انتبهو انتشار ثغـ ـرة بالتليكرام عن طريق الصورة يحـ ـذفون حسابك او قناتك او قروبك على ما انتشر عن طريق التحديث الجديد ، مامتاكدين لكن الحذر واجب اخفو صور حساباتكم قنواتكم گروباتكم وبلغو غيركم ، الخبر انتشر سريع كلش ومانعرف حقيقة او لا لكن المهم نفذو هسة اخذ حذر
انشرو الخبر عندكم بقنواتكم بلغو غيركم
وروحو هسة اخفي صورتك من حسابك
من قناتك مؤقتًا لين مانتأكد

وموضوع آخر بعيد عن هلموضوع
اكو ناس هلفترو گاعد تنشر
عني اشياء تشـ ـوه سمعتي بقنواتهم
ومسوين صور ومحادثات مفبركة
كلكم تعرفوني ما يحتاج احچي
الحمدلله الذي على كل حال
واني بقيت ثابت على طريق الله
وكلها تعرف قناتي فقط للفائدة
حتى اعلانات مانشر بيها ومايأثر
شي سواء نشرو عني او لا ميهمني
لان الناس كلها تعرفني الغريب
والقريب ويردون ينشرون عني
اشياء ان اني شخص خطـ ـر 😅
لو اني عندي شي كان الاستخبارات
القت القبض عليه صح لو لا؟ لذلك
فقط حبيت فقط ابلغكم .

للتواصل : @Twasnatbot

أمس بنية گالت اني طالبة من اصوم
تتخربط لان مـ ـريضة وماتگدر
واكو طالب أيضاً گال اني عندي
دراسة يصير اصوم لان ماكدر
مدام اجى رمضان راح انطيكم اشياء
تجوز وماتجوز وشوكت تكون جائزة

بالنسبة للبنت اذا صار عندها فترة
العذر الشرعي هنا توقف الصيام
وكذلك الصلاة لانها غير طـ ـهارة
لين ماتخلص هذي الفترة مالتها
و الي مافهم اقصد فترة الحـ ـيض
وكذلك سواء ولد او بنت عنده
مـ ـرض اخر ولازم ياخذ العلاج
واذا ما اخذ العلاج راح يتـ ـأذى
فهنا لازم يفطر حتى ما تسوء حالته
كذلك اذا انت صايم ومابيك شيء
لكن فجأة صار عتدك صداع وگعت
اغمى عليك هنا أيضاً لازم تفـ ـطر
لكن انت تگول اني عندي دراسة
اني عندي شغل اني عندي فقر دم
انت الي عليك تصوم ماتفطر اذا
ماتعاني من مـ ـرض لكن اذا انت
صمت وجاي تدرس او بالشغل
ماتخربطت ولا صار لك شيء تكمل
صيامك لانك ما تعرضت لشيء
ولا اغمى عليك ولا صداع مجرد
جوعان وعطشان وهذا كلنا نحس
بي يعني انت شنو تختلف عن غيرك
اذا جوعان لو عطشان تروح تفطر
تتحمل هي كم ساعة مادام ماصار
الك شيء لكن اذا فجأة صار الك
شيء صداع اغمى عليك بعد ماتگدر
تروح تفطـ ـر ، اما تگول اني عندي
دراسة اني شغل ياعمي كلنا عدنا
شغل ودراسة ، اذا انت تفطر علمود
دراستك اكو اشخاص بشتغلون
بالبناء وتعرف عامل البنات شگد
يصرف جهد وتعب ويعطش يجوع
مع كل هذا مايفطر وانت فقط لان
تدرس تريد تفطر ، ثانيا انت هنا
تفضل دراستك على عبادتك وانت
اذا ماتعاني من شيء تكدر تجمع
الاثنين سويًا يعني تصوم وترضي
الله وكذلك تدرس ، وتگدر تقسم
يومك لاتخلصه كله نوم تتهرب من
الجوع والعطش ولا تبقى تدرس
ساعات هواي لان راح ينشف ريگك
وتعطش كلش ف حاول تقرا على
قدر المستطاع والتزم بصيامك
واهم شيء تلتزم بصلاتك بوقتها
مو تنام ورا السحور وتكعد العصر
لو المغرب تجمعهن كلهن دفعة وحدة
ترا اكو شيء اسمة منبه نبه موبايل
موبايل اهلك وصي اهلك يكعدونك
ماكو عذر تكول اني نايم ماكدرت
اكعد ماسمعت المنبه عندك اهلك
ويكعدونك ، الصيام تلتزم بصلاتك
وتحفظ لسانك وتغض بصرك وتلزم
نفسك وما تگعد تسوي سوالف
ولا تسولف ويا بنات او العكس بنية
تسولفين ويا ولد فقط للضرورة
مثل دراسة عمل ، وكذلك يستحب
تسوي اذكار تسبيح تقرا قران حتى
صيامك يكون بي اجر كبير مو فقط
تصلي وهاي هية ، والاهم من هذا
ماتكون من هذا النوع الي فقط
يكون يصلي فقط برمضان
فهذا كل ما يخص الصيام وشوكت
تكدر تفطر وشوكت مايصير تفطر
واما الصيام الي فطرته برمضان
من ينتهي رمضان مباشرة ورا
مايخلص العيد تصوم الايام يلي
فطرت بيها لعذر شرعي لان ميجوز
تاخر الايام الي مطلوبها .
واذا عندك سؤال او تحتاج شي
تستفسر عن هالموضوع مال صيام
مسوي اني مجموعة دينية متواجد
بيها هناك تكدر تنظم وتسألني هناك
وماكو اي سوالف بيها فقط تسأل
واجاوبك ومسوي بيها اقسام
اقسام للاحاديث قسم للاسئلة
قسم للتفسير ، وللي يحتاج كتب
مصادر ف للي يريد ينتفع او يسأل
سؤال يخص الدين فقط ينظم
ومن تنظيم ادخل لقسم القوانين
واقراهن وركز بيهن لان اي مخالفة
تنحظر مباشرة .
رابط المجموعة ↓↓
https://t.me/+TcfY5S5fcc80ZjYy

وثبتو القناة عندكم لان اي موضوع
ينظل بي نصيحة وتوعية الكم
فحتى ماتضيع القناة منك وكل
منشور ينزل يوصلك 🌸

للتواصل: @Twasnatbot

ليش متسوي فطور لاهلك بدال خواتك؟
او بدال امك او بدال زوجتك او بناتك

هوا ليش الي يطبخ ويساعد اهلة عدنا
بلعراق الاغلبية يشوفو هذا خـ ـنيث!
او ماعندة شخصية واخواته او زوجته
مسيطرات عليه ليش نشوف بهيچ
نظرة ان هوا مابي حظ وماعندة كلمة
ليش مانشوفة شخص مثل الرسول
صل الله عليه واله وسلم او مثل صحابة
الرسول او مثل اهل بيت الرسول
مثل الامام علي مثلاً كانو يساعدون
زوجاتهم بشغل البيت سواء بالطبخ
او بالتنظيف او بغير شغلات يعني
هل الرسول هيچ نظرتكم عنه؟؟
انت تعرف امك واختك وزوجتك
مامجبرات يخدمنك لكن من باب
انك اخوها ابنها زوجها تخدمك
لان تحبك او ممكن هي تخاف منك
حتى لا تطلع رجولتك عليها وتگعد
تصرخ وتضـ ـربها علمود الاكل
انتو تدرون اكو اشخاص اذا اتأخر
الاكل شوي يگوم يعيط ويسمع
زوجته كلام ويفـ ـشر عليها وحتى
يضـ ـربها او اخته كذلك او بنته
كل هذا فقط لان اتأخر الاكل شوية
او اذا كالتله عندي دراسة امتحان
يگلها عوفي الامتحان وسوي اكل
واذا ماتكوم بعد شيخصلها منه!
اني هالكلام ترا شايفه بعيني وحتى
عشت هذي المواقف يعني مو سمعتها
واني اكتشفت ان الرجولة والشخصية
هي ع فطرة من الله الانسان يولد
رجال والمرأة عدها انوثة لكن الإنسان
هوا يستخـ ـنث او المرأة تسترجل
فلذلك الي يستقوي على نسوان
بالبيت علمود طبخ او شغل تنظيف
انت ليش ماتطبخ ليش ماتنظف
ليش ماتجهز ملابسك لوحدك تكويها
تغسلها ، راح تگلي المرأة بالبيت شنو
دورها لعد هي بالبيت ماتطلع وهي
هذا شغلها وانت شنو حتى تسويها
خدامة يعني امك تشوفها بنظرك
خدامة؟ او زوجتك شريكة حياتك
او اختك بنتك تشوف لازم تخدمك
انت ناقصك ايد رجل وحتى ان كان
ناقصك ايد او رجل ياما اكو اشخاص
ناقصهم ايد ورجل ويشتغلون وكلشي
يسوي فيعني ما الك عذر انتو تدرون
اني اطبخ اطيب من خواتي وامي
يعني بعض الاكلات مو كلهن مثلاً
الكبسة الدجاج الشوي البرياني
المشاوي بانواعها والله مرة سويت
دجاجة شوي وتمن مندي امي
وزوجة اخوي اتعجبن گالت امي
الدجاجة شلون ذايبة مستوية
صح والتمن شايفين مال مطاعم
شلون من تاكلة تمن المندي عبارة
عن طعم بهارات نفس مال مطاعم
اسوي ضبط ليش؟ لان اني بنفسي
احب اطبخ اساسًا اتعلم من اليوتيوب
واحب اجرب بنفسي ومن انجح
بهاي الطبخة هذا انجاز الي چبير
ان اني ولد ومن اول مرة او ثاني
مرو اسوي طبخة اطيب من المطاعم
وصرت كل مرة اتعلم اسوي عصائر
ومشاوي وطبخات ثانية وبعدها
صرت اي طبخة اريد اسويها اروح
لليوتيوب اشغل اشوف شنو الي
احتاجة من بهارات متطلبات شغلات
مثلا ذاكليوم من سويت المندي الي
اطيب من مال مطاعم رحت جبت
كل شيء جبت فلفل اسود وقرنفل
وبهارات مندي او ورق غار وتمن
هندي ودجاجة ، جبت متطلبات
التمن كلها حتى اشتغله بأدق
التفاصيل ويطلع مثل مال مطاعم
ومن كملتة اهلي مسحو الصينية
لا بقى تمن ولا دجاجة والدجاجة
اشويها بالگيس مال شوي وطبعًا
انگعها بالتتبيلة ساعات فد 4
ساعات او اكثر يعني دتشوفون
شلون اعتني بالطبخة من اطبخ
اطبخ بكل حب وشغف وكذلك
اني اتعلمت الطبخ مو بس هيچ
افكر بعدين بالمستقبل زوجتي
اذا ولدت طفل ماراح تگدر تسوي
شي او اذا اني عشت لوحدي بعدين
او اذا سافرت اذا اهلي ماموجودين
ف اني احب اطبخ لزوجتي لبناتي
لعائلتي لاهلي لامي لاخواتي احب
اشاركهم مهاراتي بالطبخ وبغير
اشياء بشغل البيت كذلك يعني
مو بس طبخ لان هي مرتي
لو خدامة واني احجيلك هذا الكلام
مو حتى ابينلك اني كيوت وكذا
لو حتى اجمع معجبات اني احجي
هذا الكلام الك اسويلك واهس
واخليك تكسر قاعدة انُ انت
ميصير تطبخ او تشتغل ويا اهلك
وعيب لامو عيب ، العيب من انت
تستنقـ ـص من امك اختك زوجتك
بنتك وتشوف نفسك ملك بالبيت
ويخدمون بيك وتشوف ان انت
افهم من الرسول لان الرسول كان
يساعد زوجاته بامور البيت ف اني
اقتدي بالرسول اذا تشوفني بغير
نظرة واني هذا شي على فطرتي
احب اتعلم طبخ وطبخي كلش
احترافي وللعلم اني عندي 8
اخوات 5 منهن متزوجات وعندي
بعد 3 وكبار ويعرفن كلشي يطبخن
ويشتغلن او امي عايشة الحمدلله
بس اني اغلب الاوقات اگوم اني
اطبخ ، ف غير تفكيرك هذا وصير
رجال ويا اهلك لا تصير رجال عليهم
ولا تكلي عادي اذا اهلي ماموجودين
او صار شي اطلب من المطاعم
بس اتذكر هذا الشي ماينقص
من رجولتك ولا شخصيتك ولا
حتى من كرامتك ف هي مو مسألة
طبخ مسألة رجولة والرجولة افعال
فأذا تشوف نفسك فعلاً رجال
لاتستنكف لان هذا فعل الرسول
وانت تقتدي بالرسول الحبيب
واني شاركت خصوصيتي وياكم
حتى ابينلك ان هذي مو خصوصية
بيها عيب وانما خصوصية جميلة
وشاركتها وياكم واني كدام الاف
الناس داحجي بنص القناة اني
شخص اطبخ لاهلي لاخواتي
لامي واذا اتزوجت راح اطبخ
لزوجتي واطبخ لبناتي أيضاً
فخليك رجال وياهن مو عليهن

وبالنهاية ثبتو القناة عندكم هسة
بالمحادثات المثبتة حتى لاتضيعها
لان كل منشور ينزل بي موضوع
توعية للطرفين الشباب والبنات
ومسموح اعادة النشر والتوجيه
والسلام عليكم 🌸
للتواصل : @Twasnatbot .

شوكت ليلة القدر وشنو نسوي بيها ؟
بكل مرة تنتشر كثير امور تخص
ليلة القدر اعمال خاصة بليلة القدر

واشياء ودزولي ناس عدة
اعمال گالو هل هذي الاعمال صحيحة
وشوكت ليلة القدر وهل انتهت لو بعد
اخوان خلي انفصل الموضوع ببساطة
أولاً ليلة القدر شوكت؟ ليلة القدر
حتى الرسول صل الله عليه واله وسلم
ميعرفها شوكت لكن الصحابة سألو
الرسول عن ليلة القدر گاللهم اتحرو
آخر 10 ليالي رمضان وهذا حديث
صحيح ثابت أنَّ رَسولَ اللَّهِ صَلَّى اللهُ
عليه وآله وسلَّمَ قَالَ: تَحَرَّوْا لَيْلَةَ القَدْرِ
في الوِتْرِ مِنَ العَشْرِ الأوَاخِرِ مِن رَمَضَانَ.
وناس هواي تنشر الكم وتگللكم ليلة
القدر يوم 15 وذاك يگول يوم 21
وذاك يكول يوم 27 كله هذا غير
صحيح طيب شنو الحكمة من اخفاء
ليلة القدر ، لان الله يريد نحصل اجر
اكثر لو عرفت ليلة القدر بيا يوم
راح تنتظر هذي الليلة وتكثر من
العبادة بيها فقط ف الرسول گال
بمعنى ان ليلة القدر تكون من آخر
10 ليالي من ليالي رمضان يعني
من يوم 20 بشهر رمضان الى نهاية
شهر رمضان تكون أحد الليالي
الاخيرة حتى الإنسان يكثر من
العبادة بهذي الأيام وهيج راح
يحصل اجر اكثر وكذل يحيي ليلة
القدر لهنا فهمنا شنو الحكمة من
الله اخفى ليلة القدر ، هسة نجي
نعرف شنو اعمال ليلة القدر وهل
هذي الاعمال المنتشرة بكل سنة
صحيحة؟ ، شفت بعض الاعمال
منتشرة وأكثرها بدعة لا صحة لها
شنو يعني بدعة يعني اشياء
مكذوبة وضافوها للدين الرسول
مافعلها ، والرسول قال كل بدعة
ظلالة وكل ظلالة بالنار فهذي
الاعمال من جاي تنشروها للناس
جاي تنشرون اشياء مكذوبة
والرسول بحديث آخر قال
من كذب علي متعمداً فليتوبئ مقعده
في النار ، لازم تتاكدون يا اخوان
مو اي شي شفتو وتنشروه للناس
بدون علم! هذا كله تتحاسب عليه
كل شخص راح يفعل هذي الأعمال
ف تاكدو قبل ما تنشرون شيء
من الاعمال الي فعلها الرسول
هذي الاعمال مو خاصة بليلة
القدر اخوان لكن الرسول كان
يفعلها ف يعني ماخصصتها
فقط بليلة القدر ، المهم
الرسول كان يعتكف ويتعبد لله
بالاعمال الصالحة الواسعة يعني
ماتقيد نفسك بشيء ، مثلا الرسول
كان يقيم الليل كل يوم ، هذا عمل
صالح كان الرسول يفعله بكل الليالي
تصلي قيام الليل وردت احاديث
صحيحة عن قيام الليل تصلي 11
ركعة اول 8 ركع تفصلهم كل ركعتين
تصليهم مثل صلاة الصبح لكن كل
صلاة تكون اطول من الي قبلها
يعني اول ركعتين مثل صلاة الصبح
ثاني ركعتين تطولهم شوي تخليها
تكون ربع ساعة بعدها ثالث صلاة
ركعتين تطول اكثر بيها وهكذا إلى
ان تصل 8 ركعات كل ركعتين بصلاة
لوحدهم الرسول كان يطول ساعات
بصلاة قيام الليل شلون يعني يطول
ساعات يعني يقرأ سور من القران
يطولة بداخل الصلاة مثلا يقرا
الفاتحة وياها سورة الكرسي
وثاني ركعة يقرا الفاتحة أيضاً
وياها سورة البقرة وهكذا لكن
هذا الشيء مو واجب فقط مستحب
لحتى تحصل اجر اكثر وتقيم ليلة
القدر باجر كبير واذا تريد تصلي
اول 8 ركع مثل صلاة الصبح كلهم
قصيرات عادي جائز ، وبعدها
تصلي صلاة الشفع ركعتين صارو
هنا 10 ركع ، بعدها تصلي صلاة
الوتر توتر بركعة واحد هنا صار
المجموع 11 ركعة ، تريد
تصلي اكثر جائز تريد تصلي
اقل جائز الامر واسع بعدها كان
الرسول يدعي ويسبح ويستغفر
ويقرا القران هكذا كان الرسول
يقيم الليل يعني تقرا قران
بعد ماتكمل الصلاة تقرا الي تكدر
عليه ، وبعدها تكعد تستغفر
او تسبح شكد ماتكدر كل ما اكثرت
كل ما حصلت اجر اكثر كذلك تدعي
شكد ماتكدر هذي كلها اعمال
صالحة وهذي كلها بيها احاديث
صحيحة والرسول ما وردن
انه خصص اعمال خاصة بليلة القدر
ف الرسول كان يقيم ليلة القدر مثل
اي ليلة من الليالي فقط يكثر بيها
العبادة يعتكف وماجان يعرف ياليلة
ف جان الرسول اخر 10 ليالي من
رمضان يعتكف يعني ينعزل بالعبادة
ويكثر بالعبادة كلش بهذي الليالي
ف يا اخوان
الرسول ماخصص اعمال خاصة
اي شخص تشوفو ناشر اعمال خاصة
بليلة القدر غير الي گلتلكم بي هذا
كذب وبدعة واني الي كلتلكم بيهن
هذن مو اعمال خاصة هذا قيام الليل
الي الرسول يسوي بكل ليلة فقط
الرسول بكثر من قيام الليل
وليلة القدر اجر الي يحييها يغفر
الله ماتقدم من ذنوبه وتعادل الف
شهر ف لاتضيعو هذي الليالي
فهمتو؟ هذي الاعمال الي شرحتها
الكم هي مو اعمال فقط بليلة القدر
هذي اسمها قيام الليل الرسول كان
يصلي قيام الليل بعد صلاة العشاء
ويقرا قران ويقرا اذكاى ويستغفر
وتسبيحات ماكان مخصصها فقط
بليلة القدر ف ليلة القدر تحييها
بالاعمال الصالحة الواسعة لاتقيد
نفسك بعمل خلي الاعمال واسعة
صلي اقرا قران سبح استغفر
اذكار ادعية ادعي ماتشاء
والله يتقبل منا ومنكم صالح الاعمال
ويغفر لنا وللمسلمين جميعًا

ومسموح التوجيه وتنفعو لغيركم
وثبتو القناة عندكم حتى لاتضيعوها
وتنتفعو اكثر لان كل منشور ينزل
بي فائدة ومنفعة الكم فثبتوها
عندكم بالمحادثات المثبتة.🌸

تواصل : @Twasnatbot .

اسمي علي عمري 27 من بابل
لأول مرة راح احچي كل شي سويته
باختصار من طفولة الى هذي اللحظة

للإتعاض من الأخطاء الي ارتكبتها
من طفولتي الى سن المُـ ـراهقة
خلصتها دراسة وهنا انحـ ـرفت
عن الطريق واني من النوع ماحب
الدراسة لان اني ماحب اتعين فقط
مو اني موزين بالدراسة لا اني ماريد
اكمل لان ماحتاج شهادة احب اشتغل
شغل حر ماتقيد بوظيفة وراتب ثابت
لان اهلي دراسين وخريجين شاطرين
فكل شخص يرغب شيء ، عدت سنتين
بالثالث ردت اخذ شهادة 3 فقط وابطل
وما اخذتها وبطلت واشتغلت بكثير
شغلات حتى عربانة دفعت يعني
اشتغل ادفع بعربانة بلسوق واتعينت
مكان ماكدر اذكره اقل السنة
وبطلت راتب قليل ويتأخر أيضاً
اتعينت بشركة بالامن كان عمري 20
طولت سنة وبعدها صار مشاكل
ونفاق وحاربوني وچان دوامي
فقط لازم سـ ـلاحي وكاعد مكاني
نظيف الاكل جيد جداً راتب عالي
من 960 الى مليون وربع مع راتب
اضافي تحفيزي ، لكن كرامتي اولى
فقدمت استقالة ، واشتغلت سنة
تقريبًا باسواق وامي بقت تضغط
علي حتى اكمل فقط 3 قدمت
مسائي شهور وبطلت صارت مشكلة
وراها صارت كـ ـورونا وقدمت خارجي
والله وفقني ونجحت وجبت لامي
شهادة ال3 لان اني ماحتاجها فقط
لامي اخذتها ، بعدها چنت حاب ادخل
مجال الانترنت وبديت من 2022
تقريبًا وهنا اهلي واصدقائي
استهزئو وكلام سلبي وماكو تشجيع
وما اهتميت ولا اتأثرت وبديت
اشتغل بمجال الاعلانات علموني
اشخاص ولكن للأسف لعد ماعلموني
وبديت انجح واتعرضت لغدر وسرقة
عدة مرات اتعرضت لهجمات واخسر
بكل مرة وارجع اعيد نفسي ماتوقف
وبعدها كملت وحدي والله وفقني
وهذول الي علموني رجعو يشتغلون
يمي ، وبعدها غيرت مجالي لان صار
عليه ضغط قوي وماعندي ناس ثقة
وصارت الي عداوات ف اني سحبت
نفسي ودخلت بمجال التصميم چنت
احب التصميم جداً وصرت مصمم
اعلانات سويشيال ميديا وصار
يجوني ناس مشاهير وشركات
حتى من الصين اجوني وهذا كله
بفضل الله ودخلي الشهري يعبر
المليون وجمعت مبلغ عالي جداً
ونست نفسي من ملابس من اكل
والي استهزئو بيه وسمعوني
كلام سلبي من اهل اصدقاء
رجعو احتاجوني من نجحت
نجاح قوي وماقصرت معهم .
استمريت الى 2024 تقريبًا
وتركت الشغل لان ماكو احد مثلي
عندة خبرة ف اني سحبت نفسي
وللان قبل شهور اجوني زبائن
يردون تصميم واني صارلي سنتين
من تركت لان عندي سمعة قوية
والناس متعودة عليه وكل هذا
بدون ما اعمل اعلانات بفلوس
الناس عرفتني عن طريق الشغل
النظيف والسمعة الطيبة والثقة
وبقيت موقف شغلي الى الان
لان جمعت مبلغ جيد الحمدلله
وهسة نرجع ل 2023 هنا نحچي
من جانب ثاني بعيد عن الشغل
والدراسة بوقتها هنا صاحبت
شخص عندة تعمق بالدين واني
جنت جاهل جداً بالدين وبوقتها
ورحت لهذا الشخص بقى يلقن بيه
ورشدني على علماء وكتب بعدها
اني هنا كملت طريقي بالدين بديت
اتعمق الى ان الحمدلله صار عندي
علمية جيدة ورحت للعُمرة مرتين
وكملت تعمقي بالدين الى يومنا
هذا ، وكذلك ب2023 أيضاً بديت
افكر بالهجرة من العراق صارت لب
ضروف خاصة جداً ماكدر اذكرها
قدمت على روسيا وانغلقت
وقدمت على دول اخرى كثيرة
كثيرة وكله يجيني رفض لان اني
ماعندي لغة ، الى 2025 الى
ان حصلت عقد عمل بالمانيا
وشرطو عليه اجيب شهادة لغة
و اهلي هنا كالعادة كلام سلبي
واللغة صعبة وانت هناك تفشل
وراح ترجع النا ومن هالكلام
لكن كالعادة ما اهتميت اني عندي
هدف ودائمًا اتوكل على الله فهنا
بلشت دراسة لغة المانية بشهر 11
من 2025 والى هذي لحظة وياي
طلاب خريجين قسم طبية أيضاً
صارت منافسة بيني وبينهم
بالدرجات الى ان عبرتهم بالامتحانات
وحتى الاستاذ نفسه كاللهم هذا علي
هوا مثل المعاون وياي شنو ينطيكم
تاخذون منه واني خريج 3 متوسط
و همة وياي خريجين طبية وهذا
يثبت ان الشهادة مو مقياس ابد
وحتى اذكر بنت وياي خريجة
وعدها لغة انكليزية قوية جداً
سألتني كالت علي شلون عندك
هيج شغف او واهس وتقرا هيچ
الجواب اني حافز لنفسي لان اني
خلصت عمري وحدي محد سندني
بمشاريعي كلها غير ربي
ف يردون مني شهادة مستوى 3
يعني لازم اتقن اللغة 50% واني
كملت مستوى 1 نجحت بي وهسة
اني بنص المستوى 2 اكمله وبعد
اخر مستوى ال 3 واخذ الشهادة
واطلع يعني باقيلي عدة شهور
واخذ شهادة واطلع ان شاء الله
واكمل حياتي خارج العراق.

الاخطاء ↓
صاحبت رفقة سوء
تعلمت على التـ ـدخين لسنوات
تعلمت امور موحلوة
مبتعد عن الدين جداً
متسرع بردة فعلي مع الناس
كثرة الاهتمام المُبالغ


النجاحات ↓
تركت رفقة السوء✓
تركت التـ ـدخين بفضل الله ✓
اتعمقت بالدين جداً ✓
نجحت بحياتي بدون شهادة ✓
سندت اهلي رغم ماسندوني ✓
نجحت بشغلي بالنت ✓
ثقفت عقليتي بالكامل ✓
حققت نجاح باللغة الالمانية ✓

لتخلي شهادة او أحد
يوقف اهدافك

موضوع هذا الچبس الي يطلع بي سيارة
چبس فلان ومشروب فلان ماگدر اذكر
اسماء تعرفون اقصد منو اول واحد
معروف الي ديوزع سيارات وايفونات

واكو اشخاص غيره قلدو الفكرة ،
اخوان كل ما بالأمر هذي ترا اقمـ ـار
الاقمـ ـار اذا تدفع فلوس وتخـ ـسر
وانت ممحصل هذي المكافأة عبارة
عن (حظ يا نصيب ) بس ع شكل چبس
ومشروبات لو اندومي لو غير منتجات
يعني شلون ، هسة الحظ يا نصيب
تدفع فلوس حتى يطلعلك المكافأة
واذا ماطلعت لك تخسـ ـر ومرات
تطلع الك مكافأة صغيرة ماتسوى
المبلغ الي صرفته انت ، فبباقي
الدول يگلك هذا اقمـ ـار وللبـ ـالغين
بصريح العبارة يگلولك هاي لعبة
اقمـ ـار ، اما بالعراق ضحكو على
اطفال العالم وسوولهم فرة وهمة
ليش استهدفو هذي الاشياء الي
يحبها الطفل مثل الچبس المشروبات
الاندومي لان يعرفون الطفل شنو يحب
ف الطفل اهله يشتروله هواي ويگلك
هذي المنتجات مستهلكة كلش من ناس
الچبس والاندومي والمشروبات لذلك
حولو هاي المنتجات الة لعبة قمـ ـار
لان انت ماجاي تريد تشتري الچبس
انت جاي تدفع فلوس علمود تحصل
ايفون لو سيارة ماجاي تشتري چبس
فعلا لو تشتري الچبس فعلا حتى تاكله
نگول اي هاي مو قمـ ـار لكن الناس
صارت تشتري نعمة الله وتشمرها
وانتو تشوفون فديوهات شكد
صارت تنتشر الطامة الكبرى انوب
ناس كبار بالعمر گامت تصور
وصارت جداوة علني يصور
مشتريله كراتين چبس ومفرغ
الچبس كله ويصور يگله ابو فلان
اريد منك سيارة لو ايفون اني
صرفت هواي فلوس وماطلعت لي
السيارة ، اذن انت ماشتريت الچبس
خسرت فلوسك ختى تحصل السيارة
لو الايفون ، وهذي هي الاقمـ ـار
الحـ ـرام تصرف فلوسك وتخسر
مقابل لا شيء لذلك همة لعبوها صح
جماعة الاچباس والعصائر وغيرهم
أولاً ضحكو على اطفال الناس ثانيا
استهدفو المنتجات الي عليها طلب
قوي وسحب ثالثا صارو يجيبون
اشخاص صناع محتوى يتابعوهم
الاطفال ويحبوهم حتى يقلدوهم
لان تعرفون الطفل شنو يشوف
يقلد ف يضحكون على الاطفال
حتى الطفل يشوف كل صناع
المحتوى الي يتابعهم يشترون
من هذي المنتجات ويروح يشتري
ويبچي والاهل ميقصرون گبل
يشترون للطفل وهيج انتو شجعتو
هذول الناس اهل الاقمـ ـار لذلك
انتو أيضاً عليكم ذنب شكو شخص
اشترى المنتجات وهوا اشتراها
فقط حتى يحصل الهدية الي بيها
ما اشتراها يريد ياكلها هذا شخص
لعب اقمـ ـار بس بغير طريقة
لذلك انتبهو ياعمي هاي اقمـ ـار
وديربحون براسكم ، وتدرون هاي
الفكرة براسي قبل لا احد يسويها
لكن من بحثت عنها وطلعت اقمـ ـار
بطريقة غير مباشرة تركتها لكن هاي
الناس عدها الحـ ـرام عادي المهم
لو اريد اني اسوي هم چبس بأسمي
وكل شخص يسوي ويربح مليارات
مو ملايين لان المشروع مايكلف
بس الحـ ـرام مانعنا لا اكثر ☺️
اني تعرفوني اي شي بي منفعة
اتطرق بي الكم لا مستفاد شيء
ولا عندي معمل ولا مصنع يعني
لاخسران ولا اي غاية، اجتني بنت
ذكرتني بهذا الموضوع وگالت نزل
عنه حتى احنا هم نشاركه بقنواتنا
ف هلمنشور مسموح الكم تشاركو
بقنواتكم بالخاص لأي شخص
لان الدال على الخير كفاعلهُ
وشكرا للبنت الي ذكرتني بالموضوع


و بالنهاية ثبتو القناة عندكم لأن
كل منشور ينزل بي منفعة الك
حتى ماتضيع القناة وتبقى يمك
والسلام عليكم . 🌿
للتواصل : @Twasnatbot

شلون تصير مُراهـ ـنة ع بنات
بداخل الكليات !!
الكلام موجه بالبداية للبنات
ثم للشباب ف البصمة يسمعها
الطرفين + اسمعها لأخر ثانية
صح بصمة مطولة لكن كل كلمة
هي راح تنقذك بالكلية ف اسمعوها
ومسموح الكم توجهوها بقنواتكم
او لأي شخص تعرفوه .

انتي ع ساس دكتورة بعلم النفس !
وجاية تنصحيني ،الموضوع وما فيه
اجت بنت تگول هي دكتورة علم نفس

واجت تنتقدني وتنصحني ف اريد
تقرأ الكلام للنهاية وتشوف هل هذي
تستحق انُ تكون دكتورة وفاهمة !
الي هي دارسة كلية واني شخص
مكمل فقط ثالث متوسط، اجتني
كالت انت عندك نقص وگاعد مخلي
نفسك شرطي ع مرأة وتحمل
المرأة فشل المجتمع وانت محد
يسألك بالقبر عن هاي شسوت وذيچ
شسوت وانت لو غاض بصرك كان
ماشفت بنات متبرجات، وكذلك
استدلت هي ب آية من القران
كلامها : الدين لم يجعلك وصيّاً
على الخلق الله سبحانه وتعالى
قال لرسوله الكريم فَذَكِّرْ إِنَّمَا
أَنتَ مُذَكِّرٌ * لَّسْتَ عَلَيْهِم بِمُصَيْطِرٍ
إذا كان الرسول ليس مسيطراً
فمن أنت لتنصب نفسك شرطياً
على ضمائر النساء وتصرفاتهن

احسنتِ يا دكتورة هذي الآية
تنقلب ضدچ اقري الله يگول
للرسول فذكر انما انت مذكر
لست عليهم بمسيطر ،وهذا
الي جاي اسوي يا دكتورة اني
كاعد اذكر الناس بالدين وارشدهم
زين اذا اني داقتدي بالرسول
واذكر الناس صرت اني شرطي
ع المرأة وماغاض بصري ؟؟؟
هاي اول نقطة انقلبت عليج
ثانيًا انتي افتريتي عليه گلتي
انت تحمل المرأة فشل المتجمع
واني اتحداچ انتي وكل شخص
بالقناة يجيب منشور بلقناة اني
كايل المرأة هي سبب فشل المجتمع
لكن راح تلاگين منشورات ع
المرأة اني ارشدهن انصحهن
مثلا منشور نزلته انصحهن شلون
يبتعدن عن علاقات الحـ ـرام
ومنشور بي نصيحة شلون يدورن
شغل ويشتغلن ويبتعدن
بي عن التبرج واللبس الغير لائق
ومنشور انصحهن شلون يحمن
نفسهن من الشباب بالشارع وشلون
يتصلن بالشرطة شلون
تتصرف بحياتها الزوجية
وتتحمل عيشة اهلها وكثير
منشورات ف هذا كله هوا بي خير
ومنفعة الهن واساسًا كثير ناس
هنا اكثرهم بنات اجو
كالو عمو وينك مختفي وهواي
بنات اتعلمو وغيرو حياتهم للأفضل
من خلال النصائح الي اقدمها
ف هذي ثاني نقطة اقلبها عليچ
وابين افترائج عليه لان اني اساسًا
مع المرأة وليس ضدها ، ثالثًا انتي
من استدليتي بالقران وگلتي
الله كال للرسول انت مذكر فقط
مو مسيطر ، اتحداچ تجيبي منشور
اني فرض رأيي لو كلت غصبا عليكم
تاخذون بكلامي ، لكن راح تشوفي
كل منشوراتي هي مجرد نصيحة
ومنفعة وكاعد اطبق كلام الله
الي اوصى بي رسوله ، كما قال
الله بالقران كُنْتُمْ خَيْرَ أُمَّةٍ أُخْرِجَتْ
لِلنَّاسِ تَأْمُرُونَ بِالْمَعْرُوفِ وَتَنْهَوْنَ
عَنِ الْمُنْكَرِ وَتُؤْمِنُونَ بِاللَّهِ ،هنا
تعاي يا دكتورة شعجب ماقريتي
هذي الاية ؟؟؟ اقري الله شيكول
يگول تأمرون وتنهون وهذا الي
كاعد اسوي بقناتي اامر بالمعروف
ادلي الناس ع طريق الصح وأيضاً
انهي عن المنكر ابعدهم عن الطريق
الخطأ ف اني ماصاير شرطي على
المرأة مثل ما افتريتي عليه ولا اني
احاسب واسيطر ع احد فهذي 3
نقطة اقلبها عليچ، رابعًا انتي تگولي
لو غاض بصرك متشوف المتبرجات
انتي أساساً حتى غض البصر فاهمته
خطأ يا دكتورة ! غص البصر مومعناه
تمشي مدنگ وعينك بالگاع لا غض
البصر متنضر بنضرة شهـ ـوانية
للمقابل ، وبعدين اني اذا دامشي
بالشارع وفجأة طلعو مجموعة
بنات واني بالخطأ داباوع گدامي
ع الطريق وصارن گدامي هل هنا
اني ماغضيت بصري لان اني
مامتقصد ولا منتبه فهذا ميعتبر
عدم غض البصر وانتي ماقريتي
بالقران من تكولين ماتتحاسب بقبرك
عن المتبرجات عن هاي شسوت
وهذيچ شسوت لكن الله بالقران
قال ، ولا يبدين زينتهن ، وبآية اخرى
ولا تبرجن تبرج الجاهلية ، وهذا
الي الله أمر المرأة بي عدم التبرج
والتزين يا دكتورة ولذلك اني كاعد
اذكر الناس مثل ما انتي استدليتي
بالاية وكلتي الله يكول للرسول انت
مذكر نعم اني كدامج داذكر الناس
واقتدي بفعل الرسول فهل هذا
فعلي خطأ من اامر الناس بالمعروف
وانهاهم عن المنكر اذا تكولين لا
فعلك صحيح اذن انتي لا فهم
ولاعلم لان كل كلامج انقلب ضدچ
ف شفتي يا دكتورة انتي حتى
مو يم المجال مالتج ولا يم هذا
الاختصاص منو گالچ انتي دكتورة
من الي انطاچ شهادة انتي حتى
بعلم النفس متفتهمين الي انتي
دارسة كلية
1-فسرتي كلامي خطأ
2- افتريتي عليه بكلام ماگلته
3-حللتي شخصيتي كله خطأ
4- ماتفهمين بالدين ولا يمه
ف اني انصحچ تغيري اختصاصچ
وتروحي تتعمقي بالدين اكثر
لان انتي لا يم علم النفس ولا يم
الدين ، واكو مثل عراقي يگول
لا حضت برجيلها ولااخذت سيد علي
انتي لا حضيتي بعلم النفس
ولا اخذتي الدين الصحيح
ف اني انصحج انج تراجعي نفسج
لان هذا تفكير نسـ ـويات ماكل
كل تفكيرج لان ما اخذتي كلامي
الي بالقناة مجرد نصيحة منفعة
ارشاد اريد الخير للناس ودانصح
لا انتي اخذتي كلامي عبارة عن
اني ضد المرأة
كلامچ افتراء وكذب والدليل
قنواتي كدامج راح
تلاگي منشورات نصائح
ومنفعة للمرأة وكلام طيب
ان بعض الظن اثم!

وهسة منو يفهم بعلم النفس؟
وعرفتي منو عنده نقص بشخصيته!
انتي ام الكُلية ؟
لو اني الي مكمل 3 متوسط !

+ المنشور هذا كان نصيحة للكل
وليس فقط لهذي البنت


وبالنهاية ثبت القناة عندكم
لان كل منشور ينزل بي منفعة
الكم حتى لاتضيعو القناة 🌸

لتگول اني مـ ـلحد گول ما اصلي وفضها
زين انت شنو افتهمت حتى وصلت لهذي
المرحلة اني متأكد هذول اكثرهم اعمارهم

ماتعبر 18 او بالزايد 20 وجوا يبدي
طريقة مايصلي بعدين يگوم يتابع
هذول الي يفسرون القران من جيبهم
بعدين يگوم يتابع فديوهات التيكتوك
والريلزات يطلعولة هذول الي عايشين
بامريكا لو المصريين لو يشوف ستوريات
بيها موسيقى حزينة وعبارات ويتابع
هاي الحسابات الي تنشر ايات من القران
وعود يبينون القران متنـ ـاقض وهنا
يبدي يصدگ وياخذ بكلشي زين انت
من هيچ تفتهم وشاطر ومسلم عقلك
للبيجات وللحسابات هاي الي اصلا
اصحاب هلحسابات مُـ ـراهقين وانت
بكل بساطة انضحك عليك وانغسل
عقلك، زين انت قريت القران كله ؟
زين انت رحت شفت هذي الايات
الي ينشروها ويگولون القران هيچ
والقران يحـ ـرض ع قـ ـتل تعبت
نفسك شوية ورحت قريت تفاسير
لو بس شفتلك فديو تيكتوك لو ريلز
واتأثرت گبل وعفت كل الكتب مال
تفاسير وكل العلماء وكلشي عفته
وراك وصرتلي مـ ـلحد وانت اساسا
حتى كتب الملحـ ـدين ماقاريها
واذا قاري ف قاري منها مقتطفات
تروح تبحث بلگوگل تبحث بلتيكتوك
عن اسم الكتاب وتشوف فديوهات
عنه يعني حتى كتب الملـ ـحدين
انت ماقاريها زين انت هنا شلون
عرفت نفسك صح اذا لا قاري كتب
التفسير مال قران ولا قاري كتب
الملـ ـحدين زين هذي كتب جماعتك
الملـ ـحدين من قريتها رحت بحثت
على ردود من علماء المسلمين وشفت
شلون يردون على كتب هذول لو لا ؟
كلفت نفسك ورحت بحثت عن آية انت
شاك بيها شي بحثت عن موضوع
وسمعت من الطرفين سمعت من علماء
المسلمين ومن جماعتك الملـ ـحدين
وشفت منو كلامه منطقي ومنو حجته
اقوى لو بس سمعت من طرف واحد
هسة اني من اشتكي عليك بلمحكمة
القاضي يسمع فقط مني لو من الطرفين
اكيد من الطرفين حتى يفهم منو هنا
على حق ومنو على باطل اذا انت
سمعت بس من جماعتك شلون تريد
تعرف الحق ويامن هذي نقطة عليك
وانت ماقريت كتب وتفاسير العلماء
المسلمين هاي نقطة ثانية محسوبة
عليك ومارحت عرضت الايات
او الشبهـ ـات الي عندك او الشكوك
على مُناظرين ، شيوخ ، علماء
وميحتاج اصلا تسأل احد لو تتعب
شوي وتروح تبحث عن كتب التفسير
راح تلاگي اجوبة واذا ماتعرف تدور
الكتب روح اسأل احد تشوفة
محتواه ديني او شيخ او مُناظر يفهم
اما تستفسر منه اما تطلب منه كتب
واني متاكد والله العظيم اغلب هذول
الي يگولون احنا ملحـ ـدين هذول
لا قارين كتب الملاحـ ـدة ولا قارين
كتب التفسير مال قران ولا باحثين
ولا مـ ـناظرين شخص ولا مناقشين
هذول مجرد بدو طريقهم تركو
الصلاة واتأثرو بفديوهات تيكتوك
وريلزات الفديوهات الي ذكرتها
انطيكم دليل بسيط مرة اجاني
شخص ماعرف مـ ـلحد مسلم
ناقشني ع كلام بالقران گال
معقولة الإسلام بي هيچ شيء
و الله هيچ يگول ف طلعت
اله الآية ، طبعًا اني اعرف هنا
افشلة واگله شلون تحچي بشي
ماتعرف بي ولا باحث ولا قاري
بس مع هذا رحت جبت اله الآية
گلتله اتفضل هذا كلام الله بالقران
چان گال، هيچ بالله لعد اذا الله
يگول هيچ ، سـ ـب الله يعني
لان انحـ ـشر وماعرف يرد بعد
ف ما عنده بعد اله هذا الحل
ف حتى تشوفون هذول مجرد
بالاسم مـ ـلحدين داحچي على
العراقيين خصوصًا واما باقي
دول العربية هم اغلبهم هيچ
الملاحـ ـدة الي يتفلسفون
وقارين هذول اغلبهم بدول
الغرب دول اوربا وبدول اسيا
الي هي الاسيويين الكورييين
اليابانيين والصينيين هم بيهم
هواي لكن بدول العرب المـ ـلاحدة
الي مـ ـلحدين فعلا قليلين كلش
ف ياعمي هي شنو مـ ـلحد انت
انولدت بالعراق لو مسلم لو من غير
ديـ ـانة مـ ـسيحي ، ايزيـ ـيدي
صابئـ ـي، اكو غير هذن الديانات
بالعراق ماكو واذا اكو ف ينعدون
قليلين كلش، وهذول اكثرهم اهلهم
ميعرفون بي هيچ تفكيره وهيچ
يگول لو يعرفون يشبعو كـ ـتل
ويعيدون تربيته من جديد او
مو شرط يكـ ـتلو لان الكـ ـتل
ميجيب نتيجة يعيدون تربيتة
من جديد لان هذا لا فهم ولاعلم
لا فاهم شنو الالحـ ـاد ولا فاهم
شنو ديسوي ولا وين هوا ولا يعرف
نفسه بشنو ديخوط ف يا ابوية
اني لا استهـ ـزء بيكم ولا اريد
اضحك عليك بي انت اساسًا
مضحوك عليك ومغسول عقلك
وكل الي اريده الك انك تراجع
نفسك وتراجع تفكيرك واكو هواي
اشخاص وشيوخ يفتحون بثوث
على تيكتوك وتگدر تصعد وتروح
تناظرهم باحترام سواء كان
من أي معتقد دام هوا مُسلم
وعنده خبره يناظر مُلحدين اصعد
بالبث واتناقش ويا ويفهمك كلشي
لا تكعد تناقش ومن تنحشر تروح
تفتح الچات جي بي تي وتخلي
يرد بمكانك هاي اني اغلب ناس
هيچ من اتناقش ويا يروح يفتح
الچات ويخلي يرد بمكانه لعد انت
شنو وين فهمك اذا خال الچات يرد
بمكانك گول اني مافتهم او اني
ماعندي رد مو عيب ترا شنو تخجل
واذا تريد كتب تفاسير موجودة
بكثرة اكتب تفسير الطبري
وغير علماء موجودات بالنت
وبلمكاتب اهم شي ماتبقى هيچ
ضايع لا انت فاهم شنو الالحـ ـاد
ولا فاهم الاسلام ولا قاري قران
ولا تفسير تعب نفسك شوي ابوية.

بالنهاية انه اريد لك الخير
لا اكثر
وثبتو القناة عندكم حتى أي
منشور ينزل يوصلك وتنتفع.

اذا انتي طالعة ويا صديقتچ بحديقة
بمكان تتمشون ويجي شخص
سكـ ـران وشايل سـ ـچينة وگلج
انطيني موبايلج غراضچ

وفلوسچ لو اصلخـ ـچ بسـ ـچينة
هنا شتسوين غصبا عليچ تنطيهيا
وانتي ساكتة واقوى شي عندچ
تصرخين زين اذا ماكو احد بالشارع
وانتي تصرخين ومحد اجى نقذچ !
شتسوين بهاي الحالة منو يحميچ
منو يدافع عنچ زين انتي وصديقاتچ
اجو مجموعة سكـ ـاره ولزموچن
گبل بدون اي مقدمات اعتدو عليچن
وضـ ـربوچن سچـ ـاچين وفعلو بيچن
اشياء ( اغتـ ـصبوچن ) زين هذول
اشخاص سكـ ـاره مو بعقلهم وانتن
ماكو وياچن رجال يلا حلنها هنا
شتسون اذا ماكو ناس بالشارع
تصيحنهم ولا احد تطلبن منه مساعدة
ولا شايلات وياچن شي شنو تسون هنا
صراخ ميفيد محد بالشارع تدافعين
عن نفسج متكدرين لان هوا شايل
شي ويروح يكتلـ ـچ خلاص گبل
لكن لو رجال وياج يتجرئ يتقرب ؟
يتجرئ يفكر اصلاً مو يتقرب ؟؟؟
لان يخاف يتقرب مدام اكو رجال
وياچ حتى لو اجو مجموعة أو وياچ
شخص واحد هم ميتجرئون فلهذا
السبب الشرع بالاسلام حرم خروج
الزوجة بدون علم زوجها الا للضرورة
مثلاً تريد تجيب مسواگ او أكل
او تحتاج شي للبيت وزوجها ماكو
فتطلع هي تجيب واليوم تطبيقات
التوصيل بيها كلشي مواد منزلية
خضروات لحوم اكل جاهز كلشي
المهم اجتني بنت تگلي شنو البنت
تحبس نفسها متتنفس لا ماگلنا هيچ
لتبالغون، الزوجة زوجها يطلعها يسفرها
يونسها ياخذها للسوق لاهلها لاقاربها
شوكت متطلب منة ياخذها هوا لأن
الزوجة قبل لاتتزوج من تكون عند
اهلها ابوها هوا ولي امرها الاعلى
وانوب اخوها ولي امرها الثاني
ومن تريد تطلع تطلب اذن ابوها
وتطلع لو ياخذها هوا يطلع وياها
او تبلغه ويطلع اخوها وياها حتى
مثل ماسولفت الكم مايصير وياها
الامور الي قد ممكن تؤذيها او تسبب
الها اشياء اخرى او سرقة، مثل هذي
اجتني تگلي خو يكافحون ظاهرة
التحـ ـرش، ابوية عوفچ من التحـ ـرش
اني داگلچ اذا طلعتي لوحدج او ويا
صديقاتچ وصار الي سولفتلج عليه
فوگ منو يحميچ اذا ماكو وياج رجال
ف الرجال هوا سند الچ مو يحبسچ
ولا يمنعج من الطلعة سواء كان أب
أخ زوج واذا انتي مسلمة ف بالقران
الله يقول
بسم الله الرحمن الرحيم
الرِّجَالُ قَوَّامُونَ عَلَى النِّسَاءِ

التفسير:
أي : الرجل قيم على المرأة
أي رئيسها وكبيرها والحاكم عليها
ف من ناحية الشرع الله وضع الرجل
قوام على المرأة والحكمة من هذا
سولفت الكم قد تكون مستضعفة
قد تتعرض لسرقة لأذيـ ـة لتحـ ـرش
ف الإسلام اجى حتى يحصن المرأة
يحميها يخليلها درع وياها لكن
النسـ ـويات امهات الفكر الغربي
والملاحـ ـدة يصورولكم ان الإسلام
هوا ويا الرجل وليس مع المرأة
والله شفت تعليقات لبنات يگولن
اصلاً الإسلام ذكـ ـوري اجى ويا
الرجال وظالم للمرأة يعني ديگولن
على الله حاشاه لله يگولن عليه
ظالم معقولة انتو اذا مسلمين
تشوفون كلامهم هيچ وتجاوزهم
على الله سبحانه وتعالى عادي
او صحيح ؟ لو تجي وحدة تگول
كافحو ظاهرة التحـ ـرش يعني
لا تفكيرچ منطقي ولا هوا صحيح
لان اذا نريد نكافح اوك وياچ اني
شنكافح كم مليون متحـ ـرش ؟
زين اذا نفرض كافحناهم كلهم
وقضينا عليهم وهلشي مستحيل
لكن ناخذ فكرتچ بجدية ونگول
تم صار الي بالچ زين وهذول
السكـ ـاره والمجـ ـانين وهذي
العصـ ـبات يعني هذول كلهم
شلون يقضون عليهم لو هي
بس كلام جيب وصفط !!!!
لو تجي هسة وحدة تگلك انت
تدافع للمتـ ـحرش عمي من
تحچون احچو بشي منطقي عقلاني
ولتخلون هذول النـ ـسويات الي
فاهمات الحرية الشخصية هي
خـ ـلع الحجاب وتطلع مدلعة
ومفرعة وتصادق ولد وسفور
ولبس حصر وتطب وتطلع بكيفها
الاب والاخ والزوج طراطير واذا
تحاجيها تگلك مـ ـتخلف ورجعي
وهمـ ـجي حافظتلها كم كلمة
وتمد لسانها شطولة عليك اذا
تجي تنصحها تبتلي ع نفسك
الثقافة من تكون مثقف بدراستك
او بالدين او بهوايات عدة او تكون
صاحب معلومات بعدة مجالات
مثقف مو بالسوالف الي تسويها
انتي عبالچ هي هاي الحرية
الشخصية وهسة تجي كم وحدة
تگلي انت 24س تنزل منشورات
على المرأة اي انزل لان أني
احب انصح بنات الوادم الي هنة
يردن نصيحة وضايعات وميعرفن
او ممكن اهلهن ماعلموهن بشكل
صحيح وكذلك دانزل ع الرجل
والا انه شنو خال بجيبي منكم
قابل صاحب منظمة ضـ ـد المراة
حتى استلمكم وانزل بس عليكم
شوي فكرو بمنطقية ارحمو عقولنا
ولتسلمون عقولكم لهذا وذاك
ويشوهون سمعـ ـة المرأة ويگلك
شوف الإسلام يعامل المرأة هذول
الحـ ـدث مثل هذا الي نزلت
مرة اجاني هذا يدعـ ـي هوا
واثق ويتمهـ ـزل ودزلي صورتين
بيهن 60 فقرة تتكلم ع المرأة
بالاسلام وكلهن شرحتهن
وكلهن بسيطات وبيهن حكمة
لكن هوا هذا لا فاهم شنو معنى
الالحـ ـاد ولا فاهم شنو الإسلام
بس سألته عن الالـ ـحاد گال اني
ماقاري ومعلوماته ماخذهن
من المنشورات والريلزات
لا فهم ولاعلم وجاي يتهملزون
بالاسلام وبالمرأة وخلوها ببالكم
بس الديـ ـوث يقبل يطلع عرضه
يتفرجون عليهن

بالنهاية ثبت القناة عندكم بالمحادثات
المُثبتة لان كل منشور ينزل بي
منفعة ونصيحة الكم لا أكثر.🌸

من تطلعون من البيت خلي شي لأباطك !
ركسونا او كريم وغسل وجهك زين حتى
ميبقى شي بعيونك وفرش اسنانك حتى
مايكون منظرهن موحلو واضافة الريحة

تكون موطيبة بسبب عدم تفريش اسنانك
واكل شي حتى لو علچ او هيل حتى تكون
ريحة حلگك طيبة مو تگعد بالسيارة
بصف شخص والريحة تعط منك مال
اباط لو مال حلگك ترا زحمة موصغير
انت وهاي نظافة ولاتلزم السـ ـم بنص
السيارة لو بمكان بي ناس وتگعد تشرب
وتـ ـخنگ الناس بالجگـ ـاير اكو ناس
بساع تختـ ـنگ وانت ماگاعد بمكان
خاص اذا انت مامقتنع أن التـ ـدخين
عندك شيء عادي ولتگعد تخابر بنص
السيارة وتدوخ العالم تريد تمشي
الطريق خابر للضرورة لان الناس
عدها طريق دوام من الصباحيات
وملابسك من تلبس لتلبس شي
قماشته نايلون لان يدبگ على
الجسم من تعرگ ولاتلبس جواريب
نايلون لان الريحة تگوم تعط منهن
البس ملابس وجواريب قامش قطني
مايطلع ريحة ولا يدبگ وقماش بارد
ولاتاكل ثوم او بصل من الصبح
واذا اكلت بصل فرش اسنانك واعلچ
علچ اما الثوم ما يصير اله چاره اذا
تريد جيب روبة ام الثوم جاهزة
او اذا تريد تاكل ثوم اكل بس بأيام
العطل ولا تركب ويا ناس وانت
ماكل ثوم لان الريحة تعط عط عمي
وخلي معطر لجسمك حتى مايطلع
ريحة مال حموضة من تعرگ منك
وشيل وياك كلينكـ ـس او وصلة
تمسح بيها وجهك رگبتك من تعرگ
مو گاعد تمسح بأيدك وقبل لاتطلع
أيضاً نظف خشمك زين وشيل وياك
كلينكـ ـس وامسح خشمك اذا انت
بالطريق مو تگعد كل شوي تشفط
ولا تتـ ـفل بنص شارع لو گدام ناس
روح لصحيات او مكان زاوية ماكو
ناس ونظف نفسك وشيل وياك بطل
مي او مطارة حتى للضرورة تغسل
وجهك خشمك او تشرب مي حتى
لاتروح تشرب من هذي الترامز الي
بالشارع كم حلگ يشرب منها ادري
شلون تشرب من گلاص بالسوگ
يشرب بي مئات او الاف الناس !
اشتري بطل لو مطارة وخليها وياك
اشتريلك جنطة صغيرة هذي ام
الحزام تنلبس صغيرة خلي بيها
غراضك علچ هيل بطل مي مطارة
موبايلك محفظتك تخلي بيها غراضك
وبطلو هاي السولة من تدخل لكافتريا
تبقى تجدي من ابو الكافتريا تگله
خالي انطيني فلفوله خالي انطيني
كذا ترا عيب يابة انت جاي تشتري
لفة اكل واذا ماشبعت اشتري لفة
ثانية ولتشيل بأيدك بالمقبلات
اكو خالين خاشوگة او ملقطة
مال مقبلات ولتشتري لفة وتوگف
يم المقبلات تاكل بلفتك وتاكل
مقبلات من الطاسات ترا انت
مو بالبيت لفة خليلها مقبلات
بنصها واكعد اكل شنو هالسوالف
اللعبان نفس ومن تكعد بنص ناس
لتبقى تسولف وتضحك بصوت
عالي عود شوفوني اني جـ ـريء
سبورتي عفوي لاعفوية ولا شي
هذا اسمه ماكو ذوق ولا احترام
للناس من تخابر من تسولف ويا
شخص سولف بصوت ناصي
الناس شنو ذنبها تنزعج وتـ ـأذيها
خلي ذوق عندك بالشارع وخلي
اسلوب احترام للمقابل احترام
الناس بكل مكان عام لان انت
بمكان عام مو ملك لأحد الشارع
ملك للجميع فلازم تحترم الخارج
وهذا الكلام للطرفين وليس فقط
للرجال ، بالنسبة للرجال اكو ملاحظة
من تريد تشتري شورت اشتري شورت
اصلي ينضبط كلش على جسمك
بحيث العضو يكون مخفي من تلبس
بنطلون لان بعض الشباب اشوفهم
لابس بنطلون ومبين العضو وهذا
الشيء عيب وزحمة اشتري شورت
اصلي الواحد ب3 الاف لو بألفين
ولاتلبس برمودة فوق الركبة لأن
الركبة من ضمن عـ ـورة الرجل
البس برمودة اسفل الركبة
ولاتحف حواجبك وتلقط وجهك
وتخلي محمر لو مورد مال وجه
وحتى البعض يخلي حمرة خفيفة
خلي مرطب مال شفة شنو تخلي
حمرة بس هاي السوالف مال مكياج
اكيد ميسويها الا الي يريد يصير
نثـ ـية يخلي مورد وحمرة ترا اكو
مرطب شفة طبي واكو مرطب
وكريمات مال وجه وشغلات عناية
اشتري كريمات مال ترطيب بشرة
اشتري واقي شمس خلي لوجهك
من تريد تطلع لان شمس العراق
تحرگ البشرة مو انت طالع بدون
واقي وتريد بشرتك لاتحترگ ولاشي
بدال ماتخلي مورد ومكياج خلي
واقي شمس بحمي بشرتك وخلي
مرطب لبشرتك سوي جلسات
تنظيف لبشرتك كل شهر مرة هيچ
روح لمركز وسوي تنظيف لوجهك
الرؤوس السوداء او من الدهون
او من الكلف والاثار او تفتيح
البشرة وبالبخار ( اختياري )
يعني هاي مال تنظيف البشرة
شي اختياري للي يخلون مكياج
مورد وباودر وحمرة خفيفة لوجهم
بعض الشاب يروح يشتري مواد
مال عناية الي ذكرتهن ويروح
ينظف بشرته احسن مايخلي
هلسوالف سوي شي صحح
مو تعالج الخطأ بالخطأ انت
بشرتك تعبانه روح عالجها
مو تروح تخليلي مكياج خفيف
حتى تخفي اثار وجهك وترا هذا
المنظف الي يم الحلاق سعره
الفين دينار مدري 5 الاف هذا
الي يخلي لوجهك وشوي وتغسله
ترا كلشي ميسوي كلاوات نادراً
الحلاق يجيب منظفات نوعية
زينة وماتحصل حلاق يجيبهن
بس المراكز والصالونات الرجالية
وهذا الكلام مجرد نصيحة الك
رتب نفسك ومسموح اعادة
النشر او وجهو لأي ولد تعرفوه👍

واخر شي اكو بنت مسوية دورة
مال سادس اعدادي لكل المواد
مجانية ولأن مجانية راح انشرها
الها تبلش يوم 7/15 انظموا
بالقناة وانتظروا يبلغوكم من
تبلش للي ماعنده امكانية
رابط القناة ↓↓
https://t.me/sixthx_27

بالنهاية ثبت القناة عندك لأن
كل منشور ينزل بي منفعة الك

هاي شنو طلاب السادس بس رسب ينتحـ ـر
شنو هاي انوب ديزيدون هم !!!!
هاي كل سنة من تطلع النتائج نسمع بطلاب
ينتحـ ـرون لعد شلون تريد الله يوفقك !

يعني انت لان رسبت رحت گبل نهيت
كلشي وخسرت الدنيا والاخرة وأذيـ ـت
اهلك والناس الي تحبك والله علمود شنو
لان رسب وشنو يعني نهاية العالم ؟
متفكر بأمك تگعد تبچي عليك كل يوم
مگابله صورتك وتبچي شنو ذنبها
اخوانك خواتك اصدقائكم متفكر
بيهم هسة ع اقل فكر بس امك
وابوك ربوك كبروك وتعبو عليك
سنين وتالي هيج تجازيهم ببساطة
ترا عادي تكدر تعيد سنة ثانية وثالثة
واعوض الفشل مو ترسب وتستسلم لا
الفشل من ترسب وبعد ماتحاول
والنجاح مو دائمًا يجيك من اول محاولة
قد تكون ضروفك ماساعدتك صار وياك
ضروف صعبة ، او قد تكون انت هملت
دراستك والي يغلط يتعلم ويصحح غلطه
بس انت تعالج الغلط بالغلط وتخسر
كلشي ، لا اتقبلها كلش عادي بوية
خلص ضروفك خلصت وبلش سنة
جديدة واطلب من الله يعوضك
وبعدين اكو طلاب يطلعون معدلات
ب80 و ب90 ناجحين ويعيدون هذول
مو بشر حالهم حالك وناجحين هم
بل حتى معدلاتهم عالية ومع هذا
يطمحون للأعلى ، والله يوصيك
بالصبر لازم تخلي عندك صبر ايمان
قوي برب العالمين الي يتوكل على
الله مايخيب ، بس اذا انت اهلك
لامعلميك لا مربيك ولا تفهم بالدين
لان هاي النماذج الي تروح تنتـ. ـحر
لو تفهم بالدين لو اهلهم معلميهم شنو
هذا الشيء ومعلميهم الاشياء الحرام
ماراحو سوو هيج وهذا الغلط يتحمله
الاهل أيضاً لان كل راعي مسؤول عن
رعيته اذا انت تارك عيالك متعرف بيهم
شيسوون ميسوون شيفكرون شيخططون
ومن تصير الطگاگة تگعدون تعضون
بأصابعكم ندم ، اهل هل وكت تربيتهم
تعبانة اغلبهم ميعرفون يربون يخلفون
ويشمرون عيالهم بالنت وبلشارع ميعرف
شديسوي ميسوي ميعلموهم يربوهم
ميعرف ابنه بنته شديسوون ميسوون
يعني الله خلقك حتى انت تعيش حياتك
بكيفك وبمزاجك مو الله بالقران گال
وما خلقت الجن والأنس الا ليعبدونِ
انت انخلقت للعبادة ما انخلقت
حتى تعيش بكيفك اذا رسبت تروح
گبل تنتـ ـحر ماحصلت اي شيء
فقط أذيـ ـت اهلك اقاربك احبابك
وخسرت الدنيا والاخرة لأن روحك
امانة مايحقلك تـ ـأذي نفسك أبد
هسة انتو المكملين و المؤجلين
عندكم فرصة تشدون حيلكم بس
صفوا بالكم رتبوا وقتكم وحاولوا
لتفكرون بشيء ثاني اتحملوا هاي
الفترة اضغط ع نفسك ، وانت كذلك
الي رسبت والله عادي ترا مو گبل
تجي عدلة وياك مو أي شي تريده
لازم يصير من أول مرة ممكن كان
تقصير منك او ممكن كانت عندك
ضروف ماسمحتلك هسة عيد سنة
ثانية اعتبر نفسك ناجح وجاي
تعدل معدلك لاتعتبر نفسك رسبت
وباوع للأمام لاتبقى تباوع للخلف
الماضي صار ماضي والندم ميفيد
و الي بي خير هسة يصحح غلطه
او يعوض الي صار ويا اذا صارت
ويا ضروف صعبة مو يبقى گاعد
ويفكر التفكير ميفيد ابوية خلص
باوع للمستقبل واشتغل عليه
خلي توكلك وأمك بالله واتوكل
لان الرسوب مو نهاية العالم بل
هوا بداية تحدي الك من جديد
وبلش اقرا من هسة وحاول تدخل
خصوصي اذا تكدر واذا ماعندك
امكانية أقرأ بقنوات اكو هواي قنوات
يدرسون مجانا او صادق اشخاص
شاطرين يساعدونك واذا تحتاجون
اشخاص يساعدوكم بكل وقت
اني مسوي مجموعة دراسية
صارلها اكثر من سنة وبيها بنات
مشرفات يساعدنكم تحتاجون
ملازم مصادر مدرسين مرشحات
ادخل للمجموعة وادخل بقسم
مرحلتك واطلب وانتظر المشرفات
يجون يردون عليك واتطمنوا
المجموعة مراقبة 24س مابيها
اي كلام خارج الدراجة
أي طالب يريد ينظم من الابتدائية
للكلية لكل المراحل مسوي.

الرابط للأنظمام ↓↓
https://t.me/+XZQktAjs2aY1NWIy

بالنهاية ثبت القناة عندك
بالمحادثات المُثبتة لاتضيعها
كل منشور ينزل بي منفعة الك

هل الزوجة واجب تخدم زوجها وعيالها او لا ؟
هلموضوع مهم وراح احچي عن الطرفين

واريدك تقرأ للنهاية وبعدها تعال ناقشني
لو تحب تناقش او عندك رد على الموضوع
بدايتًا ، الزوجة شرعًا بالاسلام غير واجب
عليها تخدم زوجها و فقط واجب
عليها تربية اطفالها هذا مسؤولية الطرفين
الزوج والزوجة ثنينهم مسؤولين ع تربية
الزوج مامجبور يطبخلچ ولا انتي مجبورة
تطبخيله لكن خلي ببالچ انتي متزوجة
شخص شريك حياتچ واهلچ وصديقچ
وحبيبچ وسندچ وكلشي الچ يعني هذا
الشي مو واجب تطبخيله ولا تغسليله
ملابسة بس الزواج حياة مشتركة لازم
واحد يعين ويساعد ويسند الثاني والا
حياتكم ماراح تمشي صح وتكثر
المشاكل ساعدي صيري الة سند وهوا
هم يساعدچ، لتخلين امهات المساواة
لو احد ثاني
يغسل عقلچ يگلچ انتي خدامة اله
انتي متزوجة حتى يدللچ مو تخدمي
وتكعدين الفجر تسويله اكل لحظرة
جنابه ويرجع تغسلين ملابسه وتسويله
الاكل ويجي ينام لتسويله هيچ وانتي
لازم يوفرلچ خدامة ولازم يطلعچ سفر
طلعات ونسات ومن هلكلام يغسلن
عقلچ ، هوا كلامهن صح لكن يوصلن
الچ الفكرة بطريقة مسمـ ـومة يعني
ترا ماكو زوج ميونس زوجتة ويدللها
اكيد كلنا هيچ الا بعض الذكـ ـور يلزم
زوجته يضـ ـربها على ابسط شيء يعني
اذا ممسويتله اكل يلزمها يمـ ـلخها
ويسمعها كلام موحلو اكو هيج نماذج
وهذا الغلط غلطچ انتي اختاريتي واحد
مو رجال اختاريتي واحد متخـ ـلف
ويعاملچ خدامة وميعرف شلون يتصرف
وياچ ويسايسچ، وطبعا اكيد من حقچ
تطلبين خادمة تخدمچ لكن اذا كان
زوجچ حالته المادية مو كلش لاتضغطي
عليه يجوز بعدين الله يوفقه ويوفرلچ
خادمة اذا تردين من تشوفين حالته
المادية صارت زينة گليله، لكن خلي
ببالچ ترا راح احچيلكم شي عن بعض
الخدامات اني دخلت بگروب بالفيسبوك
وشفت عوائل كومة كومة تنشر والله
يجيبون من المكاتب عمالات يسوون
وياهن عقد سنة او شهور واول ماتجي
تشتغل كم يوم وبعدها تسـ ـرقهم
وتشرد تاخذ ذهبهم وفلوسهم وتروح
لو بعض الخادمات يلزم اطفالكم
يكـ ـتلنهم بدون ماتدرون من وراكم
او يجوز تكتـ ـلج الچ من تشوفچ وحدچ
لعد شنو هذن الاجنبيات العصـ ـابة
وحتلو لو اكو خادمات زينات اني برأيي
اني والله عن نفسي احب اطبخ لزوجتي
مستقبلاً واني اعرف اطبخ الحمدلله
طبخي محترف واتعلم دائمًا من
اليوتيوب طبخي محترف مو هيچ ترا
اتعلمت لان اذا اهلي ماكو اني اطبخ
لنفسي ومراات اهلي موجودين عندي
ترا 8 اخوات ومرات هنة موجودات
واكوم اني اطبخ الهن والله ونگعد
وناكل ومرات اجيب اكل وياي
وحتى أيضاً للمستقبل لزوجتي اذا
ولدت طفل متگدر تتحرك بهلفترة
ف اني اقوم بالواجب غصبا عليه
اسوي اكل اوكلها البسها اسبحها
لان هي هنا بفترة وبحالة يرثى لها
هي ستوها ولدت طفل شتكدر تسوي
ياعمي واكو بعض المتزوجين من
زوجته تجيب طفل يوديها لاهلها
يعتنون بيها اسبوعين هيج وترجع
يمة لين ماتصير زينة او يجيب اهله
اخواته يساعدنها هلشي بكيفكم
الافضل الزوجة يوديها لاهلها حتى
اخواتها امها يمها من تولد يساعدنها
بشغلات مال بنات وانتو تعرفون
بعد بشنو يساعدوها او يجيب وحدة
من خواتها او امها يمها بهلفترة تبقى
يمهم اسبوعين هيج تساعدها لين
ماتتحسن وزوجها هم وياها يكون
يساعدهم بالاكل بشغلات ثانية
ف اني عن نفسي والله مو امدح
بنفسي ، لكن اني احب اشارك زوجتي
مستقبلاً حتى بالطبخ لان هذا مو
واجب عليها بل هي متفضلة عليه
من تطبخلي هي جاي تسويلي معروف
جميل من حظرتها واني هم لازم احس
ع نفسي واكوم وياها اذا جان ماعندي
شي اكلها بشنو اساعدج؟ هي هنا
راح تحس بشعور حلو مينوصف تگول
هذا شگد لعد يحترمني وتكبر بعين
زوجتك وتصب وياها اكل وكذلك
شغل البيت هي الحياة الزوجة هاي
مشاركة واحد يساعد ثاني بالطبخ
بشغل البيت بس من تشوفين زوجچ
رجع تعبان من شغل متكسر أكيد
لازم يرتاح شوي يمدد لان هوا طالع
للشغل حتى يجيب الچ خبزة وحتى
يوفر الچ مصروف تشترين بي ملابس
شغلات للبيت لنفسچ او اله للطلعات
يعني هي من اسمها حياة مشتركة
ف الافضل ماتجيبين خادمة حتى لو
زوجچ عنده كومة فلوس وغني تدرين
ليش لان حلاتها انتي تدللين زوجچ
واطفالچ ياكل من ايدچ ويگلچ عاشت
ايدچ الحلوة عاشت اناملچ عاشت
ايدچ ام فلان هاي الكلمة وحدها
تسوى الخدامة هوا الزواج شنو لعد
لطافة ودلال كلام حلو ومساعدة
وهوا هم اذا يفتهم وخوش رجال
راح يدللچ ياخذچ كل فترة لاهلچ
تسيرون عليهم ياخذچ زيارة
سفرات لغير دول
يجيبلچ هداية كل فترة ملابس
نوم اكسسوارات شغلات يجيبلچ
اكل ويا اكيد ميخليچ تطبخيلة
هوا هم يساعدچ يطبخ وياچ
وهلشي كله يعتمد عليج يا عمي
اختاري شخص صح حتى يدللچ
يساعدچ يعينچ ، تختاري شخص غلط
راح يعـ ـذبج اقل شغلة تقصير
خطأ وممكن انتي ممسوية غلط
بس لان اتاخرتي بتجهيز الاكل يجي
يلزمچ يملخـ ـج ف اختارن شخص
مثقف هيچ تفكيرة مثل ماشرحتلكم
والله اني من نفسي ضميرلي ميسمح
لي ابقى گاعد وزوجتي تشتغل لازم
اكون وياها.

بالنهاية ثبت القناة عندك بالمحادثات
المثبتة حتى لاتضيعها لأن
كل منشور ينزل بي منفعة الك. 🌸

راسلتني بنت على موضوع الشرع حلل 4 !
وگالت اريد تشرحه لان بس انت اقتنع
بكلامك ولان سمعته من شيخ وگالت
كلامه غثها كلش، طبعا هذا الشي صح

انُ بعض الشيوخ ورجال الدين ينقل
الموضوع الك بطريقة حادة ويخليك
تنفر من كلامه وحتى لو كلامه صحيح
واستدل بالقران يخليك تكره شخصيته
او تعاند ماتاخذ بالكلام، ف راح اشرح
الموضوع الكم من القران وليس كلامي
راح انقل الايات والتفسير ثم اشرح
الكم بطريقة بسيطة ثم انطي رأيي
بالنهاية بخصوص هلموضوع وانطي
نصيحة، لذلك ارجوا ان تقرا المنشور
للنهاية لاتقرأ البداية لو للنص وتجي
تتكلم وتريد تناقش اقرا وافهم للنهاية
واذا عند كسؤال او نقاش ع الموضوع
ارسل، نجي للقران الكريم
بسم الله الرحمن الرحيم
فَانْكِـ ـحُوا مَا طَابَ لَكُمْ مِنَ النِّسَاءِ
مَثْنَى وَثُلَاثَ وَرُبَاعَ فَإِنْ خِفْتُمْ
أَلَّا تَعْدِلُوا فَوَاحِدَةً
هنا رب العالمين، يگاك اتزوج من
النساء ثنين 3 او 4 مدام بالحلال
بشرط تعدل، يعني بيها شرط شنو
تعدل ؟ يعني اذا اتزوجت ثنين
يوم يم هاي ويوم يم ذيج تنطي
فلوس لهاي تنطي فلوس لذيج
تبادل هاي الحب وتبادل ذيج الحب
اذا ماعندك القدرة تعدل هيج بينهن
بكل الامور لازم تعدل تشتري لهاي
تشتري لذيج ف الله بالنهاية گال
فَإِنْ خِفْتُمْ أَلَّا تَعْدِلُوا فَوَاحِدَةً
اذا تخاف او تشك انك ماراح تعدل
بينهن اتزوج وحدة وخلص تمام !
زين بعض العلمانيين والجهلة گالوا
ان التعدد فقط من اليتيمات مو من
أي امرأة استدلوا ب أية اخرى وهمة
فسروها من جيبهم والاية واضحة
بسم الله الرحمن الرحيم
وَإِنْ خِفْتُمْ أَلَّا تُقْسِطُوا فِي الْيَتَامَىٰ
فَانكِـ ـحُوا مَا طَابَ لَكُم مِّنَ النِّسَاءِ
مَثْنَىٰ وَثُلَاثَ وَرُبَاعَ، هنا الله يوضح
الك اذا كان عندك يتيمة انت ترعاها
اهلها متوفين بنت جيران بنت اقارب
وانت ربيتها يحق لك تتزوجها لكن
ماتستغل وضعها وتگول هي يتيمة
وماتنطيها مهر كامل، بل تنطيها مهر
كامل حالها حال البنت الغير يتيمة
لذلك الله هنا كال اذا تخاف أنك
ماراح تعدل او تنطي اليتيمة حقها
تكول ابوها متوفي اهلها ماكو خلي
اتزوجها وما انطيها مهر وهي تقبل
لان يتيمة هذا شيء حرام، لكن بعض
العلمانيين والجهلة كالو الله هنا حلل
الزواج من 4 بس من اليتيمات لكن
نعذرهم على جهلهم لان لو تروحون
هسة لأي تفسير راح تلاگون التفسير
نفسه هذا الي اني شرحته الكم للي
يحب يتأكد ابحث ورا كلامي وراح
تشوف كلامي 100% كله دقيق لذلك
الله احل الزواج من 2 او 4
سواء يتيمة او غير يتيمة لكن شنو
بشروط ركز، هسة انطي رأيي
وانطي نصيحة، اني برأيي ان بهذا
الوقت اغلبنا ماعندة مسؤولية كبيرة
يتحمل زوجات 2 مو 3 لو 4
بصراحة اكو بهذا وقتنا يتزوج اكثر
من وحدة عندة امكانية مادية قوية
عندة قوة بدنية عندة مخافة الله
وهنة قابلات برضاتهن، لكن بعض
منكم راح يسألن يگولن هوا لو يحبها
مايتزوج عليها هوا لو يحترمها كان
ويقدرها ينطيها مكانتها مو يشارك
وحدة وياها ومن هالكلام لكن
اتذكري هذا شرع الله لكن كلامج
هم بي وجهة نظر يعني انت اذا
تريد تتزوج 2 او 3 من البداية صارحها
قبل لاتتزوج گللها ترا اني احب اعدد
اني اريد اتزوج وياج وحدة ثانية
وثالثة اذا تقبل تقبل اذا ماتقبل هنا
تگليله شوف غيري اني ماقبل وهذا
شي من حقج تمام وكذلك اذا گالچ
ماتزوج عليج وانتي تخافين خاف
مستقبلاً يغير كلامه، فتگدرين تخلين
شرط بالعقد مال زواجكم انُ مايتزوج
عليچ وهذا الشيء جائز صح هوا حلال
لكن انتي خليتي شرط وعليه الالتزام
بشروط العقد، وهيج انتي تكدرين
تحافظين ع هالشي، لكن لتگولين
هوا لو بي خير لو يحبني لو رجال
مايتزوج عليه وهاي يا عديمة الشخصية
ويا عديمة الكرامة تقبل،عفوا كلامج
خطأ لان الرسول عدد وتزوج 11
وحدة هل معناه هوا مثل ماذكرتي ؟
هل زوجات الرسول هنه مثل ماگلتي ؟
لا اكيد هي تقبل او ترفض، والحكمة
من رب العالمين شرع هالشيء حتى
يكون بي ابعاد عن الحر.ام وعفة
للطرفين واكثار الأمة الاسلامية
ممكن تكول :
انتو مو مثل الرسول متكدرون
تعدلون بينا مثل ما الرسول يعدل
بين زوجاته، اكو يكدرون واكو لا
لان كلتلكم حالياً اكو بهذا وقتنا
قله ديتزوجون ويعددون، واما اني
اتزوج وحدة بصراحة لان ماعندي
امكانية اتزوج ثنين وكذلك ممكن
هي تقبل اتزوج عليها وتثق بيه اني
اعدل بينها وبيج ذيچ لكن ممكن تنقهر
وتبقى بگلبها وماتريد تبين اليه لذلك
وخلي ببالچ اذا هوا اتزوج ثنين
او اكثر مو معناه ميحترمج وميقدرچ
لان هذا فعل الرسول اني رأيي
بالنهاية انُ اتزوج وحدة واكتفي بيها
حتى لو عندي امكانية مادية وكذا
لكن اهم شيء متكولون هلشي
مقـ ـزز او تسيئون لهذا الفعل لان
هذا كلام الله وهذا فعل الرسول !
ف انتبه انك تسيء لله او للرسول
وان شاء الله وضحت الكم هلموضوع
بشكل مبسط وبتفسير صحيح
وبفكرة توصل للعقل مباشرة وهذا
المنشور مسموح الكم توجهو لغيركم
او بقنواتكم . ( الموضوع للمُسلمين )

وبالنهاية ثبت القناة بالمحادثات
المثبتة حتى لاتضيعها لان كل
منشور ينزل بي منفعة وفائدة الك

تتزوج وحدة هم يادوب تلحگ ع عيشة
هي وحدة ماتلحگ تتونس وياها عمي
فلتورطون بنات الناس ترا صعبة
متشوف ربك خله بيها شروط.

بيوم 10 محرم طلعت الفجر للشغل طبگت سيارة
گدامي اول ماطلعت چنت ماخذ وياي نظارات

بالعربانة لان اني قبل فترة اشتغلت بيهن
ف چنت بوقتها بغداد ادرس لغة هناك
واشتغل بنفس الوقت المهم ف من طلعت
للشغل اجتني سيارة فاتو من يمي فجأة
نزلو شافو النظارات گامو يشوفون موديلات
وكذا ف اني جنت مشغل قران بموبايلي
ف بقو يگلبون بالنظارات واحد منهم گال
حسب ما اذكر گال هيچ :
اكو واحد يطلع هسة يبيع نظارات
وكان طبعا يمزح الولد يعني مو يستهزء
ف من گال هذا الكلام القران الي اني
مشغله وصل لآية هذي فجأة

اللهُ يَبْسُطُ الرِّزْقَ لِـمَنْ يَشَاءُ مِنْ
عِبَادِهِ وَيَقْدِرُ لَهُ إِنَّ اللهَ بِكُلِّ شَيْءٍ عَلِيمٌ
فهنا صفنت گلت هذا رد من الله
على كلامه رغم هوا كان يمزح لكن
سبحان الله هوا كال هالكلام والقران
الي اني مشغله رد عليه فجأة بهذي
الآية، هل تشوفون هذا شيء عادي
او انه رد من الله، من يؤمن بالله
يشوف هذا رد من الله ومن لايؤمن
بالله يشوف هذا امر عادي وصدفه
مثل النبي موسى خرج هوا وقومه
وماكان يعرف الله راح يشق اله البحر
ولا كان يعرف شنو ينتظره ولا كان
يعرف البحر ينتظره خرج واتوكل
على الله وكان مؤمن ان الله مايتركه
لوحده وفعلا من وصل للبحر الله
ماتركه وفتح له الطريق من نص البحر
وهذا الي اني سويته طلعت الفجر
ساعة 4 لو 5 اذكر ورا الصلاة
كان بوقتها ليلة العاشر من محرم
وكان الشارع الي امشي بس ظلمة
ماكو ولا بشر لان جنت بعندي ستوني
طلعت للشغل بشارعنا دامشي واجت
السيارة ويا ماطلعت اني ومن اجو
يشترون والولد كال هالكلام الآية
ردت علة كلامه وبعدها اشترو
مني وراحو فشوف ربك شلون
كاتبلك الرزق لو كاعد بلصحراء هم
ممطن يجي شخص من يمك ويشتري
اذا الله كان كاتبلك رزق، لذلك الله
وضع النا قصص الانبياء بالقران
حتى يشوفك انه مايترك عباده
و الي يتوكل على الله مايخيب
ويجيك واحد لافهم ولاعلم
وهوا صلاة ميصلي يگول اني
ملحـ ـد و الله ماكو وهوا إذا تگله
شنو معنى الالحـ ـاد ومنين اجى
وشنو اصله ومن يا نظرية انبنى
يضل صافن وفاك حلگه ويضل
يمتمت وميعرف شيحجي لو اقوى
شي عنده يكفـ ـر لو يشـ ـتم حتى
فقط يرد عليك لان انحشر وماعرف
يرد عليك وتلگاهم اغلبهم هذول
اعمارهم 15 لو 17 لو 20 ستوا
بلغ وصار يشوف ريلزات يضحكون
عليه وخلص هايهية صار ملـ ـحد
وهذا الكلام عن تجربة ناقشت كثير
من الي يدعون انهم ملحـ ـدين ومن
ينحـ ـشرون يصيرون يكفـ ـرون حتى
عود يغثني او يختفي بعد مايجاوب
وهذا بسبب انهم مجرد عقول ينضحك
عليها بفيديو لو ستوري لو منشور !
وميتعب نفسه ويروح يشوف ردود
علماء المسلمين على كل الشبـ ـهات
وعلى كلام الملاحـ ـده ميقرا ولاشيء
ولا يبحث ولايتعب نفسه واذا يريد
يقرأ فيقرأ فقط كتب الملاحـ ـده
وهوا تلگاه چان صلاة ميعرف يصلي
فشوفو رب العالمين اذا راح يحفظك
او يرزقك وين ماتكون وبأي زمان
ومكان راح يكون معك و أول خطوات
التوفيق هي الصلاة الالتزام بالصلاة
مهما كان عندك ذنوب واخطاء ابقى
ملتزم بصلاتك كلنا نخطأ ترا
ومامعصومين بس لاتترك صلاتك
ودائما ادعي بهذا الوقت الي هوا
بعد الاذان، ورد حديث صحيح ثابت
عن الرسول صل الله عليه وآله وسلم
انه الي يدعي بعد الاذان مباشرة
يكون وقت استجابة ان شاء الله
وفعلاً، والله ثم والله جربت هذا
الوقت واستجاب لي باشياء صعبت
علي جداً وانحلت لي مشاكل كبيرة
وحق رب العالمين هذا الوقت بي
استجابة دعاء بعد الاذان ادعي
أي اذان مال أي صلاة أول ماينتهي
المؤذن انت ادعي وكمل دعاء وصلي
فوالله هذا الوقت هوا وقت استجابة
وكانت استجابات سريعة من الله

و اعتذر من الانقطاع صار فترة
ماناشر بسبب الضروف وعندي دراسة
لغة اغلبكم يعرفون وامتحاني قرب
وبالتوفيق الكم ببداية العام الدراسي
الجديد الله يوفق كل طالب .

وارجع و اكرر وحق رب العالمين الدعاء
بعد الاذان وقت استجابة ان شاء الله
لأن الرسول لايقول شيء الا بوحي يوحى
له وصدق الرسول لانه ينقل كلام الله


وبالنهاية ثبت القناة بالمحادثات
المثبتة حتى لاتضيعها لان كل
منشور ينزل بي منفعة وفائدة الك
وهذي الآية الي كانت رد من الله للولد
اسمعها وتمعن بها 🤍↓↓

https://vt.tiktok.com/ZSb4CXXM7/