Сябры, у нас для вас цікавы анонс на канец лістапада.

Нашыя сябры з Белавежскай пушчы ў апошні лістападаўскі ўікэнд ладзяць добрасуседскі фестываль пра ахову прыроды і будаванне кантактаў на памежжы. Тры дні розных дыскусій, шпацыраў у лесе і сустрэчаў вакол стала пад назвай 'Wspólnie na granicy'.

Падрабязная праграма і апісанне - на старонцы падзеі ў фэйсбуку:

https://m.facebook.com/events/1138017975200013/?ref_source=SEARCH


Арганізатары вельмі запрашаюць усіх вас!
Можна прыехаць на усю праграму ці толькі на частку. Мы - Time4Nature - правядзём шпацыр па пушчы ў нядзелю 30 лістапада. На ўсе актыўнасці ўваход бясплатны.

І супер-бонус: можна запоўніць заяўку на ўдзел у якасці валанцёр_кі, каб дапамагчы пры гатоўцы абеду/пачастунку, і атрымаць некалькі бясплатных начлегаў. Месца сапраўды вельмі крутое, і класная нагода сустрэцца!
Пакідаем спасылку на рэгістрацыю (калі хочаце дапамагчы гатаваць і ночыць, пакіньце каментар у форме):

https://docs.google.com/forms/d/e/1FAIpQLSc8vrPzrN4w08tPPY4dTU3aKe9QUqOayL-_FvbvIdr6-VtcMw/viewform?usp=send_form

Да сустрэчы!👋🏼

👋🏼

Мы нарэшце пачынаем рэгістрацыю на Каляды ў - the one and only - Белавежскай пушчы.
Неназваныя метэаролагі з навінавых стужак абяцаюць нам сапраўдную халодную зіму, а мы скажам так: мы чакаем снег, такі патрэбны лесу. Мы чакаем казку - каб, як у «12 месяцаў»: белыя краявіды і all that magic. ❄️🌙

У доме будзе цёпла. Будуць госці, гутаркі ля печкі, смех у лесе, і калядная вячэра, канешне ж, таксама будзе. Водары - белавежскага хлеба, пірагоў, супу з баравікамі і ўсяго рознага. Будзем распазнаваць сляды і агулам занурацца ў бясконца прыгожы свет прыроды. Дарэчы, гэтым разам мы нават далі вандроўцы нешта накшталт слогану: Daj sobie spokój. Натхнёныя кароткім візітам у вялікі горад, так бы мовіць. 😄

Карацей, запрашаем у пушчу. Адпачыць, запаволіцца, парадавацца. Усе дэталі, па традыцыі, - на старонцы https://time4nature.tilda.ws/.

Ёсць тарыф early owls (магічная сава, якая бывае толькі ў казках) - пры рэгістрацыі да канца лістапада.

Пабачымся! 👋🏻

Winter solstice greetings!

Спадарства, зацягнулася паўза ў абнаўленнях гэтага каналу Time4Nature, а ўсё таму, што мы актыўна рыхтуемся да прыезду вялікай групы на Каляды. У гэтым годзе месцы скончыліся так хутка, што мы акрамя як тут нідзе больш рэкламы не рабілі.😳

Дзякуй вам, што прыехалі (і вярталіся зноў) ў пушчу ў гэтым годзе! Доўгія ночы хутка пачнуць саступаць час светлавым дням, а значыцца - вясна непазбежна прыйдзе.🌞

Неўзабаве мы павернемся з планамі-анонсамі на наступны год, а пакуль дасылаем адмыслова для вас зроблены фотаздымак. Снегу пакуль няма, але туман робіць пушчу максімальна утульнай.

P.S. Дайце знак, калі хочаце паглядзець на лес ў снезе - такое ў архівах таксама маем. 😉

👋🏼 Вітанкі з зімовай казкі!
Спадарства, вось ужо два тыдні мы жывем нібыта ў Лапландыі - цяжка апісаць словамі, як прыгожа ў заснежанай пушчы. З нагоды такой рэдкай і надзвычай важнай падзеі, як снег, мы вырашылі хуценька склікаць маленькую групу на наступныя выходныя 23-25 студзеня.

Спаць будзем у абсалютна фантастычным месцы - былой леснічоўцы пасярод лесу. Будуць лыжы і саўна на дровах. Засталіся два пакоі, усе з прыбіральнямі - запрашаем парамі, сем'ямі ці міні-кампаніямі. Падрабязнасці як заўсёды па спасылцы:

https://time4nature.tilda.ws/

Падкіньце ідэю знаёмым, калі ласка! Трэба лавіць момант, пакуль гэтая прыгажэзная зімовая казка не скончылася.❄️

Увага! Sensitive content👀

На выходных хадзілі па пушчы на лыжах, грэліся ў саўне і назіралі за касулямі з вакна кухні разам з чарговай цудоўнай групай. Учора на світанку пайшлі паназіраць за зубрамі. Ідзем, а на снезе - свежая кроў. І раптам крумкачоў цэлая зграя ўздымаецца ў паветра. І арлан-белахвост ляціць кудысьці..

Знайсці месца, дзе ваўкі зладзілі "застолле", атрымалася сёння зранку. Пах стаіць моцны. Плануем паставіць фотапастку, бо ваўкі абавязкова павярнуцца, каб даесьці.

Фотапастка зняла, як на рэшткі ваўчынай ахвяры прыходзілі ліса і малады воўк. Абодвум гэтым звярам мажлівасць паесці тут была крытычна важнай. Ліса кульгала - пярэдняя лапа была зламаная. Працоўная гіпотэза - што яна трапіла ў капкан, які нехта з мясцовых паставіў на сваім падворку. Мы бачылі расцярушанае курынае пер’е акурат за плотам, халады маглі падштурхнуць лісу да наведвання куратніка. Воўк быў хворы, у каросце (часотцы) і з плямамі голай скуры. Моцныя халады вельмі аслабляюць такіх жывёл і яны часта не перажываюць зіму - мы ведаем пра як мінімум адзін такі выпадак у польскай Белавежскай пушчы гэтай зімой. Але так працуе натуральны адбор.

Зірніце яшчэ раз на фотаздымак ваўка па-новаму - і вы ўбачыце адразу, што гэта невялічкі ваўчок з "пабітым моллю" футрам.

Як там зімоўка, спадарства? Спадзяемся, вы трымаецеся бадзёра. У ваколіцах Белавежскай пушчы прырода толькі на першы погляд здаецца, што "у зімовым адпачынку". Насамрэч, усе ейныя жыхары зараз з усёй моцы намагаюцца дацягнуць да сонца і цеплыні (нават і мы😂). Ваўкі актыўна палююць - паехалі было сёння паставіць фотапастку на месцы чарговай "сталоўкі", а ўжо і не засталося рэштак на вячэру. То не паставілі.

Калі вы толькі не злятаеце падалей шукаць сонца ў лютым (хіба што вы ўжо😁), завітвайце на канец лыжнага сезону ў бліжэйшую пятніцу. Праедземся па пушчанскіх месцах моцы, навучымся адрозніваць сірыйскага дзятла ад сярэдняга.
І разляцімся: гукаць вясну і блінцы смажыць.