【黃標精選師｜香港人，有能力就送暖】

呢個欄本來係應該分享一啲喺英國嘅慳錢方法，不過今日要令大家失望，因為我今日係想大家慷慨解囊。

話說早幾日，Charlotte睇到有條片係講一個Dinner Lady（喺學校派飯嘅女士）講自己要拒絕向無交午餐費嘅學生派飯，令佢好難受，仲講到喊晒，Charlotte睇完都覺得好心噏，即時諗我哋有無咩可以做到？雖然我哋嚟到英國時間唔長，大家仲努力扎根，但我相信大部份香港人都有能力照顧好自己之餘，仲有餘力可以為社區做啲嘢。面對住40年來最嚴重通脹、能源費飆升呢啲問題，我哋最多都係慳啲，但呢度有好多基層喺今個冬天，真係要面對溫飽問題，開咗暖氣可能就要捱餓。

我哋要做嘅可能好簡單，好似捐啲物資去食物銀行，都可以幫到少少手。其中，Tesco就同兩間食物銀行the Trussell Trust、FareShare合作，收集到嘅物資，佢哋會加碼捐多兩成。大家除咗可以捐吓意粉、罐頭，仲可以捐廁紙、牙膏呢類日用品；臨近聖誕時，大家亦可以買吓Christmas Pudding呢類節日食品送暖。如果唔想去貨架慢慢搵，好似Morrisons咁，佢哋有一啲預先包裝好嘅food parcels畀大家直接買，一般都係1鎊至3鎊。

除咗出錢，都可以出力，事關呢度食物銀行九成以上嘅義工，都係65歲以上嘅退休人士，佢哋好需要人幫手做吓運輸等工作。

另外，食物銀行又會定期喺超市做吓宣傳，好似the Trussell Trust嚟緊12月頭就要人喺Tesco做宣傳，呼籲嚟Christmas Shopping嘅顧客買多一兩件貨品做捐助，大家有興趣幫手，都可以去登記。

作者：Charlotte
逢周六英國時間上午11時 / 香港時間下午6時刊出

全文請到Patreon免費閱覽
https://www.patreon.com/posts/71767678

#黃標精選師 #專欄 #Tesco #trusselltrust