ካቢኔ ግዝያዊ ምምሕዳር ትግራይ ሓዱሽ ኣወዳድባ ኣብያተ ዕዮ መንግስቲ ኣፅዲቑ።

መቐለ፥ 03 ሚያዝያ 2017 ዓ/ም (ቴሌቭዥን ትግራይ)

ፖለቲካዊ ባህልና ኣብ ምድምማፅ፣ ምክእኣልን ምክብባርን ዝተመስረተ ንምግባር ብልዑል ቆላሕታ ክስራሕ ከምዘለዎ ፕረዚደንት ሌ/ጀነራል ታደሰ ወረደ ሓቢሮም።

እቶም ፕረዚደንት ነዚ ዝገለፁ ሎሚ 3 ማዝያ 2017 ዓ/ም ኣብ ዝተኻየደ ናይ ካቢኔ ኣኼባ እዩ። እቲ ካቢኔ ብቢሮ ስቪል ሰርቪስ ተዳልዩ ዝቐረበሉ ኣወዳድባ ኣብያተ ዕዮ መሰረት ገይሩ ዝዘተየ ኮይኑ፣ ድሕሪ ሰፊሕ ምይይጥ ምክያዱ ድማ ብሙሉእ ድምፂ ኣፅድቕዎ ኣሎ።

እዚ ኣወዳድባ ነቲ ኣብ ስራሕ ዝፀንሐ ብመሰረቱ ዝልውጥ ዘይኮነስ፤ ዝነበረ እዚ ሰንሰለት ብዘወግድ፣ ውፅኢታዊነት ናይቶም ትካላትን ሓይሊ ሰብን ብዘረጋግፅን ልዕሊ ኹሉን ቅድሚ ኹሉን ውዕል ፕሪቶሪያ ብሙሉእነት ክፍፀምን ብዘኽእል ኣገባብ ንምትዕርራይ ዝዓለመ ምዃኑ ፕረዚደንት ሌ/ጀነራል ታደሰ ሓቢሮም።

ቀንዲ ምምዕርራይ ኣወዳድባ ኣብያተ ዕዮ ዘድልየሉ ምኽንያት ኣብዚ ሓፂር ግዜ ውዕል ፕሪቶሪያ ብሙሉእነት ክፍፀም ዘኽእሉ ኣወዳድባታት ንምትእትታውን ኣብ ህዝብና ዘሎ ዙርያ መለሽ ፀገማት ንምፍታሕን ማእኸል ዝገበረ ምዃኑ ገሊፆም።

ካብቶም ኣብቲ ሓዱሽ ኣወዳድባ ዝተኻተቱ ኣብያተ ዕዮታት ሓደ ድማ፣ ትግበራ ውዕል ፕሪቶሪያ ዝከታተል ሰክሬተሪያት ምዃኑ ወሲኾም ገሊፆም። ብተዛማዲ ብዛዕባ ምምላስ ተመዛበልቲ፣ ምክያድ ፖለቲካዊ ልዝብ ምስ ፌደራል፣ ምስንባትን ዳግመ ፅንበራን ሰራዊት ትግራይ ወዘተ ኣብ ውዕሊ ፕሪቶሪያ ዝምርኮስ ኮይኑ ዓርሱ ዝኸኣለ ኣወዳድባ ክህልዎ ምግባር ግድን ከምዘድሊ እዮም እቶም ፕረዚደንት ሓቢሮም።

ኣብ ኣፈፃፅማ ዝምልከት መንግስትን ፖለቲካ ፓርቲታትን ብሓባር ኮይኖም ዝከታተልዎ ምዃኑ ዝገለፁ እቶም ፕረዚደንት ኣብ ዝቕፅል ሓደ ዓመት ብፍላይ ድማ ሓድነት ህዝቢ ትግራይ ዝያዳ ኣብ ምጥንኻር ብቐፃልነት ክስራሕ እዩ ኢሎም።

ፖለቲካዊ ባህልና ኣብ ምድምማፅ፣ ምክእኣልን ምክብባርን ዝተመስረተ ንምግባር ብልዑል ቆላሕታ ክስራሕ ከምዘለዎ ዝገለፁ ፕረዚደንት ታደሰ፣ ኣብ ትግራይ ዘሎ ናይ ፖለቲካ ፀገም ብዘላቕነት ንምፍታሕን ሓድነት ህዝቢ ትግራይ ዝያዳ ምጥንኻርን ተሓሳቢ ዝገበረ ምዃኑ ኣብሪሆም። ፖለቲካ ትግራይ ካብቲ ዘለዎ ዘይራኸብ ፀፍሒ ወፅዩ ምዕሩይ ፖለቲካዊ ባህሊ ንምህናፅ ድማ ብቐፃልነት ምስራሕ ከምዘድሊ'ውን ሓቢሮም።

ፕረዚደንት ጀነራል ታደሰ ብተዛማዲ ርክባት ወረዳ ምስ ወረዳ፣ ዞባ ምስ ዞባ ብቐፃልነት ብምፍፃም ኣብ ህዝቢ ትግራይ ዝፀንሐ ስጡም ሓድነት ዝያዳ ንምጥንኻር ከምዝስራሕ ገሊፆም።

በቲ ዝተገበረ ሓዱሽ ምትዕርራይ መሰረት ድማ ቅድሚ ሕዚ ኣብ ስራሕ ዝነበረ ካቢኔ ሰክሪተሪያት ዝተዓፀፈ ኮይኑ፣ ብቐጥታ ቢሮታት ንፕረዚደንት ተፀዋዕቲ ክኾኑን ሓደ ምክትል ፕረዚደንት ክህሉን ተገይሩ ኣሎ። በዚ ዝተገብረ ውስን ምትዕርራይ መሰረት ድማ ኣብ ሓፂር እዋን ውሱን ናይ ኣመራርሓ ለውጢ ከምዝግባር ኣንፈት ከምዝተቐመጠ ዕላዊ መርበብ ሓበሬታ ቤት ፅሕፈት ፕረዚደንት ፀብፂቡ።

ዝተመዛበሉ ወገናትና ናብ መረበቶም ንምምላስ ይኹን ግዝኣታዊ ሓድነት ትግራይ ንምውሓስ ብሰላማዊን ሰላማዊን መንገዲ ጥራሕ ከም ዝስራሕ ፕረዚደንት ጀነራል ታደሰ ሓቢሮም።

መቐለ፥ 15 ሚያዝያ 2017 ዓ.ም. (ቴሌቪዥን ትግራይ)

ፕረዚደንት ግዝያዊ ምምሕዳር ትግራይ ሌ/ጀነራል ታደሰ ወረደ ነዚ ዝበሉ ሎሚ 15 ማዝያ 2017 ዓ.ም. ምስ ኣምባሳደር ዓባይ ብሪታንያ ኣብ ኢትዮጵያ ዳረን ዌልች ኣብ እዋናዊ ጕዳያት ጠሚቶም ኣብ ዘካየዱዎ ዘተ እዩ።

ኣብቲ ዝተኻየደ ዘተ ኣብ ኣፈፃፅማ ውዕሊ ሰላም ፕሪቶሪያ ብፍላይ ምውሓስ ግዝኣታዊ ሓድነት ትግራይ፣ ምምላስ ዝተመዛበሉ ወገናት፣ ምጅማር ፖለቲካዊ ዘተ ከምኡ ድማ ተጀሚሩ ዘሎ ናይ ምምላስን እግሪ ምትካልን ሰራዊት ትግራይ ዝተልዓሉ ጕዳያት እዮም።

ፕረዚደንት ሌ/ጀነራል ታደሰ ወረደ ኣብ ዝሃብዎ መብርሂ፣ ካብ መረበቶም ተመዛቢሎም ከቢድ ህይወት ክደፍኡ ዝተገደዱ ተመዛበልቲ ወገናትና ናይ ምምላስ ጉዳይ ቀንድን ቁልፍን ዕማም ግዝያዊ ምምሕዳር ትግራይ ምዃኑ ሓቢሮም። እዚ ቁልፊ ዕማም ግዝያዊ ምምሕዳር ምትግባር ከዓ ምስ ፌደራል መንግስቲ ብምምኽኻር ከምዝስራሕን ብዝተኽኣለ መጠን ኣብ ዝሓፀረ ግዘ ንምምላስ ብልዑል ትኹረት ከምዝስራሕን ገሊፆም።

ተመዛበልቲ ንምምላስ ይኹን ግዝኣታዊ ሓድነት ትግራይ ንምውሓስ ብሰላምን ሰላማዊን መንገዲ ጥራሕ ከም ዝስራሕ እውን እቶም ፕረዚደንት ወሲኾም ሓቢሮም።

ኣብ ትግራይ ኣጋጢሙ ዘሎ ፖለቲካዊ ፀገም ንምፍታሕ ብሄራዊ ዋዕላታት ብምክያድ ካብቶም መድረኻት ብዝርከቡ ሓሳባትን ኣብ ፅንዓት ብምምስራትን ብቐፃልነት ከም ዝስራሕ እውን ገሊፆም።

ኣምባሳደር ዓባይ ብሪታንያ ኣብ ኢትዮጵያ ዳረን ዌልች ብወገኖም ንፕረዚደንት ጀነራል ታደሰ ወረደ ዕዉት ናይ ስራሕ ግዜ ክኾነሎም ሰናይ ትምኒቶም ድሕሪ ምግላፅ፣ ግዝያዊ ምምሕዳር ትግራይ ተጠናኺሩ ብምሉእ ዓቕሙ ንኽሰርሕ፣ በቲ ግዝያዊ ምምሕዳር ትልሚ ተታሒዝሉ ዘሎ ህዝባዊ ዋዕላታት ኣብ ምጥንኻር፣ ምስ መንግስቲ ፌደራል ኣብ ዝግበሩ ተመዛበልቲ ናይ ምምላስ ምንቅስቓስ ንኽሰምር ሃገሮም ዓባይ ብሪታንያ ኩሉ ዓይነት ድጋፍ ከምትገብር ገሊፆም ክብል ቤት ፅሕፈት ፕረዚደንት ሓቢሩ።