"ልኡኻት ሃገራት ኣውሮፖን ኣሜሪካን ብበዝሒ ክንመፅእ ዝኸኣልና ውዕሊ ፕሪቶሪያ ብዝድለ ፍጥነት ብዘይ ምፍፃሙ እዩ" _ኣምባሳዶር ዳረን ዊልች

መቐለ፥ 04 ለካቲት 2017 ዓ.ም. (ቴሌቪዥን ትግራይ)

ልኡኻት ሃገራት ኣውሮፖን ሕቡራት መንግስታትን ብበዝሒ ክንመፅእ ዝኸኣልና ውዕሊ ፕሪቶሪያ ብዝድለ ፍጥነት ብዘይ ምፍፃሙ እዩ ኢሎም ኣምባሳደር እንግሊዝ ኣብ ኢትዮጵያ ኣምባሳዶር ዳረን ዊልች ።

ልኡኻት ሃገራት ኣሜሪካ ፣ኢንግሊዝ ፣ጣልያን ፣ጀርመን ፣ዴንማርክ ፣ፈረንሳይን ሕብረት ኣውሮፓን ምስ ፕሬዝደንት ግዝያዊ ምምሕዳር ጌታቸው ረዳ ኣብ ህልዊ ኩነታት ትግራይ ኣመልኪቶም ይዝትዩ ኣለዉ።

ፕረዚዳንት ጌታቸው ረዳ ውዕሊ ሰላም ብዘይምትግባሩ ምምላስ ተመዛበልቲ ኮነ ፀገም ትግራይ ክፍታሕ ከምዘይከኣለ ተዛሪቦም።

እቶም ልኡዃት ውዕሊ ፕሪቶሪያ ብሙሉእነት ክፍፀም ኣብ ምግባር እጃሞም ክፍፅሙ ሓቲቶም።

ኣምባሳደር እንግሊዝ ኣብ ኢትዮጵያ ኣምባሳዶር ዳረን ዊልች ጉዳይ ትግራይ ብፍላይ ውዕሊ ፕሪቶሪያ ቁልፊ ጉዳይ ገይሮም ከምዝሓዝዎን እዙይ ተግባራዊ ኣብ ምግባር እጃሞም ከምዘፍፅሙን ተዛሪቦም።

ተመዛበልቲ ናብ መረበቶም ተመሊሶም ስሩዕ ሂወቶም ክመርሑ ከምዘለዎም እውን ገሊፆም።

እዙይ ተግባራዊ ንምግባር ድማ ብበዝሒ ክመፁ ምኽኣሎም ኣረዲኦም።

#ብይብራህ_እምባየ

ልኡኻት ሃገራት ኣውሮፓን ኣሜሪካን ውዕሊ ፕሪቶሪያ ኣብ ምፍፃም እጃሞም ከም ዘበርክቱ ተዛሪቦም።

መቐለ፥ 04 የካቲት 2017 ዓ.ም. (ቴሌቪዥን ትግራይ)

ልኡኻት ሃገራት ኣሜሪካ፣ ኢንግሊዝ፣ ጣልያን፣ ጀርመን፣ ዴንማርክ፣ ፈረንሳይን ሕብረት ኣውሮፓን ምስ ተመዛበልቲ ዘተ ኣካዪዶም።

እቶም ተመዛበልቲ “ናብ ተግባር ዘይሽረፍ ውዕሊ ፕሪቶሪያ ኣብ ሰማይ ዘሎ ደመና እዩ ኮይንና ዘሎ” ክብሉ መረረቶም ገሊፆም።

"ተወከልቲ ማሕበረ ሰብ ዓለም ንዝሓለፉ ኣርባዕተ ዓመታት ድምፅና ሰሚዖም ካብ ምኻድ ወፃኢ ዘምፅእዎ ፍታሕ የለን። ሕዚ እውን ደጊምና ንሓቶ ትግበራ ክህሉ እዩ" ኢሎም።

ውዕሊ ፕሪቶሪያ ዝፈረሙ ኣካላት ይኹኑ ማሕበረ ሰብ ዓለም ግቡኦም ብዘይምፍፃሞም ተመዛበልቲ ብጥምየትን ብሕማምን ይሞቱ ከም ዘለዉ ተዛሪቦም።

ብውዕሊ ፕሪቶሪያ ናብ መረበቶም ተመሊሶም ዝነበሩ ዝተወሰኑ ተመዛበልቲ ፀለምቲ ውሕስ ብዘይኮነ መንገዲ ብምኻዶም ይቕተሉን ዳግም ይመዛበሉን ከም ዘለዉ ገሊፆም።

ሕፅረት በጀት ብዝብል ምኽንያት ሰብኣዊ ሓገዝ ወሃብቲ ትካላት ስርሖም ኣቋሪፆም እዮም፤ በዙይ ኣብ ከቢድ ሻቅሎት ኣለና መናእሰይ እውን ይሰደዱ ኣለዉ ክብሉ ተዛሪቦም።

"ስለዝኾነ ኣብ መሬትና ሰሪሕና ክንበልዕ ብውዕሊ ፕሪቶሪያ ውሕስ ብዝኾነ መንገዲ ናብ መረበትና ክትምልሱና ኢና ንደሊ ክብሉ" ሓቲቶም።

ኣምባሳደር እንግሊዝ ኣብ ኢትዮጵያ ዳረን ዊልች ቀንዲ ዕላማ ዑደትና ኣብ ትግራይ ዘሎ ናይ ሰላም ኵነታት ንምዕዛብን ውዕሊ ፕሪቶሪያ ብምሉእነት ክፍፀም ንምግባርን እዩ ኢሎም።

ኣብ ተመዛበልቲ ዘሎ ፀገምን ስግኣትን ክንርዳእ ክኢልና ኣለና። ስለ ዝኾነ ምስ ፌደራል መንግስቲ ይኹን ምስ ካልኦት ሓሳባትኩም ወሲድና ንዝምልከቶም ኣካላት ብምቕራብ እጃምና ክንፍፅም ኢና ኢሎም።

በዙይ እውን ማሕበረሰብ ዓለም ከም ዘይረሰዐኩም ክነረጋግፀልኩም ንደሊ ክብሉ ገሊፆም።

ንመጀመርታ ጊዜ ናብ መዕቖቢ ተመዛበልቲ ምምፀኦም ዝገለፁ ኣምባሳደር ፈረንሳይ ኣብ ኢትዮጵያ ኣሌክስ ላሚክ ብወገኖም፣ ፈረንሳይ ከም ሃገር ምስ መንግስቲ ፌደራል ዘለና ዝምድና ተጠቒምና ውዕሊ ፕሪቶሪያ ኣብ ባይታ ክትግበር ክንፅዕር ኢና ኢሎም።

#ብይብራህ_እምባየ