Termizda O‘zbekiston xalq yozuvchisi Erkin A’zamning 75-yillik yubileyi nishonlandi

Bugundan Surxon vohasida yana bir muhim adabiyot bayram boshlandi — O‘zbekiston xalq yozuvchisi, elimiz qalbidan joy olgan adib, taniqli dramaturg va ssenarist, jamoat arbobi, Surxondaryoning ulug‘ farzandi Erkin A’zam 75 yoshni qarshi oldi.

Termiz shahrida adibning yubileyiga bag‘ishlangan tantanali madaniy tadbir bo‘lib o‘tdi. Unda Surxondaryo viloyati hokimi Ulug‘bek Qosimov ishtirok etib, o‘zbek adabiyotining o‘ziga xos va betakror namoyandalaridan biri — Erkin A’zamni 75-yillik yubileyi bilan voha ahli nomidan samimiy muborakbod etdi.

Tadbirda yozuvchi va jamoat arbobi Murod Muhammad Do‘st, rejissyor Jahongir Qosimov, O‘zbekistonda xizmat ko‘rsatgan jurnalist Qulman Ochil, Respublika ma’naviyat-ma’rifat markazi tadqiqotchisi Ikrom Choriyev, shoir va nosir Eshqobil Shukur, adabiyotshunos Olimjon Davlatov, Kinematografiya agentligi direktori Shuhrat Rizayev, shoir va yozuvchi G‘ayrat Majid, O‘zbekistonda xizmat ko‘rsatgan jurnalist Olim Toshboyev hamda adabiyot va san’at sohasining ko‘plab vakillari, atoqli adibning yaqinlari va kitobxonlar ishtirok etdi.

Tadbir doirasida Erkin A’zamning asarlaridan parchalar o‘qib eshittirildi, uning ijodi asosida yaratilgan filmlar namoyish etildi.

O‘zbekiston xalq yozuvchisi, O‘zbekistonda xizmat ko‘rsatgan jurnalist Erkin A’zam hozirda "Tafakkur" jurnali bosh muharriri sifatida faoliyat yuritmoqda.

Ma’lumot o‘rnida, yaqinda Surxondaryo viloyatida O‘zbekiston xalq shoiri Usmon Azimning 75-yillik tavalludi ham keng nishonlangan edi.

Surxondaryo.uz | Telegram | Facebook | Instagram | YouTube | X