❗️Палітзняволенага мінчука Кірыла Казея часта змяшчаюць у ШІЗА

Мінчук да затрымання працаваў у кампаніі, якая прадае кампутарную тэхніку. Кірыл жанаты, ёсць дзеці 7 і 10 гадоў.

Паводле следства, Казея затрымалі за спробу правучыць кіроўцу BMW, які збіваў мужчыну на дарозе за БЧБ-сцяг. Нібыта палітвязень разам са знаёмымі збіраўся пракалоць шыны аўто мужчыны. У выніку Кірыла абвінавацілі па трох артыкулах Крымінальнага кодэкса. На судзе Казей не прызнаў сваёй віны. Ён распавёў падрабязна пра затрыманне, пра гвалт, які чынілі амапаўцы, пра пагрозы і здзекі ў РУУС з боку міліцыянтаў. 

Казею прысудзілі 7 гадоў калоніі ўзмоцненага рэжыму. Тэрмін палітвязень адбывае ў віцебскай калоніі № 3. Па інфармацыі праваабаронцаў, на палітвязня цісне адміністрацыя ўстановы: яго часта змяшчаюць у ШІЗА і ўтрымліваюць там па некалькі месяцаў на год.

💌Падтрымайце Кірыла: ПК № 3. 211322, Віцебская вобласць, п. Віцьба, Кірыл Аляксандравіч Казей
💻Напісаць анлайн

Былога палітвязня Аляксандра Кабанава абвясцілі ў вышук за «садзейнічанне экстрэмісцкай дзейнасці»

Гэта вынікае з інфармацыі, якая маецца на адпаведным міліцэйскім стэндзе.

Нагадаем, што Кабанаў цалкам адбыў тэрмін у калоніі па палітычнай справе. Пасля вызвалення ён з'ехаў з Беларусі і працягвае сваю актывісцкую дзейнасць. Праз гэтае да яго бацькоў ужо прыходзілі з вобшукамі, а супраць Аляксандра распачалі новыя крымінальныя справы.

🌿«Роднасная душа» і «барацьбіт з беспакаранасцю». Што кажуць пра Валянціна Стэфановіча віцэ-прэзідэнты FIDH

У 2019 годзе праваабаронца Валянцін Стэфановіч быў абраны віцэ-прэзідэнтам Міжнароднай федэрацыі за правы чалавека (FIDH) па рэгіёне Усходняй Еўропы і Цэнтральнай Азіі. Разам з ім віцэ-прэзідэнтамі па рэгіёне тады зрабіліся Талекан Ісмаілава з Кыргызстана і Артак Кіракасян з Арменіі.

Да гадавіны затрымання Валянціна ўзгадваем архіўны тэкст «Вясны», дзе Талекан і Артак падзяліліся сваімі ўражаннямі ад сумеснай працы з Валянцінам.

«Валянцін вельмі шмат зрабіў для свету, для такіх праваабаронцаў, як мы, і маладых, паказваючы, што трэба змагацца вельмі сур'ёзнымі і моцнымі інструментамі: нягвалту, гуманнасці, выконваючы высокія стандарты, каштоўнасці правоў і свабодаў чалавека».

Чытаць па спасылцы 👉 bit.ly/3mRknA0

💌Падтрымайце Валянціна: ПК № 15, 213105, Магілёў, п/а Вейна, Слаўгарадская шаша 183, Валянціну Канстанцінавічу Стэфановічу
💻Напісаць анлайн 👉 bit.ly/3PIOcjz

Жыхара Баранавіч асудзілі на 1,5 года калоніі за абразлівы надпіс у пад'езде на адрас Лукашэнкі

У судзе Баранавіцкага раёна вынесены прысуд мясцоваму 47-гадоваму слесару Алегу Кардашу. Яго абвінавацілі ў абразе Аляксандра Лукашэнкі (ч. 1 арт. 368 КК) і апаганьванні збудаванняў і псаванні маёмасці (арт 341 КК).

Справу разглядала суддзя Аксана Літвінчык, дзяржабвінаваўца – Вадзім Карачун.

Па інфармацыі мясцовай афіцыйнай газеты, жыхара Баранавічаў судзілі за тое, што ў лютым 2023 года ён распісаў некалькі сцен у пад'ездзе шматпавярховага дома. У надпісах змяшчаліся абразы на адрас Лукашэнкі. Такім чынам, гэтыя дзеянні следства кваліфікавала адразу па двух крымінальных артыкулах.

Кардаш працаваў слесарам, ездзіў працаваць у Еўропу, сімпатызаваў пратэстам у жніўні 2020 года, адседзеў больш за месяц запар у ІЧУ.

Чытаць па спасылцы 👉 spring96.org/be/news/112156

🎉Павіншуйце палітзняволеную Аніту Бакуновіч з Днём народзінаў

Нагадаем, дзяўчыну затрымалі 21 верасня ў Гродне пры спробе нелегальна перасекчы мяжу з Літвой. Доўгі час яе ўтрымлівалі ў СІЗА КДБ і не пускалі адваката.Палітзняволеную абвінавацілі паводле ч. 3 арт. 361-1 КК (удзел у экстрэмісцкім фармаванні), ч. 1 арт. 14 і ч. 3 арт. 371 КК (замах на незаконнае перасячэнне мяжы). 5 красавіка Гродзенскі абласны суд прызначыў Аніце тры з паловай гады зняволення і штраф у памеры 100 базавых велічынь. 

У канцы чэрвеня 2022 года Бакуновіч ужо асудзілі да двух гадоў «хатняй хіміі» паводле арт. 342 Крымінальнага кодэкса.

10 ліпеня Аніта адзначыць 20-годдзе ў зняволенні.

💌Павіншуйце дзяўчыну грашовымі пераводамі, пасылкамі і тэлеграмамі: Турма № 1. 230023, г. Гродна, вул. Кірава, 1, Аніта Алегаўна Бакуновіч
💻Напісаць анлайн 👉 bit.ly/3PIOcjz

✊Падтрымайце Мікалая Банькова пасылкамі і грашовымі пераводамі

Мікалай — былы выкладчык кафедры сувязі БДУІР. Гэтая кафедра прызначана для падрыхтоўкі кадравых афіцэраў для Узброеных Сіл і іншых сілавых структур і ведамстваў Рэспублікі Беларусь. Ён быў затрыманы 18 студзеня 2023 года. Спачатку яму прызначылі арышт паводле адміністрацыйнага пратакола, а потым перазатрымалі ў межах крымінальнай справы.

Мікалаю прад'явілі абвінавачванне па арт. 361-2 КК (Фінансаванне экстрэмісцкай дзейнасці) за данаты. Хутка над ім можа распачацца суд.

Падтрымайце Мікалая грашовымі пераводамі, пасылкамі з рознымі прыемнымі дробязямі, а таксама лістамі, паштоўкамі і тэлеграмамі.

💌Адрас для падтрымкі: СІЗА-1, 220030, г. Мінск, вул. Валадарскага, 2, Мікалай Васільевіч Банькоў
💻Напісаць анлайн

🚴‍♀️Беларускі пастар пачынае велазаезд на 1000 км уздоўж мяжы ў падтрымку палітзняволеных

Беларускі бежанец, пастар пратэстанцкай царквы Тарас Цялькоўскі сёння пачаў велазаезд уздоўж усёй заходняй мяжы Беларусі (па тэрыторыі Латвіі, Літвы, Польшчы). 1000 км ён праедзе нон-стоп у падтрымку палітвязняў у Беларусі. Яго галоўны пасыл: «Вы не забытыя, калі ласка, жывіце!».

Адной з задач з'яўляецца збор грошай для сям’і аднаго з палітзняволеных, якога асудзілі да 6 гадоў зняволення, а ягоная жонка з двума дзецьмі была вымушаная з'ехаць у Польшчу.

Беларусы сабралі ўжо амаль 30 000€ на аперацыю Віталю Тысеву — засталося прыкладна 25 000€

Нагадаем, падчас зняволення ў 2020 годзе ў жыхара Стоўпцаў Віталя Тысева пагоршылася хранічнае захворванне. Пасля ўцёкаў з Беларусі лекары дыягнаставалі ў яго сур’ёзную праблему.

Віталю сабралі грошы на аперацыю: амаль 20 тысяч еўра, аднак польская клініка ў апошні момант адмовілася рабіць аперацыю. Гісторыю мужчыны распавядала «Радыё Свабода».

❗️Для мужчыны знайшлі нямецкую клініку, але аперацыя там каштуе 55 100 еўра. Калі за бліжэйшыя тыдні Віталю не зробяць аперацыю, яго можа паралізаваць.

Падрабязнасці гісторыі і ўсе дакументы ёсць на старонцы збору 👉 zrzutka.pl/46phux

😔5 месяцаў няма ніякіх вестак ад палітзняволенага Мікалая Статкевіча

Пра гэта ў Facebook паведаміла ягоная жонка Марына Адамовіч. У сярэдзіне траўня яна атрымала адказ адміністрацыі калоніі пра тое, што Мікалая змясцілі на паўгода ў адзіночную камеру

Нагадаем, Статкевіч знаходзіцца за кратамі больш за 3 гады. 14 снежня 2021 яму быў вынесены прысуд: 14 гадоў зняволення ў калоніі асаблівага рэжыму.

У канцы мінулага чэрвеня Статкевіч быў этапаваны з гомельскага СІЗА-3 у глыбоцкую калонію № 13. З таго часу яго рэгулярна змяшчаюць у ШІЗА — яму выпісалі не менш за 36 спагнанняў.

💌Падтрымайце палітвязня: ПК № 13, 211791, Глыбокае, Савецкая, 205, Мікалаю Віктаравічу Статкевічу
💻Напісаць анлайн

Падрабязнасці інцыдэнту з аблітым фарбай аўтамабілем з крымскімі нумарамі ў Наваполацку

Праваабаронцам сталі вядомы акалічнасці затрымання 53-гадовага беларуса Іллі Двойрына, які нібыта абліў фарбай машыну прарасійскага актывіста Сяргея Юдаева.

За некалькі дзён да здарэння ў Іллі з Сяргеем быў канфлікт на дарозе — расіянін ехаў нецвярозы за рулём, а беларус зрабіў яму заўвагу з гэтай нагоды. Пасля інцыдэнту з машынай прарасійскі актывіст узгадаў гэтую сітуацыю і паведаміў сілавікам нумар машыны беларуса, які зрабіў яму заўвагу.

Паведамляецца, што сілавікі хочуць псіхалагічна зламаць Двойрына праз яго родных, якіх затрымалі разам з мужчынам.

Нагадаем, машына прарасійскага актывіста Сяргея Юдаева з крымскімі нумарамі і вялікай літарай «Z» на капоце была пыпаркавана каля Полацкага РАУС. Ранкам 1 ліпеня гаспадар знайшоў сваю машыну з аблітым белай фарбай лабавым шклом.

Затрыманы магілёўскі журналіст і актывіст Дзмітрый Ляпейка

Крыніцы mogilev.media паведамляюць пра затрыманне на 15 сутак магілёўскага актывіста і журналіста Дзмітрыя Ляпейкі. Папярэдне, затрыманне адбылося перад выхаднымі, а прычынай сталі «падпіскі і лайкі».

Дзмітрый Ляпейка да лета 2020 года супрацоўнічаў з выданнем «Магілёўскія ведамасці», потым заняўся фрылансам. Ён актыўна ўдзельнічаў у дзейнасці магілёўскага Цэнтра гарадскіх ініцыятыў, быў мадэратарам шматлікіх сустрэч.

🗣Паведаміць пра затрыманне
⚖️Атрымаць бясплатную юрыдычную кансультацыю
✍️Звязацца з журналістамі «Вясны»

📍Палітзняволенага Паўла Севярынца перавялі ў гродзенскую турму

Палітык, сузаснавальнік партыі Беларуская Хрысціянская Дэмакратыя і пісьменнік больш за тры гады ўтрымліваецца ў зняволенні.

У траўні 2021 яму і яшчэ шасці палітвязням прысудзілі ад чатырох да сямі гадоў калоніі. Суд праходзіў у закрытым рэжыме.

У красавіку адміністарцыя папраўчай калоніі № 17 прызнала Паўла «злосным парушальнікам рэжыму». Яго ўтрымлівалі ў ШІЗА некалькі месяцаў, а потым перавялі ў ПКТ на 3 месяцы. Вядома, што ў яго праз гэта пачаліся праблемы са здароўем.

21 чэрвеня ў Шклове адбыўся суд па замене Севярынцу рэжыму ўтрымання. Суддзя Аляксандр Тараканаў пастанавіў перавесці палітыка ў турму тэрмінам на тры гады. Два тыдні ад яго не было звестак, цяпер ягоная маці ў фэйсбуку паведаміла, што Павел знаходзіцца ў гродзенскай турме № 1.

💌Падтрымаць палітвязня: Турма № 1. 230023, Гродна, Кірава, 1, Павел Канстанцінавіч Севярынец
💻Напісаць анлайн 👉 bit.ly/3PIOcjz

У «Спіс экстрэмістаў» дадалі яшчэ 24 прозвішчы — цяпер у ім 3016 чалавек

7 ліпеня МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі інжынера «Магілёўскіх гарадскіх электрычных» сетак Уладзіслава Купрыянава, колішніх удзельнікаў «Еўрабачання» спевакоў Дзмітрыя і Уладзіміра Каракіных, а таксама іх маці Вольгу Крайко і бацьку Юрыя Каракіна.

Да допіса далучыны апошні Пералік грамадзян, якія маюць дачыненне да экстрэмісцкай дзейнасці

⁉️«Мама, я экстрэміст». Якія абмежаванні накладаюцца на асоб, уключаных у «Спіс экстрэмістаў»

З заўтрашняга дня беларусы будуць абавязаны паведамляць «кампетэнтным органам» аб наяўнасці іншага грамадзянства або ВНЖ

Начальнік упраўлення па грамадзянстве і міграцыі МУС Аляксей Бягун адзначыў, што гэтая норма закона нібыта не абмяжоўвае правы грамадзян.

Паводле яго слоў, інфармацыя аб іншым грамадзянстве збіраецца найперш пры назначэнні на дзяржслужбу.

🔗Хроніка палітычнага пераследу 10 ліпеня

❗️У бабруйскай калоніі зняволены скончыў жыццё самагубствам — адміністрацыя спрабуе схаваць інцыдэнт

Паводле інфармацыі @MAYDAYMog, папярэдне ў мінулую суботу скончыў жыццё самагубствам 40-гадовы мужчына, асуджаны па артыкуле 328 КК «Незаконны абарот наркотыкаў». Вядома, што гэта вязень з 6-га атрада, ён выкінуўся ўніз галавой з акна чацвёртага паверха аднаго з карпусоў калоніі, які называюць «Тытанікам».

Паведамляецца, што прычынай суіцыду мог стаць вялікі тэрмін — больш за 10 гадоў пазбаўлення волі і стаўленне да так званых «наркаманаў» з боку супрацоўнікаў ДВП.