 33-гадовага Дзмітрыя Куксу затрымалі 6 жніўня. На момант пачатку судовага паседжання 9 жніўня ў Дзмітрыя ўжо скончыўся 72-гадзінны тэрмін з моманту затрымання, але суддзя не звярнула на гэта ўвагі.

Справу артыста разглядала суддзя Фрунзенскага раёна Юлія Чыж.

У Фрунзенскім РУУСе на мужчыну склалі пратакол па арт. 24.3 КаАП "за адмову адчыніць дзверы ў жылое памяшканне для правядзення ператрусу". Але Дзмітрый сцвярджае, што яго затрымалі на вуліцы каля метро Спартыўная, заламалі рукі, надзелі адразу кайданкі, а ўжо потым адвезлі для ператрусу. Там, па словах мужчыны, яны самастойна яго ключамі адчынілі дзверы, пакуль сам Кукса быў у кайданках.

У выніку, суддзя Чыж пакарала артыста 15-сутачным арыштам.

❗️За дзіцячы малюнак на акне мінчука арыштавалі на 12 сутак

У судзе Фрунзенскага раёна 10 жніўня разглядзелі справу 41-гадовага Дзмітрыя Бубенкі. Яго затрымалі ўвечары 9 жніўня дома за "несанкцыянаванае пікетаванне шляхам размяшчэння белага аркуша паперы на акне". Менавіта так пазначылі міліцыянты ў пратаколе дзіцячы малюнак.

Дзмітрый растлумачыў суддзі Наталлі Бугук, што на вокнах вісяць дзіцячыя малюнкі, якія павесілі амаль чатыры гады таму. Па яго словах, яны абараняюць расаду жонкі ад сонца. Суддзю цікавіла, чаму ён не атрымаў на гэта дазвол ад уладаў.

У выніку, суддзя Бугук палічыла Бубенку вінаватым па арт. 24.23 КаАП і арыштавала яго на 12 сутак.

📸На фота малюнак, за які Дзмітрыя пакаралі арыштам.

⚡️Супрацоўніка «Нафтана» арыштавалі за БЧБ-налепку на бамперы машыны

36-гадовага спурацоўніка «Нафтана» Сяргея Хвасцёнка затрымалі 9 жніўня ў Мінску каля ўніверсама «Цэнтральны» на пр. Незалежнасці. У Сяргея зламалася машына, таму ён спыніўся на дарозе. Пабачыўшы гэта, да яго пад’ехалі супрацоўнікі ДАІ і прапанавалі дапамогу. Але на бамперы супрацоўнікі заўважылі бел-чырвона-белую налепку, якая, па словах Сяргея, залеплівала дзірку на бамперы каля пяці гадоў. Таму замест дапамогі мужчыну адвезлі ў Цэнтральны РУУС, дзе склалі пратакол па арт. 24.23 КаАП.

Справу Хвасцёнкі 10 жніўня разглядзеў суддзя Цэнтральнага раёна Дзмітрый Карсюк.

Сведка-міліцыянт «Аляксандраў» распавёў, што затрымліваў Сяргея разам з супацоўнікамі АМАПу. Міліцыянт сцвярджаў, што Хвасцёнак адразу заявіў, што такім чынам выказвае сваі палітычныя погляды, але сам мужчына гэта адмаўляе.

⚖️Вынікам суда стаў 15-сутачны арышт.

⚡️Вялізарныя суткі і штрафы: як судзілі затрыманых за ўскладанне кветак каля мемарыялу Тарайкоўскага

У судзе Фрунзенскага раёна 11 жніўня разглядзелі справы трох мінчукоў. Іх затрымалі каля мемарыялу Тарайкоўскага 10 жніўня — на гадавіну гібелі Аляксандра.

⚖️Першай учора затрымалі 40-гадовую Наталлю Шэкаву. У жанчыны ёсць непаўнагадовае дзіця, але замест трох гадзін, як таго патрабуе закон, яе пратрымалі за кратамі ноч да суда. Падставай для затрымання стала «несанкцыянаванае пікетаванне шляхам ускладаня кветак» каля народнага мемарыялу. Суддзі Чыж Наталля распавяла, што ў яе не было ніякіх палітычных матываў, а толькі — чалавечыя. Па словах жанчыны, яна гуляла каля месца гібелі Тарайкоўскага, успомніла падзеі мінулага года і вырашыла пакласці кветкі на тым месцы. Суддзя Юлія Чыж расцаніла гэты учынак, як пікетаванне і пакарала жанчыну па арт. 24.23 КаАП штрафам у памеры 2900 рублёў (100 базавых велічыняў).

⚖️На тым жа месцы каля 17:03 затрымалі 20-гадовага Аляксея Латошу. У віну хлопцу ставіцца таксама ўскладанне кветак каля мемарыялу. Аляксей пацвердзіў, што ў памяць аб загінулым уваткнуў кветкі ў слуп. Але адрузу пасля гэтага яго затрымалі людзі ў цывільным. Суддзя Чыж цікавілася, чаму ён зрабіў гэта менавіта каля метро, а не могілках. Хлопец дадаў, што ў яго ёсць малое дзіцё, таму ён шкадуе аб учыненым і хоча быць зараз з імі, а не за кратамі. Вынік — 13 сутак.

⚖️Каля 19:55 каля мемарыялу затрымалі 23-гадовага Кастуся Цаўлоўскага. Прычына — ускладанне адной квекі каля выхаду з метро. Сваю віну хлопец адмаўляе, бо не ведаў, што ўскладанне кветак расцэньваецца, як «несанкцыянаванае пікетаванне». Ён патлумачыў, што зрабіў гэта, каб ушанаваць памяць об загінулым, а не для выказвання сваіх палітычных ітарэсаў. Суддзя зноў запытала, чаму Кастусь зрабіў гэта не на могілках. У выніку, суддзя Юлія Чыж пакарала хлопца па арт. 24.23 КаАП 30-сутачным арыштам.

⚡️Мінчука затрымалі падчас спецаперацыі сілавікоў па абароне працаўнікоў ЖРЭА. Суддзя спыніў адну са справаў пасля прагляду відэа з месца затрымання

37-гадовага Дзмітрыя Панчанку затрымалі раніцай 7 жніўня падчас прабежкі. Каля 9:50 у Мінску па вуліцы Бяды ў міліцыянтаў праходзіла спецаперацыя па абароне працаўнікоў ЖРЭА, якія ў гэты момант зразалі белыя стужкі з плоту. Згодна з пратаколам па арт. 24.23 КаАП міма іх прабягаў Дзмітрый і выкрыкнуў лозунг «Жыве Беларусь». Гэта заўважылі супрацоўнікі міліцыі, селі ў службовы аўтамабіль і паехалі затрымліваць Панчанку. Яны спыніліся, выйшлі да яго і прапанавалі сесці з імі ў машыну, але, па словах міліцыянта, Дзмітрый адмовіўся, упіраўся нагамі і нават пачаў уцякаць. Міліцыянты яго дагналі, надзелі кайданкі, адвезлі ў Савецкі РУУС і склалі два пратаколы: па арт. 24.23 КаАП і арт. 24.3 КаАП (непадпарадкаванне супрацоўнікам міліцыі).

Сам Панчанка сцвярджае, што штодзённа бегае па таму маршруту. Па яго словах, 7 жніўня ён бег у слухаўках, калі перад ім спынілася машына, з якой выйшлі два міліцыянты. Дзмітрый дастаў слухаўкі і запытаў, што здарылася. Міліцыянты пацікавіліся, што ён крычаў, а потым надзелі кайданкі і павялі ў машыну.

Суд над мужчынам пачаўся 9 жніўня ў судзе Савецкага раёна. У матэрыялах справы было шмат памылак, а сведкі блыталіся ў паказаннях. У справе нават адсутнічаў пратакол асабістага агляду пры тым, што ў Дзмітрыя забралі тэлефон і слухаўкі. Чаму гэта не пазначылі ў пратаколе — невядома.

⚖️Суддзя Сяргей Шаціла задаволіў хадайніцтва адвакаткі на прагляд відэакамер з месца затрымання Панчанкі, таму ў справе быў абвешчаны перапынак. На наступны дзень відэа з трох камер былі дасканала даследаваныя. У выніку, суддзя Шаціла пасля прагляду пастанавіў спыніць справу па арт. 24.3 КаАП праз недаказанасць віны, а па арт. 24.23 КаАП прызнаць вінаватым Панчанку і аштрафаваць на 2900 рублёў (100 базавых).

⚡️13 920 рублёў і 397 сутак: Як мінскія суддзі адзначылі гадавіну пачатку пратэстаў

На працягу гэтага тыдня ў Мінску актыўна судзілі беларусаў і беларусак, затрыманых у знакавыя для Беларусі дні — гадавіну пачатку мірных акцый пратэсту. На пратэстоўцаў у РУУСах складалі пратаколы за «непадпарадкаванне супрацоўнікам міліцыі», «дробнае хуліганства» і «ўдзел у масавых мерапрыемствах», а потым беларускія суддзі каралі іх штрафамі і суткамі. 

🌿«Вясна назірае» распавядае, за што на самой справе судзілі мінчукоў.

⚡️Збіццё, прусакі і начлег на вуліцы ў гразі: умовы ўтрымання на Акрэсціна ў ліпені і жніўні

Праваабаронцам "Вясны" працягвае паступаць інфармацыя пра нечалавечыя і жудасныя ўмовы ўтрымання на Акрэсціна. Супрацоўнікі ЦІПа працягваюць збіваць затрыманых, забіраць у іх грошы, на скаргі аб прусаках у камерах не рэагаваць, а тых, хто захварэў на COVID-19 не лячыць і не ізаляваць ад здаровых людзей.

"Вясна назірае" пагутарыла з чатырма людзьмі, якія ў розны час знаходзіліся ў камерах на Акрэсціна з ліпеня па жнівень. Суразмоўцы распавялі пра мясцовую "медыцынскую дапамогу", начлег у дворыку ЦІПа, мясцовы абмен валют і збіццё мужчын:

🔹«Людзей з высокай тэмпературай ізалююць у карцэр. Адна дзяўчынка правяла ў карцэры чатыры дні, а ёй нават не адшпілілі ложак ад сцяны»;

🔹«Супрацоўнікі маглі нават выкінуць усе рэчы з тумбачкі, а аднойчы вывернулі смецце з вядра на рэчы арыштаваных»;

🔹«Хлопец паскардзіўся, што не адчувае пахі, а лекарка яму рэзка нашатыру дала панюхаць»;

🔹 «Усю камеру вывелі і замкнулі на вечар і ноч у шпацырным дворыку, таму спаць прыходзілася на бетоне ў гразі і холадзе».

📲Чытаць цалкам па спасылцы.

⚡️Гомельскага актывіста Іллю Міронава арыштавалі на 25 сутак

Суддзя Віктар Казачок пакараў актывіста Іллю Міронава 25-сутачным арыштам па ч.3 арт. 24.23 КаАП. Іллю асудзілі за надпіс на майцы "Пішыце лісты", якую міліцыянты расцанілі як несанкцыянаванае пікетаванне.

⚡️Шахцёра Алега Кудзёлку пакаралі 10-сутачным арыштам

Як паведамляе «Новы Час», салігорскага шахцёра Алега Кудзёлку з 4РУ, які ў верасьні 2020 года адмовіўся паднімацца на паверхню, сёння арыштавалі на 10 сутак па адміністрацыйнай справе.

Алега затрымалі ўчора, калі ён прыехаў для абмена праў у ДАІ.

Крыніца: @novychas

⚡️Анархіста Іллю Сянько ўжо другі раз запар пакаралі 15-сутачным арыштам. На судзе ён заявіў пра збіццё супрацоўнікамі ГУБАЗіКа

Іллю Сянько арыштавалі яшчэ 4 жніўня падчас «зачысткі» актывістаў анархісцкга руху. Тады хлопца ў судзе Кастрычніцкага раёна пакаралі 15-сутачным арыштам па арт. 24.3 КаАП нібыта за непадпарадкаванне супрацоўнікам міліцыі. Але пасля арышту Ілля на волю так і не выйшаў. На хлопца склалі новы пратакол, але ўжо па арт. 19.1 КаАП (дробнае хуліганства).

Згодна з новым пратаколам, Ілля «4 жніўня гучна крычаў, нецэнзурна лаяўся, на заўвагі міліцыянтаў не рэагаваў». Справу Сянько разглядзелі 20 жніўня ў судзе Кастрычніцкага раёна. Актывіст адмовіўся на судзе даваць паказанні, але заявіў пра збіццё і пагрозы з боку ГУБАЗіКа. Па яго словах, праз пару дзён пасля затрымання да яго прыйшлі супрацоўнікі ГУБАЗіКа, збівалі, пагражалі і нават адрэзалі хлопцу дрэды, прымушаючы прызнаць віну і даць патрэбныя ім паказанні. Таксама Ілля сказаў, што сядзіць у чатырохмеснай камеры, у якой адразу знаходзяцца 20 чалавек. Суддзя Кастрычніцкага раёна Наталля Яроўская адмовіла хлопцу ў выкліку супрацоўніка ГУБАЗіКа ў якасці сведкі і нават не звярнула ўвагі на заяву Іллі пра збіццё.

⚖️Акрамя гэтага, справу Сянько сёння не ўнеслі ў расклад суда. У выніку, суддзя прызнала актывіста вінаватым і арыштавала на 15 сутак. Агулам Ілля правядзе за кратамі 30 сутак.

⚡️Былога артыста ансамблю «Харошкі» зноў пакаралі суткамі

Сёння ў судзе Фрунзенскага раёна разглядзелі справу былога артыста ансамблю «Харошкі» Дзмітрыя Кукса. 21 жніўня ён павінен быў выйсці на волю пасля 15-сутачнага арышту за «непадпарадкаванне супрацоўнікам міліцыі», але адразу пасля вызвалення сілавікі пасадзілі яго ў цёмна-сіні мікрааўтобус і звезлі ў невядомым кірунку.

Справу Дзмітрыя 23 жніўня разглядзела суддзя Марыя Ярохіна. На гэты раз на мужчыну склалі пратакол па арт. 19.1 КаАП (дробнае хуліганства), згодна з якім, Кукс «паводзіў сябе агрэсіўна і задзірліва, гучна крычаў, нецэнзурна лаяўся, на заўвагі не рэагаваў, выбіў з рук Загора А. І. тэчку з дакументамі, чым парушыў грамадскі парадак і спакой грамадзян».

Сведка-міліцыянт на судзе распавёў, што па загаду кіраўніцтва яму трэба было сустрэць Дзмітрыя на выхадзе з ізалятару, адвезці ў РУУС і правесці з ім гутарку. Па выхадзе Кукс «пагадзіўся на патрабаванні» міліцыянтаў і прайшоў з імі ў машыну. Па дарозе ў РУУС у мужчыны запытвалі, ці ведае ён тых, хто ўдзельнічае ў несанкцыянаваных масавых мерапрыемствах. Па словах міліцыянтаў, Дзмітрый наўпрост у машыне пачаў весці сябе агрэсіўна, а калі выходзіў, то выбіў тэчку з рук міліцыянта.

Адвакатка Дзмітрыя звярнула ўвагу суддзі на тое, што складу «правапарушэння» няма, бо службовая машына міліцыянтаў не з’яўляецца грамадскім месцам. Таксама на судзе эмацыйна выступіла і маці Дзмітрыя, якая хвалюецца за здароўе сына, бо ён хварэе на алергію і цяжка яе пераносіць. Сам Кукс не памятае, каб агрэсіўна сябе паводзіў, але дадаў, што калі і здзейсніў гэта, то з-за яго маральнага, эмацыйнага і фізічнага стана, які пагоршыўся пасля мінулых «сутак».

⚖️У выніку, суддзя Ярохіна пакарала Кукса 12-сутачным арыштам.

🔹Нагадаем, раней праўладныя СМІ пісалі, што Дзмітрый «арганізаваў вытворчасць незарэгістраваных газет і экстрэмісцкіх матэрыялаў у сябе дома». Таксама з ім запісалі пакаяльнае відэа.

❗️«Як “Пагоня“ звязана з хрысціянствам?» Мінчука пакаралі 14-сутачным арыштам за налепку з Пагоняй на машыне

43-гадовага Дзяніса Ільінчыка затрымалі 24 жніўня. Падставай для яго затрымання стала налепка з Пагоняй на задніх дзвярах аўтамабіля. За гэта ў Цэнтральным РУУСе супраць Дзяніса склалі пратакол па арт. 24.23 КаАП. Сёння, 26 жніўня, у судзе Цэнтральнага раёна справу Ільінчыка разглядзеў суддзя Дзмітрый Карсюк.

Па словах Дзяніса, на машыне акрамя налепкі з Пагоняй, ёсць яшчэ і налепка з хрысціянскім крыжом, бо ён верыючы чалавек. Мужчына кажа, што гэтыя налепкі размешчаны на машыне ўжо амаль 5 гадоў. Імі Дзяніс не выражае свае палітычныя погляды, а толькі веравызнанне. Але суддзя Карсюк не разумеў, «як “Пагоня“ звязана з хрысціянствам». Дзяніс адказаў, што «ВКЛ — гэта цэнтр хрысціянства, а акрамя вершніка на гербе ёсць крыж».

Акрамя гэтага, Дзяніс на судзе абурыўся паказаннямі сведкі-міліцыянта, які сцвярджаў, што затрыманне адбылося каля 12:00. Але мужчына сцвярджае, што 24 жніўня ён прыехаў у ДАІ, каб аплаціць штраф за няправільную паркоўку. Штраф аплаціў ён толькі каля 15:00, на што звярнуў увагу сведкі. Праз некаторы час супрацоўнікі ДАІ заўважылі на машыне налепку, самастойна яе знішчылі, а Дзянісу прапанавалі праехаць у РУУС для гутаркі, дзе яго і затрымалі.

⚖️У выніку, Суддзя Карсюк прызнаў Дзяніса Ільінчыка вінаватым па арт. 24.23 КаАП і арыштаваў яго на 14 сутак.

❗️Мінчука арыштавалі на 15 сутак за размову з АМАПаўцамі на Зыбіцкай

Сёння каля 12:30 на вуліцы Зыбіцкай 38-гадовы Максім Пятровіч набываў ежу. Каля яго стаялі супрацоўнікі АМАПу ў службовай форме, з якімі Максім вырашыў паразмаўляць. У выніку, размова скончылася затрыманнем Пятровіча. Але пратакол па арт. 24.3 КаАП на мужчыну склалі за непадпарадкаванне супрацоўнікам міліцыі на тэрыторыі Цэнтральнага РУУСа. Па пратаколе, Максім «быў затрыманы па падазрэнні ва ўдзеле ў несанкцыянаваных масавых мерапрыемствах, адмовіўся выйсці са службовага аўтамабіля, упіраўся, чым аказаў непадпарадкаванне міліцыянту».

Амаль праз тры гадзіны справу Максіма разглядзеў суддзя Цэнтральнага раёна Дзмітрый Карсюк. На пытанне суддзі наконт меркаванай прычыны затрымання, мужчына адказаў: «Пакрыўдзіліся, напэўна, можа я ім не тое што сказаў».

⚖️Суддзя Карсюк пакараў Максіма Пятровіча 15-сутачным арыштам.

‼️Web-дызайнерку затрымалі пасля ператрусу, дапыталі ў ГУБАЗіКу, а арыштавалі за непадпарадкаванне ўчастковаму РУУСа

У сераду, 1 верасня, пасля ператрусу дома была затрыманая 26-гадовая Анастасія Рокач — IT-дызайнерка, былая супрацоўніца кампаніі «Wargaming». У судзе Цэнтральнага раёна 3 верасня справу Анастасіі разглядзела суддзя Вікторыя Шабуня.

Па словах дзяўчыны, каля 14:00 яны з мужам былі дома, працавалі. Да іх пагрукаліся трое супрацоўнікаў міліцыі, але пасведчанне паказаў толькі адзін з іх. Дома пасля ператрусу забралі ўсю тэхніку, а Анастасію павезлі ў ГУБАЗіК на допыт, які доўжыўся каля 30 хвілін. Пасля допыту Рокач павезлі ў Цэнтральны РУУС, на тэрыторыі якога, згодна з пратаколам, яна аказала непадпарадкаванне супрацоўніку міліцыі: упіралася і чаплялася за яго адзенне. Дзяўчына кажа, што шла самастойна і нават не ведае, колькі супрацоўнікаў шлі побач, бо ёй не дазвалялі падымаць галавы. Віну сваю Анастасія адмаўляе.

Сведка-міліцыянт на судзе заявіў, што Рокач затрымалі па падазрэнні ва ўдзеле ў масавым мерапрыемстве раніцай 1 верасня. Міліцыянт сцвярджаў, што не ведае сваіх калегаў, з якімі затрымліваў Рокач, дома падчас ператрусу мужа Анастасіі не бачыў, бо не хадзіў па ўсіх пакоях (сям’я жыве ў аднапакаёвай кватэры), а непадпарадкаванне доўжылася каля хвіліны.

🤡Дыялог адваката са сведкай:
— За чыю вопратку хапалася Рокач?
— За маю.
— Ужывалі сілу да Рокач?
— Узялі за руку.
— Чаму не адлюстравалі гэта ў рапарце?
— Проста не адлюстраваў.
— Кіраўніцтва не павінна гэта ведаць па Вашаму?
— Я пісаў тое, што палічыў патрэбным.
— Яна ўпіралася нагамі ўжо ў аўтамабілі. Але ў рапарце гэтага таксама не пазначана.
— Я пісаў у рапарце тое, што лічыў патрэбным.

Муж Анастасіі Ілля Рокач — экс-следчы Цэнтральнага раёна, якія расследаваў эканамічныя і карупцыйныя справы. У снежні мінулага года Іллю аштрафавалі на 30 базавых велічыняў за БЧБ-сцяг на балконе.

⚖️Вынікам суда для Анастасіі Рокач стаў 15-сутачны арышт.

⚡️Настаўніка музычнага каледжа пакаралі 15-сутачным арыштам за «распаўсюд экстрэмісцкіх матэрыялаў»

Інфармацыя пра затрыманне настаўніка музычнага каледжа імя Глінкі 35-гадовага Аляксандра Цярэшчанку з’явілася на праўладных тэлеграм-каналах 1 верасня. Вядома, што яго затрымалі супрацоўнікі ГУБАЗіКа, а потым запісалі з Аляксандрам «пакаяльнае відэа».

Суд над настаўнікам прайшоў 3 верасня. Яго справу па арт. 19.11 КаАП («распаўсюд інфармацыйнай прадукцыі, уключанай у Рэспубліканскі спіс экстрэмісцкіх матэрыялаў») разглядзела суддзя Цэнтральнага раёна Вікторыя Шабуня. У раскладзе суда яго справы не было, таму суд фактычна прайшоў у закрытым рэжыме. У выніку, суддзя Шабуня прызнала Цярэшчанку вінаватым і пакарала яго 15-сутачным арыштам.

❗️За фота суддзі брэсцкую актывістку аштрафавалі на 87 рублёў

3 верасня падчас аглашэння прысуду па крымінальнай справе за абразу Лукашэнкі Алена Гнаўк сфатаграфавала суддзю Дзмітрыя Куроўскага. За гэтае «правапарушэнне» актывістку затрымалі ў залі суда, а ў РУУСе на жанчыну склалі пратакол па арт. 25.1 КаАП.

⚖️Сёння ў Брэсце прайшоў суд над Аленай Гнаўк. Суддзя Дзмітрый Шурын прызнаў жанчыну вінаватай ў «непаваге да суду» і аштрафаў яе на 87 рублёў (3 базавых велічыні).

⚡️Супрацоўнікаў культцэнтра “Корпус” пакаралі суткамі за непадпарадкаванне міліцыянтам

Стала вядома, што сёння ў судзе Савецкага раёна адбыліся суды над затрыманымі 2 верасня супрацоўнікамі культцэнтра “Корпус”. На дырэктара, арт-мэнеджара і ды-джэя Аляксандра Багданава ("Папу Бо"), сцэнографа Максіма Крука і арганізатарку культурных імпрэзаў Лізавету Неўмяржыцкую у Савецкім РУУСе склалі пратаколы па арт. 24.3 КаАП за непадпарадкаванне супрацоўнікам міліцыі. Іх справы пачалі разглядаць 3 верасня, але суд адправіў іх на дапрацоўку.

⚖️У выніку, 6 верасня Аляксандра Багданава і Максіма Крука арыштавалі на 10 сутак, а Лізавету Неўмяржыцкую — на 8 сутак.

Калаж: @by_culture

⚡️Затрыманых на фэсце «Аршанская бітва» пакаралі 10-сутачнымі арыштамі

У ноч з 4 на 5 верасня на фэсце «Аршанская бітва» былі затрыманыя адзін з арганізатараў фэста — Юрка Копцік, а таксама Ігар Уласенка і Васіль Мірановіч. Сёння стала вядома, што іх усіх прызналі вінаватымі ва ўдзеле ў несанкцыянаваным масавым мерапрыемстве і арыштавалі на 10 сутак.

❗️Праваабаронцы «Вясны» працягваюць фіксаваць факты жорсткіх і бесчалавечных умоваў утрымання для затрыманых па «народных» артыкулах. «Вясна назірае» паразмаўляла з Дзмітрыем (імя зменена ў мэтах бяспекі), які адбываў 15-сутачны арышт у канцы жніўня ў ЦІП на Акрэсціна. Ён распавёў, пра ўмовы ўтрымання і ціск на «палітычных».

Цёплыя рэчы не перадаюць нават тым, каго затрымалі яшчэ ў летняй вопратцы

Сітуацыя ў ізалятары на Акрэсціна застаецца стабільна дрэннай на працягу года. «Палітычным» не выдаюць ні матрацаў, ні бялізны, а таксама не выводзяць на шпацыр і ў душ. Людзям, якіх затрымалі яшчэ падчас спякоты ў летняй вопратцы, не перадаюць цёплыя рэчы. Камеры ўсё яшчэ перапоўненыя: у чатырохмесных камерах сядзіць па 16-20 чалавек. Праз недахоп спальных месцаў большасці затрыманых даводзіцца спаць на драўлянай падлозе. Пастаянны скразняк і холад спрыяюць захворванню арыштаваных. На думку Дзмітрыя, большасць затрыманых у камерах хварэлі каранавірусам, але належнае лячэнне і ізаляцыю адміністрацыя не забяспечвала. Пры гэтым, лекарка ў камеру прыходзіць да зняволеных толькі пры ранішнім абходзе. З лекавых сродкаў затрыманым з сімптомамі COVID‑19 выдаюцца толькі парацэтамол, анальгін, ібупрафен і валідол ад болю ў горле.

Аплату за харчаванне забіраюць з гаманца, а перадачы аддаюць толькі «перазатрыманым»

Грошы з асабістых рэчаў у затрыманых па-ранейшаму забіраюць адразу, як яны трапляюць у ЦІП на Акрэсціна. Пасля вызваленням чалавеку на рукі выдаюць чэк за аплату за харчаванне за ўвесь тэрмін арышту, у якім ужо вылічылі канфіскаваную суму. Перадачы на Акрэсціна супрацоўнікі прымаюць, аднак да затрыманых яны так і не даходзяць. Часам з перадач і асабістых рэчаў арыштаваным могуць перадаць лекі. Таксама перадачы «дастаюцца» тым, на каго складаюць новыя адміністрацыйныя пратаколы. Пасля «вызвалення» чалавека вязуць у РУУС, каб скласці новы пратакол, таму арыштаваным аддаюць перадачы, як пры вызваленні, але з гэтымі перадачамі яны потым зноў вяртаюцца на Акрэсціна. Дзмірый распавёў, што калі сваякі затрыманых паспявалі за перадаць дзве перадачы, то першую не аддавалі нават пасля вызвалення, а з другой часткова знікалі рэчы і прадукты.

«Хотите беспредел? Вот вам беспредел»

Акрамя гэтага, у якасці дадатковага ціску на «палітычных» у камеры падсаджваюць бяздомных, у якіх, у тым ліку, ёсць вошы. Таксама арыштаваных часта забіраюць на допыты: супрацоўнік РУУС забірае з камеры арыштанта, а часам можа і некалькі разоў. У іх запытваюць асабістыя дадзеныя, якія і так пазначаны ў матэрыялах справы. У 2:00 і ў 4:00 ночы праходзіць так званы «шмон» і «пераклічка», калі трэба назваць свае дадзеныя. Хлопец узгадвае, што пасля таго, як з камеры ў іх забралі ўсе асабістыя рэчы, затрыманыя заявілі супрацоўнікам ЦІПа, што гэта «парушэнне іх правоў». У адказ на гэта супрацоўнікі вылілі ім у камеру вядро «хлоркі» са словамі: «Хотите беспредел? Вот вам беспредел». Таксама супрацоўнікі пагражалі, што калі скаргі ад арыштаваных не спыняцца, то ўмовы рэзка пагоршацца.

❗️За выкрык лозунгу "Жыве Беларусь" у тралейбусе мінчука пакаралі 30-сутачным арыштам

61-гадовага Міхаіла Дубіну 8 верасня затрымалі на прыпынку грамадскага транспарту за лозунг "Жыве Беларусь" у тралейбусе. "Неабыякавы грамадзянін" паскардзіўся ў міліцыю на тое, што "невядомы мужчына выходзіў і выкрыкваў лозунг". Таму па выхадзе з транспарту Міхаіла адразу затрымалі міліцыянты. У Фрунзенскім РУУСе на мужчыну склалі пратакол па арт. 24.23 КаАП за несанкцыянаванае пікетаванне.

Сёння справу Дубіны разглядзела суддзя Марыя Ярохіна. Міхаіл сцвярджае, што ў тралейбусе паспрачаўся з двума мужчынамі на шакаладку, што выкрыкне "Жыве Беларусь". У выніку, аказалася, што гэтыя мужчыны – міліцыянты ў цывільным.

⚖Суддзя Ярохіна прызнала Міхаіла вінаватым і пакарала яго 30-сутачным арыштам.