Ціханоўская і Рада культуры абвяшчаюць тыдзень беларускай культуры 5-11 лiпеня

Святлана Ціханоўская: «Да гэтага часу беларускага дня культуры – а тым больш міжнароднага – не было. Мы ўсе ведаем, чаму: рэжым ніколі не разумеў і не цікавіўся сапраўднай беларускай культурай. Таму цяпер разам з Беларускай Радай культуры мы прапануем гэта змяніць. Мы абвяшчаем 7 ліпеня міжнародным днём беларускай культуры. У гэты дзень нарадзіліся Янка Купала, Ян Чачот і Марк Шагал – нашыя сваякI, вядомыя далёка за межамі краіны. Таксама уначы з 6 на 7 ліпеня беларусы спрадвеку святкавалі Купалле – свята кахання і свабоды, свята, якое яднае беларусаў у розных кутках свету.

Безумоўна, культура Беларусі надта разгалінаваная, каб змясціцца ў адзіны дзень. Таму мы абвяшчаем цэлы тыдзень беларускай культуры з 5 па 11 ліпеня. Я звяртаюся да беларусаў у Беларусі, а таксама да беларускіх дыяспараў ва ўсім свеце: далучайцеся да тыдня нашай культуры.

І вось што мы прапануем зрабіць у яго падтрымку:

– Прачытаць верш Янкі Купалы «А хто там ідзе?» на мове той краіны, у якой вы жывяце і апублікаваць запіс з хэштэгам #StandwithBelarus і #by_culture .
– Зладзіць Купалле ў вашым горадзе ці мясцовасці.
– Правесці супольны спеў беларускіх песняў.
– Арганізаваць выставу, музычны канцэрт ці тэатральны выступ з удзелам мясцовых беларусаў. Любая арт-акцыя ці культурнае мерапрыемства - гэта выдатны крок з вашага боку.

Далучайцеся, рабіце ўсё што ў вашых сілах. Памятайце: у кожным вершы і кожнай калыханцы для дзіцяці ўжо жыве наша агульная новая Беларусь».