ဗြိတိန်မှ ဗုံးကြဲလေယာဉ် အားလုံးကို အမေရိကန် ပြန်လည်ရုပ်သိမ်း

ဧရာဝတီ၊ အောက်တိုဘာ ၅၊ ၂၀၂၆။

ဗြိတိန်ရှိ အမေရိကန်လေတပ်စခန်းကို ပစ်မှတ်ထားရန် စီစဉ်သည့် အီရန်၏ ပူးပေါင်းကြံစည်မှုနှင့် ပတ်သက်၍ ဗြိတိန်အစိုးရက လူအများအပြားကို ဖမ်းဆီးခဲ့ပြီး ရက်ပိုင်းအကြာတွင် အမေရိကန်ပြည်ထောင်စုသည် သတ်မှတ်မထားသော ခြိမ်းခြောက်မှုအသစ်တခုကြောင့် တာဝေးပျံ ဗုံးကြဲလေယာဉ်များကို အမေရိကန်ရှိ မူလစခန်းများသို့ ပြန်လည်ရွှေ့ပြောင်းလိုက်သည်။

“RAF Fairford စခန်းမှာ တပ်ဖြန့်ထားတဲ့ အမေရိကန် ဗုံးကြဲလေယာဉ်အားလုံးဟာ အမေရိကန်ပြည်ထောင်စုမှာရှိတဲ့ သူတို့ရဲ့ မူလစခန်းတွေကို ပြန်လည်ရွှေ့ပြောင်းသွားပြီဆိုတာကို အတည်ပြုနိုင်ပါတယ်” ဟု အမည်မဖော်လိုသူ အမေရိကန်အရာရှိတဦးက CNN သို့ ပြောကြားခဲ့သည်။ လေယာဉ်များကို အဘယ်ကြောင့် ရွှေ့ပြောင်းရခြင်းဖြစ်သည် ဆိုသည့် အသေးစိတ်အချက်အလက်များ ပါဝင်ခြင်း မရှိပါ။

ကိစ္စရပ်ကို သိရှိသည့် သတင်းရင်းမြစ်က နောက်ဆုံးပေါ် ခြိမ်းခြောက်မှုကို “လက်တွေ့ကမ္ဘာမှ စိန်ခေါ်မှု/ဖြစ်စဉ်” ဟု ခေါ်ဆိုခဲ့သည်။ အမေရိကန်စစ်တပ်အနေဖြင့် ဗုံးကြဲလေယာဉ်များကို ထိုဒေသရှိ အခြားစခန်းတခုသို့ ပြောင်းရွှေ့တပ်ဖြန့်ခြင်း မပြုဘဲ မူလစခန်းများသို့ ပြန်လည်ရွှေ့ပြောင်းလိုက်ခြင်းမှာ မဖြစ်စမြဲ ထူးခြားသည့် လုပ်ရပ်ဖြစ်ကြောင်း အဆိုပါအရာရှိက ပြောကြားခဲ့သည်။

ဗြိတိန် ကာကွယ်ရေးဝန်ကြီးဌာနကမူ တစုံတရာ မှတ်ချက်ပေးရန် ငြင်းဆန်ခဲ့သည်။

Fairford ရှိ ဗြိတိန်တော်ဝင်လေတပ်စခန်းသည် အီရန်နှင့် စစ်ပွဲတွင် ပါဝင်သည့် အမေရိကန် B-1 ဗုံးကြဲလေယာဉ်များကို တပ်ဖြန့်ရန် အသုံးပြုခဲ့သည့် စခန်းဖြစ်ပြီး တာဝေးတိုက်ခိုက်မှုများကို စီမံခန့်ခွဲရန် တာဝန်ရှိသော အမေရိကန် အမျိုးသားမဟာဗျူဟာမြောက် တိုက်ခိုက်ရေးဌာနချုပ် (US Global Strike Command) ၏ လှုပ်ရှားဆောင်ရွက်ရာ စခန်းတခုလည်း ဖြစ်သည်။

ဗုံးကြဲလေယာဉ်များကို ပြန်လည်ရွှေ့ပြောင်းခြင်းသည် ကြံစည်မှုဟု သံသယရှိသည့် ဖြစ်စဉ်အား စုံစမ်းစစ်ဆေးနေစဉ်အတောအတွင်း ပေါ်ပေါက်လာခြင်းဖြစ်သည်။ ဗြိတိန်ရဲတပ်ဖွဲ့သည် စက်တင်ဘာ ၂၇ ရက်က လေတပ်စခန်းနှင့် နီးကပ်သည့်နေရာတွင် အကြမ်းဖက်မှုနှင့် ဖောက်ခွဲရေးပစ္စည်းများ ဆိုင်ရာ ပြစ်မှုဆိုင်ရာ သံသယဖြင့် အမျိုးသား ၅ ဦးကို ဖမ်းဆီးခဲ့သည်။ လန်ဒန်မှ အသက် ၂၃ နှစ်မှ ၂၅ နှစ်ကြား ဗြိတိန်နိုင်ငံသားများဖြစ်ကြောင်းသာ ဖော်ပြထားသည့် ထိုအမျိုးသားများကို အာမခံဖြင့် အမြန်ပြန်လွှတ်ပေးခဲ့ပြီး အခင်းဖြစ်ပွားရာနေရာရှိ ဗန်ကား သုံးစီးတွင် မည်သည့်ဖောက်ခွဲရေးပစ္စည်းမှ မတွေ့ရှိကြောင်း ရဲတပ်ဖွဲ့က အတည်ပြုခဲ့သည်။ ၎င်းတို့ ပြန်လည်လွတ်မြောက်လာမှုအပေါ် သမ္မတ ဒေါ်နယ်ထရန့်က “ကျနော်သာဆိုရင် အဲဒီလို လုပ်မှာမဟုတ်ဘူး” ဟု ဝေဖန်ပြောဆိုခဲ့သည်။

ကြံစည်မှုဟု သံသယရှိသည့် အဆိုပါဖြစ်စဉ်နှင့် ပတ်သက်၍ အသက် ၂၅ နှစ်အရွယ် ဗြိတိန်-အီရန် ကပြား အမျိုးသားတဦးကိုလည်း ကြာသပတေးနေ့က ထပ်မံဖမ်းဆီးခဲ့သည်။

ဗြိတိန်ဝန်ကြီးချုပ် အန်ဒီဘန်းဟမ်က လွန်ခဲ့သည့်သီတင်းပတ်က အဆိုပါဖြစ်စဉ်တွင် အီရန်ပါဝင်ပတ်သက်နေကြောင်း “ခိုင်လုံသော အရိပ်အယောင်များ” ရှိကြောင်း ပြောကြားခဲ့သည်။

“ဒါနဲ့ ပတ်သက်ပြီး သင့်တော်တဲ့အချိန်ကျရင် အသေးစိတ် ထပ်မံပြောကြားသွားမှာ ဖြစ်ပေမဲ့ အီရန်က ဒီဖြစ်စဉ်မှာ ပါဝင်ပတ်သက်နေတယ်လို့ ကျနော်တို့ ယုံကြည်ကြောင်းတော့ အတည်ပြုနိုင်ပါတယ်” ဟု စက်တင်ဘာ ၃၀ ရက်တွင် BBC သို့ ပြောကြားခဲ့သည်။

အန်ဒီဘန်းဟမ်၏ ပြောကြားချက်များသည် အဆိုပါဖြစ်စဉ်တွင် ပြင်ပနိုင်ငံတခု၏ ပတ်သက်မှုရှိနေသည်ဆိုသော အမေရိကန်၏ သုံးသပ်ချက်ကို ထောက်ခံနေပုံရသည်။

တချိန်တည်းမှာပင် အီရန်က အဆိုပါဖြစ်စဉ်တွင် ပါဝင်ပတ်သက်မှု မရှိကြောင်း ငြင်းဆိုထားပြီး စွပ်စွဲချက်များသည် အခြေအမြစ်မရှိဟု ဖော်ပြကာ တီဟီရန်မြို့ရှိ ဗြိတိန်သံအမတ်ကို ကြာသပတေးနေ့က ဆင့်ခေါ်ခဲ့ကြောင်း အီရန်နိုင်ငံပိုင် မီဒီယာများက ဖော်ပြခဲ့သည်။ အဆိုပါတွေ့ဆုံမှုအတွင်း အီရန်ဒုတိယနိုင်ငံခြားရေးဝန်ကြီး မာဂျစ် တာ့ခ်သ်-ရာဗန်ချီ (Majid Takht-Ravanchi) က တီဟီရန်အပေါ်ထားရှိသည့် ဗြိတိန်၏ “မသင့်တော်သော ချဉ်းကပ်ပုံ” ကို ပြန်လည်ပြင်ဆင်ရန် လန်ဒန်ကို တိုက်တွန်းခဲ့ကြောင်း သိရသည်။

ကိုးကား။ ။ CNN သတင်း US removes all Air Force bombers from UK base following new threat

အွန်လိုင်းလိမ်လည်မှုဖြင့် ဖိလစ်ပိုင် ဖမ်းသည့်အထဲ မြန်မာ ပါဝင်

ဧရာဝတီ၊ အောက်တိုဘာ ၅၊ ၂၀၂၆။

ဖိလစ်ပိုင် အာဏာပိုင်များသည် တရားမဝင် ပြည်ပအွန်လိုင်းလောင်းကစား လုပ်ငန်းများအပေါ် ယခုနှစ်အတွင်း အကြီးမားဆုံး နှိမ်နင်းမှုအဖြစ် အများစုမှာ တရုတ်နိုင်ငံသားများဖြစ်ကြသည့် နိုင်ငံခြားသား အလုပ်သမား ၂၀၀ ကျော်ကို ဖမ်းဆီးထိန်းသိမ်းလိုက်သည်။

ဖိလစ်ပိုင် တောင်ပိုင်း မင်ဒါနာအိုကျွန်းပေါ်ရှိ နေရာနှစ်ခုကို စစ်တပ်နှင့် အခြားဥပဒေစိုးမိုးရေး အေဂျင်စီများက သောကြာနေ့တွင် ဝင်ရောက်စီးနင်းခဲ့ကြောင်း အမျိုးသား လူဝင်မှုကြီးကြပ်ရေးဗျူရိုက စနေနေ့ညနှောင်းပိုင်းတွင် သတင်းထုတ်ပြန်ခဲ့သည်။ ပြစ်မှုကျူးလွန်သည့် ဒုစရိုက်ဂိုဏ်းများသည် ပြည်ပအွန်လိုင်းလောင်းကစား လုပ်ငန်းများ (POGOs) ကို အမျိုးမျိုးသော ပြစ်မှုများအတွက် အကာအကွယ်အဖြစ် အသုံးပြုနေကြကြောင်း စွပ်စွဲခံထားရသည်။

ဗျူရို၏ ထုတ်ပြန်ချက်အရ နေရာတခုကို ဝင်ရောက်စီးနင်းစဉ် တရုတ်နိုင်ငံသား ၁၁၀ ဦး၊ ကမ္ဘောဒီးယားနိုင်ငံသား ၂ ဦးနှင့် ဟောင်ကောင်ဒေသခံ ၁ ဦးတို့ကို ဖမ်းဆီးရမိခဲ့သည်။

ဒုတိယမြောက်နေရာတွင် အခြားသော နိုင်ငံခြားသား ၁၃၁ ဦးကို ထပ်မံဖမ်းဆီးခဲ့သည်။ ထိုအထဲတွင်လည်း အများစုမှာ တရုတ်နိုင်ငံသားများဖြစ်ကြပြီး မလေးရှား၊ အင်ဒိုနီးရှားနှင့် မြန်မာနိုင်ငံသားများလည်း ပါဝင်ကြောင်း ထုတ်ပြန်ချက်တွင် ဖော်ပြထားသည်။

အာဏာပိုင်များသည် ကွန်ပျူတာ စက်ပစ္စည်းများ၊ လက်ကိုင်ဖုန်းများ၊ လပ်တော့ပ်များနှင့် ဆင်းမ်ကတ် (SIM card) အရေအတွက် အမြောက်အမြားကို သိမ်းဆည်းရမိခဲ့သည်။

လူကုန်ကူးမှု၊ ငွေကြေးခဝါချမှု၊ ပြန်ပေးဆွဲမှု၊ လိမ်လည်မှုနှင့် လူသတ်မှုများအတွက် ဒုစရိုက်ဂိုဏ်းများက အကာအကွယ်အဖြစ် အသုံးပြုနေကြသည်ဟူသော အကြောင်းပြချက်ဖြင့် မနီလာအစိုးရသည် POGO လုပ်ငန်းများကို ၂၀၂၄ ခုနှစ်တွင် ပိတ်ပင်တားမြစ်ခဲ့သည်။

၂၀၂၃ ခုနှစ် ကုလသမဂ္ဂအစီရင်ခံစာတစ်ခုတွင် လွန်ခဲ့သောနှစ်များအတွင်း လူပေါင်း ရာပေါင်းများစွာသည် ဒုစရိုက်ဂိုဏ်းများ၏ လူကုန်ကူးခြင်းကို ခံခဲ့ရပြီး အရှေ့တောင်အာရှတလွှားရှိ အွန်လိုင်းလိမ်လည်မှု ဌာနများ (scam centres) နှင့် အခြားသော တရားမဝင် အွန်လိုင်းလုပ်ငန်းများတွင် အတင်းအကျပ် ခိုင်းစေခြင်းခံခဲ့ရကြောင်း မှတ်တမ်းတင်ဖော်ပြထားသည်။

မြန်မာနိုင်ငံတဝန်းတွင် အနည်းဆုံး လူပေါင်း ၁၂၀,၀၀၀ ဦးနှင့် ကမ္ဘောဒီးယားနိုင်ငံတွင် လူပေါင်း ၁၀၀,၀၀၀ ခန့်သည် အွန်လိုင်းလိမ်လည်မှု လုပ်ငန်းများတွင် ပိတ်မိနေနိုင်ပြီး၊ လာအို၊ ဖိလစ်ပိုင်နှင့် ထိုင်းနိုင်ငံတို့ရှိ ဒုစရိုက်ဂိုဏ်းပိုင် စီးပွားရေးလုပ်ငန်းများသည် ခရစ်ပတိုငွေကြေး လိမ်လည်မှုမှသည် အွန်လိုင်းလောင်းကစားမှုများအထိ ကျူးလွန်လျက်ရှိကြောင်း ကုလသမဂ္ဂ အစီရင်ခံစာက ခန့်မှန်းထားသည်။

နောက်ဆုံး ဝင်ရောက်စီးနင်းမှုများအတွင်း ဖမ်းဆီးရမိသူများအနက် အချို့ကို လူကုန်ကူးမှုနှင့် ဆက်စပ်နိုင်သည့် ပြစ်မှုများအတွက် ဖိလစ်ပိုင်အစိုးရက စုံစမ်းစစ်ဆေးလျက်ရှိပြီး ကျန်ရှိသူများကိုမူ ပြည်နှင်ဒဏ်ပေးမည်ဖြစ်သည်။

တရုတ်သံရုံး ပြောရေးဆိုခွင့်ရှိသူ ဂျီလင်းပန်က AFP သတင်းအေဂျင်စီသို့ ပြောကြားရာတွင် ၎င်းတို့အနေဖြင့် “ဒီအမှုရဲ့ အသေးစိတ်အချက်အလက်တွေနဲ့ ပတ်သက်ပြီး ဖိလစ်ပိုင် ဥပဒေစိုးမိုးရေး အေဂျင်စီတွေနဲ့ ဆက်သွယ်ဆောင်ရွက်နေပါတယ်” ဟု ပြောသည်။

၎င်းက ဆက်လက်၍ “တရုတ်နိုင်ငံသားတွေ ပြည်ပမှာ လောင်းကစားတာ ဒါမှမဟုတ် လောင်းကစားကုမ္ပဏီတွေမှာ အလုပ်လုပ်တာအပါအဝင် လောင်းကစားပြုလုပ်မှု မှန်သမျှကို တရုတ်ဥပဒေက တားမြစ်ထားပါတယ်” ဟု ဖြည့်စွက်ပြောကြားခဲ့သည်။

ကိုးကား။ ။ Al Jazeera သတင်း Philippines arrests 244 suspects in online scam crackdown

ဓာတ်ပုံ - ၂၀၂၅ ခုနှစ်၊ ဇန်နဝါရီလ ၃၁ ရက်နေ့က မနီလာမြို့ရှိ သံသယဖြစ်ဖွယ် အွန်လိုင်းငွေလိမ်လုပ်ငန်း ရုံးခန်းတခုအား သမ္မတ၏ ဖွဲ့စည်းပုံအခြေခံဥပဒေဆိုင်ရာ ဥပဒေစိုးမိုးရေးနှင့် ဥပဒေမဲ့ဂိုဏ်းများ နှိမ်နင်းရေး ကော်မရှင် (PAOCC) နှင့် အမျိုးသားစုံစမ်းစစ်ဆေးရေးဗျူရိုတို့မှ အရာရှိများ ဝင်ရောက်စီးနင်းစဉ်/ AFP

ကျောင်းသားဆန္ဒပြပွဲများကြောင့် ပြင်သစ်တွင် ကျောင်းပေါင်း ၅၀၀ အထိ ပိတ်ထားမည်

ဧရာဝတီ၊ အောက်တိုဘာ ၅၊ ၂၀၂၆။

တနေ့တခြား ပိုမိုများပြားလာသည့် ကျောင်းသားဆန္ဒပြပွဲများအကြား ပြင်သစ်နိုင်ငံသည် တနင်္လာနေ့တွင် ကျောင်းပေါင်း ၅၀၀ အထိ လုံးဝ သို့မဟုတ် အစိတ်အပိုင်းလိုက် ပိတ်ထားရန် စီစဉ်နေသည်။

ပညာရေးဝန်ကြီး အက်ဒူးအာ ဂျက်ဖရေး (Edouard Geffray) က “သင်ခန်းစာများ ပိုင်းခြား၍ တဖြည်းဖြည်း ပြန်လည်စတင်နိုင်ရေး” ၏ တစိတ်တပိုင်းအဖြစ် ယင်းကြိုတင်ကာကွယ်ရေး အစီအမံများကို တနင်္ဂနွေနေ့တွင် ကြေညာခဲ့သည်။ သို့သော် နွေရာသီ ပိတ်ရက် အေးချမ်းသွားပြီးနောက် အတန်း အရွယ်အစား၊ ဆရာအင်အား နည်းပါးမှုနှင့် အခြားမကျေနပ်ချက်များကြောင့် လွန်ခဲ့သည့်လက စတင်ခဲ့သည့် ဆန္ဒပြပွဲများကို သီတင်းပတ်အစတွင် ပြန်လည်စတင်ရန် ဆန္ဒပြကျောင်းသားများက ကြေညာခဲ့ကြသည်။

လုံခြုံရေးအခြေအနေများ “ပြည့်မီခြင်းမရှိသေး” သောကြောင့် အထက်တန်းကျောင်း “၄၀၀ မှ ၅၀၀” ခန့်တွင် သင်ခန်းစာများကို “လုံးဝ သို့မဟုတ် အစိတ်အပိုင်းလိုက် ဆိုင်းငံ့ထားမည်” ဟု ဝန်ကြီးက ပြောကြားခဲ့သည်။ ဆန္ဒပြပွဲများ စတင်ခဲ့ချိန်မှစ၍ ကျောင်း ၂၄ ကျောင်း “မီးရှို့ခံရခြင်း သို့မဟုတ် ဖျက်ဆီးလုယက်ခံရခြင်း” ရှိခဲ့ကြောင်းလည်း သူက ထပ်လောင်းပြောကြားခဲ့သည်။

ကျောင်းများပိတ်ထားခြင်းသည် လုံခြုံရေးဆိုင်ရာ ကြိုတင်ကာကွယ်မှုတခုဖြစ်ကြောင်း ဂျက်ဖရေးက ပြောသည်။ သမ္မတ မက်ခရွန်၏ အစိုးရထံမှ “ခိုင်မာသည့် အစီအမံများ” မရှိခြင်းကို ကိုးကား၍ ဆန္ဒပြပွဲ ဦးဆောင်ကျင်းပသူများက အင်္ဂါနေ့တွင် အကြီးစား ဆန္ဒပြပွဲများ ပြန်လည်ပြုလုပ်ရန် ခေါ်ယူထားသည်။

စက်တင်ဘာလလယ်တွင် ပါရီ၌ ကျောင်းသားဆန္ဒပြပွဲများ စတင်ဖြစ်ပွားခဲ့ပြီးကတည်းက အနည်းဆုံး ကျောင်းသား ၁၇၀ နှင့် ပညာရေးဝန်ထမ်း ၇၈ ဦး ဒဏ်ရာရရှိခဲ့ကြောင်း ဂျက်ဖရေး၏ ပြောကြားချက်အရ သိရသည်။

သောကြာနေ့တွင် ပြင်သစ်ရှိ အထက်တန်းကျောင်းပေါင်း ၃,၇၀၀ အနက် အနည်းဆုံး ၄၀၀ ခန့် ပိတ်ထားခဲ့ရပြီး ၅၆၀ မှာ ဆန္ဒပြပွဲများ သို့မဟုတ် အနှောင့်အယှက်များနှင့် ရင်ဆိုင်ခဲ့ရကြောင်း အမျိုးသားပညာရေးဝန်ကြီးဌာနက သတင်းထုတ်ပြန်ခဲ့သည်။

ဆရာအင်အား နည်းပါးမှု၊ ကျောင်းတက်ချိန် အလွန်အမင်း များပြားမှုနှင့် အခြားမကျေနပ်ချက်များကြောင့် စက်တင်ဘာ ၁၇ ရက်တွင် ပါရီမြို့ ဆန်ဆန်းရှိ အထက်တန်းကျောင်းတကျောင်း၌ ဆရာများနှင့် ကျောင်းသားများသည် ပထမဆုံး စတင် လှုပ်ရှားခဲ့ကြသည်။ ထိုအချိန်မှစ၍ ဆန္ဒပြပွဲများသည် တနိုင်ငံလုံးသို့ ပျံ့နှံ့သွားခဲ့ပြီး စာသင်ခန်း သပိတ်မှောက်မှုများ၊ ပိတ်ဆို့မှုများနှင့် ဆန္ဒပြပွဲများ ဖြစ်ပေါ်လာခဲ့သည်။

ပြည်ထဲရေးဝန်ကြီး၏ အဆိုအရ လွန်ခဲ့သည့်သီတင်းပတ်အတွင်း လူ ၅,၀၀၀ ထက်မက ဖမ်းဆီးခံခဲ့ရပြီး ၎င်းတို့အနက် ၈၅ ရာခိုင်နှုန်းမှာ အရွယ်မရောက်သေးသူများ ဖြစ်ကြသည်။

ဆန္ဒပြပွဲများကို တုံ့ပြန်ရာတွင် ရဲတပ်ဖွဲ့၏ “အချိုးအစား မမျှသော အကြမ်းဖက်မှု” ကို ဝေဖန်ရေးသမားများက ဝေဖန်ခဲ့ကြသည်။ လူ့အခွင့်အရေးအဖွဲ့ Amnesty International က ကျောင်းသားဆန္ဒပြသူများကို “နှိပ်ကွပ်ခြင်း မဟုတ်ဘဲ နားထောင်ပေးရမည်” ဟု ပြောကြားခဲ့သည်။

ပြင်သစ် အများပြည်သူဆိုင်ရာ ရေဒီယိုနှင့် အင်တာဗျူးတခုတွင် ဂျက်ဖရေးက လက်ဝဲစွန်း လှုပ်ရှားသူများသည် “ကျောင်းသားလှုပ်ရှားမှုအတွင်း စိမ့်ဝင်ကာ ကျောင်းသားများထံမှ လှုပ်ရှားမှုကို လွှဲပြောင်းယူခဲ့ပြီး အလွန်အမင်း အကြမ်းဖက်မှုများ ကျူးလွန်ခဲ့ကြသည်” ဟု စွပ်စွဲပြောဆိုခဲ့သည်။

ကိုးကား။ ။ Al Jazeera သတင်း France to shutter up to 500 schools as more student protests called

TIME နှင့် အင်တာဗျူးအပြီး ရခိုင်ပြည်နယ်၊ ကျောက်တော်မြို့တွင် စစ်အုပ်စု၏ လေကြောင်းတိုက်ခိုက်မှုကြောင့် လူအစုလိုက်အပြုံလိုက် သေဆုံးခဲ့ရရာ နိုင်ငံတကာသတင်းဌာနများစွာက ဖော်ပြခဲ့ပြီး နိုင်ငံတကာက ရှုတ်ချခဲ့၏။ ထိုဖြစ်ရပ်ကို စစ်တပ်လော်ဘီများက ဖုံးဖိကာကွယ်နေကြသော်လည်း ယခင် VOA မြန်မာပိုင်း ဌာနမှူးလုပ်ခဲ့ဖူးပြီး ယခု စစ်တပ်လော်ဘီလုပ်ပေးနေသူကိုယ်တိုင်ပင် ထိုဗုံးကြဲမှုကို တခွန်းမှ မဟရဲပေ။ လော်ဘီ လုပ်မပေးရဲပေ။ စစ်တပ်၏ ဗုံးကြဲမှုကို ဖုံးဖိမပေးရဲပေ။

ဤသို့ ယခင် နိုင်ငံတကာသတင်းလောကတွင် တာဝန်ယူခဲ့ဖူးပြီး လက်ရှိ စစ်တပ်လော်ဘီလုပ်ပေးသည့် အဆင့်ရောက်နေသူပင် လော်ဘီလုပ်မပေးရဲသည့် အစုလိုက်အပြုံလိုက် သတ်ဖြတ်မှုမျိုးစုံ ကျူးလွန်နေသည့် မင်းအောင်လှိုင်စစ်အုပ်စုအနေဖြင့် နိုင်ငံတကာမှ အဆင့်အတန်းရှိသည့် သတင်းဌာနများက ၎င်းတို့အကြောင်းကို ချီးမြှောက်ရေးသားလိမ့်မည်၊ လော်ဘီလုပ်ပေးလိမ့်မည်၊ ၎င်းတို့ပြောသမျှ ယုံကြည်လိမ့်မည်ဟု ထင်နေခြင်းမှာ မိုက်မဲရူးသွပ်မှုတရပ်သာ ဖြစ်ပေလိမ့်မည်။

Website တွင် ဖတ်ရန် https://burma.irrawaddy.com/opinion/viewpoint/2026/10/05/416802.html
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://www.irrawaddy.com/donation

အယ်နီညို သတိပေးနေချိန် မီးကို အလှည့်ကျစနစ်ဖြင့် ပေးမည်

ဧရာဝတီ၊ အောက်တိုဘာ ၅၊ ၂၀၂၆

ပြင်းထန် အယ်နီညိုရာသီဥတု ဖြစ်စဉ်ကြောင့် မြန်မာနိုင်ငံတွင် ၆ လအတွင်း လူ ၁,၂၀၀ ခန့်အထိ သေဆုံးနိုင်ကြောင်း ပညာရှင်များက သတိပေးထားချိန်တွင် အာဏာသိမ်းအစိုးရ လျှပ်စစ်နှင့်စွမ်းအင်ဝန်ကြီးဌာနက လျှပ်စစ်ဓာတ်အားများကို အလှည့်ကျစနစ်ဖြင့်သာ ဖြန့်ဖြူးတော့မည်ဟု ကြေညာသည်။

မုတ်သုံလွန် ပွင့်လင်းရာသီသို့ ရောက်ရှိလာခြင်းနှင့်အတူ အပူချိန် သိသာစွာ မြင့်မားလာသဖြင့် ဓာတ်အားသုံးစွဲမှုနှင့် လိုအပ်ချက် တိုးတက်လာသောကြောင့် ဝန်အား ထိန်းညှိသည့်အနေဖြင့် အလှည့်ကျစနစ်ကို အောက်တိုဘာ ၅ ရက်မှ စတင် ကျင့်သုံးခြင်းဖြစ်ကြောင်း ဖော်ပြထားသည်။

အပူချိန် မြင့်မားချိန်တွင် ဓာတ်အား ထုတ်လုပ်မှုနှင့် သုံးစွဲမှု အချိုးမညီပါက ဓာတ်အားထုတ်စက်များ ရုတ်တရက် ရပ်တန့်ခြင်းနှင့် တနိုင်ငံလုံး ဓာတ်အားစနစ် ပြတ်တောက်ခြင်း (System Breakdown) တို့ ဖြစ်ပေါ်နိုင်သဖြင့် ဝန်အား ထိန်းညှိဖြန့်ဖြူးမှုကို မလွဲမရှောင်သာ အနည်းဆုံး ပမာဏဖြင့် ဖြန့်ဖြူးပေးရခြင်း ဖြစ်သည်ဟုလည်း အသိပေးထားသည်။

လျှပ်စစ်မီးကို အချိန်ပိုင်းသာ ရရှိတော့မည် ဖြစ်သဖြင့် မြို့ကြီးများရှိ တိုက်ခန်းများ၌ စုပြုံ နေထိုင်သူများအပူရှောင်ရန် အခွင့်အလမ်း နည်းပါးသွားနိုင်သည့်အပြင် စံချိန်တင် အပူချိန်ကြောင့် သေဆုံးနိုင်ခြေနှင့် ရောဂါအခံ ရှိသူများ ထိခိုက်နိုင်ခြေ မြင့်မားလာကြောင်း မိုးလေဝသနှင့် သိပ္ပံပညာရှင်များက သတိပေးထားသည်။

#WhatsHappeningInMyanmar
#RejectMilitaryCoup

ဗီယက်နမ်၏ သုံးလပတ် GDP ၄ နှစ်အတွင်း အမြန်ဆုံး နှုန်းဖြင့် တိုးတက်

ဧရာဝတီ၊ အောက်တိုဘာ ၅၊ ၂၀၂၆။

စနေနေ့က ထုတ်ပြန်ခဲ့သည့် အစိုးရ ကိန်းဂဏန်းများအရ ဗီယက်နမ်၏ ပြည်တွင်းထုတ်ကုန် (GDP) သည် တတိယသုံးလပတ်တွင် ယခင်နှစ် ကာလတူထက် ၉.၉၅% တိုးတက်ခဲ့ပြီး၊ ယင်းမှာ ကိုဗစ်ကပ်ရောဂါ ဖြစ်ပွားပြီးနောက်ပိုင်း အမြန်ဆုံး သုံးလပတ် တိုးတက်မှုနှုန်းဖြစ်ကာ ဒုတိယသုံးလပတ်၏ ပြန်လည်ပြင်ဆင်ထားသော ၈.၈၁% တိုးတက်မှုနှုန်းထက် ပိုမိုမြန်ဆန်လာခဲ့ခြင်း ဖြစ်သည်။

ဇူလိုင်မှ စက်တင်ဘာလအထိ သုံးလပတ် တိုးတက်မှုကို အားကောင်းသော ပို့ကုန်များနှင့် အခြေခံအဆောက်အအုံဆိုင်ရာ ခိုင်မာသော ရင်းနှီးမြှုပ်နှံမှုများက မောင်းနှင်ခဲ့သော်လည်း၊ နိုင်ငံ၏ တနှစ်တာလုံး တိုးတက်မှု ရည်မှန်းချက်ဖြစ်သည့် ၁၀% ထက် ကျော်လွန်ရန်မူ လိုအပ်နေသေးသည်။

အီရန်စစ်ပွဲကြောင့် ယခုနှစ်အတွင်း သွင်းကုန်စရိတ်များ မြင့်တက်လာမှုနှင့်အတူ ပို့ကုန်ကို အဓိက အားထားနေရသည့် အဆိုပါ စီးပွားရေးစနစ်သည် စိန်ခေါ်မှုများနှင့် ရင်ဆိုင်ခဲ့ရပြီး၊ ယခုနှစ် ပထမ ကိုးလအတွင်း ကုန်သွယ်ရေး လိုငွေပြမှုမှာ စံချိန်တင် အမြင့်ဆုံးသို့ ရောက်ရှိခဲ့သည်။

စက်တင်ဘာလတွင် ကုန်စည်ပို့ကုန် တင်ပို့မှုမှာ ယခင်နှစ် ကာလတူထက် ၃၉.၁% မြင့်တက်ခဲ့ပြီး ကန်ဒေါ်လာ ၅၉.၄၈ ဘီလီယံရှိခဲ့ကာ၊ သွင်းကုန်မှာ ၄၅.၈% မြင့်တက်ခဲ့ပြီး ကန်ဒေါ်လာ ၅၈.၂၁ ဘီလီယံ ရှိခဲ့သဖြင့် ယင်းလအတွက် ကုန်သွယ်ရေး ပိုငွေ ကန်ဒေါ်လာ ၁.၂၇ ဘီလီယံ ထွက်ပေါ်ခဲ့ကြောင်း အမျိုးသား စာရင်းအင်းရုံး (NSO) ၏ အစီရင်ခံစာတွင် ဖော်ပြထားသည်။

ယခုနှစ် ပထမ ကိုးလအတွက်မူ ပို့ကုန်မှာ ၂၄.၅% မြင့်တက်ခဲ့ပြီး ကန်ဒေါ်လာ ၄၃၄.၃၀ ဘီလီယံ ရှိခဲ့ကာ၊ သွင်းကုန်မှာ ၃၆.၇% မြင့်တက်ခဲ့ပြီး ကန်ဒေါ်လာ ၄၅၃.၇၂ ဘီလီယံ ရှိခဲ့သဖြင့် ကုန်သွယ်ရေး လိုငွေပြမှုမှာ စံချိန်တင် အမြင့်ဆုံးအဖြစ် ကန်ဒေါ်လာ ၁၉.၄၂ ဘီလီယံအထိ ရှိခဲ့သည်။

စွမ်းအင် သွင်းကုန်များ ဈေးနှုန်း မြင့်တက်လာခြင်းသည် ကုန်သွယ်ရေး လိုငွေပြမှု ပိုမိုကျယ်ပြန့်လာရခြင်း၏ အကြောင်းရင်း အစိတ်အပိုင်းတခု ဖြစ်သည်။ အစီရင်ခံစာအရ အဆိုပါ ကာလအတွင်း ရေနံစိမ်း သွင်းကုန် ပမာဏမှာ ၁၃.၅% လျော့ကျခဲ့သော်လည်း တန်ဖိုးအားဖြင့် ၁၄.၄% မြင့်တက်ခဲ့သည်။ သန့်စင်ပြီး စက်သုံးဆီ သွင်းကုန် ပမာဏမှာ ၁၁.၅% မြင့်တက်ခဲ့ပြီး တန်ဖိုးအားဖြင့် ၇၉.၃% ထိ မြင့်တက်ခဲ့သည်။

စက်တင်ဘာလတွင် စားသုံးသူ ဈေးနှုန်းများမှာ ယခင်နှစ် ကာလတူထက် ၅.၀၈% မြင့်တက်ခဲ့ကြောင်း NSO က ပြောကြားခဲ့သည်။ ထို့ပြင် စက်တင်ဘာလအတွင်း စက်မှုထုတ်လုပ်မှုမှာလည်း ယခင်နှစ် ကာလတူထက် ၁၆.၇% မြင့်တက်ခဲ့သည်ဟု ဆိုသည်။

နိုင်ငံတော်၏ စီးပွားရေး တိုးတက်မှုကို မြှင့်တင်ရန် ကြိုးပမ်းမှုများ၏ အစိတ်အပိုင်းအဖြစ် အခြေခံအဆောက်အအုံပိုင်းတွင် ပြည်သူ့ရင်းနှီးမြှုပ်နှံမှုများကို တိုးမြှင့်ဆောင်ရွက်ခဲ့သဖြင့် ကိုးလတာ ကာလအတွင်း စုစုပေါင်း ရင်းနှီးမြှုပ်နှံမှုမှာ ယခင်နှစ် ကာလတူထက် ၁၆.၇% မြင့်တက်ခဲ့ကြောင်း ကိန်းဂဏန်းများက ဖော်ပြသည်။

ကိုးလတာ ကာလအတွင်း နိုင်ငံခြား ရင်းနှီးမြှုပ်နှံမှု စီးဝင်မှုမှာ ယခင်နှစ် ကာလတူထက် ၁၂.၁% မြင့်တက်ခဲ့ပြီး ကန်ဒေါ်လာ ၂၁.၁ ဘီလီယံ ရှိခဲ့ကြောင်း NSO က ပြောကြားခဲ့သည်။

ယခုနှစ်အတွက် ဗီယက်နမ်၏ စီးပွားရေး တိုးတက်မှု ခန့်မှန်းချက်ကို လွန်ခဲ့သည့် သီတင်းပတ်က ၇.၂% မှ ၇.၈% သို့ တိုးမြှင့်ပြင်ဆင်ခဲ့သည့် အာရှဖွံ့ဖြိုးရေးဘဏ် (ADB) က ဗီယက်နမ်၏ ထုတ်လုပ်မှုကဏ္ဍ ဆက်လက် တိုးတက်လာခြင်း၊ ပြည်တွင်း စားသုံးမှု အားကောင်းခြင်းနှင့် တိုက်ရိုက် နိုင်ငံခြားရင်းနှီးမြှုပ်နှံမှုများ တည်ငြိမ်စွာ ဝင်ရောက်နေခြင်းတို့ကြောင့် ကာလတို တိုးတက်မှု မျှော်လင့်ချက်များမှာ ဆက်လက် ခိုင်မာနေဆဲဖြစ်ကြောင်း ပြောကြားခဲ့သည်။

သို့သော်လည်း ရေရှည်အတွက်မူ "ကမ္ဘာ့ဝယ်လိုအား အားနည်းသွားခြင်းနှင့် ပြင်ပ မရေရာမှုများ ပိုမိုမြင့်တက်လာခြင်းတို့က တိုးတက်မှုကို ထိခိုက်စေနိုင်ပြီး၊ စွမ်းအင်ဈေးနှုန်းများ ပိုမိုမြင့်တက်လာခြင်းနှင့် ကမ္ဘာ့ဘဏ္ဍာရေး အခြေအနေများ တင်းကျပ်လာခြင်းတို့က ငွေကြေးဖောင်းပွမှုနှင့် ငွေလဲနှုန်း ဖိအားများကို ပိုမိုဆိုးရွားစေနိုင်သည်" ဟု ပြောကြားခဲ့သည်။

စွန့်စားရမှုဆိုင်ရာ သတင်းအချက်အလက် ကုမ္ပဏီ Verisk Maplecroft မှ အာရှရေးရာ အကြီးတန်း လေ့လာသုံးသပ်သူ Laura Schwartz က အထူးသဖြင့် လွန်ခဲ့သည့် လများအတွင်း ငွေကြေးဖောင်းပွမှု မြန်ဆန်လာခြင်းကြောင့် ဗီယက်နမ် စီးပွားရေး ပူပြင်းလာနိုင်သည့် အခြေအနေအပေါ် စိုးရိမ်ပူပန်မှုများ မြင့်တက်နေကြောင်း ပြောကြားခဲ့သည်။

အနာဂတ် ကာလတိုနှင့် ကာလလတ်အတွင်း "လျှပ်စစ်ဓာတ်အား လိုအပ်ချက် မပြည့်မီနိုင်မှုများကလည်း ကြီးမားသော စိန်ခေါ်မှုများကို ဖြစ်ပေါ်စေလိမ့်မည်" ဟု သူမက ဖြည့်စွက်ပြောကြားခဲ့သည်။

ကိုးကား။ ။ Reuter သတင်း Vietnam's quarterly GDP grows fastest in 4 years as exports boom

မန္တလေး ဆေးတက္ကသိုလ် ဓာတ်ခွဲခန်းမှူး CDM ဆရာမ အိုးဘိုထောင်၌ ကွယ်လွန်

ဧရာဝတီ၊ အောက်တိုဘာ ၅၊ ၂၀၂၆

ဆေးတက္ကသိုလ် (မန္တလေး)၊ ရောဂါဗေဒဌာန၊ ဓာတ်ခွဲခန်းမှူး CDM ဆရာမ ဒေါ်ခင်သီတာသည် နိုင်ငံရေးယုံကြည်ချက်ကြောင့် မတရား ဖမ်းဆီးခံရပြီး မန္တလေး အိုးဘိုထောင်အတွင်း အကျဉ်းကျနေစဉ် လုံလောက်စွာ ဆေးကုသမှု မရရှိသဖြင့် စက်တင်ဘာ ၂၈ ရက်၌ ကျဆုံးခဲ့ကြောင်း အာဏာရှင် စနစ် ဆန့်ကျင်ရေး ပြည်သူ့အင်အားများ ချိတ်ဆက်ညှိနှိုင်းရေးကော်မတီ- မန္တလေး (AFCC) က ယမန်နေ့တွင် ထုတ်ပြန်သည်။

ဆရာမ ဒေါ်ခင်သီတာသည် ၂၀၂၁ ဖေဖော်ဝါရီမှ စတင်၍ စစ်အာဏာရှင်စနစ် ဆန့်ကျင်ကာ CDM ပြုလုပ်ခြင်း၊ နွေဦးတော်လှန်ရေးအတွင်း ပါဝင်ခြင်းနှင့် CDM ဝန်ထမ်းများအား ထောက်ပံ့ကူညီခြင်းတို့ကြောင့်၂၀၂၃ ခုနှစ် ဩဂုတ် ၁၅ ရက်တွင် ဖမ်းဆီးခံခဲ့ရပြီး အကြမ်းဖက်မှုတိုက်ဖျက်ရေး ဥပဒေပုဒ်မ ၅၀ (ည) နှင့် ၅၂ (က) တို့ဖြင့် ထောင်ဒဏ်၂၂ နှစ် ချမှတ်ခဲ့ခြင်းဖြစ်သည်။

ဆရာမ ဒေါ်ခင်သီတာသည် ထောင်မကျခင်က ရောဂါအခံ၊ ပုံမှန်ဆေးသောက်သုံးနေရခြင်း မရှိသည့်အပြင် မကွယ်လွန်မီ တလခန့်၌ မိသားစုဝင်များ ထောင်ဝင်စာသွားတွေ့ချိန်အထိ ကျန်းကျန်းမာမာရှိနေကြောင်း AFCC အဖွဲ့ တာဝန်ရှိသူက ပြောသည်။

၎င်းက "၂၇ ရက်ညမှာ ဆရာမက ရုတ်တရက် မူးလဲသွားတယ်လို့ သိရတယ်။ ၂၈ ရက် မနက်ကျမှ ဆေးရုံကို ပို့ပေးတယ်။ ဆေးရုံရောက်တဲ့ အချိန်ကျမှ မိသားစုကို ဆက်သွယ်တာပေါ့နော်။ ဆေးရုံရောက်တဲ့အချိန်မှာ အသက်မပါလာဘူးလို့ သိရတယ်။ ထောင်ထဲမှာပဲ ဆုံးတယ်။ ဆေးရုံဘက်က ဆီးချို ဆောင့်တက်လို့တော့ ပြောတယ်။ အဓိကကတော့ ဖြစ်ဖြစ်ချင်းမှာ ဆေးရုံကို မပို့ပေးတာရယ်၊ ပုံမှန် ဆေးစစ်ပေးတာရယ် မရှိတာကြောင့် ဆရာမက မဆုံးသင့်ဘဲ ဆုံးပါးသွားရတာဖြစ်တယ်" ဟု ပြောသည်။

ဆရာမ ဒေါ်ခင်သီတာ၏ ရုပ်အလောင်းကို မိသားစုအား ပြန်ထုတ်ခွင့်မပေးခဲ့ကြောင်း သိရသည်။

ဒေါ်ခင်သီတာ၏ ဒီမိုကရေစီအပေါ် ထားရှိခဲ့သည့် ယုံကြည်မှု၊ ကြိုးပမ်းမှုနှင့် စိတ်ဓာတ်တို့ကို အောက်မေ့လေးစားလျက် အကျဉ်းထောင်အတွင်း မတရားဖမ်းဆီးခံထားရသော နိုင်ငံရေးအကျဉ်းသားအားလုံး လွတ်မြောက်ရေးနှင့် ဖက်ဒရယ်ဒီမိုကရေစီရေးတို့ကို အစဉ်တစိုက် ကြိုးပမ်း ဆောင်ရွက်သွားမည်ဟု AFCC က ကတိပြုသည်။

ထို့ပြင် အာဏာသိမ်းအစိုးရက နိုင်ငံရေးအကျဉ်းသားများအပေါ် လူ့အခွင့်အရေး ချိုးဖောက်မှုများကျူးလွန်နေခြင်းသည် နိုင်ငံတကာ ရာဇဝတ်မှုဖြစ်သည့် လူသားမျိုးနွယ်အပေါ် ကျူးလွန်သော ရာဇဝတ်မှုမြောက်ကြောင်းသတ်မှတ်၍ အပြင်းအထန် ရှုတ်ချပြီး ယင်းချိုးဖောက်မှု တခုချင်းစီအတွက် တရားမျှတမှု ရရှိရန် ကြိုးပမ်း ဆောင်ရွက်သွားမည်ဟုလည်း ထုတ်ပြန်ထားသည်။

#WhatsHappeningInMyanmar
#RejectMilitaryCoup

ဆန်၊ ဆီ၊ စက်သုံးဆီ၊ ရွှေနှင့်ဒေါ်လာ ယနေ့ ပေါက်ဈေး

ဧရာဝတီ၊ အောက်တိုဘာ ၅၊ ၂၀၂၆

ဆန်

အာဏာရှင်အစိုးရအဖွဲ့ သတ်မှတ်သည့် ဆန်လက်ကားဈေးမှာ အကြမ်း အနိမ့်ဆုံးဆန်ကြမ်း ၁ အိတ်(အနိမ့်ဆုံး) ၇၂,၀၀၀ ကျပ်မှ ၈၃,၀၀၀ ကျပ်၊ အချော အမြင့်ဆုံး ရွှေဘိုပေါ်ဆန်း ၁ အိတ် ၂၀၀,၀၀၀ ကျပ်မှ ၂၃၀,၀၀၀ ကျပ်၊ ဧရာဝတီပေါ်ဆန်း နယ်စုံ ၁၇၀,၀၀၀ ကျပ်မှ ၁၈၅,၀၀၀ ကျပ်

ပြင်ပ ဈေးကွက်၌ ကြိုက်ရောင်းကြိုက်ဝယ် ဈေးဖြင့်သာ အရောင်းအဝယ်ဖြစ်နေပြီး ဆန်၏ အရည်အသွေး၊ ဆန်ကွဲပါဝင်မှု၊ ဆန် သစ်/ဟောင်း၊ ငွေပေးချေမှု၊ အိတ်ခွံ၊ နေရာအလိုက် သယ်ယူပို့ဆောင်မှုပေါ်မူတည်၍ ဈေးနှုန်း အနည်းငယ် ကွာဟမှုရှိနိုင်ကြောင်း ဝါးတန်းလမ်း ဆန်ကုန်စည်ဒိုင်က သိရသည်။

စားအုန်းဆီ

အာဏာရှင်အစိုးရအဖွဲ့၏ စားအုန်းဆီ ရည်ညွှန်းလက်ကားဈေးမှာ ၁ ပိဿာ ၇,၀၀၀ ကျပ်ကျော်တွင်ရှိနေ၊
လက်လီသတ်မှတ်ဈေးမှာ ၈,၀၀၀ ကျပ် ဝန်းကျင်တွင်ရှိနေ၊ ပြင်ပဈေးမှာ ၁ ပိဿာလျှင် ၂၅,၀၀၀
ကျပ်ဝန်းကျင်တွင် ရှိနေပြီး ယင်းဆီဈေးနှုန်းမှာ ရန်ကုန်မြို့ ဈေးနှုန်းများဖြစ်ပြီး မြို့နယ်နှင့် နေရာဒေသအလိုက် ကွာခြားမှု၊ မြင့်တက်မှုများ ရှိနိုင်သည်။

စက်သုံးဆီ

ဓာတ်ဆီ ၉၂ တလီတာ ၄,၅၄၀ကျပ်
ဓာတ်ဆီ ၉၅ တလီတာ ၄,၇၃၀ ကျပ်
ဒီဇယ် တလီတာ ကျပ် ၄,၈၁၅ ကျပ်
ပရီမီယံ ဒီဇယ် တလီတာ ၅,၇၉၅ ကျပ်
စစ်ဖြစ်ပွားသည့် ဒေသများအပါဝင် ဝေးလံခေါင်ဖျားဒေသများတွင် သတ်မှတ်ဈေးထက် ဈေးနှုန်း အဆမတန် မြင့်တက်ခြင်း၊ သယ်ယူပို့ဆောင်မှုများကို အာဏာသိမ်းအစိုးရ ကန့်သတ်ခြင်းများ ရှိနေသည်။

ရွှေနှင့် ဒေါ်လာ

ပြင်ပဈေးကွက်အရ အမေရိကန် ၁ ဒေါ်လာလျှင် ကျပ် ၄,၄၀၀ ကျော်တွင်ရှိနေ
အကယ်ဒမီ အခေါက်ရွှေ တကျပ်သား (စနစ်ဟောင်း) ကျပ်သိန်း ၁၀၀ ကျော်တွင်ရှိနေ

လက်ဝတ်ရတနာ ၁၅ ပဲရည် တကျပ်သား (စနစ်ဟောင်း) ကျပ် ၉၄ သိန်း ကျော်တွင်ရှိနေ
အကယ်ဒမီ အခေါက်ရွှေ တကျပ်သား (စနစ်သစ်) ကျပ် ၉၈ သိန်း ကျော်တွင်ရှိနေ
လက်ဝတ်ရတနာ ၁၅ ပဲရည် တကျပ်သား (စနစ်သစ်) ကျပ် ၉၂ သိန်း ကျော်တွင်ရှိနေ
ကမ္ဘာ့ရွှေဈေး တအောင်စ အမေရိကန် ဒေါ်လာ ၄,၁၃၁
ဓာတ်သတ္တု (ရွှေ) ရည်ညွှန်းဈေး သတ်မှတ်ရေးကော်မတီ သတ်မှတ်ဈေး စံချိန်မီ ရွှေ ၁ ကျပ်သား
(၁၆.၃၂၉၃၂၅ဂရမ်) ၇,၁၀၀,၀၀၀
အချိန်နှင့်အမျှ ဈေးနှုန်း အပြောင်းအလဲ ရှိနိုင်သည်။

#ဧရာဝတီ
#နေ့စဉ်ကုန်ဈေးနှုန်း
#ဆန်ဈေး
#ဆီဈေး
#လောင်စာဆီဈေး
#ရွှေဈေး
#ဒေါ်လာဈေ

တရုတ်နှင့် ကုန်သွယ်ရေးမြှင့်ရန် ရွှေလီမြစ်ကူး တံတားဆောက်ဖို့ TNLA ပြင်ဆင်နေဟုဆို

သတင်း | ဧရာဝတီ၊ အောက်တိုဘာ ၅၊ ၂၀၂၆

တရုတ်နှင့် ကုန်သွယ်ရေးမြှင့်ရန် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA)က ရှမ်းမြောက် ဒေသ နမ့်ခမ်းမြို့နယ်တွင် ဝန်တင်အား တန် ၁၀၀ အထိ ခံနိုင်သည့် နှစ်လမ်းသွား ရွှေလီမြစ်ကူးတံတားသစ်တည်ဆောက် ရန် စီစဉ်နေကြောင်း ဒေသခံတို့က ဆိုသည်။

TNLA ထိန်းထားသော နမ့်ခမ်းမြို့ အနောက်ဘက် ၂ မိုင်ကျော် အကွာရှိ တခုတည်းသော နမ့်ခမ်း- နောင်တောင်း နယ်စပ် ကုန်သွယ်ရေးစခန်းကို စက်တင်ဘာလကစ၍ အဆင့်မြှင်တင်ရန် လုပ်နေသလို တရုတ်ဘက်ကလည်း အဆင့်မြင့် ကုန်သွယ်ရေးဂိတ်စခန်း တည်ဆောက်ပြီးစီးသွားပြီဖြစ်သည်။

ထိုစီမံကိန်းတွင် နယ်စပ်ကုန်သွယ်ရေးလမ်းကြောင်းပေါ်ရှိ အဓိကကျရာ ရွှေလီမြစ်ကို စက်လှေအသုံးပြု ကူးလူးခြင်း မပြုတော့ဘဲ ဝန်တင်အား တန် ၁၀၀ အထိ ခံနိုင်သည့် နှစ်လမ်းသွား ရွှေလီမြစ်ကူးတံတားသစ် တည်ဆောက်မည်ဖြစ်သလို ခေတ်မီ နယ်စပ်ဂိတ်၊ စစ်ဆေးရေးကွင်းများ၊ ဇေယျသုခ လမ်းပိုင်းကို ၁၀ ပေ ချဲ့ထွင်ခြင်းနှင့် နောင်တိန်ကျေးရွာအတွင်း ကွန်ကရစ်လမ်းခင်းခြင်းတို့လည်း ပါဝင်သည်။

Website တွင် ဖတ်ရန် https://burma.irrawaddy.com/news/2026/10/05/416809.html
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://www.irrawaddy.com/donation

စစ်တပ် အသေခံဒရုန်းကြောင့် ရေဦး၌ အရပ်သားများ ဒဏ်ရာရ

ဧရာဝတီ၊ အောက်တိုဘာ ၅၊ ၂၀၂၆

စစ်ကိုင်းတိုင်း၊ ရေဦးမြို့နယ်အနောက်ခြမ်း ရွာများကို အောက်တိုဘာ ၄ ရက် မွန်းလွဲ ၁၂ နာရီခွဲခန့်က အနောက်မြောက်တိုင်း စစ်ဌာနချုပ် (နမခ) မှ လွှတ်တင်သည့် အသေခံဒရုန်းများဖြင့် တိုက်ခိုက်၍ ကလေးတဦးအပါ အရပ်သား ၃ ဦး ဒဏ်ရာရခဲ့ကြောင်း ရေဦးမြို့နယ်ပကဖထံမှ သိရသည်။

ရေဦးနယ် အနောက်ခြမ်း ညောင်ပင်သာ၊ ညောင်စောက်၊ မကျည်းကုန်းနှင့် အုတ်ဖိုတို့အား ဒရုန်းဖြင့် တိုက်ခိုက်ခဲ့ခြင်းဖြစ်ကာ ညောင်စောက်ရွာအတွင်းပေါက်ကွဲသည့် ဒရုန်းကြောင့် ၈ နှစ်အရွယ် ယောကျ်ားလေး ၁ ဦး၊ အသက် ၃၀ နှင့် ၄၀ အရွယ် အမျိုးသမီး ၂ ဦးတို့ ထိခိုက် ဒဏ်ရာများရရှိခဲ့ပြီး နေအိမ် ၁ လုံး ပျက်စီးခဲ့ကြောင်း သိရသည်။

"ရေဦးနယ်မှာ စစ်ကြောင်းမထိုးတာ၂ နှစ်ကျော် ၃ နှစ်နီးပါး ရှိတော့မယ်။ ဘာတိုက်ပွဲမှလည်း ဖြစ်မထားဘဲနဲ့ အရပ်သား ပြည်သူတွေကို ပစ်မှတ်ထားပြီး အကြောင်းမဲ့ ဒီရွာတွေကို အသေခံဒရုန်း ၃ စင်းနဲ့ တိုက်ခိုက်ခဲ့တာပါ။ ညောင်ပင်သာ၊ မကျည်းကုန်း၊ အုတ်ဖို ရွာတွေဘက်ကတော့ လူထိခိုက်မှု မရှိခဲ့ဘူး" ဟု ရေဦးမြို့နယ် အနောက်ခြမ်းဇုန် သတင်းဆက်သွယ်ရေး တာဝန်ခံ ထူးခန့်ဇော် (အမေ့သား) က ပြောသည်။

ဒရုန်း ၃ စင်းအနက် ၁ စင်းသည် ညောင်ပင်သာ၊ မကျည်းကုန်းနှင့် အုတ်ဖိုရွာ ၃ ရွာကြား လယ်ကွင်းအတွင်း မပေါက်ကွဲဘဲ ကျရောက်ခဲ့သဖြင့် ရေဦး ပကဖ က သိမ်းဆည်းနိုင်ခဲ့သည်ဟုလည်း ဆိုသည်။

ရေဦးနယ်အတွင်းရှိ ကျေးရွာများတွင် စစ်ရေး လှုပ်ရှားမှု မရှိ၊ တိုက်ပွဲ ဖြစ်ပွားထားခြင်း မရှိဘဲ အရပ်သား ပြည်သူများကို ပစ်မှတ်ထားကာ စစ်တပ်က ဂျက်ဖိုက်တာ၊ ဂျိုင်ရိုကော်ပတာ၊ အသေခံ ဒရုန်းများနှင့် တိုက်ခိုက်နေသဖြင့် ဒေသခံများ လေကြောင်းအန္တရာယ် အထူး ဂရုစိုက်နေထိုင်ကြရန် အသိပေးထားသည်။

ဓာတ်ပုံ- ဂျက်ဂျက်
#WhatsHappeningInMyanmar
#RejectMilitaryCoup

လူငယ်တွေ ညမထွက်ရဲတော့တဲ့ နေပြည်တော်

ဧရာဝတီ၊ အောက်တိုဘာ ၅၊ ၂၀၂၆

အာဏာသိမ်း စစ်ခေါင်းဆောင်တွေအခြေစိုက်ပြီး အခိုင်အမာ ထိန်းချုပ်ထားတဲ့ နေပြည်တော်မှာ စစ်မှုထမ်းဖို့ အဓမ္မ စုဆောင်းခံရမှာကို စိုးရိမ်တာကြောင့် ဒေသခံလူငယ်တွေ ညဘက်အိမ်ပြင်မထွက်ရဲတော့တဲ့ အခြေအနေတွေ ဖြစ်ပေါ်နေပါတယ်။

စစ်ဌာနချုပ်တွေနဲ့ အဓိက စစ်ဘက်အခြေစိုက်စခန်းတွေ ဝန်းရံထားတဲ့ နေပြည်တော်လို နေရာမျိုးမှာတောင် ဒေသခံတွေဟာ လုံခြုံမှုမရှိဘူးလို့ ခံစားနေကြရပြီး ဇမ္ဗူသီရိ၊ ဥတ္တရသီရိ၊ ပျဉ်းမနား အပါအဝင်မြို့နယ်အသီးသီးမှာ ည ၈ နာရီနောက်ပိုင်း အပြင်မထွက်ရဲကြတော့ဘူးလို့ ဧရာဝတီကို ဒေသခံတွေက ပြောထားပါတယ်။

အာဏာသိမ်းခေါင်းဆောင်က စစ်မှုထမ်းဥပဒေကို စတင်အသက်သွင်းလိုက်ပြီးတဲ့နောက် နေပြည်တော် အပါအဝင် နိုင်ငံတဝန်းမှာ အဓမ္မ စစ်သားစုဆောင်းတာတွေနဲ့ စစ်မှုထမ်းအကြောင်းပြ ပြန်ပေးဆွဲငွေညှစ်မှုတွေ တနေ့တခြား ပိုမိုဆိုးရွားလာနေပါတယ်။

ဒီအခြေအနေတွေကြောင့် သက်ဆိုင်ရာ လူငယ်တွေသာမက မိဘဆွေမျိုးနဲ့ ဇနီးသည်တွေပါ မိသားစုဝင်တွေ ပေါ်တာဆွဲ ဖမ်းဆီးခံရမှာကို အပြင်းအထန် စိုးရိမ်ပူပန်နေကြရပြီး၊ မဖြစ်မနေ အရေးကြီးကိစ္စ မရှိဘူးဆိုရင်တော့ ညဘက် အပြင်မထွက်ကြတော့ဘဲ နေအိမ်တွေထဲမှာပဲ ခိုအောင်းနေထိုင်နေကြရတယ်လို့ မြို့ခံတွေကပြောပါတယ်။

https://youtu.be/UJhB6RX5Up4

#မြန်မာ #ဧရာဝတီ #စစ်မှုထမ်း #နေပြည်တော် #WhatsHappensInMyanmar

ဧရာဝတီရဲ့ YouTube membership ကို Support လုပ်ချင်တဲ့ပရိတ်သတ်တွေအနေနဲ့ ဒီ https://www.youtube.com/@irrawaddynews1993 Link လေးမှ join button ကို နှိပ်ပြီးတော့ ပါဝင်နိုင်ပါပြီ။

စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://www.irrawaddy.com/donation