Hududda yoshlar bandligini ta’minlashga qaratilgan innovatsion loyiha bilan tanishildi

Innovatsion rivojlanish agentligi direktori v.v.b. A.Norov hamda Namangan viloyati hokimi o‘rinbosari O.Bazarov viloyatda amalga oshirilayotgan istiqbolli loyihalar bilan tanishish doirasida “United IT Clubs” MCHJ tomonidan hayotga tatbiq etilayotgan muhim tashabbus bilan yaqindan tanishdi.

Mazkur loyiha Innovatsion rivojlanish agentligi tomonidan moliyalashtirilgan bo‘lib, “Temir daftar” va “Yoshlar daftari”ga kiritilgan yoshlarni axborot texnologiyalari sohasida o‘qitish hamda ularning bandligini ta’minlashga qaratilgan tijoratlashtirish loyihasi hisoblanadi.

Loyiha doirasida yoshlar zamonaviy IT yo‘nalishlari bo‘yicha malaka oshirib, amaliy bilim va ko‘nikmalarni egallashi, shuningdek, mehnat bozorida talab yuqori bo‘lgan kasblarga ega bo‘lishi uchun zarur sharoitlar yaratilmoqda. Bu esa nafaqat yoshlar bandligini ta’minlash, balki hududda raqamli iqtisodiyot rivojiga xizmat qiladigan malakali kadrlarni tayyorlashda muhim ahamiyat kasb etadi.

Mas’ullar loyiha faoliyati bilan tanishar ekan, uning ijtimoiy ahamiyati, yoshlarni zamonaviy kasblarga yo‘naltirishdagi o‘rni hamda hudud iqtisodiy rivojiga qo‘shayotgan hissasini alohida ta’kidladi.

Shuningdek, kelgusida loyiha imkoniyatlarini kengaytirish, ko‘proq yoshlarni qamrab olish hamda IT sohasida amaliy natijalarga erishishga qaratilgan tashabbuslarni qo‘llab-quvvatlash yuzasidan fikr almashildi.