【重講保就業，富臨單嘢當無事發生？】

林鄭今日交代保就業計劃細節，會放寬令更多65歲或以上年長僱員，或在特定散工行業嘅員工，都可以計算喺保就業計劃之內。

聽落幾好聽，多咗員工受惠喎，但認真睇真啲，根本就係一個局！其實呢啲所謂改動，只係幫老細拎更多津貼！講咗好多次，成個計劃嘅根本問題在於，啲錢係去晒老闆個袋度，而唔保證亦唔會監管係咪俾到每一個員工。

成個計劃只係要求老闆承諾不裁員，只要老闆願意保留個職位，員工拎幾多錢人工、全職定兼職、被迫放幾多日無薪假，政府俾咗啲錢老闆後，就一概唔會監管。

個道理好顯淺唧，你唔規定老闆拎幾多補貼要保證員工唔會少收，咁老闆咪各自玩花式、鑽空子亂Q咁嚟囉。富臨單嘢大家有眼見，全世界都睇到，藍店老闆點樣一手迫員工放無薪假，另一手攤大手板舐盡千幾億津貼，係林鄭仲可以咁無恥，繼續當乜事都無發生過。

工人被放無薪假，俾藍店老闆揸乾揸盡，你死你賤，林鄭一於少理，繼續大手大手豪花公帑買票，繼續選舉工程。

#防疫基金 #保就業 #工會戰線 #抗爭之路 #攬炒
#藍店富臨