#تورکمن_صحرا_سئلی


ائوینی- اوبانی ییخسا داشغین سئل
یوردوندا اسیرسه بو گون قارا یئل
سنی قورتارماغا بیرلشه‌جک ائل
سنی اونوتمارام، سنی آتمارام
آی تورکمن قارداشیم، آی تورکمن باجیم

بو گون گؤیدن یاغان یاغیش یوخ داش‌دی
دؤزومون کاساسی باخ! بو گون داشدی
بو گون سئل اوغرو تک دیواردان آشدی
سنی اونوتمارام، سنی آتمارام
آی تورکمن قارداشیم، آی تورکمن باجیم

آذربایجان آتماز دوغما قارداشین
تورک آتماز تورکمنی، ساتماز سویداشین
یولداشا باغلانان آتماز یولداشین
سنی اونوتمارام، سنی آتمارام
آی تورکمن قارداشیم، آی تورکمن باجیم

یاز سئلی باغریما ووروب‌دور یارا
قیش گئدر، کؤمورلر قالاجاق قارا
سیخیلما، داریخما، تئللری دارا
سنی اونوتمارام، سنی آتمارام
آی تورکمن قارداشیم، آی تورکمن باجیم

سوسوزلوقدان یانیر اورمونون گؤلو
سو ایچینده قالیب تورکمن چؤلو
بو سئل‌ده چوخ اولدو ایتنله اؤلو
سنی اونوتمارام، سنی آتمارام
آی تورکمن قارداشیم، آی تورکمن باجیم

تورکمن قارداشیم قارداشا گوون
سئلین قاباغیندا بیر آز دا دیرن
آذربایجانیم‌دا هله وار ارن
سنی اونوتمارام، سنی آتمارام
آی تورکمن قارداشیم، آی تورکمن باجیم

نه‌دن گؤی تانری‌سی گؤندریر بلا؟
نه‌دن بس طبیعت ائیله‌ییر جفا؟
بو گون بس کیملردن باش وئریب خطا؟
سنی اونوتمارام، سنی آتمارام
آی تورکمن قارداشیم، آی تورکمن باجیم

دئیه‌سن طبیعت عملین آزیب
بیزلره قوراقلیق، سیزه سئل یازیب
بوتون تورک ائلینه او، قبیر قازیب
سنی اونوتمارام، سنی آتمارام
آی تورکمن قارداشیم، آی تورکمن باجیم

بو گون گلیریم آز، چیخاریمسا چوخ
قارنیم آج اولسا دا ایکی گؤزوم توخ
بو دار گون‌ده سنه من دئمه‌رم یوخ
سنی اونوتمارام، سنی آتمارام
آی تورکمن قارداشیم، آی تورکمن باجیم

آذربایجان بو گون یوخلاما، یاتما
تورکمن قارداشینی اونوتما، آتما
دوغما قارداشینی یادلارا ساتما
سنی اونوتمارام، سنی آتمارام
آی تورکمن قارداشیم، آی تورکمن باجیم


نعمت مسگری
4/1/1398