【葵盛泳池靈異公廁 上】
#葵青靈異檔案
#葵盛西邨
#檔案VIII

八十年代時期的葵盛西邨泳池係好多居民都會去嘅地方，除了游水之外仲會打蛇餅排隊拎水，中秋節更有好多小朋友煲蠟。毫無疑問泳池旁嘅呢座公廁，應該人氣比較旺，但我同老公就曾經喺度遇過兩次靈異經歷。

以前游泳池「花王」，曾警告過細路時期嘅我千祈唔好去呢座公廁，因為「好污糟」。直至1994年某個晚上7點，當時男朋友（即現任老公）同我拍住拖由葵芳行上葵盛西邨，途經泳池旁呢座公廁時，男友入去小解，而我就留在公廁外旁邊嘅「空中樓梯」等候。

男友入去後冇幾耐，突然就非常驚慌咁跑返出嚟，仲同我返屋企先。事後講返先知道，當日佢小解前睇過男廁係空無一人，但小解個陣突然聽到一下巨響！嚇到佢望返轉頭，原來係第一格男廁門半邊跌左落嚟，佢見到地下有一舊黑色物體，類似有天線嘅收音機，仲聽到沙沙聲。最驚嚇嘅就係有隻手慢慢由另一格下面伸出嚟，拎返呢舊黑色物體入去。
明明我就喺男廁外，點解會聽唔到巨響？更靈異嘅係，第二日入去檢查發現，第一格男廁門竟然完整無缺，更加冇維修過嘅痕跡，唔通個日係幻覺？

一個月後嘅某個晚上，男友再去呢個公廁小解。正當想入去個陣，就有一個三七分界髮型嘅男人由廁所內衝出嚟！男友形容當時係被呢個男人「好似一股涼風咁穿過咗」，令到佢退後三﹑四步差少少跌低，正想轉身追上呢個男人時，發現已經消失得無影無蹤。由於呢個男人嘅去向只有女廁，男友等左好耐都聽唔到女廁有聲，其後發現女廁根本冇人。再者，男友表示個個男人衝出嚟個陣，外表同腳部都係模糊，咁即係個個男人好有可能就係.....靈體？

事後我同男友都好少經過呢個公廁，但關於呢個公廁仲有其他靈異故仔而唔係發現喺我身上，留返下回待續。

感謝熱心街坊提供