💪 Анал байыаннай дьайыы кыттыылааҕа бэйэ дьыалатын саҕалаата

🪖 Аллараа Бэстээх бөһүөлэгэр анал байыаннай дьайыы кыттыылааҕа Айнар Слепцов бэйэ дьыалатын – «Jambo» эр дьон баттаҕын  кырыйар өҥөнү оҥорор тэрилтэтин арыйда.

🤝 Нөөрүктээйи олохтооҕо Айнар Валентинович 1993 сыллаахха күн сирин көрбүтэ, билигин ыал аҕата буолар. 2022 сыллаахха хантараак баттаан, 2 төгүл анал байыаннай дьайыыга Ийэ дойдутун көмүскүү баран кэллэ. «Хорсун быһыытын иһин» судаарыстыбаннай наҕарааданы ылбыта, иккис истиэпэннээх «Эр санаатын иһин», «Бахмуту ылыы иһин», «Соледары ылыы иһин» мэтээллэринэн наҕараадаламмыта уонна бойобуой бааһырыылаах төннөн кэлбитэ.

🇷🇺 Биир дойдулаахпыт, киэн туттар байыаспыт үлэтин арыйар үөрүүлээх күнүгэр СӨ Ыччат бэлиитикэтигэр уонна социальнай алтыһыыга миниистирэ, анал байыаннай дьайыы кыттыылааҕа Петр Шамаев, Донбасска Көмө уонна өйөбүл хотугулуу-илиҥҥи пуондатын дириэктэрэ, өрөспүүбүлүкэтэҕи хамыыһыйа «Вместе к Победе!» кэлим сүрүннүүр киинин суһал ыстаабын салайааччыта Георгий Куркутов, улуус баһылыгын бастакы солбуйааччы Гаврил Толстяков, «Мин бизнеһим» киин бэрэстэбиитэлэ Зоя Егорова, Нөөрүктээйи баһылыгын солбуйааччы Альбина Кострамыкина эҕэрдэлэрин кытта саҥа арыллыбыт дьоҕус дьыала атаҕар туран, дьоҥҥо-сэргэҕэ хаачыстыбалаах өҥөнү оҥорон, тупсан, кэҥээн истин диэн баҕа санааларын эттилэр.

🎖Айнар Слепцов:
– Оскуоланы 2011 сылга бүтэрэн, 18 сааспын туолан аармыйаҕа Владивосток куоракка муора пехотатын тус биригээдэтигэр сулууспалаабытым. Онтон 2013 сыллаахха Сирияҕа, 2022 сыллаахха Украинаҕа Ийэ дойдубун көмүскүү сылдьыбытым.
Хантараак болдьоҕо бүппүтүн кэннэ Ю.П.Степанов аатынан Доруобуйаларынан хааччахтаах дьон өрөспүүбүлүкэтээҕи социальнай-чэбдигирдэр кииннэригэр, Аллараа Бэстээххэ «Абалаах» сонотуоруйга эмтэнии куурсун, чөлгө түһүүнү ааспытым. Дьокуускай куоракка анал байыаннай дьайыы кыттыылаахтарын өйүүр «Аҕа дойдуну көмүскээччилэр» судаарыстыбаннай пуонда элбэх тэрээһиннэри ыытар, анал докумуоннары түргэнник оҥорон биэрэр. Соторутааҕыта оҕунан ытыыга 40 киһиттэн үһүс миэстэни ылбытым улахан ситиһиим буолар. Бу араас көмө барыта миэхэ, чугас дьоммор, ийэбэр улахан үчүгэй суолталаах буолара саарбаҕа суох.

🙏 Анал байыаннай дьайыыга сылдьан кэлбит байыастарга этиэм этэ, биһиэхэ маннык доруобуйаны тупсарар ньымалары, олох-дьаһах өттүгэр өҥөнү оҥороллоро олус туһалаах диэн. Араас тэрээһиннэргэ кыттан аралдьыйан, сэргэхсийэн, эйэлээх олоххо адаптацияны түргэнник ылыныахха сөп.

❤️ Баттах кырыйар идэ уопутун бастаан аармыйаҕа сулууспалыы сылдьан ылбытым. Оттон парикмахерскай арыйан үлэлиирбэр улуустааҕы нэһилиэнньэ дьарыктаах буолуутун, «Мин бизнеһим» кииннэрэ «Аллараа Бэстээх» атыы-эргиэн киинигэр үлэлиир «Образ» кэрэ сэбэрэ солуонугар маастар-кылааска үөрэттэрэннэр, эр дьону кырыйарга көҥүл (допуск) сэртипикээт ылбытым. Тэрилтэм үлэлиир хоһун буларбар, төлүүрбэр, үлэ тэриллэрин атыылаһарбар нэһилиэнньэ социальнай көмүскэллээх буолуутун улуустааҕы кэлим киинэ социальнай хантараагынан 350 тыһыынча солкуобайы биэрбитэ. Билигин соҕотох үлэлиибин, тэрилтэбин кэҥэтэр, сайыннарар санаалаахпын.

Сиһилии ⬅️

@gazetaerkeii
@ulusmedia