#Tigray

በትግራይ ክልል የ12ኛ ክፍል መልቀቂያ ብሔራዊ ፈተና ዛሬ መሰጠት ተጀምሯል።

ፈተናው በኦንላይን እና በወረቀት እየተሰጠ ነው።

በኢትዮጵያ ለመጀመርያ ጊዜ የ12ኛ ክፍል መልቀቂያ ብሔራዊ ፈተና በኦንላይን መስጠት ተግባራዊ ተደርጓል።

በመቐለ ፣ አኽሱም ፣ ዓዲግራት ፣ ራያ ዩኒቨርሲቲዎች የሚሰጠውን ብሔራዊ ፈተና አጠቃላይ ከ54,000 በላይ ተማሪዎች ፈተናውን ይወስዳሉ ተብሎ ይጠበቃል።

ፈተናው ከሌሎች ክልሎች ለምን ቀድሞ ጀመረ ?

ፈተናውን የሚወስዱት በቀድሞ ስርዓተ ትምህርት የተማሩና በ2013 እና በ2014 የትምህርት ዘመን መፈተን የነበረባቸው ተማሪዎች ናቸው።

በ2012 ዓ/ም የ10ኛ ክፍል የነበሩ (code 01) ብዛታቸው ከ31 ሺህ የሆኑ የማህበራዊ እና የተፈጥሮ ሳይንስ ተማሪዎች ከሀምሌ 2 እስከ 5 /2016 ዓ/ም ፈተና ወስደው ሀምሌ 6 እና 7 ወደ ቤታቸው ይመለሳሉ።

ከኮረም ፣ አላማጣ ፣ ዛታ ፣ ኦፍላ ፣ ራያ ጨርጨር ፣ ራያ ዓዘቦ፣ ማይፀብሪ፣ ላዕላይና ታሕታይ ፀለምቲ ሆኖው ትምህርታቸው ሲከታተሉ የነበሩ የማህበራዊ ሳይንስ ተማሪዎች ከሀምሌ 3 አስከ 5 /2016 ዓ/ም ተፈትነው ሀምሌ 6 ና 7 ወደ ቤታቸው ይመለሳሉ። የተፈጥሮ ሳይንስ ተማሪዎች ሀምሌ 6 እና 7 ወደ ተመደቡበት ዩኒቨርስቲ ተጉዘው ከሀምሌ 9 እሰከ 11/2016 ዓ/ም ተፈትነው ሀምሌ 12 እና 13 ወደ ቤታቸው ይመለሳሉ።

በ2012 ዓ.ም የ11ኛ ክፍል የነበሩ ( Code 07) የሶሻልና የተፈጥሮ ሳይንስ ብዛታቸው ከ23 ሺህ በላይ የሆኑ ተማሪዎች ሀምሌ 6 እና 7 ወደ ዩኒቨርስቲ ገብተው ከሀምሌ 9 አስከ 12 ቀን 2016 ዓ/ም ፈተና ወስደው ሀምሌ 13 እና 14 ቀን 2016 ዓ/ም ወደ ቤታቸው ይመለሳሉ።

#TikvahEthiopia
#TigrayEducationBureau

@tikvahethiopia

#BenishangulGumuz

በቤኒሻንጉል ጉሙዝ ፤ አሶሳ ከተማ የኤሌክትሪክ ኃይል ከተቋረጠ 2 ሳምንት አልፏል።

የአሶሳ አጠቃላይ ሆስፒታል ሁኔታው በዚህ ከቀጠለ አገልግሎት ሊቆም እንደሚችል አሳውቋል።

ሆስፒታሉ በየቀኑ ከ400 እስከ 500 ከዞን ፣ ከወረዳ፣ ከአጎራባቹ ኦሮሚያ ክልል ታካሚዎችን ያስተናግዳል።

ሆስፒታሉ ከሚሰጠው አገልግሎት አንጻር 24 ሰዓት ሙሉ የማይቋረጥ ኃይል ማግኘት ያለበር ቢሆንም ባለፉት ሳምንታት የኤሌክትሪክ ኃይል መቋረጡ በተቋሙ ላይ ከፍተኛ ጫና አሳድሯል።

ኃይል ከተቋረጠበት ቀን አንስቶ ለጄኔሬተር በየቀኑ ከ180 እስከ 200 ሊትር ነዳጅ እየተጠቀመ ነው።

ሁለት ጄኔሬተሮች ያሉ ቢሆንም ሙሉ ሆስፒታሉን ኃይል እንዲያገኝ የሚያስችሉ አይደሉም።

ያለ ጊዜያቸው የሚወለዱ ጨቅላ ሕጻናትን ለማቆየት የሚሆኑ ማሽኖችን ማስነሳትም ከባድ ሆኗል።

በዚህ ማሽን ውስጥ የሚቆዩ ሕጻናት ያልተቋረጠ ኦክስጅን ማግኘት ስላለባቸው ኃይል መቋረጥ ካጋጠመ በሕጻናቱ ላይ ሞት ሊያስከትል ይችላል።

ሆስፒታሉ የተወሰኑ የሥራ ክፍሎችን የኃይል አቅርቦት እያጠፋ ነው ጄኔሬተሩ ሲነሳ የኤሌክትሪክ ኃይሉን ወደ ጨቅላ ሕጻናት ማቆያ ማሽኑ የሚቀይረው። ሌሎች የሥራ ዘርፎች ላይ ኃይሉ ሲፈለግ ደግሞ ማሽኑን ለማቋረጥ ይገደዳል።

ቀድሞም የበጀት እጥረት የሚፈተነው ሆስፒታሉ ለጄኔሬተሩ የሚውለው ነዳጅ ወጪ ከአቅም በላይ እንደሆነ የነዳጅ ማከማቻም አለመኖር ፈተና እንደሆነ ገልጿል።

ሆስፒታሉ ነዳጅ ከተለያዩ መ/ቤቶች እና ባለሃብቶች በልመና ነው ማታ ማታ እየዞረ የሚያመጣው።

ሁኔታው በዚህ ሁኔታ ከቀጠለ የድንገተኛ ህክምና አገልግሎት ጭምር ሊቋረጥ የሚችልበት አዝማሚያ እንዳለ አሳውቋል።

የአሶሳ ዞን ፥ በአሶሳ ከተማ እና በአካባቢው የኃይል መቋረጥ የተከሰተው በአጎራባች የኦሮሚያ ክልል፣ ምዕራብ ወለጋ ዞን በሚገኝ የኃይል ተሸካሚ ምሰሶ ላይ " በታጣቂዎች " በደረሰ ጉዳት እንደሆነ አሳውቋል።

#BBCAMHARIC

@tikvahethiopia

#Ethiopia የኢትዮጵያ ብሔራዊ ባንክ አዲስ የገንዘብ ፖሊሲ ማዕቀፍ ይፋ አድርጓል።

(ሙሉ መግለጫው ከላይ ተያይዟል)

#NBE

@tikavhethiopia

#ድሬ

ከቀናት በፊት ድሬዳዋ ' አሸዋ ገበያ ' ስፍራ እጅግ በጣም የከፋ የእሳት አደጋ ደርሶ እንደነበር ይታወቃል።

በአደጋው በርካታ ነጋዴዎች አንድም ሳይቀር ነገር ሳይቀር ንብረታቸው ወድሟል።

አሁን ላይ የድሬዳዋ ከተማ አስተዳደር ተጎጂዎች እንዲረዱ ለማድረግ " ድሬዳዋ ትጣራለች !! " በሚል ዘመቻ ጀምሯል።

ለተጎጂዎች ድጋፍ ማድረጊያ የሒሳብ ቁጥርም ይፋ ተደርጎ ድጋፍ እየተሰባደበ ነው። የሒሳብ ቁጥሮቹ  ፦
• ንግድ ባንክ ፦ 1000637750201
• ዳሽን ባንክ ፦ 5009786342011
• አዋሽ ባንክ ፦ 013211367855100
• የኦሮሚያ ኅብረት ሥራ ባንክ ፦ 1001300318808 ሲሆኑ ' BESAT ADEGA LETEGODU WOG DIGAF MAS ' ይላል።

በሌላ በኩል ፤ የስልጤ ልማት ማኅበር እና የስልጤ ዞን አስተዳደር ምክር ቤት ለተጎጂዎች እያንዳንዳቸው 1 ሚሊዮን ብር (በድምሩ 2 ሚሊዮን ብር) ድጋፍ ማድረጋቸው ተነግሯል።

#DireDawa

@tikvahethiopia

ጊምቦ ላይ ምን ሆነ ?

" በአካባቢው የሚታየው እንቅስቃሴ አሳሳቢ ነው " - እናት ፓርቲ

ከሰሞኑን በደቡብ ምዕራብ ኢትዮጵያ ክልል፣ ካፋ ዞን ጊምቦ ወረዳ፣ ሾምባ ቲጭብ ቀበሌ አለመረጋጋት ተቀስቅሶ ነበር።

ይህንን ሁኔታ በተመለከተ እናት ፓርቲ ለቲክቫህ ኢትዮጵያ መግለጫ ልኳል።

እናት ፓርቲ ምን አለ ?

- በጊምቦ ወረዳ የተፈጸመ የግድያ ወንጀልን ተከትሎ በአማራ ማህበረሰብ እና በካፋ ማህበረሰብ መካከል ግጭት እንዲቀሰቀስ የሚሰሩ ኃይሎች አሉ። እጃቸውን ሊሰበስቡ ይገባል።

- የአማራ እና ካፋ ማህበረሰብ ለዘመናት ተዋልዶና ተፋቅሮ የኖረ ማህበረሰብ ነው። " ከእስር ቤት አምልጦ ወጣ የተባለ ግለሰብ " ፈጸመው የተባለውን ግድያ ተከትሎ ድርጊቱን የብሔር ቅርጽ ለማስያዝ እየሰሩ የሚገኙ በዞንና ወረዳ ደረጃ የሚገኙ አንዳንድ አመራሮች እጃቸውን ሊሰበስቡ ይገባል።

- ከሰኔ 29 ቀን 2016 ዓ/ም ጀምሮ በአካባቢው የሚታየው እንቅስቃሴ አሳሳቢ ነው።

- ሾምባ ቲጭብ ቀበሌ ሁለት ቤቶች እንዲሁም ቢሪ አርሴማ በተባለ አካባቢ አምስት ቤቶች በጥቅሉ ሰባት የአማራ ማኅበረሰብ መኖሪያ ቤቶች እንዲሁም ሶስት ባጃጆች ተቃጥለዋል። ድርጊቱን የፈጸሙት የተደራጁ ወጣቶች ናቸው።

- በተለያዩ ቀበሌዎች የጸጥታ አካላት የአማራውን ማኅበረሰብ ነጥለው እያሰሩ ነው።

- የአማራና ከፋ ማህበረሰብ ለዘመናት ተዋልዶ፣ ተፋቅሮና ተጋምዶ የኖረ ማህበረሰብ ነው ፤ በማህበረሰቡ መካከል ምንም ችግር እንደሌለ ነዋሪዎች ገልጸዋል።

- " አንዳንድ የማህበረሰብ አንቂ ነን" የሚሉ ግለሰቦች ብልሹ ሥነ ምግባር ካላቸው የዞንና ወረዳ አመራሮች ጋር በመቀናጀት ' አማራ መሬታችንን ለቆ ይውጣ ' የሚል ዘመቻ ጀምረዋል።

- የክልሉ መንግሥት፣ የዞንና ወረዳ አመራሮች ተናበው ለተፈጠረው ችግር አስቸኳይ እልባት እንዲሰጡ ተጠይቋል።

- ነዋሪዎች አሁንም በከፍተኛ ስጋት ውስጥ ስለሚገኙ እየተፈጸመ የሚገኘው የጅምላ እስር፣ የቤት ቃጠሎና የንብረት ውድመት በአስቸኳይ እንዲቆም ተጠይቋል።

- አርሶ አደሩ እርሻ ላይ ተጠምዶ በሚገኝበት በዚህ ሰአት በፍቅር አብሮ እየኖረ በሚገኘው የአማራና ካፋ ማህበረሰብ መካከል ግጭት እንዲፈጠር እየተንቀሳቀሱ የሚገኙ  እንዲሁም በማህበራዊ ድረ ገጽ የጥላቻ ጽሑፍ በማሰራጨት የተጠመዱ አካላት እጃቸውን ሊሰበስቡ ይገባል።

" በርካታ ወጣቶች ታስረዋል ፤ የእርሻ ስራ ለመስራትም ፍርሀት ውስጥ ነን " - የአካባቢው ወጣቶች

ቲክቫህ ኢትዮጵያ የእናት ፓርቲ መግለጫ ተንተርሶ የጊምቦ ወረዳ ወጣቶችን አነጋግሯል።

ወጣቶቹ አለመረጋጋት የተፈጠረው ከእስር ቤት ያመለጠ አንድ ግለሰብ በጊምቦ ወረዳ ውስጥ የአንድ ሰው ነብስ አጥፍቶ በመደበቁ እንደሆነ አመልክተዋል።

አሁን ላይ ምንም እንኳን አካባቢው በአንጻራዊነት ሰላም ቢሆንም ፖሊስ ወጣቶችን እያሰረ መሆኑን ተከትሎ በፍርሀት ውስጥ መሆናቸውን አስረድተዋል።

በተለይ አለመረጋጋት በነበረባቸው ቀበሌያት ያሉ ወጣቶች ፖሊስ አሰሳ እያደረገ እና በርካታ ወጣቶችን ሲያስር በመመልከታቸው ምክንያት ወቅታዊውን የእርሻ ስራ ለመስራት ፍርሀት ውስጥ እንዳስገባቸው ገልጸዋል።

" አካባቢው ወደቀደመ ሰላሙ ተመልሷል " - የክልሉ መንግሥት ኮሚኒኬሽን

ቲክቫህ ኢትዮጵያ የወጣቶችን ፍርሀት እንዲሁም የአካባቢውን ነባራዊ ሁኔታ በተመለከተ የደቡብ ምእራብ ኢትዮጵያ መንግስት ኮሚዩኒኬሽን ቢሮ ዳይሬክቶሬት ዳይሬክተሩ አቶ የሽዋስ አለሙን አነጋግሯል።

እሳቸውም " አሁን ላይ የጸጥታ ሀይሎች በወሰዱት እርምጃ  አካባቢዉ ወደቀደመ ሰላሙ ተመልሷል " ብለዋል።

ከዚህ ባለፈም " ከእስር አምልጦ ሰው በመግደል አካባቢውን ሲበጠብጥ ነበር " ያሉት ግለሰብ ከአድማ ብተና እና ከክልሉ ፖሊስ ጋር በተደረገ የተኩስ ልውውጥ መገደሉን ገልጸዋል።

የወጣቱን ፍርሀት በተመለከተ በወቅቱ ችግር ለመፍጠር የሞከሩትን ሰዎች ለመያዝ አንዳንድ እንቅስቃሴ መኖሩን ገልጸው ከዛ ውጭ ግን በጥርጣሬ የተያዙ ካሉ ተጣርተው እንደሚለቀቁና ፍርሀት ውስጥ መግባት እንደማይጠበቅባቸዉ አሳውቀዋል።

#TikvahEthiopiaFamilyHW

@tikvahEthiopia