🟢O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga yo‘llagan Murojaatnomasida mamlakatimizda ekologik barqarorlikni ta’minlashning yangi bosqichi belgilab berildi. Unda beshinchi ustuvor yo‘nalish sifatida ekologik muvozanatni saqlash, “Yashil” energetikani rivojlantirish hamda suv resurslaridan oqilona foydalanish masalalari ilgari surildi. Ijtimoiy-iqtisodiy sohalarni yanada takomillashtirish bilan bir qatorda ekologik barqarorlikni ta’minlashga ham alohida e’tibor qaratildi.
Jumladan, chang-to‘zonlarning oldini olish maqsadida Surxondaryo viloyatida 10 ming gektar maydonda “Yashil makon”, Sirdaryo viloyatida esa 84 kilometrli “Yashil devor” barpo etilishi belgilandi.
Qoraqalpog‘iston Respublikasi, Xorazm, Buxoro va Navoiy viloyatlarida jami 250 ming gektar, jumladan, Orol dengizining qurigan tubida 115 ming gektar maydonda daraxt va butalar ekiladi.
Shuningdek, har bir hududda botanika va dendrologiya bog‘lari hamda 20 tadan soya-salqin sayr ko‘chalari barpo etilishi rejalashtirildi, — dedi Prezidentimiz.

🟢Sanoat korxonalarida zamonaviy filtrlash tizimlarini o‘rnatish uchun 100 million dollarlik kredit liniyasining ajratilishi, atmosfera havosini monitoring qilish stansiyalarining tashkil etilishi atrof-muhitni muhofaza qilish borasida muhim amaliy qadam bo‘ladi.
Shu bilan birga, qishloq xo‘jaligida issiqxonalarni ekologik toza isitish tizimlariga o‘tkazish, agroklasterlarni qo‘llab-quvvatlash chora-tadbirlari barqaror rivojlanishga xizmat qiladi. Shahar havosining musaffoligini ta’minlashda elektromobillar oqimini kengaytirish va ularga berilayotgan imtiyozlar tizimi ham muhim ahamiyat kasb etadi.

🟢“Yashil makon” va “Yashil devor” loyihalari doirasida amalga oshirilayotgan keng ko‘lamli ishlar iqlim o‘zgarishiga qarshi kurashishda muhim omil hisoblanadi. Suv tanqisligi sharoitida irrigatsiya tizimlarini betonlash va yopiq tizimlarga o‘tkazish bo‘yicha belgilangan vazifalar resurslarni tejashning eng samarali yo‘lidir. Bularning barchasi ekologik barqarorlikni ta’minlash, aholi salomatligini mustahkamlashga xizmat qilishi bilan ahamiyatlidir.

Bizni kuzating