🌿Прафесійнае і чалавечае. Валянцін Стэфановіч — у маналогу Сашы Кулаевай

14 ліпеня будзе роўна два гады з дня затрымання праваабаронцы Валянціна Стэфановіча. З'яўляючыся намеснікам старшыні «Вясны», Валянцін таксама займае і ганаровую пасаду віцэ-прэзідэнта Міжнароднай федэрацыі за правы чалавека (FIDH).

У FIDH Саша Кулаева ў 2002-2018 гадах была кіраўніцай аддзела Усходняй Еўропы і Цэнтральнай Азіі (у гэты рэгіён уваходзіць і Беларусь). Цяпер яна — выкладчыца Вышэйшай школы палітычных навук у Парыжы. З Валянцінам яны знаёмыя больш за 20 гадоў.

Напярэдадні гадавіны затрымання Валянціна ўзгадваем наш архіўны тэкст, у якім Саша распавяла аб тым, які Валянцін прафесіянал і чалавек.

Чытаць па спасылцы 👉 spring96.org/be/news/109436

💌Падтрымайце Валянціна: ПК № 15, 213105, Магілёў, п/а Вейна, Слаўгарадская шаша 183, Валянціну Канстанцінавічу Стэфановічу
💻Напісаць анлайн 👉 bit.ly/3PIOcjz

📍Палітзняволеную Вікторыю Кульшу перавялі ў калонію ў Зарэччы

Вікторыю двойчы за год асудзілі паводле ч. 1 арт. 411 КК (злоснае непадпарадкаванне законным патрабаванням адміністрацыі калоніі). Апошні раз суд прызначыў жанчыне яшчэ адзін год зняволення ў дадатак да трох з паловай гадоў калоніі.

За паўгода ў зарэчанскай калоніі Вікторыя адбыла мінімум 92 дні ў ШІЗА і паўгады ў ПКТ. Нядаўна праваабаронцам стала вядома, што адзін з наглядчыкаў душыў Вікторыю логцем, стоячы ззаду, а таксама цягаў яе па камеры. Акрамя гэтага, жанчына некалькі разоў у калоніі трымала галадоўкі на знак пратэсту супраць жудасных умоваў. Праз гэта ў яе двойчы здараўся сардэчны прыступ.

Стала вядома, што 22 чэрвеня жанчыну этапавалі ў жаночую калонію № 24.

💌Адрас для падтрымкі: ПК № 24. 247526, вул. Вытворчая, 44, г. п. Зарэчча, Рэчыцкі раён, Гомельская вобласць, Вікторыя Аляксандраўна Кульша
💻Напісаць анлайн

Мінюст падаў пазоў аб ліквідацыі Беларускай партыі «Зялёныя»

Раней ім адмовілі ў перарэгістрацыі, піша @euroradio.

Старшыню Дзмітрыя Кучука запрасілі 17 ліпеня ў Вярхоўны суд «ў парадку падрыхтоўкі справы да судовага разбіральніцтва».

💔900 дзён за кратамі знаходзіцца праваабаронца Леанід Судаленка

Праваабаронца «Вясны» Леанід Судаленка быў затрыманы 18 студзеня 2021 года. Пазней суддзя Сяргей Салоўскі асудзіў Леаніда да 3 гадоў калоніі агульнага рэжыму. У студзені мінулага году праваабаронца быў этапаваны ў папраўчую калонію №3.

💌Падтрымаць Леаніда: ПК №3. 211322, Віцебская вобласць, г.п. Віцьба, Леанід Леанідавіч Судаленка
📮Напісаць анлайн 👉 bit.ly/3PIOcjz
⁉️Як падтрымаць зняволеных праваабаронцаў «Вясны»
💳Падтрымаць «Вясну» на Patreon

Паўтара месяца ў Берасці судзяць баранавіцкага лекара Валерыя Хаменку

У Брэсцкім абласным судзе паўтара месяцы доўжыцца суд гад 40-гадовым лекарам з Баранавіч Валерыем Хаменкам. Лекара брыгады інтэнсіўнай тэрапіі станцыі хуткай дапамогі абвінавачвалі ў рэабілітацыі нацызму (ч. 1 арт. 130-1 КК).

Спачатку мужчыну абвінавацілі ў тым, што ў сацсетцы «Укантакце» ён зрабіў рэпост публікацыі, дзе побач параўноўваліся ўлёткі часоў нацысцкай Германіі і ўлёткі з сучаснай Расеі. Да дадзеных улётак Валерый напісаў: «Рашызм».

Але на судзе 5 ліпеня пракурорка ўдакладніла абвінавачванне. Цяпер яно гучала так: Хаменка распальваў варожасць у адносінах да рускіх і жыхароў Расіі шляхам публікацыі некалькіх репостаў і каментароў ва «Укантакце». Такім чынам Валерый, на думку пракуроркі, здзейсніў злачынства па ч.1 арт.130 КК (Распальванне варожасці).

Чытаць па спасылцы 👉 spring96.org/be/news/112147

Былы палітвязень Рамуальд Улан выйшаў на волю пасля 7 сутак арышту

«Пасля 7 сутак ізалятара... Па тых жа падставах, як і раней (пасты, фоткі за 2021 і 2020 год!!!)», — напісаў Рамуальд на сваёй старонцы ў Facebook.

Улан збіраецца закрыць свае сацсеткі, «каб зноў чагосьці не знайшлі тады яшчэ дазволенага, а цяпер забароненага».

Былы заснавальнік і выдавец «Новай газеты Смаргоні» ў студзені 2021 года быў асуджаны да 2,5 гадоў «хіміі». Смаргонцу паставілі ў віну тое, што ён распаўсюдзіў заведама непраўдзівыя звесткі, якія ганьбяць гонар і годнасць міліцыянераў. У траўні стала вядома, што яго вызвалілі па амністыі.

Пасля выхаду на волю Улана двойчы затрымлівалі — агулам яму прызначылі 10 сутак арышту паводле арт. 19.11 КаАП (распаўсюд экстрэмісцкіх матэрыялаў).

У Бабруйску асудзілі палітвязня Сяргея Франчука і дадалі яшчэ паўгады калоніі

У судзе Бабруйскага раёна і горада Бабруйска быў вынесены прысуд па справе палітзняволенага Сяргея Франчука. На гэты раз яго абвінавацілі ў абразе Аляксандра Лукашэнкі паводле ч. 1 арт. 368 КК. Справу разглядала суддзя Вольга Серакова. Да першага прысуду тэрмінам у тры гады пазбаўлення волі Франчуку дадалі яшчэ паўгода.

Новы суд над Франчуком пачаўся яшчэ ў траўні, аднак у працэсе быў абвешчаны перапынак да моманту разгляду ягонай апеляцыйнай скаргі на папярэдні прысуд. Прадказальна, касацыйная скарга Сяргея, якая была разгледжана ў Вярхоўным судзе, засталася без задавальнення, а прысуд Мінскага гарадскога суда ад 27 красавіка — без змен.

Сяргей — стрыечны брат прадстаўніка палка Кастуся Каліноўскага Вадзіма Кабанчука.

Чытаць па спасылцы 👉 spring96.org/be/news/112095

❗️Палітвязень Уладзімір Гарох у зняволенні моцна схуднеў і губляе зубы

Уладзіміра непакоіць артроза-артрыт каленных суставаў. Таксама пачалі моцна выпадаць зубы — на верхняй сківіцы засталося ўсяго шэсць зубоў. Таксама ён настолькі схуднеў, што хадзіў, трымаючыся за сцены, паведамляе hrodna.life.

Усю зіму, паводле слоў сына, Уладзімір правёў у ШІЗА. За апошнія паўгода яму ўдалося перадаць усяго адну перадачу. Сын звязвае гэта з дрэнным харчаваннем і адсутнасцю вітамінаў.

Жонцы Уладзіміра таксама прыйшлося пакінуць Беларусь. У красавіку 2023 года сілавікі прыйшлі да яе дадому. Сын палітвязня пакінуў Беларусь яшчэ ў жніўні 2020 года.

Нагадаем, Уладзімір быў затрыманы 18 жніўня 2020 года па так званай «Карэліцкай справе» — аб нібыта плануемых беспарадках у Карэлічах і Навагрудку пасля прэзідэнцкіх выбараў. У снежні 2020-га яму прысудзілі 7 гадоў калоніі.

💌Падтрымайце Уладзіміра лістамі і тэлеграмамі: Турма № 4. 212011, Магілёў, Крупскай, 99А, Гароху Уладзіміру Уладзіміравічу
💻Напісаць анлайн

Два тыдні няма звестак пра Паўла Севярынца, якога мусілі адправіць у турму

Паводле ініцыятывы Шклоўскай калоніі №17, дзе палітвязень адбываў пакаранне, 23 чэрвеня палітзняволенаму змянілі рэжым утрымання. Па рашэнні Шклоўскага райсуду ён павінны адбыць наступныя тры гады ў турме. Перавесці Севярынца на новае месца зняволення мусілі цягам 10-ці дзён, але сваякі нічога не ведаюць пра ягоны лёс.

На думку маці палітвязня, Таццяны Севярынец, непасрэдна перад этапам ён мог трапіць у ШІЗА, дзе забаронена перапіска. Такім чынам з ім маглі абысціся ў ПК-17, дзе яшчэ ў красавіку зняволенага палітыка, журналіста і літаратара паставілі на ўлік як злоснага парушальніка рэжыму.

Паводле заканадаўства, менавіта з калоніі мусілі б паведаміць, куды пераводзяць іхнага былога вязня. Але родныя не атрымалі паведамленняў ні з ПК-17, ні ад самога Паўла, піша «Віцебская Вясна».

«Беларускі дом правоў чалавека імя Барыса Звозскава» прызнаны ў Расіі «непажаданай арганізацыяй»

Пра гэта паведамляе Генпракуратура РФ. Таксама ў спіс «непажаданых арганізацыяй» трапілі Human Rights House Foundation, Human Rights House Tbilisi, Educational Human Rights House Chernihiv, Human Rights House Crimea, Human Rights House Yerevan.

Паведамляецца, што дзейнасць гэтых арганізацый «накіравана на парушэнне тэрытарыяльнай цэласнасці РФ, дэстабілізацыю грамадска-палітычнай абстаноўкі, дыскрэдытацыю ўнутранай і знешняй палітыкі, фармаванне грамадскай думкі аб неабходнасці змены ўлады неканстытуцыйным шляхам».

Сцвярджаецца, што з пачатку «спецыяльнай ваеннай аперацыі арганізацыі займаюцца дыскрэдытацыяй знешняй палітыкі Расійскай Федэрацыі і Узброеных Сіл Расіі».

✊Беларусы за суткі сабралі грошы на лекаванне і рэабілітацыю актывісту з Бярозаўкі

Сяргей Пантус, грамадска-палітычны актывіст з Бярозаўкі. За яго плячыма шматгадовая праца на карысць Беларусі і роднага горада. Разам з Вітольдам Ашуркам яны ўдзельнічалі ў палітычных кампаніях, вырашалі экалагічныя праблемы роднага горада і займаліся ўшанаваннем памяці ўдзельнікаў паўстання Кастуся Каліноўскага.

У канцы 2021 года пад пагрозай крымінальнага пераследу з палітычных прычынаў Сяргей быў вымушаны з'ехаць з Беларусі і апынуўся ў Беластоку. Там ён да апошняга часу працаваў на будоўлі.

19 чэрвеня яму стала блага на працы, ён страціў прытомнасць. У лякарні не адразу, але паставілі дыягназ – разрыў анеўрызмы судзінаў галаўнога мозга. Сяргею зрабілі некалькі аперацыяў і ўвялі на некалькі дзён у штучную кому.

Беларусы за суткі сабралі больш за 8000 еўра для Сяргея.

💳Вы яшчэ можаце падтрымаць збор па спасылцы

Сайт і сацсеткі светлагорскага тэлеканала «Ранак» прызнаныя «экстрэмісцкімі»

Адпаведнае рашэнне прынятае судом Чыгуначнага раёна Гомеля 4 ліпеня.

Нагадаем, 11 чэрвеня ў Светлагорску былі затрыманыя восем супрацоўнікаў тэлеканалу «Ранак». Сапраўднай прычынай для затрымання мог стаць сюжэт пра выбух на Светлагорскім ЦКК, у якім загінула тры чалавекі.

На ўсіх затрыманых склалі пратаколы па ч. 2 арт. 19.11 КаАП. Мужчынам прысудзілі па 7 сутак адміністрацыйнага арышту, жанчынам — штрафы ў памеры 25 б. в.

🎪Суд Чыгуначнага раёна Гомеля б'е ўсе рэкорды — за адно пасяджэнне там прызналі «экстрэмісцкімі» ажно 105 старонак у інтэрнеце

Згодна з Рэспубліканскім Спісам экстрэмісцкіх матэрыялаў, 4 ліпеня ў судзе Чыгуначнага раёна Гомеля за адно пасяджэнне былі прызнаныя «экстрэмісцкімі» 105 інтэрнет-старонак. Гаворка пра чаты дыяспар, гістарычныя тэлеграм-каналы, старонкі СМІ, асабістыя профілі ў сацсетках і нават Linkedin-старонкі.

Агульны спіс тых, каго ў судзе Чыгуначнага раёна Гомеля за дзень прызналі экстрэмісцкімі, займае 13 старонак.

Акрамя таго, у той самы дзень судом Чыгуначнага раёна Гомеля былі прызнаныя «экстрэмісцкімі» сайт і сацсеткі светлагорскага тэлеканала «Ранак».

🤯Telegram-канал з цікавосткамі пра беларускую мову «РазМова» прызнаны «экстрэмісцкім»

Адпаведнае рашэнне прынятае судом Баранавіцкага раёну і Баранавічаў 5 ліпеня.

🆘Кубінец Рабэрта Вальдэс Касануэву, які 30 гадоў пражыў у Беларусі і падтрымаў пратэсты, мае патрэбу ў дапамозе для найму адваката

Мужчына не змог атрымаць статус уцекача ў Літве.

Нагадаем, Рабэрта затрымалі 8 лістапада 2020-га году падчас Маршу, а потым больш за год трымалі на Акрэсціна ў чаканні дэпартацыі.

На Кубе Касанэуву можа пагражаць небяспека, таму мужчына просіць усіх неабыякавых дапамагчы яму сабраць сродкі на іміграцыйнага адваката, каб падаць апеляцыю і атрымаць магчымасць застацца ў Літве.

Падтрымаць Рабэрта на BYSOL

За рэгістрацыю ў «плане Перамога» мінчука асудзілі на чатыры гады калоніі

У Мінскім гарадскім судзе 12 чэрвеня быў асуджаны культурніцкі актывіст Андрэй Прымака. Яго абвінавацілі паводле трох артыкулаў Крымінальнага кодэксу: арт. 368 (абраза Лукашэнкі), арт. 342 (арганізацыя і падрыхтоўка дзеянняў, якія груба парушаюць грамадскі парадак, ці актыўны ўдзел у іх), арт. 361-1 (стварэнне ці ўдзел у экстрэмісцкім фармаванні).

Справу разглядаў суддзя Яўген Пісарэвіч.

Андрэя затрымалі 12 студзеня, пазней яму прысудзілі 10 сутак адміністрацыйнага арышту, пасля якіх на волю ён ужо не выйшаў.

Чытаць па спасылцы 👉 spring96.org/be/news/112150

У ААН прайшла дыскусія «Свабода меркаванняў і іх свабоднае выказванне ў Беларусі пад пытаннем»

У мерапрыемстве, якое праводзілася ў межах 53-й сесіі Рады па правах чалавека ў Жэневе, спікерамі былі спецыяльная дакладчыца ААН па сітуацыі з правамі чалавека ў Беларусі Анаіс Марэн, прадстаўніца па нацыянальным адраджэнні Аб'яднанага Пераходнага Кабінета Аліна Коўшык, член Беларускай асацыяцыі журналістаў Вольга Хвоін, журналістка Ганна Любакова. Мадэрыраваў дыскусію пастаянны прадстаўнік Літоўскай Рэспублікі пры ААН у Жэневе Дарыюс Станюліс.

У сваім выступленні прадстаўніца па нацыянальным адраджэнні Аб'яднанага Пераходнага Кабінета распавяла пра парушэнні права беларусаў на свабоду слова і выказванне меркаванняў, якія рэжым здзяйсняе на працягу больш 20 гадоў, складаныя ўмовы працы для незалежных СМІ ў выгнанні і сучасныя выклікі ў працы на сваёй цяперашняй пасадзе.

Крыніца: @CabinetBelarus

😔23 гады таму ў гэты дзень выкралі Дзмітрыя Завадскага

Алесь Бяляцкі і Валянцін Стэфановіч выйшлі на акцыю ў снежні 2000 года з пытаннем да ўладаў, дзе зніклыя палітыкі і аператар Завадскі.

Праз 23 гады грамадства не атрымала адказ на гэтае пытанне, а праваабаронцаў, якія дабіваліся праўды па грамадска-палітычных пытаннях, саміх пасадзілі ў турмы

✊Як можна падтрымаць палітвязняў?

Амаль штодзённа па ўсёй Беларусі працягваюцца затрыманні беларусаў па крымінальных справах. За кратамі знаходзяцца тысячы чалавек, якія маюць патрэбу ў дапамозе і падтрымцы.

Мы заклікаем вас працягваць падтрымліваць кожнага і кожную, хто сутыкнуўся з палітычным пераследам. Дасылайце словы падтрымкі праз лісты і тэлеграмы, рабіце грашовыя пераводы, дасылайце пасылкі з прыемнымі дробязямі. Памятайце, што сіла беларусаў — у салідарнасці!

🌿Карысныя спасылкі па падтрымцы:

Практычны дапаможнік па перадачах для вязняў ад “Вясны”

"Наша сіла — у салідарнасці!" Вялікі дайджэст па дапамозе палітвязням

"Хачу напісаць вязню!" Распавядаем, як гэта зрабіць

Як рабіць грашовы перавод?

"Гэта надзвычай цудоўная падтрымка". Распавядаем пра пасылкі салідарнасці палітвязням

📨Адрасы і спіс усіх палітвязняў, якім можна даслаць паштоўку або ліст

💳Падтрымаць «Вясну» на Patreon

✊Дапамога хворай на рак пенсіянерцы, якая чакае сына з турмы

Пасля прэзідэнцкіх выбараў 2020 года пастаянныя перажыванні з-за рэпрэсій справакавалі праблемы са здароўем Алы, і ў сакавіку 2021 года ёй паставілі дыягназ — анкалогія.

Да дыягназу жанчына працягвала працаваць швачкай з-за невялікай пенсіі — 300 рублёў, але ў траўні 2021 года яна была вымушаная пакінуць працу. Ала імкнецца трымацца аптымістычна і з пазітывам глядзіць у будучыню.

Аднак фінансавае становішча яе сям'і ўскладненае яшчэ і тым, што адзін з яе найбліжэйшых сваякоў, які дапамагаў маральна і матэрыяльна, трапіў пад рэпрэсіі і доўгі час дапамагаць ужо не зможа.

Падтрымаць Алу праз сэрвіс hutka.help

🗣«Гэта бессэнсоўны акт прапаганды». Былы палітвязень ПК-17 пра сюжэт БТ пра яго калонію

На дзяржаўным тэлеканале «Беларусь 1» паказалі сюжэт пра шклоўскую ПК № 17, экскурсію па якой правялі палітзняволеныя: былы журналіст гэтага канала Дзмітрый Лукша, асуджаны за «масавыя беспарадкі» ў Брэсце Уладзімір Рубашэўскі і мінчук Юрый Сяргей.

У сюжэце абурыліся існаваннем Маскоўскага механізму супраць Беларусі, які займаецца фіксацыяй парушэння правоў і свабод у нашай краіне. Прапагандысты зноў сцвярждалі, што палітвязняў у Беларусі няма, высновы «Даклада аб сур'ёзнай пагрозе чалавечаму вымярэнню АБСЕ ў Беларусі з 5 лістапада 2020 года» БДІПЧ АБСЕ — лухта, правы грамадзян не ўшчамляюцца, а ў калоніях ўмовы створаныя як у санаторыі.

«Вясна» папрасіла былога палітвязня ПК-17 паглядзець сюжэт БТ і распавесці пра сапраўдныя ўмовы ўтрымання ў шклоўскай калоніі.

«Яны паказалі абразцова-паказальны корпус, дзе жывуць выключна карысныя для адміністрацыі зняволеныя».

Чытаць па спасылцы 👉 spring96.org/be/news/112151