‒ Аҕа дойду Улуу сэриитин ыар тыына дойдубут, өрөспүүбүлүкэбит үрдүнэн хаарыйбатах дьиэ кэргэнэ суох. Аҥаардас Мэҥэ Хаҥалас оройуонуттан 4128 хорсун-хоодуот уолаттар сэриигэ барбыттара, олортон улахан аҥаардара олохторун толук уурбуттара. Кинилэр ортолоругар сахалартан бастакынан Сэбиэскэй Сойуус Дьоруойун үрдүк аатын сүкпүт Федор Кузьмич Попов баара. Кини уонна сэриигэ кыттыбыт тыһыынчанан буойуннарбыт итиэннэ Улуу Кыайыыны тыылга уһансыбыт дьоммут-сэргэбит үтүө ааттара мэлдьи биһиги сүрэхпитигэр тыыннаахтар. Кинилэргэ сүгүрүйэн дойдубутугар, өрөспүүбүлүкэбитигэр, улуустарбытыгар, нэһилиэктэригэр пааматынньыктар, искибиэрдэр бааллар. Майаҕа бу ытык сир 1967 с. тутуллан, 1985 с. саҥардыллан кэҥэтиллибитэ. Оттон 2023 с. улуус баһылыга Дмитрий Тихоновы кытары сүбэлэһэн баран, дойдубут Бэрэсидьиэнэ Владимир Путин көҕүлээбит “Олох инфраструктурата” национальнай бырайыагын чэрчитинэн “Куорат тупсаҕай эйгэтин тэрийии” федеральнай бырагырааматыгар улахан бырайыак оҥорон, ону көмүскүүргэ уустук куонкуруһу ааһан, «Кыайыы Аартыга» кыайыылаах тахсан өссө тупсарыллан, саҥардыллан оҥоһулунна. Майа сэлиэнньэтигэр федеральнай бүддьүөттэн 50 мөл. солк., ону таһынан өрөспүүбүлүкэ уонна улуус үбүлээһини эбии көрөн сэриигэ кыттыбыт дьоммут ааттарын үйэтитиигэ бэртээхэй үчүгэй эбийиэк баар буолла. Бүгүн бу Үйэлэргэ умуллубат уот уматыллан бырайыак толору ситэн-хотон арылынна, ‒ диэн бэлиэтээтэ Айсен Николаев.