"ტიტანიკ"-ის კატასტროფას გადარჩენილის წერილი აუქციონზე 300 000 ფუნტ სტერლინგად გაიყიდა. - ინფორმაციას The Guardian-ი ავრცელებს.

ავტორი პირველი კლასის მგზავრი, პოლკოვნიკი არჩიბალდ გრეისი იყო. წერილი 1912 წლის 10 აპრილით თარიღდება, - იმ დღით, როდესაც გრეისი გემზე ავიდა. მასში ის თავის პირველ შთაბეჭდილებებს აღწერს.

„ის კარგი გემია, მაგრამ მის შესახებ განაჩენის გამოტანამდე, დაველოდები ჩემი მოგზაურობის დასრულებას.“ - ნათქვამია წერილში.

„ტიტანიკ"-ის ჩაძირვის დროს, პოლკოვნიკი ქალებსა და ბავშვებს სამაშველო ნავებამდე მისვლაში ეხმარებოდა და თბილ საბნებსაც გადასცემდა. ჩაძირვის შემდეგ, გრეისიმ ერთ-ერთ გადაბრუნებულ დასაკეც ნავზე ასვლა მოახერხა სხვა მგზავრებთან ერთად, რომელთა ნახევარზე მეტი, მისი თქმით, გადაღლილობის, ძლიერი წვიმის ან გადაბრუნებული ნავის კილიდან ჩამოცურების შედეგად გარდაიცვალა.

მოგვიანებით, გრეისი გადაარჩინეს და ნიუ-იორკში დაბრუნების შემდეგ, მან კატასტროფა აღწერა თავის წიგნში, „სიმართლე ტიტანიკის შესახებ“. იმის გამო, რომ ჰიპოთერმიისგან ვეღარ გამოჯანმრთელდა, ის 1912 წლის დეკემბერში გარდაიცვალა.

აუქციონერების თქმით, ასეთი წერილები ძალიან იშვიათია და ეს ლოტი აქამდე არასდროს გამოტანილა გასაყიდად. მისი საწყისი ფასი 60 000 ფუნტი სტერლინგი იყო.

ტრამპი ამერიკული გემებისთვის, პანამის და სუეცის არხების გავლით, თავისუფალ გადაადგილებას მოითხოვს. - ინფორმაციას The Guardian-ი ავრცელებს.

აშშ-ს პრეზიდენტმა თქვა, რომ არხები „არ იარსებებდა შეერთებული შტატების გარეშე“ და სწორედ ამიტომ, კომერციული და სამხედრო გემების გადაადგილება თავისუფალი უნდა იყოს.

გამოცემა წერს, რომ ტრამპმა უკვე სთხოვა სახელმწიფო მდივან რუბიოს, „დაუყოვნებლივ გაუმკლავდეს სიტუაციას“.

აღსანიშნავია, რომ შეერთებულმა შტატებმა მართლაც მნიშვნელოვანი როლი ითამაშა პანამის არხის მშენებლობაში, თუმცა სუეცის არხი ფრანგებმა და ეგვიპტელებმა 1859-1869 წლებში ააშენეს. 1956 წლის, ეგრეთ წოდებული სუეცის კრიზისის შემდეგ, არხი ეგვიპტის სრული კონტროლის ქვეშ დარჩა.

არაბული მედია:
""ჰამას"-ი ღაზას სექტორიდან ყველა მებრძოლის გაყვანას დათანხმდა"

როგორც გამოცემა „ალ არაბია“ იუწყება, "ჰამას"-მა მიიღო ეგვიპტის მიერ ღაზას სექტორში სიტუაციის საბოლოო მოგვარებისთვის წაყენებული ძირითადი პირობები. არხის წყაროს ცნობით, კაირომ ორგანიზაციას შესთავაზა შეთანხმება ომის საერთაშორისო გარანტიებით დასრულების შესახებ. საპასუხოდ, "ჰამას"-მა, როგორც ამბობენ, მზადყოფნა გამოთქვა, ცეცხლის შეწყვეტისთანავე ღაზას სექტორიდან ყველა თავისი მებრძოლი გაიყვანოს, იმ პირობით, რომ მათ სისხლისსამართლებრივი დევნისგან დაიცავენ.

გარდა ამისა, "ჰამას"-ი დათანხმდა, უარი ეთქვა ანკლავის მომავალ მმართველობაში ნებისმიერ მონაწილეობაზე. წყაროების ცნობით, აშშ-მ შუამავლები გააფრთხილა, რომ ღაზას სექტორში მებრძოლების განიარაღება ნებისმიერი მომავალი შეთანხმების სავალდებულო ნაწილი უნდა იყოს.

კრემლის პრეს-სპიკერის, დმიტრი პესკოვის განცხადებით, რუსეთის პრეზიდენტმა, ვლადიმირ პუტინმა აშშ-ის პრეზიდენტის სპეციალურ წარმომადგენელთან, სტივ უიტკოფთან შეხვედრაზე დაადასტურა რუსეთის მზადყოფნა, უკრაინასთან მოლაპარაკებები წინაპირობების გარეშე აწარმოოს. - ინფორმაციას რუსული მედია ავრცელებს.

„ტრამპის წარმომადგენელ უიტკოფთან საუბრისას, ვლადიმირ პუტინმა კიდევ ერთხელ გაიმეორა, რომ რუსული მხარე მზადაა, უკრაინასთან მოლაპარაკებების პროცესი ყოველგვარი წინაპირობების გარეშე განაახლოს.“ - აღნიშნა პესკოვმა.

შეგახსენებთ, პუტინმა და უიტკოფმა შეხვედრა კრემლში პარასკევს გამართეს. მას ასევე, ესწრებოდნენ რუსეთის პრეზიდენტის თანაშემწე იური უშაკოვი და რუსეთის პირდაპირი ინვესტიციების ფონდის ხელმძღვანელი, კირილ დმიტრიევი.

რომის პაპი სანტა მარია მაჯორეს ბაზილიკაში, უბრალო ხის კუბოში დაკრძალეს. ეს თავად პაპის სურვილი იყო. - ინფორმაციას The Sun-ი ავრცელებს.

სტატიაში ნათქვამია, რომ პაპის ეს სურვილი მის უბრალოებასა და ადამიანებთან სიახლოვისკენ სწრაფვაზე მეტყველებს და ფრანცისკეს მოკრძალებაზე დაკრძალვის წირვაც მეტყველებდა.

„მის კუბოს მარგინალიზებული თემების წევრები, მათ შორის, მიგრანტები და პატიმრები ატარებდნენ, რაც ყველაზე მეტად გაჭირვებულთა მომსახურების მიმართ მის ერთგულებას ასახავს.“ - წერს გაზეთი.

ვაფასებ ტრამპისა და მისი გუნდის მუშაობას უკრაინაში, პუტინის ბარბაროსული ომის სამართლიანად დასასრულებლად. ამის შესახებ x-ში რესპუბლიკელი სენატორი ლინდსი გრემი წერს და რუსეთის წინააღმდეგ, დამატებითი სანქციების დაწესებას აანონსებს:

"რაც შეეხება პუტინის რუსეთის წინააღმდეგ დამატებით სანქციებს, გვაქვს ორპარტიული კანონპროექტი, თითქმის, 60 თანასპონსორით, რომელიც მეორად ტარიფებს დააწესებს ნებისმიერ ქვეყანაზე, რომელიც შეიძენს რუსულ ნავთობს, გაზს, ურანს ან სხვა პროდუქტებს. სენატი მზადაა, ამ მიმართულებით იმოძრაოს და ამას დიდი სიამოვნებით გააკეთებს, თუ რუსეთი არ დათანხმდება სამართლიან და მდგრად მშვიდობას." - წერს სენატორი.

შეგახსენებთ, ვოლოდიმირ ზელენსკისთან, ვატიკანში გამართული მოლაპარაკებების შემდეგ, სანქციების დაწესება არც დონალდ ტრამპმა გამორიცხა.

ღამით, რუსული დრონებით თავდასხმას დნეპროპეტროვსკის რეგიონში, ქალაქ პავლოგრადში, ერთი ადამიანი ემსხვერპლა. ასევე, დაშავდა 14 წლის გოგონა.

საოლქო სამხედრო ადმინისტრაციის ხელმძღვანელის, სერგეი ლისაკის თქმით, საჰაერო თავდაცვის ძალებმა რეგიონში 13 დრონი ჩამოაგდეს. ლისაკის ცნობითვე, ქალაქში ორი საცხოვრებელი კორპუსი დაზიანდა და ერთ-ერთ მათგანში ხანძარი გაჩნდა. გარდა ამისა, პავლოგრადის რაიონში თავდასხმა განხორციელდა სასოფლო-სამეურნეო საწარმოზე. დაიბომბა დნეპრიც. საოლქო სამხედრო ადმინისტრაციის ხელმძღვანელის თქმით, ფანჯრები ჩამსხვრეულია ოთხ მრავალსართულიან შენობასა და რამდენიმე მაღაზიაში.

მონიტორინგის არხები და უკრაინის საჰაერო ძალები ღამით რუსული დრონების მასშტაბური თავდასხმის შესახებ იუწყებოდნენ.

კიევის ოლქისა და ოდესის რეგიონის საჰაერო სივრცეში უპილოტო საფრენი აპარატები აღმოაჩინეს და საჰაერო თავდაცვის ძალები მათზე მუშაობდნენ.

ნიკოლაევის, ჟიტომირისა და კიროვოგრადის ოლქებში საჰაერო თავდასხმის საფრთხის დონე გამოცხადდა.

კანადის ქალაქ ვანკუვერში ავტომობილის ხალხში შევარდნის შედეგად, სულ მცირე, 8 ადამიანი დაიღუპა. ამის შესახებ Global News-ი იუწყება.

გამოცემა, წყაროებზე დაყრდნობით, იტყობინება, რომ დაშავდა, სულ მცირე, 6 ადამიანი. დაღუპულთა შორის კი, ერთი ბავშვია.

ამავდროულად, დეტალები პოლიციას ოფიციალურად არ გაუვრცელებია.

ტრამპის გუნდი უკვე ამზადებს გეგმას მომდევნო 100 დღისთვის. ფოკუსირება მოხდება სავაჭრო შეთანხმებებსა და სამშვიდობო მოლაპარაკებებზე. - ინფორმაციას Reuters-ი ავრცელებს.

სააგენტო თეთრი სახლის წარმომადგენლებზე დაყრდნობით წერს, რომ ტრამპის გუნდი მომდევნო 100 დღის განმავლობაში სავაჭრო შეთანხმებებსა და სამშვიდობო მოლაპარაკებებზე გაამახვილებს ყურადღებას.

სტატიაში ასევე ნათქვამია, რომ მომავალ თვეში აშშ-ის პრეზიდენტი ხანგრძლივ მოგზაურობას გეგმავს, რომლის დროსაც საუდის არაბეთს, ყატარსა და არაბთა გაერთიანებულ საამიროებს ეწვევა და ამავდროულად, უკრაინასა და რუსეთს შორის მიმდინარე ომის მშვიდობიანი გზით დარეგულირებისკენ მოწოდებას გააგრძელებს.

ირანის ბანდარ-აბასის პორტში აფეთქების შედეგად დაღუპულთა რიცხვი 25-მდე გაიზარდა. ამის შესახებ Reuters-ი იუწყება.

ირანის კრიზისების მართვის ორგანიზაციის მონაცემებით, სამედიცინო დახმარება 752 ადამიანს გაეწია, რომელთაგან 190 კვლავ ექიმების მეთვალყურეობის ქვეშ იმყოფება.

ქვეყნის შინაგან საქმეთა მინისტრმა, ესკანდარ მომენიმ ადგილობრივ ტელევიზიას განუცხადა, რომ ხანძრის, დაახლოებით, 80% ჩამქრალია.

ამ დროისთვის, კანადაში ადამიანებზე ავტომობილით შეჯახება ტერორისტულ თავდასხმად არ განიხილება. ამის შესახებ ვანკუვერის პოლიციამ განაცხადა. ასევე დადასტურებულია, რომ ინციდენტის შედეგად, 9 ადამიანი დაიღუპა, ხოლო დაშავებულთა რაოდენობა უცნობია.

შეგახსენებთ, რომ კანადის ქალაქ ვანკუვერში, ფესტივალის მიმდინარეობის დროს, მანქანა ხალხის ბრბოში შევარდა. მძღოლი, რომელიც იმავე ქალაქის 30 წლის მკვიდრია, დაკავებულია და ამჟამად დაკითხვაზეა. მისი მოტივები ჯერ კიდევ უცნობია.

გერმანიაში, ბავარიის რეგიონის ქალაქ ბაიროითში ორი პირი დააკავეს, რომლებიც რუსეთის სასარგებლოდ ჯაშუშობასა და უკრაინისთვის განკუთვნილი დახმარების დივერსიის ორგანიზებაში არიან ეჭვმიტანილები. დაკავებულებიდან, ერთი გერმანელი, მეორე კი, რუსია.

ერთ-ერთს პოტენციურ სამიზნეებზე, მათ შორის, აშშ-ის სამხედრო ობიექტებზე თავდასხმების ორგანიზებაც ედება ბრალად.

დაკავებულები არიან: დიტერ ს. და ალექსანდერ ჯ.

გერმანელი პროკურორების განცხადებით, დიტერ ს., რუსეთის დაზვერვასთან დაკავშირებულ პირთან ერთად, გერმანიაში დივერსიული აქტების მოწყობას გეგმავდა. მთავარი მიზანი იყო გერმანიის მიერ უკრაინისთვის გაწეული სამხედრო დახმარების განადგურება. ის აგროვებდა ინფორმაციას პოტენციურ სამიზნეებზე, მათ შორის, - აშშ-ის სამხედრო ობიექტებზეც.

ორივე მათგანს მოსამართლემ პატიმრობა შეუფარდა. 2014 წლის დეკემბრიდან 2016 წლის სექტემბრამდე, დონეცკის რეგიონში შეიარაღებული პრორუსული სეპარატისტული ძალების წევრობისთვის, დიტერ ს.-ს ცალკე ბრალდებაც წაუყენეს.

ამ შემთხვევის გამო, გერმანიის საგარეო საქმეთა სამინისტრომ რუსეთის ელჩი დაიბარა. კრემლში კი, ამტკიცებენ, რომ არაფერი იციან. "ამ საკითხთან დაკავშირებით, არანაირი ინფორმაცია არ მაქვს." - ამბობს პრეს-სპიკერი დმიტრი პესკოვი.