ما ينومس لابته غير الشجاع الماجد
واحدٍ صوته ليا عجعج رمكها يصدح

الرجل ما هوب يصلح له يشاور واجد
ودّك انه مرّه يشاور وعشره يقدح

عسى اللي معاذيره معه ساعة الميقاف
فدا اللي يشيب ووقفته ما بعد شابت

اعتبر هذا صبا ولا تصابي
‏يا بصيص آمالي اللي خاب أملها

‏بان شيبي وذْبلت زهرة شبابي
‏وانتهى طيش البدايات وجهلها

‏كن أهل ذيك المرابع والمرابي
‏ديرةٍ مستفرد الريح بنخلها

‏جوها غايم وواقعها ضبابي
‏توجع اللي شافها واللي دخلها

‏المطر وهو المطر من حر ما بي
‏لو يسمّي فوق كبدي ما غسلها

لا تطيح بعين من شافك السد المنيع
لو تكمل باقي الدرب تمشي وتعرج

الله هو اللي الاقوياء عنده ضعوف
يعطي ولا يبخل ويحيي ويفني

اللي بحب خشوم ومصايد شفوف
لو لاح لي براقها ما شعفني

وأنا الى ما شافني قاصر الشوف
والله ما أقول لقاصر الشوف شفني

عند الدني واللاش مانيب معروف
بس النزيه من الرجال يعرفني

جعلنا لا بيّنت شمس الصباح المستنيره
‏ يتداول ذكرنا بالطيب والفعل المشرّف

تكثر حشود المشاريه والخاطر عيوف
ما يطاوع قولة الوقت لا عيّا طعه

من تضحكه الليالي تصحيه الصدوف
‏لا يهمّل صاحب الضيق في وقت السعه

‏والله إني ما اتضيعف ولا أحب الضعوف
‏جعل يومٍ ياخذ العز ياخذني معه

زكاة العقل تهميش زلة قليل العرف
‏والاسراف فيه مناقشة واحدٍ جاهل

‏لو إنّا ندقق بالحكي ما نغضّ الطرف
‏زهدنا بسمعتنا مع اللي مايستاهل

ياناسٍ على اتفه سالفه تلبسون بشوت
بعضكم مايسوى بشته اللي على متنه

الفارس اللي بندقه تعرف ومرماها يبين
عن الضعيفه تكرم يمينه وتكرم بندقه

اترك بعيد المنفعه لا تطرّيه
وان جابته بعض الطواري، تعده

الله يبيح الشايب اللي مسميه
ومعنّزه على خيار الأشده

عطاه بشتٍ كل يوم يْعثر فيه
الواضح ان البشت ماهوب قده

صكوك الجمايل فالنشاما مسن سيوف
ما دام السنافي بين وقفه وترحيبه

تقدم على درب القدا والعيون تشوف
سهوم الليالي تخطي الكفو وتصيبه

ترا شرهة اللي لا جماله ولا معروف
مثل منّة اللي ما عطى شي من جيبه

والله يا شوفتك ساعة، ساعة ونص
‏تشرى بقيمة سنين العمر كلّه

‏أقول كم سالفه وأعد كم نص
‏وأشرب ملامحك وأتوكل على الله

لله يا نفسي الأمّاره اتجهي
‏لا تختلف بوصلة دربك وتخطينه

‏أعز ماء فوق وجه الأرض ماء وجهي
‏موتي ضما، بس وجهي لا تهينينه

لا تسقني ماء الحياة بذلةٍ
‏بل فاسقني بالعز كأس الحنظلِ

دلوعه تكره جفا البعد واللوم
وتموت بإحساس الشعر والقوافي

من الترف لو كان بعيونها النوم
ما تنام لين ينقال لها نوم العوافي

أمانه ! تخشرون اسمي من الدعوات يا حِجّاج
‏انا روحي لرحمة قاضي الحاجات محتاجه

‏الا يا ماهد ٍممشى نبيّك ليلة المعراج
‏طريقي موحش وغارت نجومه واعتم سراجه

‏على قلبي عواصف ذعر منها والظروف أمواج
‏وقف طالبك من كثر السحى كنه على صاجه

‏لك المنّه على اقدارك لك الشكر ولك الالهاج
‏بحمدك لين ترضى يا عظيم الملك بفراجه

لي رفيقٍ جنابه ما يحب الكفيّا
كل ما غابوا أصحاب الرخا ماتغيّب

اللّٰه من الطناخه والله من الحميّا
مني مقرّبٍ جعله من اللّٰه قريّب

ما أخبر اني زهمته في لزومي وعيّا
طيّب كل ما كلمته يقول طيّب

لو يسبقوني بالمعايد والسلام
‏ما يسبقوني بالضمير وبالحضور

‏يعايدونك بالرسايل والكلام
‏وأعايدك من قلب وإحساس وشعور

‏أنت البدايه والنهايه والختام
‏خذني من أول نظره ليوم النشور

‏عيدك مبارك كل عيد وكل عام
‏وعيدي بدونك من دبورٍ في دبور

ماطحت في غيابك ولكن كل شي طاح
دمعي وصبري والطموح اللي أطمح

اكلمك وانا على باب الأفراح
وألمح من الأفراح مدري وش ألمح

عطني كلامٍ زين يمكن اني ارتاح
ولا كلامٍ شين يمكن اني أسمح