Surxondaryoda O‘zbekiston xalq shoiri Usmon Azim tavalludining 75 yilligi keng nishonlandi

Bugun Surxon vohasida yurtimiz ma’naviy hayotida muhim ahamiyatga ega tadbir — O‘zbekiston xalq shoiri Usmon Azim tavalludining 75 yilligi keng nishonlandi.

Termiz shahridagi "San’at saroyi" majmuasida o‘tkazilgan madaniy-ma’rifiy tadbirda O‘zbekiston xalq shoiri Usmon Azim, Surxondaryo viloyati hokimi Ulug‘bek Qosimov, O‘zbekiston Yozuvchilar uyushmasi raisi, xalq shoiri Sirojiddin Sayyid, viloyat ijodkorlari, mutasaddilar, yoshlar hamda jamoatchilik vakillari qatnashdi.

Tadbirda viloyat rahbari ardoqli shoirni Surxondaryo ahli nomidan samimiy tabriklab, uning asarlarida yurtimizning go‘zalligi, xalqimiz ruhi va milliy qadriyatlarimiz chuqur ifoda etilganini ta’kidladi. Shuningdek, shoir ijodida insonparvarlik, Vatanga muhabbat va inson sha’nini ulug‘lash g‘oyalari muhim o‘rin tutishini qayd etdi.

Tadbir davomida yozuvchi va ijodkorlar, yoshlar hamda jamoatchilik vakillari shoir asarlaridan namunalar o‘qishdi. Shu bilan birga, Usmon Azimning hayoti va ijodiga bag‘ishlangan videolavhalar namoyish etildi.

Ayni paytda viloyatning barcha hududlarida atoqli ijodkorimiz, O‘zbekiston xalq shoiri Usmon Azim tavalludining 75 yilligi munosabati bilan adabiy-ma’naviy uchrashuvlar va ijodiy kechalar o‘tkazilmoqda.

Ma’lumot uchun: O‘zbekiston xalq shoiri Usmon Azim 1950-yil 13-avgust kuni Surxondaryo viloyati Boysun tumanida tavallud topgan.

Surxondaryo.uz | Telegram | Facebook | Instagram | YouTube | X

Xalqaro hamkorlik doirasida yangi mahorat darslari!

O‘zbekiston Respublikasi Prezidentining 2017-yil 20-apreldagi PQ–2909-son qarorida belgilangan oliy ta’lim tizimini modernizatsiya qilish va xalqaro hamkorlikni rivojlantirish maqsadida Termiz davlat universitetida yana bir muhim tashabbus amalga oshirildi.

Eron Respublikasining Sheyda instituti musiqa o‘qituvchisi Tahmineh Fakhravari qariyb bir oy davomida “Musiqa ta’limi” kafedrasi talabalariga: “O‘zbekiston va Eron musiqa san’atining bog‘liqligi”, “Eron klassik musiqasi” mavzularida mahorat darslarini o‘tdi.

Safar yakunida Tahmineh Fakhravari xonim Termiz davlat universiteti rektori A.Toshqulov bilan uchrashib, berilgan imkoniyat va samimiy munosabat uchun minnatdorchilik bildirdi hamda ikki tomonlama hamkorlikni yanada kengaytirish bo‘yicha takliflar berdi.

O‘z navbatida rektor ham mehmonni ehtirom bilan qabul qilib, musiqiy ta’lim sohasida xalqaro tajriba almashinuvi muhimligini ta’kidladi.

Shuningdek, Tahmineh Fakhravari “Vokal san’ati: an’anaviy xonandalik” yo‘nalishidagi talabalarga “Solfedjio” fanidan 30 soatlik dars mashg‘ulotlarini o‘tdi.

Bu tashabbus ikki xalq musiqiy madaniyatining o‘zaro yaqinligini yanada mustahkamlash, talabalar ijodiy salohiyatini oshirish hamda xalqaro tajriba almashuvini rivojlantirishga xizmat qiladi.

Bizni kuzating

Telegram | Instagram | Facebook | You tube | Sayt