【Bauhaus焗員工每月「負鐘」尅扣薪金假期】

上市時裝品牌Bauhaus被揭刻薄員工黑幕，大批員工喺佢個fb官方專頁留言，控訴公司管理手法刻薄（獎金target搬龍門、單方面減薪及限制員工食飯等等），最離譜係實行「負鐘」制度，夾硬迫員工拖欠公司大筆鐘數，離職前還唔清，就要被尅扣工資同削減年假。

申訴嘅員工話，去年發生社運期間，喺一啲日子商場唔開門，或者黑警周街亂放tg，店舖要關門或早收，員工因此每日返唔夠9小時，剩低嘅鐘數就會通通入落「負鐘」，員工要孭住條數做人，仲會好似雪球，一路帶落去愈滾愈大。

後來公司更加改變每日經營時間為8小時，但係每周合約維持54小時不變，令到「負鐘」變成恆常化，變相每人每日就算按編更返足晒8小時，都會硬食1個鐘負鐘，成個月會欠成十幾廿個鐘。

點解上市公司嘅管理層可以咁變態？員工每日努力返工賺番份糧，天經地義，點解反而會搞到自己周身債咁慘？日日做到唞唔到氣，但係睇住自己條「負鐘數」，舊數未清，新債又嚟。

離職前都還唔清條鐘數咁點算呢？公司竟然間夠膽死尅扣員工離職前薪金嚟抵償負鐘數，隨時要補番幾千蚊俾公司，更有員工連自己未放嘅大假都要奉獻埋。

呢種惡劣行為擺明係違反勞工法例，法例話僱主可因「缺勤」而扣除工資，但依家係公司未有按合約提供工作俾員工，責任在公司身上，「僱傭條例」中有關「扣除工資的限制」無一條係話老細可以用「負鐘」扣人工。即係話，公司所做嘅嘢，根本就係違法尅扣薪金!!!

至於用「負鐘」扣年假，同樣係無視勞工法例，法例已寫明僱主不可「以薪代假」，更何況員工根本無放過年假，又無收過年假工資，僱主巧立名目扣假，一樣係違法行為。

Bauhaus現職員工個個月被「負鐘」壓榨，好多員工離職時更係遭到尅扣薪金同假期，條數都拖左好耐，你地假假地都係上市公司、知名品牌吖，唔係仲要等員工上門追數，先至肯還錢吓嘛？

#Bauhaus還錢還錢還錢還錢
#徵集Bauhaus追債苦主
#勞工處個longvocation放完未
#負鐘咁嘅嘢係你先諗得出
#賣成二千蚊條牛仔褲做乜你咁陰質重手
－－－－－－－－－－－－－－－－－－
職工盟聯絡方法：
熱線：2770 8668
網址：https://www.hkctu.org.hk/zh-hant
Telegram：https://t.me/unionsforHK