🎖 Майаҕа, Хараҕа Арассыыйа Дьоруойа Родимир МАКСИМОВ – БУРХААТ ыалдьыттаата

🎖 Сэтинньи 8 күнүгэр Мэҥэ Хаҥалас улууһугар биир дойдулаахтарбыт, Тааттаттан төрүттээх РФ Дьоруойа Родимир Максимов – Бурхаат уонна анал байыаннай дьайыы кыттыылааҕа, “Эр санаа” уордьан кавалера Ион Дмитриев – Аман ыалдьыттаатылар.

🪖 Кинилэри Майаҕа улуус баһылыгын бастакы солбуйааччы Гаврил Толстяков, биллиилээх боксер, РФ успуордун үтүөлээх маастара, Аан дойду вице-чөмпүйүөнэ, Европа 2, Арассыыйа 5  төгүллээх чөмпүйүөнэ, Хара нэһилиэгин бочуоттаах олохтооҕо Василий Егоров, Майа сэлиэнньэтин баһылыгын солбуйааччы Март Андреев, Хара нэһилиэгин баһылыга Дария Назарова көрсөн арыаллаатылар.
Ыалдьыттар уонна олохтоохтор сахалартан бастакы Сэбиэскэй Сойуус Дьоруойа Ф.К. Попов искибиэригэр итиэннэ Хара нэһилиэгэр Аҕа дойду Улуу сэриитин кыттыылаахтарыгар аналлаах Кыайыы искибиэригэр сибэкки дьөрбөтүн уурдулар.

🪖 Хара нэһилиэгэр И.Г.Игнатьев аатынан успуорт хайысхалаах, В.П.Ларионов, Ф.Г.Охлопков ааттарынан Майа орто оскуолаларын уонна И.Г.Тимофеев аатынан лиссиэй үөрэнээччилэриниин истиҥ-иһирэх көрсүһүү тэрилиннэ.

❤️ Манна Таатта улууһун Туора Күөл бөһүөлэгин олохтооҕо, сахалартан 8-с киһинэн Арассыыйа Дьоруойун үрдүк аатын ылбыт Родимир Максимов-Бурхаат Күн сирин көрдөрбүт күндү ийэтэ Варвара Николаевна Максимова, бииргэ төрөөбүттэрэ — Туора Күөл оскуолатын 9-с кылааһын үөрэнээччитэ Дарина, 5-с кылааһын үөрэнээччитэ Вадим Максимовтар, ийэтин убайа Иван Николаевич Кузьмин, Хара нэһилиэгэр олорор эдьиийэ, ИДьМ бэтэрээнэ Василиса Скрябина, 1-кы Тыыллыма нэһилиэгиттэн эдьиийэ Варвара Дьячковская уонна  “Эр санаа” уордьан кавалера Ион Дмитриев – Аман Күн-күбэй ийэтэ Антонина Михайловна Кириллина кыттыыны ыллылар.

❤️ Бу күн Р.Г.Васильев аатынан улуустааҕы кыраайы үөрэтэр түмэлгэ РФ Дьоруойа Родимир Максимов – Бурхаат бойобуой олоҕун сырдатар “Сулус суоллаах буойун Бурхаат” быыстапка үөрүүлээхтик арылынна.

@gazetaerkeii
@ulusmedia