Бошқача мухаббат бор иккимизда,
Бошқа-бошқа уйда яшаймиз, айро,
Нега учрашмадик ёшлигимизда?
У пайтлар бошқача эдими дунё?

Сен келин бўлгансан мендан бошқага,
Мен хам бошқасини атаганман ёр,
Бошқа билан яшаб, айтчи нимага?
Яна иккимизда бошқача ишқ бор?

Яшириб юрамиз бошқалардан кўп,
Қўрқамиз бошқача миш-миш, гап-сўздан.
Бошқа ошиқлардан бошқачамиз хўп,
Ерга келгандекмиз бошқа юлдуздан.

Бошқа севишмайлик дейсан севгилим,
Юрак бошқачароқ санчади танда,
Сен менинг танлаган бошқача гулим,
Барибир бошқалардан бошқачасанда.

Бошқача мухаббат кўрсатар кучин,
Озроқ кечикиброқ келган мухлатдан,
Бошқа-бошқа уйда яшамасликчун,
Бир ўлиб туғилиш керак бошқаттан.

Расулбек

​​​​МУҲАББАТНИНГ ИСИ

Хуш кўрдик зеборўй, қомати гулгун,
Васлингиз шамоли майин еляпти.
Билмам, қаерларда бўлдингиз бугун,
Сиздан муҳаббатнинг иси келяпти.

Ҳуснингиз ҳукми бор токи жонгача,
Лабларингиз ранги сингди қонгача,
Бошингиздан тортиб то товонгача,
Эй воҳ, муҳаббатнинг иси келяпти.

Моҳитоб термулган кўзингиздан ҳам,
Кулганда кулгичли юзингиздан ҳам,
Оҳанги меҳрибон сўзингиздан ҳам,
Шундоқ муҳаббатнинг иси келяпти.

Бу ифор ҳар оқшом айлар мени маст,
Юрагим энтикур, вужудим сармаст,
Юрсангиз, фаранги атирнинг эмас,
Оҳ-оҳ муҳаббатнинг иси келяпти.

Қаршилай гуллардан поёндоз солиб,
Олам ошиқлари қолсин уёлиб,
Нозибўй, атиргул, райҳонлар қолиб,
Ё раб, муҳаббатнинг иси келяпти.

Билмам, қаерлардан келдингиз, айтинг,
Токи тонг отгунча дил аро дайдинг,
Кетманг! Бир энтикай, ёнимга қайтинг,
Сиздан муҳаббатнинг иси келяпти.

Ўлмасбек Самарқандий.

* * *

Сени кўп изладим Дунёда юриб,
Ва сенга етгунча минг йилга етдим,
Қара, телбалардек ёнингда туриб,
Минг йил кўрмагандек соғиниб кетдим!

Бирга келишингдан умидга тўлиб,
Баҳорларни кутдим, қишларни кутдим!
Топдиму, ишқинга гирифтор бўлиб,
Минг йил кўрмагандек соғиниб кетдим!

Келмас йўлларингни юбордим ёқиб,
Чўғларнинг устидан кунда бир ўтдим,
Сўнг сени топдиму, кўзинга боқиб,
Минг йил кўрмагандек соғиниб кетдим!

Висолинг умидин жон қадар суйиб,
Заққум дарахтларин мевасин ютдим,
Келдингу, пойинга кўнглимни қўйиб,
Минг йил кўрмагандек соғиниб кетдим!

Қандай жодуладинг билмайман мени,
Ишониб юрагим қўлинга тутдим,
Ёнимдан жилмагин, ахир мен сени,
Минг йил кўрмагандек соғиниб кетдим!


Малика Тавфиқ