გერმანიაში, ბავარიის რეგიონის ქალაქ ბაიროითში ორი პირი დააკავეს, რომლებიც რუსეთის სასარგებლოდ ჯაშუშობასა და უკრაინისთვის განკუთვნილი დახმარების დივერსიის ორგანიზებაში არიან ეჭვმიტანილები. დაკავებულებიდან, ერთი გერმანელი, მეორე კი, რუსია.

ერთ-ერთს პოტენციურ სამიზნეებზე, მათ შორის, აშშ-ის სამხედრო ობიექტებზე თავდასხმების ორგანიზებაც ედება ბრალად.

დაკავებულები არიან: დიტერ ს. და ალექსანდერ ჯ.

გერმანელი პროკურორების განცხადებით, დიტერ ს., რუსეთის დაზვერვასთან დაკავშირებულ პირთან ერთად, გერმანიაში დივერსიული აქტების მოწყობას გეგმავდა. მთავარი მიზანი იყო გერმანიის მიერ უკრაინისთვის გაწეული სამხედრო დახმარების განადგურება. ის აგროვებდა ინფორმაციას პოტენციურ სამიზნეებზე, მათ შორის, - აშშ-ის სამხედრო ობიექტებზეც.

ორივე მათგანს მოსამართლემ პატიმრობა შეუფარდა. 2014 წლის დეკემბრიდან 2016 წლის სექტემბრამდე, დონეცკის რეგიონში შეიარაღებული პრორუსული სეპარატისტული ძალების წევრობისთვის, დიტერ ს.-ს ცალკე ბრალდებაც წაუყენეს.

ამ შემთხვევის გამო, გერმანიის საგარეო საქმეთა სამინისტრომ რუსეთის ელჩი დაიბარა. კრემლში კი, ამტკიცებენ, რომ არაფერი იციან. "ამ საკითხთან დაკავშირებით, არანაირი ინფორმაცია არ მაქვს." - ამბობს პრეს-სპიკერი დმიტრი პესკოვი.

საფრანგეთის ულტრამემარჯვენე პარტიის, „ეროვნული გაერთიანების“ (RN) ლიდერის, ჯორდან ბარდელას თქმით, თუ მარინ ლე პენს 2027 წლის საპრეზიდენტო არჩევნებში მონაწილეობას აუკრძალავენ, მაშინ კენჭს თავად იყრის. - ინფორმაციას France 24 ავრცელებს.

გამოცემის ცნობით, 29 წლის ბარდელამ Le Parisien-თან ინტერვიუში მკაფიოდ მიანიშნა, რომ თუ მარინ ლე პენი კენჭისყრას ვერ შეძლებს, „ეროვნული გაერთიანების“ პარტიის პრეზიდენტობის კანდიდატი ის იქნება.

„არ არსებობს ბუნდოვანება იმაში, რომ მარინ ლე პენი ჩემი კანდიდატია, მაგრამ თუ მას ხვალ კენჭისყრაში ხელს შეუშლიან, ვფიქრობ, შემიძლია გითხრათ, რომ მე მისი კანდიდატი ვიქნები. ამაზე უფრო ნათლად ვერ ვიტყვი.“ - განუცხადა გამოცემას ჯორდან ბარდელამ.

შეგახსენებთ, მიმდინარე წლის მარტში პარიზის სასამართლომ საფრანგეთის ულტრამემარჯვენე „ეროვნული გაერთიანების“ ლიდერი, მარინ ლე პენი და რვა ევროპარლამენტარი ევროკავშირის თანხების გაფლანგვაში დამნაშავედ ცნო. სასამართლოს გადაწყვეტილებით, ლე პენს საჯარო თანამდებობის დაკავება 5 წლით აეკრძალა, 4 წლით თავისუფლების აღკვეთა მიესაჯა და 100 000 ევროს ჯარიმის გადახდა დაეკისრა. მარინ ლე პენმა სასამართლოს გადაწყვეტილება გაასაჩივრა. იგი იმედოვნებს, რომ სააპელაციო საჩივარი სწრაფად განიხილება და გაუქმდება ან შეიცვლება განაჩენი, რაც კენჭისყრის საშუალებას მისცემს.

უკრაინის შეიარაღებული ძალები კურსკისა და ბელგოროდის ოლქების გარკვეულ რაიონებში აქტიურ თავდაცვით მოქმედებებს აგრძელებენ. ამის შესახებ ვოლოდიმირ ზელენსკიმ განაცხადა.

თუმცა, უკრაინის პრეზიდენტის თქმით, სიტუაცია ბევრი მიმართულებით „რთული რჩება“.

შეგახსენებთ, ერთი დღით ადრე, რუსეთის შეიარაღებული ძალების გენერალურმა შტაბმა რეგიონის „განთავისუფლების“ შესახებ განაცხადა.

"შენ აქ არ უნდა იყო“: ტრამპმა მაკრონი ზელენსკისთან შეხვედრიდან გააძევა. - ინფორმაციას ბრიტანული ტაბლოიდი The Sun-ი ავრცელებს.

გაზეთის ჟურნალისტებმა ტუჩების მოძრაობის მიხედვით ტექსტის წამკითხველ პროფესიონალს, ნიკოლა ჰიკლინგს სთხოვეს, გაეშიფრა, თუ რა განაცხადეს აშშ-ის, უკრაინისა და საფრანგეთის პრეზიდენტებმა ვატიკანში შეხვედრის დროს.

„ტრამპი ორივესკენ იწვდის ხელს და თავისკენ იზიდავს. მაკრონს ეუბნება: „შენ აქ უადგილოდ ხარ, მჭირდება, რომ ერთი სიკეთე გამიკეთო, შენ აქ არ უნდა იყო“. ზელენსკიმ თანხმობის ნიშნად თავი დააქნია, ხოლო კამერის წინ მდგომმა ვიკარიუსმა თავი გვერდზე გადახარა, მოსმენილით შეშფოთებულმა.“ - განმარტა ჰიკლინგმა.

ჰიკლინგმა ასევე აღმოაჩინა, რომ ტრამპთან შეხვედრის ვიდეოში ზელენსკიმ თქვა: „მინდა, რომ ეს გააკეთოთ, მაგრამ არა ასე“, რაზეც აშშ-ის პრეზიდენტმა უპასუხა: „ეს ძალიან საინტერესო სტრატეგიაა. შეგიძლიათ, ამაში დარწმუნებული იყოთ“.

აშშ-ის სახელმწიფო მდივანი მარკო რუბიო:

📍უკრაინამ და რუსეთმა მალე უნდა მოაწერონ ხელი სამშვიდობო შეთანხმებას, რომელიც მთლიანობაში, ბოლო სამი წლის განმავლობაში, ყველაზე ახლოსაა ერთმანეთთან;

📍მომავალი კვირა გადამწყვეტი იქნება უკრაინაში მშვიდობიანი დარეგულირებისთვის საჭირო მოლაპარაკებებისთვის;

📍აშშ მომავალ კვირას შეაფასებს მხარეთა პროგრესს და გადაწყვეტს, სურთ თუ არა უკრაინაში სამშვიდობო მოლაპარაკებებში მონაწილეობის გაგრძელება;

📍აშშ-მ რუსეთის წინააღმდეგ სანქციები არ დააწესა, რადგან იმედოვნებს, რომ მეომარი მხარეებს დააახლოებს ერთმანეთთან.

სერგეი ლავროვი CBS News-თან ინტერვიუში:

📍რუსეთს შეუძლია გარკვეული დათმობების გაკეთება უკრაინასთან დაკავშირებით და მზადაა „ინტერესების ბალანსის“ მოსაძებნად;

📍რუსეთი არ აწარმოებს მოლაპარაკებებს თავისი ტერიტორიის მთლიანობაზე (საუბარია ოკუპირებულ ყირიმზე);

📍საჭიროების შემთხვევაში, რუსეთის ფედერაცია აშშ-ს აუხსნის, რომ ზაპოროჟიეს ატომური ელექტროსადგური საიმედო ხელშია და მისი კონტროლის შეცვლა შეუძლებელია;

📍რუსეთს აშშ-სგან სანქციების მოხსნის შესახებ არანაირი წინადადება არ მიუღია.

ტრამპის ადმინისტრაცია ჩრდილოეთ კორეასთან დიალოგის განახლებას განიხილავს. ამის შესახებ Axios-ი წყაროებზე დაყრდნობით იუწყება.

გამოცემის ცნობით, პირველი ვადის განმავლობაში, ტრამპმა კიმ ჩენ ინთან ორი სამიტი გამართა, თუმცა მას შემდეგ, თითქმის ყველა ჩრდილოეთ კორეელი ჩინოვნიკი, რომელსაც აშშ-სთან ურთიერთობა ჰქონდა, ან სამსახურიდან გაათავისუფლეს, ან გადამზადებაზე გაგზავნეს.

ტრამპი ზელენსკისთან ვატიკანში შეხვედრას დაჟინებით ითხოვდა. ამის შესახებ მაიკლ უოლცმა განაცხადა.

„აშშ-ის პრეზიდენტს მტკიცედ ჰქონდა გადაწყვეტილი, რომ ზელენსკისთან პირისპირ ესაუბრა და განეხილა, თუ როგორ ვაპირებთ ევროპაში ყველაზე მასშტაბური სახმელეთო ომის დასრულებას.“ - ციტირებს The Telegraph-ი ეროვნული უსაფრთხოების საკითხში ტრამპის მრჩევლის სიტყვებს.

ლავროვი:
"პუტინმა ორი პირობა დაასახელა, რომლის შემთხვევაშიც ის უკრაინაში ცეცხლის სრულად შეწყვეტას აპირებს"

რუსეთის საგარეო საქმეთა მინისტრის თქმით, პირველი პირობაა, რომ უკრაინას იარაღი აღარ უნდა მიეწოდოს; მეორე კი, ის არის, რომ უკრაინის შეიარაღებულმა ძალებმა ცეცხლის შეწყვეტის შეთანხმება გადაიარაღებისთვის არ უნდა გამოიყენონ.

რუსეთი რეალურად ცდილობს მსოფლიოს მოტყუებას, - ამერიკის და სხვების მოტყუებას, - და ომის კიდევ უფრო გახანგრძლივებას. ამის შესახებ ვოლოდიმირ ზელენსკიმ განაცხადა.

„საჭიროა ზეწოლა. ზეწოლის გარეშე, არ გამოვა, რომ რუსებმა გადადგან ყველა ნაბიჯი, გააკეთონ ყველაფერი, რაც საჭიროა ომის შესაჩერებლად. გუშინდელმა შეხვედრებმა ვატიკანსა და რომში დაადასტურა, რომ ჩვენი პარტნიორები ხვდებიან, რა ხდება.“ - დასძინა უკრაინის პრეზიდენტმა.

გერმანია უკრაინას მოუწოდებს, ტრამპის სამშვიდობო გეგმა უარყოს.

გერმანიის თავდაცვის მინისტრის მოვალეობის შემსრულებელმა ბორის პისტორიუსმა განაცხადა, რომ უკრაინა „არ უნდა წავიდეს იმდენად შორს, რამდენსაც აშშ-ის პრეზიდენტი სთავაზობს“. თუმცა, მან დასძინა, რომ კიევს „შესაძლოა, ზოგიერთი ტერიტორიის დათმობა მოუწიოს“.

„უკრაინას შეეძლო ერთი წლის წინ დამოუკიდებლად მიეღო ის, რაც ამ [ტრამპის] წინადადებაში იყო შეტანილი. ეს კაპიტულაციის მსგავსია. მე ვერ ვხედავ რაიმე დამატებით ღირებულებას.“ - თქვა პისტორიუსმა.

შეგახსენებთ, მანამდე, Reuters-მა გამოაქვეყნა აშშ-ის სავარაუდო სამშვიდობო გეგმა უკრაინისთვის. ის მოიცავს ყირიმის რუსეთის ნაწილად ოფიციალურად აღიარებას და რუსეთის ფაქტობრივი კონტროლის აღიარებას დონეცკის, ლუგანსკის, ზაპოროჟიესა და ხერსონის ოლქებში მის მიერ ოკუპირებულ ტერიტორიებზე. გარდა ამისა, გეგმა ითვალისწინებს უკრაინის უარს ნატოში გაწევრიანებაზე და რუსეთის ფედერაციის წინააღმდეგ დაწესებული სანქციების მოხსნას.

რომის პაპმა ფრანცისკემ, გარდაცვალებამდე ცოტა ხნით ადრე, თითქმის მთელი დარჩენილი თანხა, - დაახლოებით, 200 000 ევრო, - რომის არასრულწლოვანთა ციხეში მოქმედი მაკარონის ქარხნის იპოთეკური სესხის დასაფარად გაიღო. ამის შესახებ The Economist-ი იუწყება.

სხვადასხვა წყაროს, მათ შორის, Hello!-ს და Marca-ს ინფორმაციით, მისი პირადი ქონება, დაახლოებით, £16 მილიონს (დაახლოებით $21 279 454) შეადგენდა. ქონებაში შედიოდა პაპის თანამდებობასთან დაკავშირებული აქტივები, როგორიცაა ავტომობილები, საცხოვრებელი ადგილი და სამოსი.

საინფორმაციო სააგენტო realestate-ის ინფორმაციით, ფრანცისკეს ოფიციალური ხელფასი წლიურად £384 000-ს (დაახლოებით $511 219) შეადგენდა, თუმცა ცნობილია, რომ მან უარი თქვა ამ თანხის პირად მოხმარებაზე და იგი საქველმოქმედო ფონდებში გადარიცხა. ხოლო, მის ძირითად საჭიროებებს, როგორიცაა ცხოვრების ხარჯები, საკვები, ტანსაცმელი და მოგზაურობა, ვატიკანი იხდიდა.

სიცოცხლის ბოლომდე, პაპი ფრანცისკე ცხოვრობდა ვატიკანის სტუმართა სახლში, Casa Santa Marta-ში და არა პაპის ოფიციალურ სასახლეში. იგი ხშირად სტუმრობდა ადგილობრივ მაღაზიებს და იყენებდა უბრალო სამოსს, რითაც კიდევ ერთხელ უსვამდა ხაზს სულიერი ღირებულებებისადმი ერთგულებას.

ფრანცისკემ არ დატოვა პირადი ქონება, რომელიც საჭიროებდა მემკვიდრეობის გადანაწილებას. მისი ძირითადი აქტივები დაკავშირებული იყო პაპის სტატუსთან და ვატიკანს ეკუთვნოდა. Celebrity Net Worth-ის თანახმად, მისი წმინდა ქონება მისი გარდაცვალების დროს, მხოლოდ 100 ფუნტ სტერლინგს (133 აშშ დოლარი) შეადგენდა.

მოსკოვის სასამართლომ დააპატიმრა იგნატ კუზინი, რომელსაც გენერალ-ლეიტენანტ იაროსლავ მოსკალიკის მკვლელობა ედება ბრალად. ამის შესახებ მოსკოვის საერთო იურისდიქციის სასამართლოების Telegram-ის არხი იუწყება.

„კუზინმა აღწერა თავისი ქმედებების ქრონოლოგია მომზადების დაწყებიდან დანაშაულის ჩადენამდე. 2025 წლის 23 აპრილს, მომზადების დასრულების შემდეგ, კუზინი მიიმალა. ჩადენილი დანაშაულისთვის, მას დაჰპირდნენ ფულად ჯილდოს, სულ 18 ათასი აშშ დოლარის ოდენობით.“ - აღნიშნულია გავრცელებულ ინფორმაციაში.

შეგახსენებთ, 25 აპრილს, მოსკოვის ოლქის ქალაქ ბალაშიხაში, რუსი გენერალი, 59 წლის იაროსლავ მოსკალიკი ააფეთქეს. მოსკალიკი რუსეთის გენერალური შტაბის დაზვერვის ოპერატიული სამმართველოს უფროსის მოადგილე იყო. 2021 წელს პუტინმა მას გენერალ-ლეიტენანტის წოდება მიანიჭა.

რუსეთის ფედერალური უსაფრთხოების სამსახურის განცხადებით, დააკავეს პირი, რომელმაც გენერალ-ლეიტენანტ იაროსლავ მოსკალიკის მანქანა დანაღმა. "ეფესბე"-ს ცნობით, დაკავებული 1983 წელს დაბადებული იგნატ კუზინია. უწყება ამტკიცებს, რომ ის უკრაინის სპეცსამსახურების აგენტია და უკრაინაში ბინადრობის ნებართვა ჰქონდა.

რუსეთის დაზვერვის სამსახურის ცნობით, ასაფეთქებელი მოწყობილობა უკრაინის ტერიტორიიდან, დისტანციურად ამოქმედდა.

ყაზახეთიდან ჩამოსული ტურისტები საქართველოში არსებულ პრობლემებზე ჩივიან.

ყაზახეთ-საქართველოს ეკონომიკური კავშირი აცხადებს, რომ 2024-2025 წლებში გახშირდა ყაზახეთიდან ჩამოსული ტურისტების მიმართ „არასათანადო მოპყრობის“ შემთხვევები, განსაკუთრებით, - მომსახურების სექტორში: „ტურისტები სხვადასხვა სიტუაციაში არასათანადო და შეურაცხმყოფელ ქცევას აწყდებიან, განსაკუთრებით, - იმ ადგილებში, სადაც ისინი ყოველდღიურად შედიან ადგილობრივ მცხოვრებლებთან კონტაქტში, კერძოდ, კვების ობიექტებში, ფინანსურ ინსტიტუტებში, მიკროავტობუსებსა და საზოგადოებრივ ტრანსპორტში.“ - ნათქვამია განცხადებაში.

ასევე აღნიშნულია, რომ სასაზღვრო გამშვებ პუნქტებზე მკვეთრად გაიზარდა ისეთი შემთხვევების რაოდენობა, როცა ყაზახეთის მოქალაქეებს „გაურკვეველი ან არასაკმარისი მიზეზების გამო, არ შეუძლიათ ქვეყანაში შესვლა“.

მიმდინარე წლის პირველ კვარტალში, საქართველოში შემოსული ყაზახი ტურისტების რაოდენობამ 21 625 ადამიანი შეადგინა. მიუხედავად იმისა, რომ აღნიშნული მაჩვენებლით, საერთაშორისო ვიზიტორების რაოდენობით, ყაზახეთი მე-9 ადგილზეა,
როგორც Kazinform-ი იტყობინება, ეს წინა წელთან შედარებით, 22,4%-ით ნაკლებია.