ტრამპი რუსეთზე უკრაინული დრონებით თავდასხმით აღფრთოვანებულია, თუმცა წუხს, რომ ეს გაართულებს მის მისიას ცეცხლის შეწყვეტის დამყარების კუთხით. - ინფორმაციას Axios-ი ავრცელებს.

სტატიაში ნათქვამია, რომ აშშ-ის პრეზიდენტი თავდასხმას „ძლიერად“ და „მაგრად“ მიიჩნევს, ხოლო ტრამპის ერთ-ერთმა მრჩეველმა განაცხადა, რომ „საერთაშორისო თვალსაზრისით, ჩიხუახუამ მნიშვნელოვანი ზიანი მიაყენა დიდ ძაღლს“.

ამავდროულად, აშშ-ს პრეზიდენტი წუხს, რომ თავდასხმები პუტინს შურისძიების უფრო ძლიერი გზებისკენ უბიძგებს.

შეერთებული შტატების ლეგენდარული ბირთვული ავიამზიდი „ენტერპრაიზ"-ი, რომელიც 451 მილიონ დოლარად აიგო, 537 მილიონ დოლარად დაიშლება.

„ენტერპრაიზ"-ი (CVN-65) მსოფლიოში პირველი ბირთვული ავიამზიდია, რომელსაც რვა რეაქტორი აქვს. ის ექსპლუატაციაში 1961 წელს შევიდა და მხოლოდ 2012 წელს გაჩერდა; 50 წელზე მეტი ხნის განმავლობაში მსახურობდა და მონაწილეობდა ოპერაციებში, ცივი ომიდან 11 სექტემბრის შემდგომ არსებულ კონფლიქტებამდე.

მისი რეაქტორები 2017 წელს გადმოიტვირთა და გამოირთო. ახლა კი, ავიამზიდი უბრალოდ, დაიშლება. დემონტაჟისა და განადგურების კონტრაქტი კომპანია „NorthStar Maritime Dismantlement Services, LLC“-ს მიენიჭა და სამუშაოების დასრულება 2029 წლის ნოემბრისთვის იგეგმება.

მივიღე პირადი გადაწყვეტილება, გავიდე პენსიაზე. ამის შესახებ საქართველოში აშშ-ის ელჩის, რობინ დანიგანის განცხადებაშია აღნიშნული, რომელსაც საელჩო სოციალურ ქსელში ავრცელებს.

როგორც დანიგანი აღნიშნავს, მისი გაწვევა აშშ-ს მთავრობას არ მოუთხოვია.

ამასთან, დანიგანმა განაცხადა: "განვაგრძობ დაუღალავ შრომას ჩვენ შორის კავშირების გასამყარებლად, სანამ ივლისში საქართველოს დავტოვებ".

„მას შემდეგ რაც, როგორც დიპლომატი, შეერთებულ შტატებს ოცდაცამეტი წლის განმავლობაში წარმოვადგენდი, მივიღე პირადი გადაწყვეტილება, გავიდე პენსიაზე. საქართველოში აშშ-ის ელჩად ყოფნა ჩემი კარიერის უდიდესი პატივი და პრივილეგიაა. მე სამუდამოდ ვიამაყებ იმ მნიშვნელოვანი საქმით, რაც გასწია ამერიკის მთავრობის შესანიშნავმა გუნდმა როგორც ვაშინგტონში, ისე აქ, თბილისში, აშშ-ის საელჩოში, ჩვენს ქვეყნებსა და ხალხებს შორის პარტნიორობის გასაძლიერებლად.

ეს სრულიად პირადი გადაწყვეტილებაა. ჩემი გაწვევა ჩემს მთავრობას არ მოუთხოვია.

მე და ჩემი ოჯახი ბედნიერები ვართ, რომ გამოვცადეთ ქართველი ხალხის გასაოცარი სიკეთე და სითბო. არ აქვს მნიშვნელობა ამ საოცრად ლამაზი ქვეყნის რომელ მხარეში ვმოგზაურობდით, ყველგან გვხვდებოდნენ შეუდარებელი ქართული სტუმართმოყვარეობით. ჩვენ აღფრთოვანებული ვართ თითოეული ქართველის გულით, სულითა და ენთუზიაზმით. დღეს, როგორც არასდროს, დარწმუნებული ვარ, რომ ის ძირეული ღირებულებები, რაც ამერიკელებსა და ქართველებს აერთიანებს, უზრუნველყოფს ჩვენი განსაკუთრებული პარტნიორობისა და მეგობრობის გაგრძელებას.

მე განვაგრძობ დაუღალავ შრომას ჩვენ შორის კავშირების გასამყარებლად, სანამ ივლისში საქართველოს დავტოვებ.” - ნათქვამია განცხადებაში.

მოსკოვის აეროპორტებიდან სანქტ-პეტერბურგის პულკოვოში ზოგიერთი რეისის გადატანის შესახებ მოლაპარაკებები, სულ მცირე, ორმა უცხოურმა ავიაკომპანიამ დაიწყო; ეს შეიძლება იყოს Turkish Airlines-ი და Emirates-ი. ამის შესახებ „ვედომოსტ"-ი ერთ-ერთ რუსულ ავიაკომპანიასა და ერთ-ერთ აეროპორტში მყოფ წყაროებზე დაყრდნობით იტყობინება.

გამოცემის ცნობით, უცხოური ავიაკომპანიები ამ ვარიანტს განიხილავენ მოსკოვში დრონების საფრთხის გამო ფრენების შეზღუდვების დაწესების, ასევე, იმ მგზავრების რაოდენობის ზრდის გამო, რომლებიც საერთაშორისო მიმართულებით მოსკოვიდან დაფრინავენ, მაგრამ იქ სანქტ-პეტერბურგიდან ჩადიან.

დომოდედოვოს აეროპორტმა „რია ნოვოსტი“-ს განუცხადა, რომ „რეისების მასობრივი გადატანის შესახებ ინფორმაცია სიმართლეს არ შეესაბამება“. სხვა აეროპორტებმა, ასევე Turkish Airlines-მა და Emirates-მა ამ ინფორმაციაზე კომენტარი ჯერ არ გააკეთეს.

„შავი ქვრივი“ ნიჟნევარტოვსკიდან

რუსეთის ფედერაციის ქალაქ ნიჟნევარტოვსკში დააკავეს ქალი, რომელიც ქორწინდებოდა მარტოხელა მამაკაცებზე და თანამზრახველ პოლიციელთან ერთად, მათ ომში აგზავნიდა, იმ გათვლით, რომ მამაკაცი ფრონტის ხაზზე დაიღუპებოდა, ხოლო ჯარისკაცის სიკვდილის შემდეგ, თანამზრახველები კომპენსაციას გაიყოფდნენ.

ინფორმაციას რუსული მედია ავრცელებს.

სქემა შემდეგნაირად დალაგდა: პოლიციელი ქალს უცოლო, ნარკომანი, ალკოჰოლიკი, კრიმინალური წარსულის მქონე მამაკაცების პირად მონაცემებს აწვდიდა, რომელიც მსხვერპლთან სასიყვარულო ურთეიერთობებს აბამდა, რასაც ქორწინებით ასრულებდა. ურთიერთობის მეორე ეტაპი კი, ქმრის ომში გაგზავნა იყო.

სქემის ფარგლებში, ოთხი „ქმარი“ გაისტუმრეს იმქვეყნად. თითოეულისთვის, "ქვრივმა", კომპენსაციის სახით, 3,5 მილიონი რუბლი მიიღო (საშუალოდ, 40 000 დოლარი), რომელიც მან თავის პარტნიორ პოლიციელთან გაიყო. ჯამში, სქემის მსხვერპლი 7 რუსი მამაკაცია. აქედან ოთხი ომში უკვე დაიღუპა.

ეს რუსულ სისტემაში არსებული ხარვეზი არ არის. ეს თავად სისტემაა. ომი, რიგითი რუსებისთვის შემოსავლის წყაროდ იქცა. მაშინ, როდესაც ჩინოვნიკები ნავთობისა და გაზის საშუალებით შოულობენ ფულს, რიგითი რუსები "სასაფლაო ეკონომიკის" ფარგლებში ოჯახის წევრების სიცოცხლეს ფულში ცვლიან.

უკრაინამ და იაპონიამ ხელი მოაწერეს შეთანხმებას, რომელიც რუსული გაყინული აქტივებიდან მიღებული 3 მილიარდი დოლარის უკრაინისთვის გადაცემას ითვალისწინებს. ამის შესახებ პრემიერ-მინისტრმა დენის შმიგალმა განაცხადა.

მისი თქმით, თანხები მიმართული იქნება „ქვეყნის ბიუჯეტის პრიორიტეტული საჭიროებებისკენ, ეკონომიკის გაძლიერებისა და განვითარებისთვის."

თურქეთში მუშამ, პირში სიგარეტით, საწვავის ავზის ლუქის გაღება გადაწყვიტა.

ადგილობრივი მედიის ცნობით, ქალაქ გაზიანტეპში, 27 წლის მამაკაცმა, ანთებული სიგარეტით, მზესუმზირის ზეთის ქარხნის ტერიტორიაზე მდებარე საწვავის ავზის ლუქი გახსნა. შედეგად, აფეთქება მოხდა, რამაც უბედური მუშა ჰაერში ატყორცნა.

ვრცელდება ინფორმაცია, რომ ის მძიმედ დაშავდა და ამჟამად, საავადმყოფოში იმყოფება.

ჩინეთის ლიდერმა სი ძინპინმა და აშშ-ის პრეზიდენტმა დონალდ ტრამპმა სატელეფონო საუბარი გამართეს.

ინფორმაციას CCTV ავრცელებს.

უკრაინის შეიარაღებულმა ძალებმა რუსეთის ბრიანსკის ოლქში "ისკანდერ"-ის ტიპის ბალისტიკური რაკეტების სამი გამშვები დანადგარი გაანადგურეს. შეტევა განხორციელდა იმ მომენტში, როდესაც რუსული მხარე კიევის მიმართულებით რაკეტების გაშვებისთვის ემზადებოდა.

წყაროების თანახმად, პრევენციული დარტყმით, უკრაინულმა მხარემ თავიდან აიცილა დედაქალაქზე მორიგი იერიში. ოპერაცია დაზვერვის მონაცემების საფუძველზე განხორციელდა.

საქართველოში „ქართული ოცნების“ ხელისუფლებიდან ჩამოშორების მიზნით, დიდი ბრიტანეთი ძალისხმევას აძლიერებს. ამის შესახებ ინფორმაციას რუსული მედია რუსეთის ფედერაციის საგარეო დაზვერვის სამსახურის პრეს-სამსახურის განცხადებაზე დაყრდნობით ავრცელებს.

„ლონდონი გეგმავს, ქართული ოპოზიციური არასამთავრობო ორგანიზაციებისთვის დაფინანსება მნიშვნელოვნად გაზარდოს, რაც მათ მიერ ანტისამთავრობო საქმიანობის რადიკალიზაციას ისახავს მიზნად.“ - ნათქვამია რუსეთის საგარეო დაზვერვის სამსახურის განცხადებაში.

უწყების მტკიცებით, „დიდ ბრიტანეთს „ქართული ოცნების“ ხელისუფლებიდან ჩამოშორების მიზნით ბრძოლის ახალი რაუნდის დაწყება სურს“.

„ბრიტანელები აპირებენ, რომ „დივერსიულად დამუხტულ“ ორგანიზაციებს ოპოზიციურ პარტიებთან ძალების გაერთიანებისკენ უბიძგონ. ლონდონის გათვლებით, ამან სისტემური პოლიტიკური ოპოზიციის „რეორგანიზაცია“ უნდა გამოიწვიოს, მას „მეორე სუნთქვა“ უნდა გაუხსნას და მმართველი „ქართული ოცნების“ ხელისუფლებიდან ჩამოსაშორებლად ბრძოლის ახალი რაუნდის დასაწყებად, მისი მობილიზება უნდა მოახდინოს.“ - აღნიშნულია განცხადებაში.

უწყების თქმით, "„ქართული ოცნების" მმართველობა მათში დაუფარავ გაღიზიანებას იწვევს“.

რუსეთის საგარეო დაზვერვის სამსახურში აცხადებენ, რომ „დიდი ბრიტანეთის საგარეო საქმეთა სამინისტრომ, საქართველოს სხვადასხვა რეგიონში დივერსიული საქმიანობის განხორციელების მიზნით, დაახლოებით, 100 ახალგაზრდული და სტუდენტური ასოციაცია, ფემინისტური მოძრაობები და ლგბტ ჯგუფები შეარჩია“.

„განსაკუთრებული მნიშვნელობა ენიჭება „აქტივისტების“ დივერსიულ მეთოდებში მომზადებას. მომავალ მებრძოლებს ასწავლიან, როგორ დაუპირისპირდნენ პოლიციას საპროტესტო აქციების დროს, გვერდი აუარონ ხელისუფლების „ციფრულ“ კონტროლს და დივერსია მოამზადონ.“ - აცხადებს უწყება.

უწყების განცხადებით, დასავლეთს „აღიზიანებს საქართველოს სურვილი, განთავისუფლდეს ლიბერალურ-გლობალისტური ძალების მეურვეობისგან“.

„დასავლეთში განსაკუთრებით აღიზიანებთ ის, რომ თბილისი, რომელიც ჯერ კიდევ ცოტა ხნის წინ, მიხეილ სააკაშვილის მმართველობის დროს, სამხრეთ კავკასიაში „დემოკრატიზაციის ლოკომოტივი“ იყო, „ავტორიტარული გზისკენ“ სულ უფრო მეტად უხვევს და ეროვნულ ინტერესებს პირველ ადგილზე აყენებს. ლონდონს არ აინტერესებს ქართველი ხალხი, რომელმაც გასულ წელს ჩატარებულ არჩევნებში ქვეყნის ხელმძღვანელობის ეროვნულ კურსს მხარი ცალსახად დაუჭირა.“ - ნათქვამია განცხადებაში.

ევროატლანტიკურ სივრცეში რუსეთი ყველაზე დიდ საფრთხეს წარმოადგენს. ამის შესახებ ნატო-ში აშშ-ის ელჩმა, მეთიუ უიტეკერმა ბრიუსელში ჟურნალისტებს განუცხადა.

„ევროპელები გამუდმებით გვეუბნებიან, რომ რუსეთი ყველაზე დიდი საფრთხეა. ჩვენც ვეთანხმებით, რომ ევროატლანტიკურ სივრცეში ეს სწორედ ასეა. ამიტომ, ინვესტიციები უნდა განვახორციელოთ.“ - განაცხადა მეთიუ უიტეკერმა.

მისი თქმით, მნიშვნელოვანია, რომ ევროპელმა მოკავშირეებმა თავდაცვის ხარჯები მშპ-ს 5%-მდე გაზარდონ, რადგან რუსეთი უკრაინაში ომის დასრულების შემდეგ აღდგენას 5 წელიწადში შეძლებს.

„თავდაცვის ხარჯების გაზრდისთვის, დროს ჩვენ არ ვადგენთ. ის საფრთხეებით განისაზღვრება. რუსეთს აღდგენა 5 წელიწადში ან კიდევ უფრო მალე შეუძლია.“ - აღნიშნა ნატო-ში აშშ-ის ელჩმა.