🆘🆘🆘
💪 Уолаттар хас биирдии көмөҕүтүгэр олуһун үөрэллэр, махталларын биллэрэллэр

📦 Бу дьыл муус устар 1-15 күннэригэр Мэҥэ Хаҥалас улууһуттан анал байыаннай дьайыыга кытта сылдьар биир дойдулаахтарбытыгар гуманитарнай көмөнү тиэрдиигэ онус төгүлүн улуустан бөлөх тэринэн баран кэллибит.

🤝 Манна улуус баһылыгын нэһилиэнньэ олоҕун-дьаһаҕын хааччыйыыга солбуйааччы Николай Никифоров, 1-кы Наахара нэһилиэгин баһылыга Иннокентий Исаков, 1-кы Баатара нэһилиэһин баһылыга Петр Андросов, Ходоро нэһилиэгин баһылыга Виктор Федоров, Мэҥэ Хаҥалас улууһун бойобуой дьайыы бэтэрээннэрин “Доблесть” түмсүүтүн салайааччыта, анал дьайыы кыттыылааҕа Афанасий Сергеев уонна мин, Афанасий Максимов, сырыттыбыт. Сорохпут арыый эрдэлээн, массыыналары, туттар тэриллэри, таҥаһы-сабы була тураары,  кулун тутар ый 25 күнүгэр Ростов-на-Дону куоракка тиийбиппит.

🚁 Эрдэ тиийбит бөлөх уолаттар сакаастарынан 3 массыына, 1 матассыыкыл, 16 дрон, ол иһигэр 1 “Мавик-3Т”, 10 “Мавик-3 про”, 5 “DJI” дроннары, 6 дрону биллэрэр “Булат-4” диэн тэриллэри, 2 “Инкубатор 3.0” диэн дрон сибээһин күүһүрдэр тэриллэри, 30 устуука рация, 3 тепловизионнай прицеллары, 4 устуука бронежилет, 3 устуука 8 кВт кыамталаах дизель уматыгынан барар генератордары, 17 устуука бензин уматыгынан барар инверторнай генератордары, массыына саппаас чаастарын, таҥас-сап, атах таҥаһа, утуйар мөһөөччүктэри, туттар тэриллэри, тутуу матырыйаалларын, саа ботуруоннарын, 135 устуука саха быһаҕын, онтон да араас уолаттар наадыйар тэриллэрин атыылаһан бэлэмнээбиппит.

🏍 Муус устар 1 күнүгэр Ставропольскай кыраай Минеральные Воды куоратыгар (ДНР сириттэн-уотуттан 600-тэн тахса килэмиэтир тэйиччи саамай чугас аэропорт) анал байыаннай дьайыыга сылдьар биир дойдулаахтарбыт тус баһыылкалара, улуустан кырбастанан тоҥоруллубут биир байтаһын биэ этэ, иһэ, нэһилиэктэр уонна тэрилтэлэр бэлэмнээбит бурдук астара, ыһаарыламмыт собо балыктара, мииннэрэ, о.д.а., уопсайа 1300 киилэттэн тахса ыйааһыннаах тоҥ таһаҕас кэлэн, түүннэри ДНР Новоазовскай куоратынааҕы Саха сирин тирэх пуунугар айаннаабыппыт.

◽️ Муус устар 2-15 күннэригэр Донецкай уонна Луганскай Өрөспүүбүлүкэлэр, Херсон уонна Запорожье уобаластарыгар, итиэннэ Арассыыйа Белгород, Курскай, Брянскай, Ростов уобаластарыгар араас сирдэринэн анал байыаннай дьайыыга кытта сылдьар 100-тэн тахса биир дойдулаахтарбытыгар улуустарын дьонноруттан-сэргэлэриттэн көмөнү, чугас дьоннорун баһыылкаларын тиксэртээтибит. Ыраах Псковскай уобаласка быстах хомуурга түбэһэн барбыт биир дойдулаахпытыгар көмөнү баһыылка оҥорон ыыттыбыт. Иккис бөлөх төннөн иһэн Москва куоракка госпиталга эмтэнэ сытар биир дойдулаахтарбытын эмиэ көрүстүлэр.

Сиһилии уонна элбэх хаартыска - БУ СИГЭНЭН киирдэххэ ⬅️

@gazetaerkeii
@ulusmedia

📲 «Эркээйи» в MAX