አቶ ታገሰ ጫፎ ከሴናተር ጀምስ ኢንሆፎ ጋር ተወያዩ።

ትላንት ኢትዮጵያ (አ/አ) የገቡት ሴናተር ጀምስ ኢንሆፎ ከኢፌዴሪ የሕዝብ ተወካዮች ም/ቤት አፈ ጉባኤ አቶ ታገሠ ጫፎ ጋር ተወያይተዋል።

አፈ ጉባኤ አቶ ታገሠ ጫፎና የአሜሪካ ኮንግረሰ ሴናተር ጀምስ ኢንሆፎ በቀጠናዊና ሃገራዊ ጉዳዮች ላይ ውይይት ማድረጋቸው ተገልጿል።

በውይይቱ አፈ ጉባኤ አቶ ታገሰ ፦
- በህዳሴ ግድብ ፣
- በህግ ማስከበር ፣
- በሰብአዊ እርዳታ ተደራሽነት፣
- ከሱዳን ድንበር ማስከበር ሥራ ጋር ተያይዞ ያለበት ደረጃና እየተከናወኑ ያሉትን ተግባራት ላይ ማብራሪያ ሰጥተዋል፡፡

በተጨማሪ ኢትዮጵያ ሁለተኛውን ዙር የህዳሴ ግድብ የሙሌት ሥራ ለማከናወን በዝግጅት ላይ መሆኗን አብራርተዋል።

ሙሌቱ የተፋሰሱን ሃገራት ጥቅም በማይነካ መልኩ እንደሚፈፀምም ገልፀዋል፡፡

ከ "ህግ ማስከበር" ጋር ተያይዞ የተከሰቱ ችግሮችን ደረጃ በደረጃ ለመፍታት እየተሠራ ነው ብለዋል። የሰብዓዊ እርዳታ ለሚያስፈልጋቸው ወገኖች ድጋፍ በመደረግ ላይ ነው ብለዋቸዋል።

ኢትዮጵያ ከሱዳን ድንበር ጋር ተያይዞ በየጊዜው የሚነሱ ግጭቶችን በሰላማዊ መንገድ ለመፍታት ኢትዮጵያ ዝግጁ መሆኗን ለሴናተሩ ተናግረዋል፡፡

ሴናተር ጀምስ ኢንሆፍ ምን አሉ ?

በተደረገላቸው አቀባበል ደስተኛ መሆናቸውን ገልፀዋል።

የተሰጠው ማብራሪያ በኢትዮጵያ ውሥጥ እየተደረገ ያለውን ሁለንተናዊ እንቅስቃሴ ለመረዳት እንዳስቻላቸው ተናግረዋል።

ኢትዮጵያ በምታከናውናቸው ተግባራት ሁሉ ድጋፍ ለማድረግ ቁርጠኛ መሆናቸውን ሴናተር ጀምስ አረጋግጠዋል፡፡ #FDRE_HoPR

@tikvahethiopia

#Tigray

የተባበሩት መንግስታት ድርጅት (UN) በኢትዮጵያ ትግራይ ክልል ከ90 በመቶ በላይ ህዝብ አስቸኳይ የሆነ የምግብ እርዳታ ይፈልጋል ሲል አሳወቀ።

የተባበሩት መንግስታት የዓለም የምግብ ፕሮግራም (WFP) በመጋቢት ወር በትግራይ ክልል ሰሜን ምዕራብ እና ደቡብ ዞኖች ስርጭት ከጀመረ ጀምሮ ለአንድ ሚሊዮን ሰዎች የአስቸኳይ የምግብ እርዳታ መስጠቱን ገልጿል።

በጥቅምት ወር ላይ በተነሳው ግጭት ሳቢያ በአጠቃላይ 5.2 ሚሊዮን ህዝብ (91 % የትግራይ ህዝብ ማለት ነው) አስቸኳይ የምግብ እርዳታ እንደሚያስፈልገው WFP አሳውቋል።

ለአስቸኳይ ጊዜ የምግብ እርዳታ ምላሽ የ203 ሚሊዮን የአሜሪካ ዶላር ድጋፍ ያስፈልጋል ብሏል።

የWFP ቃል አቃባይ ቶምሶን ፒሪ ፥ "በክልሉ ረሃብ ወደ ከፍተኛ ደረጃ እንዳይሸጋገር ያሳስበናል" ሲሉ ተናግረዋል።

በትግራይ እስከ 2021 መጨረሻ በረሃብ ምክንያት የሰዎች ሕይወት እንዳይጠፋ እና የተጀመረውን የምግብ ድጋፍ አጠናክሮ ለማድረስ የተጠየቀው ገንዘብ በአስቸኳይ ሊቀርብ እንደሚገባ WFP አሳስቧል።

የተመድ የዓለም ምግብ ፕሮግራም ሪፖርት : www.wfp.org/news/wfp-reaches-over-1-million-people-emergency-food-assistance-tigray

@tikvahethiopia

የጠፋች ልጃቸውን በሕይወት ለማግኘት ተስፋ ያደረጉት ቤተሰቦች አስከሬኗን ተረክበዋል !

የ16 ዓመቷ ተማሪ ፌቨን ዳዊት ከጠፋች ከ4 ቀናት በሗላ አስክሬኗ በሀዋሳ ሀይቅ ተገኘ።

ፌቨንና ጓደኛዋ ትዕግስት ዘወትር እንደሚያደርጉት ሀዋሳ ሀይቅ ዳርቻ እየተዝናኑ ነበር በድንገት 2 ወጣቶች ካልተቀላቀልናችሁ ብለው አብረዋቸው የሆኑት።

ጥቂት ደቂቃዎችን አብረዋቸው ከቆዩ በሗላ በጀልባ ሀይቁ ላይ እንዝናና የሚል ጥያቄን ወጣቶቹ ያነሳሉ። 2ቱ ታዳጊ ሴቶች አለመፈለጋቸውን ቢገልፁም የወጣቶቹ ጉትጎታ የሚቻል ስላልነበር እሺ ለማለት ተገደዱ።

ጏደኛዋ ትዕግስት እንደምትለው የታዳጊ ሴቶቹ ቀጣይ ፈተና የነበረው የጀልባ ጉዞው ለየብቻ ነው የሚል ትዛዝ አዘል መመሪያ ከወንዶቹ ሲመጣ ነው።

ብዙ አታስቡ ተከታትለን ስለምንሄድ የሚል የማሳመኛ ቃል ሲደጋገም እሺታን መርጠው ጉዞ ጀመሩ።

አላማቸው 2ቱን ታዳጊ ሴቶች መነጠል እንጂ መዝናናት ስላልነበር አንደኛው ወጣት ፌቨንን ይዞ ጉዞ ይጀምራል..ጥቂት እንደተጓዙ ፌቨን የነ ትዕግስትን ጀልባ መመልከት ስላልቻለች ከወዴት ናችሁ የሚል ተደጋጋሚ የስልክ ጥሪ ለጓደኛዋ ታደርጋለች።

ከቆይታ በሗላ የት ናችሁ የሚል ጥያቄ ሳይሆን ለጓደኛዋ የድረሽልኝ መማፀኛ መልዕክት መላክ ጀመረች።

አሳዛኙ እውነታ ግን ፌቨን ከሀይቁ ሰምጣለች። ወጣቶቹ ከአካባቢው ተሰውረዋል።

ከ4 አስጨናቂ ቀናት በኋላ ቤተሰብ የ16 አመት ልጃቸውን አስክሬን ተረክበዋል።

የፌቨን አስክሬን ሲገኝ እጇ መጠምዘዙን ዓይኗ በቦክስ የመመታት ምልክት እንደነበረው በቦታው ቤተሰቦቿ ይናገራሉ።

2ቱን ወጣቶች ፖሊስ በቁጥጥር ስር አውሎ ምርመራ እያደረገ ይገኛል።

ህይወትን አይታ ያልጠገበችው የ16 ዓመቷ ፌቨን ቤተሰቦች ፈጣሪ እውነቱን ያሳየን የፍትህ ያለህ ይላሉ!

(#በጋዜጠኛ_አዳነ_አረጋ)

@tikvahethiopia

#AddisAbaba

በአዲስ አበባ ጎዳና ተዳዳሪ በመምስል ልዩ ልዩ ወንጀሎችን በመፈፀም ለፀጥታ ስጋት የሆኑ 1 ሺ የሚጠጉ ግለሰቦች በቁጥጥር ስር ዋሉ።

ፖሊስ የምርመራ ስራ እየሰራ ይገኛል።

ተጠርጣሪዎቹ ከህዝብ በደረሰ መረጃ መነሻ በማድረግ በ7 ክፍለ ከተሞች በተመረጡ 20 ቦታዎች ላይ ግንቦት 22 ቀን 2013 በተከናወነ የኦፕሬሽ ስራ የተያዙ ናቸው።

አጠቃላይ ቋሚ አድራሻ የሌላቸውና በዋና ዋና አደባባዮች እና በምሽት በሰዋራ ቦታዎች የተለያዩ ወንጀሎችን ሲፈፅሙ የነበሩ 999 ግለሰቦች ናቸው የተያዙት።

በቁጥጥር ስር ከዋሉት መካከል ፦

- አብዛኞቹ ማስቲሽና ቤንዚን በመጠቀም እራሳቸውን በማደንዘዝ የትራፊክ እንቅስቃሴዎችን ሲያውኩ እነደነበሩ

- የትራፊክ መብራት ካስቆመው ተሽከርካሪ ላይ ስፖኪዮ ገንጥለው እንደሚወስዱ፣

- ከአሽከርካሪ ወይም ከተሳፋሪ ላይ ሞባይል ስልክ፣ የአንገት ሃብል፣ ቦርሳ እና ልዩ ልዩ ንብረቶችን ቀምተው እንደሚሰወሩ

- በተለይ ሴት አሽከርካሪዎች አደጋ ሳያደረሱባቸው አደጋ እንዳደረሱባቸው በማስመሰልና በማዋከብ ገንዘብ እንደሚቀበሉ፣

- የትራፊክ አደጋ ሲያጋጥም ልዩ ልዩ ስልቶችን በመጠቀም ንብረቶችን እንደሚሰርቁ በጥቅሉ ትኩረታቸውን በዋና ዋና አደባባይ የትራፊክ መብራት በያዘው ተሽከርካሪ ላይ አድርገው ወንጀል ሲፈፅሙ እንደነበር ተረጋጧል።

በሌላ በኩል ግለሰቦቹ በምሽት የቅሚያ ወንጀል ሲፈፅሙ እንደነበር የተረጋገጠ ሲሆን በተለይ ደግሞ የውጪ ሀገር ዜጎችንና የዲፕሎማቲክ ማህበረሰቡን በማዋከብና በማስጨነቅ በከተማዋ መልካም ገፅታ ላይ አሉታዊ ተፅእኖ ሲፈጥሩ ነበር።

የተሰወኑት ግለሰቦች ደግሞ የጎዳና ተዳዳሪ በመምስል የሽብር ተግባር ለማስፈፀም ተልዕኮ ተቀብለው ሲንቀሳቀሱ መገኘታቸውን የአ/አ ፖሊስ በይፋዊ ፌስቡክ ገፁ አሳውቋል።

@tikvahethiopia

#Update

ከቀናት በፊት በዋግኽምራና አካባቢው ላይ የኤሌክትሪክ አገልግሎት መቋረጡን የሚገልፅ መረጃ ተለዋውጠን ነበር።

አካባቢው አሁንም ድረስ የኤሌክትሪክ ኃይል እንዳላገኘ ተሰምቷል።

በዋግ ኽምራ በሚገኙ አብዛኛዎቹ አካባቢዎች የተቋረጠው ኤሌክትሪክ አገልግሎት መልሶ ለማገናኘት ጥረት እየተደረገ መሆኑን የሰሜን ምስራቅ ሪጅን ትራንስሚሽንና ሰብስቴሽን ኦፕሬሽንና ጥገና ቢሮ አስታውቋል።

ቢሮው በአካባቢው ካለፈው ቅዳሜ ጀምሮ ኤሌክትሪክ የተቋረጠው በ3 የኃይል ተሸካሚ ምሰሶዎች ላይ ስርቆት በመፈፀሙና በመውደቃቸው ነው ብሏል።

ወደስፍራው ለጥገና የተንቀሳቀሰው ቡድን የወደቁትን ምሰሶዎች መልሶ ለመትከል ከእሁድ ጀምሮ እንቅስቃሴ መጀመሩ ተገልጿል።

ከአንድ ወር በፊት ከአላማጣ እስከ ሰቆጣ በሚገኙት 269 ምሰሶዎች ላይ የፍተሻ ስራ መከናወን መጀመሩን የተገለፀ ሲሆን በስምንት የብረት ምሰሶዎች ላይ የስርቆት ሙከራ መፈፀሙን በማረጋገጥ ምሰሶዎቹ ከመውደቃቸውና ኤሌክትሪክ ከመቋረጡ በፊት መስተካከሉ ተነግሯል።

በአሁኑ የተፈፀመው ስርቆት በመስመሩ ውስጥ በሚገኙትና የፍተሻ ስራ ባልተካሄደባቸው 47 ምሰሶዎች ውስጥ በሶስቱ ነው።

በምሰሶዎቹ መውደቅ ሰቆጣን ጨምሮ አምደወርቅ፣ ዳህና ፣ በአበርገለ፣ በሰሀላ፣በዝቋላና በአካባቢያቸው ኤሌክትሪክ ተቋርጧል።

የዋግ ኽምራ አብዛኛዎቹ አካባቢዎች ኃይል የሚያገኙት ከአላማጣ ባለ 66 ኪሎቮልት ማከፋፈያ ጣቢያ ከሚወጣ መስመር ነው።

#EthiopianElectricPower

@tikvahethiopia

የአሜሪካ የቪዛ እቀባ የሚመለከተው ማንን ነው ?

አሜሪካ በኢትዮጵያ "ትግራይ ክልል ግጭት" ሳቢያ በተለያዩ የግጭቱ ተሳታፊ ናቸው ባለቻቸው አካላት ላይ የቪዛ እቀባ ማድረጓ አይዘነጋም።

አሜሪካ እገዳውን ለመጣል የወሰነችው የትግራዩ ጦርነት እንዲቆም፣ የኤርትራ ወታደሮች ከትግራይ እንዲወጡ ፣ የሰብዓዊ ዕርዳታ አቅርቦት እንዲሻሻል እንዲሁም ተፋላሚ ወገኖች ወደ ድርድር እንዲመጡ ያቀረብኩት ሀሳብ ተቀባይነት አላገኘም በሚል እንደነበር ይታወሳል።

የቪዝ ክልከላ የተጣለባቸው አካላት በግልፅ የስም ዝርዝራቸው ይፋ ባይሆንም እቀባው ግን የሚመለከተው ፦

- የቀድሞ እና የአሁን የኤርትራ እና የኢትዮጵያ ባለስልጣናት
- የኢትዮጵያ እና ኤርትራ ወታደራዊ እና የፀጥታ ሹማምንት
- የአማራ ክልል የፀጥታ አካላት
- የህዝባዊ ወያነ ሓርነት ትግራይ (TPLF) አባላትን ነው።

ትላንት መግለጫ ያወጣው በአዲስ አበባ የሚገኘው የአሜሪካ ኤምባሲ ከላይ ከተገለፁት ውጭ ሌሎች ለትምህርት፣ ለስራ፣ ለሌላም ጉዳይ ወደ አሜሪካ የሚሄዱ ሰዎችን የቪዛ ጥያቄ እንደሚያስተናግድ አሳውቋል።

@tikvahethiopia

የ8ኛ ክፍል ፈተና ከሰኔ 23 ጀምሮ እንደሚሰጥ የአ/አ ትምህርት ቢሮ አሳወቀ።

በዛሬው ዕለት የአዲስ አበባ ከተማ አስተዳደር ትምህርት ቢሮ የ2013 ዓ.ም የ8ኛ ክፍል ክልላዊ ፈተና ከሰኔ 23-25/2013 ድረስ እንደሚሰጥ በይፋዊ የፌስቡክ ገፁ ላይ አሳውቋል።

@tikvahethiopia

ኢትዮጵያ በሁለት ቀን ብቻ 743 ዜጎቿን ከሳዑዲ አረቢያ አስወጥታለች።

ኢትዮጵያ ሳዑዲ አረቢያ ውስጥ በችግር ላይ ያሉ ወገኖችን በስፋት ወደ ሀገራቸው መመለስ ከጀመረች ወራት ተቆጥረዋል።

አሁንም ዜጎችን ወደሀገራቸው የመመለስ ስራ ተጠባክሮ የቀጠለ ሲሆን በሁለት ቀን ብቻ 743 ዜጎቿን ወደሀገራቸው መልሳለች።

አገራቸው ከተመለሱት ከ 743 ኢትዮጵያውያን መካከል 334ቱ #ከሪያድ ትላንት የተመለሱ ሲሆኑ 409ኙ ደግሞ በዛሬው ዕለት #ከጅዳ የተመለሱ ናቸው።

@tikvahethiopia