【Bauhaus員工尋人：勞工處處長陳嘉信去咗邊？】

Bauhaus 尅扣負鐘員工薪金，至今未見有負責人出嚟作任何交代，一直龜縮唔露面唔講嘢，但就「好積極」咁逃避苦主，連fb個official page都刪除埋（係，唔單止刪留言，係成個page都刪除咗），等員工唔可以再留言控訴，真係令人嘆為觀止！

不過無論個老細點衰點無恥都好，如果無香港奴工處完美配合，佢地壓榨員工嘅手段都唔會咁猖獗。

有個Bauhaus員工同我地講，勞工處喺疫情期間無開門，咁佢唯有打去1823條熱線查詢，對方嘅回答竟然係：「勞工法例無寫明有負鐘，但亦無寫明唔可以負鐘扣人工。」

嘩，呢啲說話真係難聽過粗口！無寫明唔准做，咁你奴工處就由得啲無良僱主亂咁嚟啦喎？

更何況呢個講法係完全曲解咗法例，按照《僱傭條例》第32條「扣除工資的限制」清楚列明只有9種情況下（包括缺勤、損壞貨品、借糧、預支薪金等），先可以容許僱主在一定限制下扣除員工薪金。法例條文寫得清清楚楚，「除按照本條例規定外，僱主不得從僱員的工資（或到期付給僱員的任何其他款項）中扣除任何款項」（引自法例原文）。「負鐘」既然唔係以上任何一種情況，僱主以此尅扣薪金，即屬違法，最高刑罰罰款10萬元及監禁1年。

既然已有法例清楚規定，勞工處幾時先會作出檢控，將個無良僱主繩之於法呢？勞工處處長陳嘉信係咪放緊佢嘅Long Vacation？定係繼續Work From Home？高官返緊工定放緊假，我地小市民真係分唔到囉。

陳處長咪再打官腔叫人去勞工處求助啦，既然已知道成間公司都行緊負鐘扣薪扣假，咁點解唔係勞工處主動派人去巡查Bauhaus全港19間分店，反而要員工打1823仲要隨時俾人老點呢？

#尋人陳嘉信
#勞工處定係奴工處
#係咪上市公司犯法就唔駛拉
#消失的Bauhaus專頁
#Bauhaus拎咗政府保就業及零售業補貼近1200萬