💔Пенсіянера Васіля Дземідовіча праз тыдзень пачнуць судзіць ужо ў сёмы раз

У Старых Дарогах 19 кастрычніка распачнецца суд над 71-гадовым палітзняволеным Васілём Дземідовічам. Яго абвінавачваюць паводле арт. 369 КК (абраза прадстаўніка ўлады) і арт. 368 КК (абраза Лукашэнкі). Справу будзе разглядаць суддзя Наталля Зык.

Гэта ўжо сёмы суд над пенсіянерам. Агулам яго асудзілі на 7 гадоў пазбаўлення волі, пры гэтым вынік апошніх двух судоў пакуль невядомы. У зняволенні Васіля Іванавіча ўтрымліваюць ужо амаль год і чатыры месяцы.

У сувязі з тым, што палітзняволенага ўнеслі ў «спіс тэрарыстаў», яму нельга рабіць грашовыя пераводы. Апроч гэтага, у Васіля няма сваякоў якія маглі б яго падтрымаць. Адзначым, што за апошні год пенсіянер перажыў дзясяткі этапаў. Этапуюць палітвязняў у цяжкіх умовах — таму гэта пакідае вельмі дрэнны адбітак на здароўі Васіля.

(Не) апошняе слова Васіля Іванавіча на адным з судоў

💵Фінансавая дапамога рэпрэсаванай сям'і беларусаў з двума дзецьмі

«У 2022 годзе да нас дадому прыйшлі з КДБ. Былі ператрусы і допыты ў межах крымінальнай справы. Праз пагрозы жыццю і здароўю, праз пагрозы турэмнага зняволення па палітычных матывах мы былі вымушаныя пакінуць наш дом.

Прайшоўшы разам з маленькімі дзецьмі праз пункты першаснага прыёму і лагер уцекачоў, мы сутыкнуліся з парушэннем нашых правоў і бесчалавечным стаўленнем да нашых дзяцей. І цяпер мы вымушаныя абараняць нашыя правы і правы нашых дзяцей у разнастайных інстанцыях, у тым ліку ў нацыянальных судах і ў Еўрапейскім Судзе па правах чалавека.

На жаль, чым далей зацягваецца гэтая гісторыя, тым мацней станавіцца дыскрымінацыя. На дадзены момант нас наўпрост пакінулі без сродкаў на існаванне без тлумачэння прычын і афіцыйных апавяшчэнняў. Пры гэтым нашы пашпарты і пашпарты дзяцей былі канфіскаваныя ў першасным пункце прыёму бежанцаў.

Мы вельмі асцерагаемся, што будзем незаконна дэпартаваныя назад у Беларусь».

Падтрымаць сям'ю на BYSOL

Сілавікі затрымалі яшчэ адну меркаваную фігурантку «карагоднай справы»

Як паведамляе СК, гэта 50-гадовая жыхарка Брэста — яе ідэнтыфікавалі па відэазапісах. Паведамляецца, што яна нібыта «прымала актыўны ўдзел у групавых дзеяннях, якія парушаюць грамадскі парадак, выбягала на дарогу, танчыла і здымала тое, што адбывалася, на мабільны тэлефон».

Акрамя гэтага, жанчына была прыцягнута і да адміністрацыйнай адказнасці за распаўсюд экстрэмісцкіх матэрыялаў.

Жыхарцы Брэста прад'яўлена абвінавачанне паводле «народнага» арт. 342 КК. Па хадайніцтве следства, у дачыненні да жанчыны з санкцыі пракурора прыменена мера стрымання ў выглядзе ўзяцця пад варту. Расследаванне справы завершана, матэрыялы перададзены пракурору для накіравання ў суд.

«Справа карагодаў» — крымінальная справа, узбуджаная па падзеях 13 верасня 2020 года ў Брэсце, калі пратэстоўцы выйшлі на праезную частку, а іх разагнаў вадамёт. Агулам па справе былі асуджаныя больш за 130 чалавек.

🇺🇳Да 30 лістапада місія па Беларусі пры УВКПЧ ААН збірае інфармацыю аб парушэннях правоў чалавека ў Беларусі

ААН цікавяць усе выпадкі парушэнняў, пачынаючы з траўня 2020 года. Каб распавесці сваю гісторыю, трэба запоўніць невялічкую анкетку на рускай ці ангельскай мове.

Місія па Беларусі збірае інфармацыю пра стан з правамі чалавека ў Беларусі і справаздачыцца перад міжнароднай супольнасцю. Бачнасць праблемы рэпрэсій у Беларусі зніжаецца, таму важна працягваць распавядасць пра выпадкі парушэнняў правоў чалавека, якія не скончыліся ў 2020 годзе.

Дадатковая ўвага дадаецца гендэрнаму аспекту такіх парушэнняў — сюды падыходзіць, напрыклад, не выдача гігіенічных пракладак падчас менструацыі альбо дадатковы ціск на мужчын праз не адпавяданне мускулінным нормам.

Нашыя юрысты дапамогуць вам распавесці сваю гісторыю рэпрэсій. Звяртайцеся на @zvarot96 ці на zvarot@spring96.org

📍Палітзняволеныя Рыта Зотава і Мікіта Хількевіч выйшлі на волю

Іх затрымалі па даносе 9 жніўня 2021 года за расклейванне пратэсных налепак і ўлётак у Чачэрску. Але пазней іх адпусцілі пад падпіску аб нявыездзе. 28 снежня 2021 года іх зноў затрымалі і абвінавацілі паводле  арт. 341 КК (апаганьванне будынкаў і псаванне маёмасці) і арт. 342 КК (актыўны ўдзел у дзеяннях, якія груба парушаюць грамадскі парадак).

У сакавіку 2022 года суд прызначыў ім па два гады калоніі. Рыта адбывала тэрмін ў гомельскай жаночай калоніі № 4, а Мікіта — у івацэвіцкай калоніі № 22. Па інфармацыі "Гомельскай Вясны", яны цалкам адбылі тэрміны і выйшлі на волю.

📸Падчас Канферэнцыі АБСЕ у Варшаве прайшла выстава, прысвечаная палітзняволеным адвакатам

У межах Канферэнцыі АБСЕ па чалавечым вымярэнні прайшла адкрытая выстава "Беларускія адвакаты ў турме".

На выставе былі прадстаўленыя партрэты Максіма Знака, Аляксандра Данілевіча, Віталя Брагінца, Анастасіі Лазарэнкі, Юліі Юргілевіч, Аляксея Бародкі.

Адрасы для падтрымкі палітзняволеных можна знайсці ў іх профілях па спасылках.

У Магілёве затрымалі Алега Дзьячкова

Паводле інфармацыі, атрыманай @nashaniva, магілёўскага экскурсавода і актывіста Алега Дзьячкова затрымалі раніцай 9 кастрычніка ў ягонай кватэры, дзе правялі вобшук.

У выніку Дзьячкоў атрымаў 10 сутак арышту.

З'явілася інфармацыя пра затрыманні ў Слоніме

Паводле інфармацыі @Grodno_grab, 12 кастрычніка супрацоўнікамі АМАПа ў Слоніме былі затрыманыя Руслан і Цімур Лагуцікі. Прычына затрымання высвятляецца.

UPD. Руслан — блогер-дальнабойшчык. Ён мае ўласны YouTube-канал Engine BLR, на які падпісаныя амаль 30 тысяч чалавек.

🗣Паведаміць пра затрыманне
⚖️Атрымаць бясплатную юрыдычную кансультацыю
📝Абскардзіць пастанову суда
✍️Звязацца з журналістамі «Вясны»

Сілавікі прапануюць адкупляцца за данаты і тлумачаць механізм. Што пра гэту схему і гарантыі кажа юрыст «Вясны» Павел Сапелка?

Павел Сапелка кажа, што ў законе ёсць нормы, якія вызваляюць ад крымінальнай адказнасці па абвінавачванні ў экстрэмісцкай дзейнасці (артыкул 361-2 КК). Яны прадугледжваюць дзейнае раскаянне і добраахвотную кампенсацыю шкоды.

Юрыст заўважае, што чалавек, які «добраахвотна» прызнаўся ў «фінансаванні экстрэмісцкага фармавання» мусіць пільнаваць, каб вызваленне ад крымінальнай адказнасці належным чынам было аформлена. Пастанова павінна выносіцца органам, які вядзе крымінальны працэс — пракурорам ці следчым са згоды пракурора.

Кампенсацыя шкоды, іншыя выплаты павінны быць зробленыя толькі на рахунак органа, які вядзе крымінальны працэс і ніякія іншыя. Па словах юрыста, выкананне такіх умоваў можа стаць гарантыяй таго, што да гэтага пытання вяртацца не будуць.

Крыніца: Наша Ніва

💵Рэпрэсіі за данаты ў фонд BYSOL праз Facebook. Што рабіць?

У «Спіс экстрэмістаў» дадалі яшчэ 27 прозвішчаў — цяпер у ім 3399 чалавек

13 кастрычніка МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі псіхолага Андрэя Рускіх, асуджаных за нацыянальныя сцягі Беларусі і Украіны Дзяніса Варозава, Вячаслава Панцюшэнку, Вольгу Церах, Кацярыну Зарэцкую, Уладзіміра Лавара, супрацоўніцу IT-кампаніі «Гейм Стрым» Ксенію Алькенаву.

Да допіса далучыны апошні Пералік грамадзян, якія маюць дачыненне да экстрэмісцкай дзейнасці

⁉️«Мама, я экстрэміст». Якія абмежаванні накладаюцца на асоб, уключаных у «Спіс экстрэмістаў»

🥀Сёння Вітольду Ашурку споўніўлася бы 53 гады

Вітольд — актывіст з Бярозаўкі, супраць якога ў жніўні 2020-га распачалі крымінальную справу за паслявыбарчыя падзеі. Суддзя Максім Філатаў прысудзіў Ашурку 5 гадоў калоніі. 21 траўня 2021 года Вітольд памёр у шклоўскай калоніі пры нявысветленых абставінах. Крымінальнай справы па факце ягонай смерці дагэтуль няма.

У гонар Вітольда «Вясна» абвясціла 21 траўня — Днём палітвязня ў Беларусі.

«Далі пяць гадоў, хай бы сядзеў. Ну яшчэ пяць дайце! Навошта было забіваць? Шкадую, што паміраў адзін у чужых людзях, у такім болі. Не было побач нікога з блізкіх людзей, хто б пашкадаваў, прытуліў яго перад смерцю. Але што цяпер паробіш? Думаю, такая была Божая воля. Ён сам абраў гэты шлях. Я да самай смерці буду плакаць», — казала маці Вітольда.

На фотаздымку Вітольд у верасні 2020-га года — гэта апошняе вядомае фота Ашурка з волі.

🔹«Давесці да канца справу Вітольда важна для ўсяго грамадства», — Андрэй Ашурак
🎧На судзе і ў труне. Падкаст памяці Вітольда Ашурка

У Беларусі новае «экстрэмісцкае фармаванне» — «Беларусь за МКАДом»

Адпаведнае рашэнне прынятае МУС 13 кастрычніка.

У рашэнне ведамства таксама пазначаны чалавек, якія нібыта маюць дачыненні да ініцыятывы — 33-гадовы грамадзянін Украіны Аляксандр Катовіч.

📍Палітвязень Андрэй Чудзінаў выйшаў на волю

У судзе Кастрычніцкага раёна Мінска 17 сакавіка 2022 года Андрэя асудзілі да двух гадоў калоніі агульнага рэжыму. Яго абвінавацілі па ч. 1 арт. 342 КК за ўдзел у "Маршы Новай Беларусі" 23 жніўня 2020 году. Асноўным і адзіным доказам віны Чудзінава стаў фотаздымак на ягоным тэлефоне, які раней забралі супрацоўнікі міліцыі.

Вядома, што ў зняволенні на палітвязня ціснулі і змяшчалі яго ў ШІЗА. У лістападзе 2022 года яго перавялі на турэмны рэжым у Магілёў.  

Сёння Андрэй выйшаў на волю, цалкам адбыўшы тэрмін.

🇺🇳У ААН зарэгістравалі зварот экс-палітвязня Леаніда Судаленкі па «справе Вясны»

У Камітэце ААН па правах чалавека зарэгістравалі індывідуальны зварот праваабаронцы і былога палітвязня Леаніда Судаленкі па «справе Вясны». Нагадаем, у верасні 2021 года яго асудзілі да 3 гадоў калоніі паводле ч.1 і 2 арт. 342 (арганізацыя і фінансаванне дзеянняў, якія груба парушаюць грамадскі парадак). Праваабаронца цалкам адбыў тэрмін і выйшаў на волю.

Леанід тлумачыць важнасць міжнароднага механізму КПЧ ААН тым, што ён дае магчымасць падрабязна задакументаваць парушэнні правоў чалавека, няхай нават тады, калі Беларусь адмаўляецца выконваць пастановы Камітэта.

«Сітуацыя з правамі чалавека ў Беларусі павінна заставацца на парадку дня і нагадваць супольнасці аб неабходнасці ініцыятыў салідарнасці, падтрымкі зняволеных і тых, каго пераследуюць, прыцягвання беларускіх уладаў да адказнасці».

Чытаць па спасылцы 👉 https://spring96.org/be/news/113073

😔На судзе і ў труне. Падкаст памяці Вітольда Ашурка — палітвязня, які памёр у калоніі

21 траўня 2021 года ў шклоўскай калоніі пры невысветленых абставінах памёр палітвязень Вітольд Ашурак. Крымінальная справа па факце яго смерці да гэтага часу не ўзбуджаная, а сітуацыя з палітычнымі зняволенымі за гэты час значна пагоршылася. Сёння Вітольду магло б споўніцца 53 гады...

Узгадваем 28-ы выпуск падкаста «Вясна прыйдзе», які быў запісаны ў мінулым траўні да Дня Палітвязня. Ён прысвечаны Вітольду, а таксама людзям, на якіх ён паўплываў — і пры жыцці, і пасля смерці.

Прысуд у 5 гадоў калоніі, які абурыў прысутных, і новыя рэпрэсіі, якія распачаліся з-за гэтага. Схуднелае цела ў труне (вачыма доктаркі) і самае вялікае пахаванне, якое бачыла Бярозаўка… І сілавікі, якія сачылі за Вітольдам нават пасля яго смерці.

Тэкставая версія | SoundCloud | Apple Podcasts | Google Podcasts | Spotify | Youtube | Anchor

Былога журналіста Андрэя Толчына абвінавачваюць у «нанясенні шкоды нацыянальнай бяспецы»

Стала вядомай верагодная прачына затрымання ў Гомелі былога журналіста-фрылансера, дэмакратычнага актывіста Андрэя Толчына. Яго абвінавачваюць паводле арт. 361-1 Крымінальнага кодэкса — «Заклікі да дзеянняў, накіраваных на нанясенне шкоды нацыянальнай бяспецы Рэспублікі Беларусь», піша @bajby.

Сілавікі затрымалі 63-гадовага Андрэя напрыканцы верасня і змясцілі ў ізалятар часовага ўтрымання. На наступны дзень пасля затрымання ў кватэры, дзе мужчына жыў з жонкай, правялі ператрус. Следчыя забралі камп’ютарную тэхніку ды іншыя лічбавыя носьбіты. Тлумачылі жонцы, што ператрус ладзіўся нібыта ў межах справы за экстрэмізм.

Толчына неаднаразова затрымлівалі і судзілі за журналісцкую дзейнасць з 2017 года. Пасля пратэстаў 2020 года журналіст вырашыў сысці з прафесіі.

Медсястру гродзенскага санаторыя «Жемчужина» асудзілі да «хатняй хіміі» за інтэрнэт-каментар пра міліцыянтаў

У судзе Кастрычніцкага раёна Гродна 25 верасня асудзілі Вольгу Куранчык паводле арт. 369 КК (Абраза прадстаўніка ўлады). Суддзя Віталь Лабоцкі прызначыў Вользе абмежаванне волі без накіравання ў папраўчую ўстанову адкрытага тыпу («хатнюю хімію»), а таксама штраф.

Вольгу абвінавацілі ў тым, што яна, паглядзеўшы ў тэлеграм-канале «Беларусь головного мозга» два відэаролікі пра супрацоўнікаў міліцыі, пакінула ў іхны бок каментары, якія суд палічыў абразлівымі.

Каментары тычыліся маёра міліцыі, старшага ўчастковага інспектара У., а таксама маёра міліцыі, участковага інспектара Жодзінскага ГАУС Б.

Чытаць па спасылцы 👉 https://spring96.org/be/news/113074

🎉Павіншуйце палітвязня Аляксандра Мураўёва з Днём народзінаў

Мужчыну затрымалі 6 лістапада 2021 года, калі ён выйшаў з дома. У кватэры ў той момант знаходзіліся ягоная жонка і двухгадовая дачка. У зняволенні яго ўтрымліваюць амаль два з паловай гады.

Аляксандра абвінавацілі паводле трох артыкулаў Крымінальнага кодэкса. На думку абвінавачвання, Мураўёў з восені 2020 года — удзельнік і арганізатар ініцыятывы «Буслы ляцяць», а яшчэ датычны да інцыдэнту, калі ў сакавіку 2021 года быў абліты фарбай кузаў машыны суддзі з Барысава, таксама ў ёй былі прабіты чатыры колы. Мінгарсуд асудзіў Мураўёва да 12 гадоў калоніі.

Сёння, 13 кастрычніка, Аляксандр адзначае 34-годдзе ў зняволенні.

💌Павіншуйце палітвязня: Турма № 4. 212011, г. Магілёў, вул. Крупскай, 99А, Аляксандр Мікалаевіч Мураўёў
💻Напісаць анлайн

Старонка спявачкі Маргарыты Ляўчук і email праекту «Волковыск.ВY» — вялікае папаўненне Спіса экстрэмісцкіх матэрыялаў

У яго трапілі:

📍Telegram-каналы і чаты «ПОЛЬШЧА. ВОЛЬНАЯ БЕЛАРУСЬ», «Слуцкая мясорубка-чат»;
📍Instagram-старонкі «dyjaspara», «ПАСПАЛІТАЕ РУШЭНЬНЕ», «Olya Malashkina», «r_a_z_m_o_v_a», «klopat_by», «belarusen.frankfurt», «margarita.levchuk.official»;
📍Youtube-каналы «ВОЛЬНАЯ БЕЛАРУСЬ», «Стоп таракан», «БЕЛСАТ LIFE»;
📍Відэазапіс «Обращение Полка Калиновского к белорусам»;
📍Старонка ў «Аднакласніках» «Координационный совет»;
📍Старонкі ва «Укантакце» «Осиповичи исполком», «stachkomgrodnopromstroj.l», «Алеся Манкевiч», «Ольга Карач»;
📍Старонкі праекту «Наша мова» ў сацсетках;
📍Сайт, старонкі праекту ў сацсетках і email «Волковыск.ВY»;
📍TikTok-старонкі «Ksenia Mija», «Я. Салянкоў», «baj.bу» «Настоящее время. Беларусь», «mkbelarus», «Мая Краiна Беларусь», «novy.kanal», «1863_х», «жизнь-малина», «baj.bу».

У «экстрэмісцкі спіс» таксама трапіла старонка Вольгі Гарбуновай — прадстаўніцы па сацыяльных пытаннях Аб’яднанага Пераходнага Кабінета Беларусі

Гаворка пра інстаграм-старонку «klopat_by», рашэнне аб прызнанні якой «экстрэмісцкай» прыняў суд Ленінскага раёну Брэста 9 кастрычніка.

Былая палітзняволеная Вольга Гарбунова займаецца арганізацыяй сістэматычнай дапамогі палітзняволеным і іх блізкім, а таксама стварэннем кансалідаванай платформы беларускіх грамадскіх ініцыятыў і арганізацый для павелічэння эфектыўнасці іх дзейнасці па такіх напрамках як юрыдычная, сацыяльна-псіхалагічная і гуманітарная дапамога.

🗣«Давесці да канца справу Вітольда важна для ўсяго грамадства», — Андрэй Ашурак

21 траўня 2021 года ў шклоўскай калоніі № 17 загінуў палітзняволены актывіст Вітольд Ашурак. Гэта адбылося ў камеры № 21. Следчы камітэт заявіў, што смерць палітвязня не мела крымінальнага характару і да гэтага часу не завёў крымінальную справу. Афіцыйная прычына — спыненне сэрца, але ўжо маецца каля дзясятка сведчанняў былых вязняў ПК № 17 пра ціск і жорсткія ўмовы ўтрымання Вітольда, а таксама катаванні ў гэтай калоніі.

Сёння Вітольду споўнілася б 53 гады. З гэтай нагоды ўзгадваем нашу размову з яго братам Андрэем пра сведчанні вязняў, якія ўтрымліваліся з Вітольдам у калоніі, а таксама пра расследванне справы і аднаўленне справядлівасці.

«Справа Вітольда — гэта асабістая справа, таму я ў любым выпадку знайду вінаватых, куды бы яны не з'ехалі і дзе б не схаваліся. Бо яны зрабілі такое, што я гэта не забудуся ніколі».

Чытаць па спасылцы 👉 https://spring96.org/be/news/111695