🔥🔥🔥🔥🔥🔥
Улуу бырааһынньыгы саҥардыллыбыт «Кыайыы аартыгар» бэлиэтээтибит

❤️‍🔥 Ыам ыйын 9 күнэ – 1941-1945 сс. Аҕа дойду Улуу сэриитигэр биһиги норуоппут нацистскай Германияны кыайыытын бэлиэтиир харах уулаах бырааһынньыга. Майа сэлиэнньэтигэр Улуу Кыайыы 81 сылын бэлиэтиир дьоро күн сарсыарда 8 аҥаар чаастан сахалартан бастакы Сэбиэскэй Сойуус Дьоруойа Ф.К.Попов пааматынньыгар сүгүрүйүүнэн саҕаланна.

🎖 Манна улуус баһылыга Дмитрий Тихонов, дьокутааттар сэбиэттэрин бэрэссэдээтэлэ Иннокентий Андросов, Майа сэлиэнньэтин баһылыгын солбуйааччы Март Андреев, СӨ Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин, улуус бэтэрээннэрин сэбиэтин бэрэссэдээтэлэ Евдокия Решетникова, РФ успуорка үтүөлээх маастара, боксаҕа Европа икки төгүллээх, Арассыыйа биэс төгүллээх чөмпүйүөнэ, 49 киилэҕэ Аан дойду чөмпүйэнээтин үрүҥ көмүс призера, Олимпийскай оонньуулар кыттыылааҕа, Мэҥэ Хаҥалас улууһун Бочуоттаах олохтооҕо Василий Егоров сырыттылар. Ф.К.Попов пааматынньыгар салайааччылары сэргэ, И.Г.Тимофеев аатынан лиссиэй “Дохсун” байыаннай-патриотическай кулуубун иитиллээччилэрэ уонна Дьоруой хаан-уруу аймахтара, бэтэрээннэр сибэкки дьөрбөтүн, гирлянда уурдулар.
Салгыы тэрээһин саҥардыллыбыт “Кыайыы аартыга” монумеҥҥа буолла.

❤️‍🔥 Бырааһынньыктыы киэргэммит киин Сэбиэскэй уонна Майинскай уулуссаларынан тэрилтэлэр, оскуолалар уонна Майа бочуоттаах олохтоохторо, уопсастыбанньыктар холуонналарынан сэлэлии хаамыылара биэрэстэнэн сири тайаата.

❤️‍🔥 Кыайыы кэлэрин туһугар сырдык тыыннарын толук уурбут дьоммутун кэриэстиир Бүтүн Арассыыйатааҕы көлүөнэлэри ситимниир “Өлбөт үйэлээх полка” аахсыйаҕа сыллата дьон көхтөөхтүк кыттар. Эһэлэрин, эбэлэрин, абаҕаларын, таайдарын мэтириэттэрин туппут эдэр көлүөнэ дьоҥҥо киэн туттуу, эмиэ да үөрүү, эмиэ да курус санаа аргыстаһар.

🪔 Бастакы холуоннаҕа В.П.Ларионов аатынан орто оскуола “Беркут” байыаннай-патриотическай кулуубун иитиллээччилэрэ, 11-с кылаас үөрэнээччилэрэ Александр Яковлев, Дьулустан Петров, Ильдар Николаев, Иннокентий Романов Кыайыы Кыһыл Знамятын өрө тутан хаамтылар.

Сиһилии уонна элбэх хаартыска - БУ СИГЭНЭН киирдэххэ ⬅️

@gazetaerkeii
@ulusmedia

📲 «Эркээйи» в MAX