كان من دعاء ابن عباس- رضي الله عنهما- إذا أصبح:

‏اللهم إني أسألك بنور وجهك الذي أشرقت له السماوات والأرض، أن تجعلني في حرزك، وحفظك، وجوارك، وتحت كنفك.

رسمة اليوم:
السير فيليب.

اليوم كملت كتاب "نهاية التفكير" ، الي توقعته حيرافقني للقبر.

الكتاب هذا نحترمه لسببين

السبب الأول ما عنداشي علاقة بالمحتوى، لكن لأني مكسدة فحنكتبه.
الكتاب هذا شريته من مكتبة صغيرة تبيع في كُتب مدعومة في الجامعة؛ أغلى حاجة غادي ما تفوتش عشرة دينار، كل الكتب في الأغلب اقل ، وفيها عنواين مثيرة للأهتمام.
سعر كتاب "نهاية التفكير" كان عشرة دينار ، فلما وقفت قدام الطاولة بيش نعطي لراجل المكتبة المحترم الفلوس ، شاف السعر المكتوب و قالي شني عشرة دينار؟ ، انتِ طالبة ولاه؟
قلتله ايه... قالي تمام اعطيني ثلاثة دينار بس.
طبعاً انصدمت ، قلتله اني طالبة بس الكتاب مانبيشي لأغراض دراسية يعني هكي و خلاص .
قالي ايه ايه نعرف بس اني نحب نساعد الطلبة.
و باعلي كتاب تاني يتكلم على أساطير الغرب عن الشرق ، كان سعره سبعة دينار فباعهولي بدينارين فقط. و سألني قالي وين تلقي فيهم العنواين المليحة هذي؟.
فالرجل هذا كل ما نذكره ندعيله من أعماق قلبي في صلاة الفجر لكي يساعده ربي في حياته كما سخَّره الله لمساعدة الطلبة.

السبب الثاني توا على المحتوى :
حقيقةً هو كتاب حلو يتكلم على كيف المجتمعات العربية توقفت عن إعمال عقلها و التفكير و الأبداع، و كيف يحطوا في أسباب و حجج دينية لتوقيف العقل.
هو الكتاب رغم انه ذكر في بداية الكتاب ان المحتوى مش عبارة عن مقارنة؛ بس اني نشوف فيه عبارة عن مقارنة بين الشرق و الغرب ، والي نزل من إعجابي للكتاب انه طرح مشاكل بدون وضع حل واضح للمشاكل الي تصير ، واني نشوف ان كلنا نعرفوا المشاكل الي تصير حولنا بس نبوا من يتكلم و يديرلنا الحل.
على أي حال؛ الكاتب قسم المجتمع العربي الي مجموعتين: مجموعة متشددة دينياً بطريقة خاطئة،  تحشي في الناس بأفكار خاطئة عن الدين  و تدعوا الناس عن توقف عن التفكير و الإذعان لهم .
و المجموعة التانية هي المنفتحين للغاية ، الذين باعوا هاويتهم و ثقافتهم و دينهم على أمل انهم يصيروا متقدمين كالغرب.

مشكلة الكتاب انه عطي جزء كبير من الكتاب للتحدث عن المجموعة الأولة، و المجموعة التانية ما تكلمش عليها الا في جزئية بسيطة في نهاية الكتاب.

و هذا شيء موجود عند الكل

لحظت ان اي حد يبي يتكلم سبب تأخر العرب دائماً ما يركزوا على المجموعة متشددة دينياً بطريقة خاطئة كأن هي السبب الوحيد في بقائنا للخلف.
مش دفاعاً طبعاً و اني نؤمن ان عندنا هلبه افكار دينية مغلوطة

بس اني عندي نية نقرأ كتاب يتكلم كيف ان المجتمع العربي قاعد في مكانه بسبب تركهم لدينهم و لأنهم يتبعون في سبيل ناس مختلفين عنهم بيش يصيروا مثلهم.

يعني حد يتكلم على ان من أسباب ضعفنا هو انحلالنا و كيف نحلوا مشكلة هذي.

و هذا هو

مش حنقيم الكتاب من عشرة لأني ما نحبش التقيم

المهم ننصحكم تجربوا تقروه