#Update

የኦሮሞ ፌዴራሊስት ኮንግረስ ከመጋቢት 17 እስከ መጋቢት 18 የሚያካሂደውን 2ኛ መደበኛ ጉባኤው ዛሬ በአዲስ አበባ ማካሄድ ጀምራል።

በዛሬው ዕለት በነበረው የጉባኤው ማስጀመሪያ ስነስርዓት ላይ የፓርቲው ሊቀመንበር የሆኑት ፕ/ር መረራ ጉዲና ንግግር አድርገዋል።

ፕ/ር መረራ በንግግራቸው " በሀገሪቱ ለውጥ እንዲመጣ የኦሮሞ ወጣት (ቄሮና ቀሬዎች ) የደም ዋጋ ከፍሎበታል። ብዙዎችን አጥተንበታል " ብለዋል።

" ለውጡ መጥቶ አዲስ መንግስት ተመስርቶ ወንድሞቻችን ወደ ሚኒሊክ ቤተመንግስት ሲገቡ ትንሽ ስራቸው አሳስቦኝ በግፋ በለው ባይሄዱ አልኩኝ " ያሉት ፕ/ር መረራ " በዚያ በግፋ በለው መንገድ በመሄዳቸው በእነዚህ አራት ዓመታት ሀገራችንንም ሆነ ህዝባችንን ብሎም ፓርቲያችንን ከፍተኛ ዋጋ አስከፍለዋል " ሲሉ ተደምጠዋል።

" ከምንም በላይ ደግሞ ምርጫውን ያለ ብሄራዊ መግባባት ብናደርግ ሰላም እና መረጋጋትን እድገት እና ብልፅግናን ብሎም ዴሞክራሲን አያመጣም በፈጣሪ ስም ወደ ብሄራዊ መግባባት እንሂድ ብለን ጠይቀን ነበር " ብለዋል።

" ነገር ግን በእንቢተኝነት ተሄደበት ውጤቱ ደግሞ የምታዩት ነው ፤ ኃይል በእጃቸው ያለው አይሆንም እኛ በቀድሞ ህግ መሰረት ነው የምንሄደው ብለው ምርጫ አካሄዱ ያ ደግሞ ጦርነት መዘዘ " ሲሉ ተናግረዋል።

ፕ/ር መረራ " ጦርነቱ እንዳይጀመር ተማፅነናል " ያሉ ሲሆን " ከተጀመረም እንዳይቀጥል በተደጋጋሚ ነው የጠየቅነው አሁን ያ ሁሉ ህይወትና ንብረት ወድሞ ወደእርቅ ተመጥቷል " ብለዋል።

ፕሮፌሰሩ ፤ 2014 ዓ/ም ላይ ከተካሄደው ምርጫ ተገፍተው መውጣታቸውን ገልፀው የፓርቲያቸው ጥያቄ የነበረው እውነተኛ የምርጫ ቦርድ ፣ ምህዳሩ የሰፋ የፖለቲካ ስርዓት እንደነበር አስረድተዋል።

የሃጫሉን ህልፈት ተከትሎ የፓርቲው አባላት እና አመራሮች ወደ እስር ቤት መታጎራቸውን ፤ ከ206 ፅህፈት ቤቶችም 203ቱን መዘጋታቸውን ይህን ተከትሎ ተገፍተው ከምርጫ መውጣታቸውን ገልፀዋል።

ፕሮፌሰር መረራ ጉዲና፤ በትግራይ ምርጫ እንዳልተካሄደና በኦሮሚያም አንድ ፓርቲ ከራሱ ጋር መወዳደሩን አንስተዋል።

በመጨረሻ ፕሮፌሰር መረራ " ሰሞኑን መንግስት ከህወሓት ጋር ጦርነቱን አቁሞ ወደ ብሄራዊ መግባባት እንሂድ እየተባለ ነው የሚገኘው የኛዎቹስ ? ኦነግ ሸኔ የተባሉትን በአንድ ወር እናጠፋለን እያሉ ነው በጦርነቱ ማንም ያሸንፍ ማን የኦሮሞ ህዝብ ግን የከፋ ዋጋን ያስከፍለዋል በፈጣሪ ስም አስቡበት በሏቸው። " ሲሉ ተደምጠዋል።

ፓርቲያቸው ለሰላም በሚደረገው ትግል፣ ለሀቀኛ ዴሞክራሲ በሚደረገው ትግል፣ ይሄን ሀገር ለመለወጥ እና ብልፅግናን ለማረጋገጥ በሚደረገው ትግል ውስጥ የራሱን አስተዋፅኦ እንደሚያደርግ አረጋግጠዋል።

@tikvahethiopia

#ETHIOPIA

ፕ/ር መስፍን አርዓያ (የአገራዊ ምክክር ኮሚሽን ኮሚሽነር) ፦

" ... የምክክር ኮሚሽኑ አመቻች እንጂ አደራዳሪም ሆነ እርቅ አስፈጻሚ አይደለም።

ኮሚሽኑ የድርድር ሥራ እንደማይሰራ፤ ዕርቅ እንደማያስፈጽም ሕዝብ ሊያውቅ ይገባል።

የአገራዊ ምክክር ኮሚሽነሮችና አባላትን ለምክክሩ የሚረዱ መድረኮችና አጀንዳዎችን በማመቻቸት አስፈላጊው ሥራ ለማከናወን የተመረጥን መሆኑን ሁሉም ሊገነዘብ ይገባል።

የኮሚሽኑ ሥራ አጀንዳ ነቅሶ ሕዝብን ለውይይት መጋበዝ ነው። ለሕዝብ ከሚቀርቡት አጀንዳዎች ውስጥ መግባባት ላይ የሚያደርሰውን መንገድ እናመቻቻለን።

በዚህ አካሄድ ኮሚሽኑ አመቻች ሲሆን ዋናው ወሳኙ ሕዝብ ነው።

ምክክሩ ወደ ' ብሔራዊ እርቅ ' የሚወስድ ከሆነም በእራሱ አሰራርና አካሄድ መሰረት ወደ እርቅ ይሄዳል እንጂ ኮሚሽኑ ሽምግልና እና አሊያም ብሔራዊ እርቅ ማስፈጸም ውስጥ አይገባም።

አንዳንድ ጊዜ በተሳሳተ መንገድ የአገራዊ ምክክር ኮሚሽኑን አሸማጋይ አሊያም አደራዳሪ አድርጎ የሚያይ ካለም የተሳሳተ ነው። የኮሚሽኑ ኃላፊነት አካታች በሆነ መንገድ ሁሉንም ጉዳይ አለኝ የሚል ወገንን በተመረጡ አጀንዳዎች ላይ እንዲመክር ማድረግ ነው። "

#EPA

@tikvahethiopia