မြစ်ဆုံပြန်စချင်နေတာ မြန်မာအာဏာသိမ်းအစိုးရလို့ တရုတ်လော်ဘီ ပြော

ဧရာဝတီ၊ စက်တင်ဘာ ၁၆၊ ၂၀၂၆

ကချင်ပြည်နယ် လျှပ်စစ်မီးလုံလောက်ရန်နှင့် တနိုင်ငံလုံး မီးလင်းရေးအတွက်ဟုဆိုကာ ရပ်တန့်ထားသည့် ဧရာဝတီမြစ်ဆုံ ရေအားလျှပ်စစ်စီမံကိန်းကို ပြန်လည်စတင်ရန် ကြိုးစားနေသည်မှာ မြန်မာအာဏာသိမ်းအစိုးရသာဖြစ်ပြီး တရုတ်အစိုးရ မဟုတ်ကြောင်း တရုတ်လော်ဘီ အမျိုးသမီး မြန်မာအမည် စောကြည် (ခ)ကျောက်ကျင်း (Zhao Jin) က လူမှုကွန်ရက်စာမျက်နှာတွင် ရေးသားထားသည်။

တရုတ်၏ ကိုယ်ကျိုးကြည့်ဝါဒကို ဆန့်ကျင်သည့် မြန်မာပြည်သူတို့အား လူမှုကွန်ရက်မှ တိုက်ခိုက်ရေးသားနေသော တရုတ်လော်ဘီ အမျိုးသမီး ကျောက်ကျင်း (Zhao Jin) သည် အာဏာသိမ်းသမ္မတ ဦးမင်းအောင်လှိုင် ၏ ဇွန် ၁၇ ရက်က မြို့တော် ပေကျင်းရှိ China Railway Construction Corporation Limited (CRCC) သို့ သွားရောက်စဉ် အနီးကပ်လိုက်ပါကာ စကားပြန်အဖြစ် ဆောင်ရွက်ခဲ့သူဖြစ်သည်။


၎င်းက “မြစ်ဆုံပြန်စချင်တာက မြန်မာအစိုးရပါ။ တရုတ်အစိုးရ မဟုတ်ဘူး။ အခု မြန်မာပြည်မှာ တရုတ် CPI ကုမ္ပဏီက ဝန်ထမ်းတယောက်မှ မရှိဘူး။ မြန်မာနိုင်ငံက ရင်းနှီးမြှုပ်နှံမှု အန္တရာယ် အများဆုံးနိုင်ငံအဖြစ် တရုတ်ကုန်သွယ်ရေး ဝန်ကြီးဌာနက အခုထိ သတ်မှတ်ထားပါတယ်။ တရုတ်အစိုးရ ပြန်စချင်တာဆိုတာ ဘယ်ကသိလာသလဲ မသိဘူး။ တရုတ်ပြည်ရဲ့ စက်မှုလုပ်ငန်းတွေရော၊ ပြည်သူတွေရဲ့ နေထိုင်မှုရော မီးမရှိလို့ မလည်ပတ်နိုင်ဘဲ မြစ်ဆုံရဲ့ လျှပ်စစ်ကို ငုတ်တုတ်ထိုင်ပြီး စောင့်နေတာ မဟုတ်ဘူး” ဟု ဆိုသည်။

DVB သတင်းဌာနမှ တင်ဆက်သည့် မြစ်ဆုံစီမံကိန်း DVB Debate အစီအစဉ်မှ ဒေါက်တာထားထားပါ ၏ ပြောဆိုချက်ကို ပြန်လည်တုံံ့ပြန်ခြင်းဖြစ်သည်။

မြန်မာကုမ္ပဏီတခုက ရန်ကုန်၌ ဆိုလာလျှပ်စစ်စက်ရုံတခုတည်ဆောက်ရေး တရုတ်ကုမ္ပဏီ ရင်းနှီးမြှုပ်နှံမှုများ ဖိတ်ခေါ်လိုသည့်အတွက် ယခုနှစ်ဆန်းပိုင်းတွင် ၎င်းထံ ဆက်သွယ်လာခဲ့ကြောင်းလည်း ပြောသည်။

“ကျမက မြန်မာပြည်မှာ ကိုယ်စားလှယ်ရုံး ၁၀ နှစ်ကျော် ဖွင့်ထားတဲ့ တရုတ်အစိုးရပိုင် ကုမ္ပဏီတခုကို ဆက်သွယ်ပြီး သူတို့လုပ်ချင်သလား မေးတယ်။ သူတို့က ရင်းနှီးငွေ၊ မီတာခ၊ ဘဏ်အတိုးနှုန်းအမျိုးမျိုးနဲ့ တွက်ချက်ပြီး ကျမကို ပြပေးတယ်။ အဲဒီလိုမျိုး အသေးစား လျှပ်စစ်စီမံကိန်းလုပ်တာ အမြတ်က ဘဏ်အပ်ငွေ အတိုးနှုန်းထက် ပိုနည်းတယ်။ အရင်းငွေကို ၈-၁၀ နှစ် ကြာပြီးမှ ပြန်ရနိုင်တယ်။ ၁၀ နှစ်လောက်ကြာပြီးမှ အမြတ်စပေါ်လာတယ်။ ဒီရင်းနှီးငွေတွေကို ဘဏ်မှာ ၁၀ နှစ်ထားပြီး ရရှိတဲ့ အတိုးငွေတောင် ပိုများတယ်။ ဘာမှ အန္တရာယ်လည်း မရှိဘူး။ ဒါကြောင့် သူတို့က စိတ်မဝင်စားဘူး။ ပြီးတော့ မြန်မာပြည်မှာ ငွေကြေးတန်ဖိုး အမြဲကျနေလို့ ကာလရှည် ရင်းနှီးမြှုပ်နှံမှုအတွက် အန္တရာယ် ပိုကြီးတယ်” ဟု ၎င်းက ပြောသည်။

အာဏာသိမ်းသမ္မတ ဦးမင်းအောင်လှိုင်၏ ဇွန်လအတွင်း တရုတ်နိုင်ငံခရီးစဉ်နောက်ပိုင်း မြစ်ဆုံစီမံကိန်း အကောင်အထည် ဖော်ပါက တနိုင်ငံလုံး လျှပ်စစ်မီးရမည်ဆိုသည့် မက်လုံးများနှင့် ဝါဒဖြန့်ပြောဆိုလာသလို ကချင်ပြည်နယ် ဝန်ကြီးချုပ် ဦးခက်ထိန်နန်လည်း မြေပြင်တွင် လိုက်လံ စည်းရုံးမှုများ ဆက်တိုက်လုပ်ဆောင်နေသည်။

ပုံစာ-ယခုနှစ် ဇွန်လက တရုတ်ခရီးစဉ်အတွင်း စကားပြန် လုပ်ပေးသူ ကျောက်ကျင်းအား မင်းအောင်လှိုင်နောက်တွင် တွေ့ရပုံ/MOI

#WhatsHappeningInMyanmar
#RejectMilitaryCoup

ဆန်၊ ဆီ၊ စက်သုံးဆီ၊ ရွှေနှင့်ဒေါ်လာ ယနေ့ ပေါက်ဈေး

ဧရာဝတီ၊ စက်တင်ဘာ ၁၆၊ ၂၀၂၆

ဆန်

အာဏာရှင်အစိုးရအဖွဲ့က သတ်မှတ်သည့် ဆန်လက်ကားဈေးမှာ အကြမ်း အနိမ့်ဆုံးဆန်ကြမ်း ၁ အိတ်(အနိမ့်ဆုံး) ၇၂,၀၀၀ ကျပ်မှ ၈၃,၀၀၀ ကျပ်၊ အချော အမြင့်ဆုံး ရွှေဘိုပေါ်ဆန်း ၁ အိတ် ၂၀၀,၀၀၀ ကျပ်မှ ၂၃၀,၀၀၀ ကျပ်၊ ဧရာဝတီပေါ်ဆန်း နယ်စုံ ၁၅၈,၀၀၀ ကျပ်မှ ၁၇၈,၀၀၀ ကျပ်
ပြင်ပ ဈေးကွက်မှာလည်း ကြိုက်ရောင်းကြိုက်ဝယ် ဈေးဖြင့်သာ အရောင်းအဝယ်ဖြစ်နေပြီး ဆန်၏ အရည်အသွေး၊ ဆန်ကွဲပါဝင်မှု၊ ဆန် သစ်/ဟောင်း၊ ငွေပေးချေမှု၊ အိတ်ခွံ၊ နေရာအလိုက် သယ်ယူပို့ဆောင်မှုပေါ်မူတည်၍ ဈေးနှုန်း အနည်းငယ် ကွာဟမှုရှိနိုင်ကြောင်း ဝါးတန်းလမ်း ဆန်ကုန်စည်ဒိုင်အတွင်းရှိ ကုန်သည်များထံက သိရသည်။

စားအုန်းဆီ

အာဏာရှင်အစိုးရအဖွဲ့၏ စားအုန်းဆီ ရည်ညွှန်းလက်ကားဈေးမှာ ၁ ပိဿာ ၇,၀၀၀ ကျပ်ကျော်တွင်ရှိနေ၊ လက်လီသတ်မှတ်ဈေးမှာ ၈,၀၀၀ ကျပ် ဝန်းကျင်တွင်ရှိနေ၊ ပြင်ပဈေးမှာ ၁ ပိဿာလျှင် ၁၅,၀၀၀ ကျပ်နှင့် အထက်တွင် ရှိနေပြီး ယင်းဆီဈေးနှုန်းမှာ ရန်ကုန်မြို့မှ ဈေးနှုန်းများဖြစ်ပြီး မြို့နယ်နှင့် နေရာဒေသအလိုက် ကွာခြားမှု၊ မြင့်တက်မှုများ ရှိနိုင် သည်။

စက်သုံးဆီ

ဓာတ်ဆီ ၉၂ တလီတာ ၃,၈၂၅ ကျပ်
ဓာတ်ဆီ ၉၅ တလီတာ ၃,၉၅၀ ကျပ်
ဒီဇယ် တလီတာ ကျပ် ၄,၁၅၀ ကျပ်
ပရီမီယံ ဒီဇယ် တလီတာ ၅,၀၅၀ ကျပ်
စစ်ပွဲဖြစ်ပွားသည့် ဒေသများအပါဝင် ဝေးလံခေါင်ဖျားသည့် ဒေသများတွင် သတ်မှတ်ဈေးထက် ဈေးနှုန်း
အဆမတန် မြင့်တက်ခြင်း၊ သယ်ယူပို့ဆောင်မှုများကို အာဏာသိမ်းအစိုးရ ကန့်သတ်ခြင်းများ ရှိနေသည်။

ရွှေနှင့် ဒေါ်လာ

ပြင်ပဈေးကွက်အရ အမေရိကန် ၁ ဒေါ်လာလျှင် ကျပ် ၄,၄၀၀ ကျော် တွင်ရှိနေ
အကယ်ဒမီ အခေါက်ရွှေ တကျပ်သား (စနစ်ဟောင်း) ကျပ် ၁၀၁ သိန်း ကျော်တွင်ရှိနေ
လက်ဝတ်ရတနာ ၁၅ ပဲရည် တကျပ်သား (စနစ်ဟောင်း) ကျပ် ၉၅ သိန်း ကျော်တွင်ရှိနေ
အကယ်ဒမီ အခေါက်ရွှေ တကျပ်သား (စနစ်သစ်) ကျပ် ၉၉ သိန်း ကျော်တွင်ရှိနေ
လက်ဝတ်ရတနာ ၁၅ ပဲရည် တကျပ်သား (စနစ်သစ်) ကျပ် ၉၃ သိန်း ကျော်တွင်ရှိနေ
ကမ္ဘာ့ရွှေဈေး တအောင်စ အမေရိကန် ဒေါ်လာ ၄,၃၂၈
ဓာတ်သတ္တု (ရွှေ) ရည်ညွှန်းဈေး သတ်မှတ်ရေးကော်မတီ သတ်မှတ်ဈေး စံချိန်မီ ရွှေ ၁ ကျပ်သား (၁၆.၃၂၉၃၂၅ဂရမ်) ၇,၁၀၀,၀၀၀
အချိန်နှင့်အမျှ ဈေးနှုန်း အပြောင်းအလဲ ရှိနိုင်သည်။

#ဧရာဝတီ
#နေ့စဉ်ကုန်ဈေးနှုန်း
#ဆန်ဈေး
#ဆီဈေး
#လောင်စာဆီဈေး
#ရွှေဈေး
#ဒေါ်လာဈေး

ရွှေကုက္ကိုကျားဖြန့် ဖျက်ဆီးရာ၌ စစ်တပ်က AI ပုံများသုံး၍ ဝါဒဖြန့်

ဧရာဝတီ၊ စက်တင်ဘာ ၁၆၊ ၂၀၂၆

မြဝတီ ရွှေကုက္ကိုမြို့သစ်ရှိ အွန်လိုင်းငွေလိမ်လုပ်ငန်း (ကျားဖြန့်) အဆောက်အအုံများ ဖျက်ဆီးသည့် သတင်းများ စစ်တပ်ထုတ်ပြန်ရာတွင် နေရာများ ကွဲလွဲမှုရှိနေသလို AI ဓာတ်ပုံ၊ ရုပ်သံများအား အသုံးပြုထားသည်ကို လေ့လာဆန်းစစ်တွေ့ရှိရသည်ဟု နိုင်ငံတကာ သုတေသနအဖွဲ့အစည်း Myanmar Witness က ယနေ့ ထုတ်ပြန်သည်။

စစ်တပ်၏ ထုတ်ပြန်ချက်များကို Myanmar Witness မှ စိစစ်လေ့လာခဲ့ရာ တရားဝင်ထုတ်ပြန်ချက်များနှင့် မြေပြင်အခြေအနေများကြား သိသာထင်ရှားသော ကွဲလွဲမှုများကို ဖော်ထုတ်တွေ့ရှိခဲ့ရပြီး၊ နှိမ်နင်းမှု စတင်ချိန်တွင် ဖျက်ဆီးမှုများသည် ထုတ်ပြန်ချက်နှင့် ကိုက်ညီခဲ့သော်လည်း၂၀၂၆ ခုနှစ် ဇူလိုင်လမှစ၍ ကွဲလွဲမှုများတွေ့ရှိရသည်ဟု ဆိုသည်။

၂၀၂၆ မေလ ၂၅ ရက်တွင် မြန်မာစစ်အစိုးရက ရွှေကုက္ကိုကို နှိမ်နင်းဖြိုခွင်းမည်ဟု ကြေညာခဲ့ပြီး အဆိုပါ စစ်ဆင်ရေးကို ယခင် ကရင်နယ်ခြားစောင့်တပ် (KBGF) ဟု သိကြသော ကရင်အမျိုးသားတပ်မတော် (KNA) ၏ ကူညီပံ့ပိုးမှုဖြင့် လုပ်ဆောင်ခဲ့ကာ အဆောက်အအုံ ၃၂၂ ခုအနက် ၇၇ ခုကို ဖျက်ဆီးခဲ့သည်။

Myanmar Witness က အဆိုပါ နှိမ်နင်းမှုများကို ဆန်းစစ်လေ့လာရာ ၂၀၂၆ ဇူလိုင်လမှစ၍ လွဲမှားမှုအများအပြားတွေ့ရှိခဲ့ရပြီး ယင်းတို့တွင် အစီရင်ခံထားသော အဆောက်အအုံ တည်နေရာများနှင့် မြေပြင်တကယ့်တည်နေရာများကြား ကွဲလွဲမှုများ၊ မဖျက်ဆီးမီ အဆောက်အအုံအမိုးများနှင့် အမြင့်များ ပြောင်းလဲသွားခြင်းနှင့် AI ဖြင့် ပြင်ဆင်ထားသည့် ပုံရိပ်များ အသုံးပြုထားခြင်းတို့ ပါဝင်သည်။

အစီရင်ခံစာသည် ရွှေကုက္ကိုအတွင်း ဖျက်ဆီးမှုများကို ဆန်းစစ်ထားသော်လည်း ဖျက်ဆီးခံရသည့် အဆောက်အအုံတိုင်းမှာ ကျားဖြန့် လုပ်ငန်းများနှင့် ဆက်စပ်မှု ရှိမရှိ သက်သေပြရန်ထက်၊ အစိုးရ၏ တရားဝင် ထုတ်ပြန်ချက်များနှင့် နှိမ်နင်းမှုဆိုင်ရာ ပုံရိပ်များသည် ရရှိနိုင်သော အထောက်အထားများနှင့် ကိုက်ညီမှု မရှိသည်ကို မီးမောင်းထိုးပြရန် ပိုမိုရည်ရွယ်ကြောင်း Myanmar Witness က ဆိုသည်။

ကရင်ပြည်နယ်၊ မြဝတီမြို့နယ်အတွင်းရှိ ကျားဖြန့်များနှင့်ပတ်သက်၍ နိုင်ငံတကာ၏ ဖိအားပေးမှုများ ရှိလာချိန်တွင် စစ်တပ်သည် မြဝတီတောင်ဘက် မယ်ထော်သလေးဒေသ KK Park နှင့် မြဝတီမြို့ မြောက်ဘက် ရွှေကုက္ကိုမြို့သစ် ကျားဖြန့်များကို ၂၀၂၅ အောက်တိုဘာနှင့် နိုဝင်ဘာလတို့တွင် စီးနင်းခဲ့ပြီး အဆောက်အအုံတချို့ ဖျက်ဆီးခဲ့ခြင်း ဖြစ်သည်။

ပုံစာ- ယခုနှစ် ဇူလိုင်လ ၆ ရက်က ရွှေကုက္ကို ကျားဖြန့်အဆောက်အအုံတခု ဖြိုဖျက်နေကြောင်း စစ်တပ် ထုတ်ပြန်ထားစဉ်/CINCDS

#WhatsHappeningInMyanmar
#RejectMilitaryCoup

ဝတ်မှုံရွှေရည်ဓာတ်ပုံများ Vogue Thailand ဖယ်ရှား

ဧရာဝတီ၊ စက်တင်ဘာ ၁၆၊ ၂၀၂၆

သရုပ်ဆောင် ဝတ်မှုံရွှေရည်ကို Vogue Thailand၏ အစီအစဉ်တခုတွင် ဖော်ပြထားသော်လည်း ခင်ပွန်းဖြစ်သူက မြန်မာစစ်တပ်နှင့် စီးပွားရေး ဆက်နွယ်နေခြင်းကြောင့် Vogue ၏ စံတန်ဖိုးထားမှုများနှင့် မကိုက်ညီဟုဆိုကာ စက်တင်ဘာ ၁၅ ရက်တွင် ကန့်ကွက်ခံရပြီးနောက် ၂၄ နာရီအတွင်း ဝတ်မှုံရွှေရည်ပါဝင်သော ဆောင်းပါး၊ ဓာတ်ပုံများကို ၎င်းတို့၏ သက်ဆိုင်ရာ ဆိုရှယ်မီဒီယာပလက်ဖောင်းများမှ ဖြုတ်ချသွားခဲ့သည်။

ထိုသို့ ဖြုတ်ချရန်တောင်းဆိုမှုများကို ရုပ်ရှင်အကဲဖြတ် လူမှုကွန်ရက်အကောင့်ဖြစ်သော Cinema Boulevard မှ ဦးဆောင်ကာ စက်တင်ဘာ ၁၅ ရက်တွင် Vogue Thailand သို့ ထုတ်ပြန်ချက်များ၊ စာတိုများပေးပို့ကာ ကန့်ကွက်ခဲ့ကြခြင်းဖြစ်သည်။

Vogue Thailand သည် အမေရိကန်မီဒီယာကုမ္ပဏီ Condé Nast ၏ Vogue အမှတ်တံဆိပ်အောက် လိုင်စင်ဖြင့် ထုတ်ဝေလည်ပတ်နေသော ထိုင်းနိုင်ငံဆိုင်ရာ Edition ဖြစ်ပြီး ၂၀၁၉ ခုနှစ်တွင် ထုတ်ပြန်ခဲ့သော “Vogue Values”၌ ကမ္ဘာတဝန်းရှိ မတူကွဲပြားမှု၊ တာဝန်ယူမှုနှင့် လူတဦးချင်း၊ လူမှုအသိုင်းအဝိုင်းများနှင့် သဘာဝပတ်ဝန်းကျင်အပေါ် လေးစားမှုများကို အဓိကတန်ဖိုးများအဖြစ် ဖော်ပြထားသည်။

သို့သော် မကြာသေးမီက Vogue Thailand၏ အစီအစဉ်တခု၌ မြန်မာ့အဝတ်အထည် အမှတ်တံဆိပ်တခုကို ဝတ်မှုံရွှေရည်က ကြော်ငြာပေးထားခြင်းသည် အဆိုပါကတိကဝတ်တွင် ပါရှိသော အချက်အလက်များနှင့် လုံးဝဆန့်ကျင်နေသောကြောင့် ကန့်ကွက်ခဲ့ခြင်းဖြစ်ကြောင်း Cinema Boulevard က ဆိုသည်။

ပုံစာ-Vogue Thailand တွင် ဖော်ပြထားသော ဝတ်မှုံရွှေရည် ဓာတ်ပုံများ

#WhatsHappeningInMyanmar
#RejectMilitaryCoup

မြန်မာ ပတ်စ်ပို့ကိုင်ထားသည့် တရုတ်နိုင်ငံသားကို ထိုင်းရဲ ဖမ်း

ဧရာဝတီ၊ စက်တင်ဘာ ၁၆၊ ၂၀၂၆

မြန်မာပတ်စ်ပို့ ကိုင်ဆောင်ပြီး ထိုင်းနိုင်ငံသားအမည်ခံ၍ စီးပွားရေးလုပ်ကိုင်နေသည့် တရုတ်နိုင်ငံသားတဦးအား စမွတ်ဆာခွန်ခရိုင်၌ ယနေ့ ဖမ်းဆီးလိုက်ကြောင်း ဘန်ကောက်ပို့စ်သတင်းဌာနက ဖော်ပြသည်။

စမွတ်ဆာခွန်ရှိ တာယာစက်ရုံတရုံကို စီးနင်းရှာဖွေစဉ် ၎င်းအား ဖမ်းဆီးခဲ့ခြင်းဖြစ်ပြီး မတည်ရင်းနှီးငွေ ဘတ် ၁၉၁ သန်းရှိ ထိုင်းနိုင်ငံသားအမည်ခံ ကုမ္ပဏီ ၃ ခုတွင် ရှယ်ယာရှင်တဦးအဖြစ် ပါဝင်နေကာ နေအိမ်နှင့် လုပ်ငန်းများအတွက် ဘတ်သန်း ၆၀၀ ခန့် တန်ဖိုးရှိ မြေ ၂၈ ရိုင်ကျော် ပိုင်ဆိုင်ထားသည်ကို တွေ့ရှိခဲ့ရကြောင်း သိရသည်။

ထိုင်း လူဝင်မှုကြီးကြပ်ရေးဌာန၏ မျက်နှာသွင်ပြင် စိစစ်ဖော်ထုတ်မှုအရ မြန်မာအမည် “မျိုး” ဟု ခံယူထားသည့် တရုတ်အမျိုးသားမှာ တရုတ်နိုင်ငံက လာဘ်စားမှုဖြင့် အလိုရှိနေသော “Mr. Li” နှင့် အချက်အလက်များ ကိုက်ညီ နေသည်ကို စိစစ် တွေ့ရှိခဲ့သည်။

Mr. Li သည် တရုတ်ပတ်စ်ပို့ကို အသုံးပြုကာ ၂၀၁၃ ခုနှစ်မှ ၂၀၁၆ ခုနှစ်အတွင်း ထိုင်းနိုင်ငံသို့ ၁၄ ကြိမ် ဝင်ထွက် ခဲ့ပြီး၂၀၁၈ ခုနှစ်တွင် “မျိုး” ဟူသော အမည်ပါ မြန်မာပတ်စ်ပို့ကို စတင်အသုံးပြုကာ ထိုင်းနိုင်ငံအတွင်းသို့ ၄၈ ကြိမ် ဝင်ထွက်ခဲ့ကြောင်းလည်း ရဲတပ်ဖွဲ့က ဖော်ထုတ်ထားသည်။

Mr. Li ၏ သားဖြစ်သူ ထိုင်းနိုင်ငံသားကတ် ကိုင်ဆောင်ထားသည့် “Thor” ဆိုသူကိုလည်း လက်ဗွေစိစစ်ချက်များအရ ယခင်က ထိုင်းနိုင်ငံအတွင်း ခရီးသွားလာရာတွင် တရုတ်ပတ်စ်ပို့ အသုံးပြုခဲ့သည့် တရုတ်နိုင်ငံသား “Ji” ဆိုသူနှင့် အချက်အလက်များ ကိုက်ညီနေသည်ကို တွေ့ရှိရကြောင်း သိရသည်။

“Thor” ၏ ထိုင်းမှတ်ပုံတင်ကို ဆက်လက်စစ်ဆေးရာတွင် နိုင်ငံခြားသားများအား တရားမဝင် သက်သေခံ လက်မှတ်များရရှိရန် ကူညီဆောင်ရွက်မှုဖြင့် ဖမ်းဆီးခံထားရသော အုပ်ချုပ်ရေးအရာရှိဟောင်းတဦးနှင့် အချိတ် အဆက်များ ဖော်ထုတ်တွေ့ရှိထားသည့်အပြင် မိခင်အဖြစ် အမည်ဖော်ပြထားသည့် ထိုင်းအမျိုးသမီးတဦးထံမှလည်း DNA နမူနာရယူကာ ၎င်းတို့ကြား ဇီဝဗေဒဆိုင်ရာ ဆွေမျိုးတော်စပ်မှု ရှိမရှိ စစ်ဆေးသွားမည်ဖြစ် ကြောင်း သိရသည်။

မိခင်အဖြစ်အမည်ဖော်ပြထားသူ ထိုင်းအမျိုးသမီးအနေဖြင့် အမည်ခံ စီးပွားရေးလုပ်ငန်းများနှင့် ဆက်စပ်သည့် အထောက်အထားအတု ပြုလုပ်မှုတွင် မိမိဆန္ဒအလျောက် ပါဝင်ပတ်သက်ခဲ့ကြောင်း စိစစ်တွေ့ရှိပါက ဥပဒေအရ အရေးယူခံရဖွယ်ရှိကြောင်းလည်း ဘန်ကောက်ပို့စ်၌ ဖော်ပြထားသည်။

ထိုသို့ မြန်မာပတ်စ်ပို့ ကိုင်ဆောင်ထားသည့် တရုတ်နိုင်ငံသားများစွာရှိနေပြီး ရန်ကုန်လေဆိပ် လူဝင်မှုကြီးကြပ်ရေးကောင်တာ၌ မြန်မာလိုမေးမြန်းရာတွင် မြန်မာစကား မပြောတတ်ကြကြောင်း လေဆိပ်၌ ကြုံတွေ့ခဲ့ရသူ တဦးက Facebook စာမျက်နှာ၌ ရေးသားထားသည်။

#WhatsHappeningInMyanmar
#RejectMilitaryCoup

ရွှေကူ၌ စစ်သင်္ဘောတချို့ ထပ်မြုပ်၊ စစ်ကြောင်းလည်း ချေမှုန်းခံရ

ဧရာဝတီ၊ စက်တင်ဘာ ၁၆၊ ၂၀၂၆

ကချင်ပြည်နယ် ရွှေကူနှင့် ဗန်းမော်ကြား ဧရာဝတီမြစ်အတွင်း ကချင်လွတ်လပ်ရေးတပ်မတော်(KIA) ပူးပေါင်းတပ်များ တိုက်ခိုက်မှုကြောင့် စစ်သင်္ဘောနှစ်စီး ယနေ့ ထပ်မံနစ်မြုပ်ခဲ့ပြီး ကျန်သင်္ဘောတချို့လည်း တိုက်ခိုက်ခံရကြောင်း ရှေ့တန်းသတင်းရင်းမြစ်က ပြောသည်။

စင်းခန်းတံတားအထက်ဘက် စာဝတီ၊ ညောင်ပင်သာ၊ ကံသာနှင့်ရေနီရွာတို့အနီး ရပ်နားထားသည့် သင်္ဘောများထဲမှ တွန်းသင်္ဘောနှင့် သံခွံသင်္ဘောတချို့ ယမန်နေ့ညပိုင်းက ရွှေကူဘက်သို့ ထွက်ခွာလာစဉ် တိုက်ခိုက်ခံရပြီး ယနေ့နံနက်ပိုင်းတွင် စင်းခန်းတံတားအနီး တစီးနစ်မြုပ်ခဲ့ကြောင်း သိရသည်။

ရှေ့တန်းသတင်းရင်းမြစ်က “ ကျန်သင်္ဘော ၆ စီးလောက်နဲ့ သံခွံ ၂ စီးလောက်ပါတဲ့ အုပ်စုဆင်းသွားတာမှာ တွန်းသင်္ဘော ၁ စီးကတော့ နစ်မြုပ်သွားတယ်၊ သံခွံတစီးကလည်း ရေထဲမှာတွန်းမယ့် ဆွဲမယ့်သူမရှိဘဲ မျောနေတယ်လို့သိရတယ်၊ စင်းခန်းတံတားအထက်ဘက်မှာ သောင်တင်နေတဲ့ စစ်သင်္ဘော ၁ စီးနဲ့ သံခွံသင်္ဘောအကြီး ၁ စီးက မီးလောင်ထားတယ်၊အဲဒါကို အခု ရှင်းလင်းရေးလုပ်နေတယ်”ဟု ပြောသည်။

ထို့ပြင် ရွှေကူမှ ဗန်းမော်သို့ ယနေ့ထပ်မံဆန်တက်လာသည့် စစ်တပ်သင်္ဘော ၃ စီး တိုက်ခိုက်ခံရကာ ဝဲမကြီးရွာအနီး ၁ စီး နစ်မြုပ်ခဲ့ကြောင်းလည်း သိရသည်။

စစ်တပ်သင်္ဘောများတိုက်ခိုက်ခံရစဉ်အတွင်း လေကြောင်းမှလုံခြုံရေးလိုက်ပါလာသော Y-12 လေယာဉ် တစင်းမှာ KIA ပူးပေါင်းတပ်၏ ပစ်ခတ်မှုထိမှန်ကာ ပျက်ကျကြောင်း သတင်းများ ထွက်ပေါ်နေသော်လည်း သီးခြား အတည်ပြုနိုင်ခြင်း မရှိသေးပေ။

စစ်သင်္ဘောများအပြင် ရွှေကူနှင့် ဗန်းမော်ကြားရှိ စင်းခန်းတံတားအနီး ခြေကုပ်ယူထားသည့် စစ်တပ် စစ်ကြောင်းကို ယနေ့တိုက်ခိုက်ခဲ့ရာ ထိခိုက်သေဆုံးမှု များပြားခဲ့ကြောင်း ရှေ့တန်းသတင်းရင်းမြစ်က ဆိုသည်။

၎င်းက “ သင်္ဘောလမ်းကြောင်း လုံခြုံရေးယူထားတဲ့ စင်းခန်းလည်း ပွဲပြတ်သွားတယ်၊ ညတုန်းက သင်္ဘောတစီးနဲ့ ကမ်းကပ်ပြီး လာခေါ်သွားတဲ့အချိန်မှာ တဝက်လောက်ပဲ ပါသွားတယ်၊ ကျန်တဲ့တဝက်ကတော့ ကျနော်တို့ အသေခံဒရုန်းတွေနဲ့ တိုက်ခိုက်ပြီး ထိန်းသိမ်းနိုင်ခဲ့တယ်၊ ရှင်းလင်းတာ မပြီးသေးဘူး၊ ဒရုန်းအကြီးတစီးနဲ့ အသေခံဒရုန်း ၁၅ စီး သိမ်းဆည်းရရှိတာတော့ သေချာတယ်”ဟု ပြောသည်။

ဗန်းမော်မြို့အား စစ်ကူဖြည့်တင်းရန် မန္တလေးမြို့မှ ဧရာဝတီမြစ်ကြောင်းအတိုင်း ရေယာဉ်များဖြင့် ဩဂုတ်လကုန်ပိုင်းက စတင်ထွက်ခွာလာပြီးနောက် ရွှေကူနှင့်ဗန်းမော်ကြားတွင် တိုက်ပွဲများ ပြင်းထန်နေခြင်းဖြစ်ပြီး စစ်သင်္ဘောအုပ်စုမှ သင်္ဘော ၁၀ စီးကျော် ဖျက်ဆီးခံခဲ့ရသည်။

#WhatsHappeningInMyanmar
#RejectMilitaryCoup

မင်းအောင်လှိုင် စစ်တပ်သည် ရခိုင်အား စစ်မျက်နှာ ၇ ခု ဖြန့်ထိုးစစ်ဆင်နေပြီး နပခ၊ နတခ၊ တပခ၊ လပခ တို့မှ တိုင်းတပ်များ၊ ရဲတပ်ရင်းများအပြင် တပ်မ ၁၁၊ တပ်မ ၅၅၊ တပ်မ ၆၆၊ စကခ ၁၀၊ စကခ ၁၇၊ စကခ ၂၀ ၊ မစခ ၉၀၅ မှ တပ်များ၊ တပ်မ ၂၂၊ စကခ ၁၂၊ စကခ ၁၈၊ တပ်မ ၁၀၁ တို့မှ ထုတ်နှုတ်တပ်များ၊ စကခ ၅၊ စကခ ၉၊ စကခ ၁၅ တို့မှ တပ်ကြွင်းတပ်ကျန်များ၊ ကပစ နှင့် နောက်တန်းဌာနချုပ်များမှ ထုတ်နှုတ်တပ်များ ဖြည့်တင်းထား၏။ ထို့ပြင် စစ်တွေနှင့် ကျောက်ဖြူ၌ ရေတပ်စခန်းများ၊ ရေတပ်စစ်သင်္ဘော ၁၀ စီးခန့်စီနှင့် ရေတပ်အင်အား ရာအချို့စီ ရှိ၏။ မင်းအောင်လှိုင် စစ်တပ်သည် ရခိုင်စစ်မျက်နှာကြီး တခုစီလျှင် စစ်အင်အား ၂၀၀၀ မှ ၃၀၀၀ ခန့်ထိ အသုံးပြုထားပြီး ခံစစ်အတွက်သာမက ထိုးစစ်ကိုပါ စစ်ကြောင်းများဖြန့်ခွဲ အသုံးပြုပြီး ရေတပ်နှင့် လေတပ် ပစ်ကူတွဲဖက်ပေးထား၏။

လက်ရှိ ရခိုင်တွင် အာရက္ခတပ်တော်က စစ်ဒေသ ၈ ခုနှင့် တပ်မဟာ ၂ ခု ဖွဲ့စည်းထားရှိပြီး သူ၏ စစ်မျက်နှာအလိုက် စစ်ရေးတာဝန်ယူထား၏။ စစ်ဒေသတခုတွင် အင်အား ၄၀၀၀ မှ ၄၅၀၀ ထိ ရှိပြီး တပ်မဟာ နှစ်ခုကတော့ စစ်ဒေသထက် အင်အား အနည်းငယ်သာ လျော့နိုင်၏။ သို့ဖြစ်ရာ စစ်မျက်နှာတခုချင်းအရသော်လည်းကောင်း၊ ရခိုင်စစ်မြေပြင်တခုလုံးအရသော်လည်းကောင်း မင်းအောင်လှိုင် စစ်အင်အားသည် အာရက္ခတပ်တော်ထက် သာလွန်အင်အား မရှိပေ။ ဤ အာရက္ခတပ်တော် အင်အားသည် ရခိုင်နှင့် ချင်းတောင်ရှိ အင်အားသာဖြစ်၏။ ရှမ်းမြောက်၊ ကချင်၊ စစ်ကိုင်းနှင့် မကွေးရှိ စစ်အင်အားများ မပါသေးပေ။

Website တွင် ဆက်လက်ဖတ်ရှုပါ - https://burma.irrawaddy.com/article/2026/09/16/416311.html

စစ်မှုထမ်းဖို့ ဝါဒဖြန့်ပေးတဲ့ အနုပညာရှင်တွေကို ပြည်သူတွေဝေဖန်

ပြည်သူ့စစ်မှုထမ်းဥပဒေအရ အာဏာသိမ်းစစ်တပ်ဆီမှာ စစ်မှုထမ်းကြဖို့ ဝါဒဖြန့်ချိရေးရုပ်ရှင် ရိုက်ကူးသူတွေနဲ့ အားပေးအားမြှောက်လုပ်ကြတဲ့ အနုပညာရှင်တွေကို ပြည်သူတွေက လူမှုကွန်ရက်စာမျက်နှာတွေမှာ ပြင်းပြင်းထန်ထန် ဝေဖန်နေကြပါတယ်။

စစ်မှုထမ်းရတာ ပျော်စရာကောင်းကြောင်းနဲ့ စစ်မှုထမ်းမှာပါဝင်ခဲ့ကြပြီးနောက် စစ်တပ်ဟာ ထူးချွန်ထက်မြက်တဲ့ လူငယ်တွေ မွေးထုတ်ပေးခဲ့တယ်ဆိုတဲ့ ဝါဒဖြန့်ချီ ရိုက်ကူးထားတဲ့ “တောစီးဖိနပ်ကလေးရဲ့ အိမ်ပြန်ချိန်” နာမည်နဲ့ ရုပ်/သံ ဇာတ်လမ်းတိုကို စက်တင်ဘာ ၁၂ ရက်နေ့က စတင်ထုတ်လွှင့်ပြသခဲ့တာပါ။

အာဏာသိမ်းစစ်တပ်ဟာ ပြည်သူ့စစ်မှုထမ်း ဥပဒေကိုပြဌာန်းပြီးနောက် ကာလတို စစ်သင်တန်းပေးပြီး ရှေ့တန်း စစ်မြေပြင်ကို ပို့နေတာဖြစ်သလို စစ်မှုထမ်းအပတ်စဉ်တွေမှာ လူပြည့်ဖို့အတွက် အတင်းအဓမ္မ စစ်သားစုဆောင်း ဖမ်းဆီးခေါ်ဆောင်တာတွေလည်း ရှိနေတာ ဖြစ်ပါတယ်။

#မြန်မာ #ဧရာဝတီ #စစ်မှုထမ်း #အနုပညာ #ဝါဒဖြန့် #တောစီးဖိနပ်ကလေးရဲ့အိမ်ပြန်ချိန် #ပြည်သူ့စစ်မှုထမ်းဥပဒေ #WhatsHappeningInMyanmar

နေပြည်တော်ကို သတိပေးလိုက်တဲ့ ဂျာမန်သံရုံးအကြီးအကဲ

မြန်မာနိုင်ငံဆိုင်ရာ ဂျာမန်သံရုံးအကြီးအကဲက ရုရှားရဲ့ ယူကရိန်းကျူးကျော်စစ် အနိုင်ရမှာမဟုတ်သလို ဒီစကား ဟာ ရုရှားရဲ့ အထောက်အပံ့ကို အားကိုးနေတဲ့ နေပြည်တော်က လူတွေအတွက်ပါ ပေးလိုတဲ့ သတင်းစကား ဖြစ်တယ်လို့ စက်တင်ဘာလ ၁၀ ရက်နေ့က ပြောဆိုခဲ့ပါတယ်။

စစ်တပ်အာဏာသိမ်းပြီးနောက် ရုရှားနဲ့ အာဏာသိမ်းစစ်တပ်အကြား စစ်ရေး၊ နိုင်ငံရေးနဲ့ စီးပွားရေးဆက်ဆံမှုတွေ နီးကပ်လာချိန်မှာ ဂျာမန်သံရုံးအကြီးအကဲက “နေပြည်တော်က လူတွေ” လို့ တိုက်ရိုက်ရည်ညွှန်းပြောဆို ခဲ့တာကြောင့် သူ့ရဲ့ပြောဆိုချက်ကို လူမှုကွန်ရက်မှာ စိတ်ဝင်စားမှုရှိနေကြပါတယ်။

စက်တင်ဘာ ၇ ရက်ကနေ ၁၁ ရက်အထိ ဘာလင်မြို့မှာ ကျင်းပခဲ့တဲ့ ဂျာမန်နိုင်ငံခြားရေးမစ်ရှင် အကြီးအကဲ တွေရဲ့ နှစ်ပတ်လည်ညီလာခံကို တက်ရောက်နေချိန် အခုလို ပြောဆိုခဲ့တာပါ။

#မြန်မာ #ဧရာဝတီ #နေပြည်တော် #ဂျာမန်သံရုံးအကြီးအကဲ #ရုရှား #ယူကရိန်း #WhatsHappeningInMyanmar

• စင်းခန်းမှာအထိုင်ချဖို့ကြိုးစားတဲ့ စစ်ကြောင်းကို KIA ချေမှုန်း

• မြန်မာပတ်စပို့ကိုင်တဲ့ တရုတ်တွေ ထိုင်းမှာဆက်တိုက်ဖမ်းခံနေရ

• အာဏာသိမ်းစစ်တပ် ကြံရာပါအဖြစ် တယ်လီနောရုံးချုပ်ကို နော်ဝေ စီးနင်း

• စစ်မှုထမ်းလူငယ်ကို သတ်ဖြတ်ခဲ့တဲ့ အုပ်ချုပ်ရေးမှူးအပါ ၇ ဦး ဖမ်းခံရ

• စစ်ရေးသတိရှိဖို့ MNDAA သတိပေး

နေ့စဥ်သတင်း၊ စက်တင်ဘာ ၁၆၊ ၂၀၂၆

https://youtu.be/EUWhcHFgc3Q
#မြန်မာ #ဧရာဝတီ #စင်းခန်း #ကချင် #KIA #ပတ်စပို့ #တရုတ် #တယ်လီနော #နော်ဝေ #စစ်မှုထမ်း #အုပ်ချုပ်ရေးမှူး #MNDAA #နေ့စဉ်သတင်း #DailyNews #WhatsHappeningInMyanmar