ევროკავშირი და აზერბაიჯანი შეთანხმდნენ, რომ პარტნიორობისა და თანამშრომლობის ახალ შეთანხმებაზე მოლაპარაკებები განაახლონ. აზერბაიჯანული მედიის ინფორმაციით, ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, ევროკომისიის ვიცე-პრეზიდენტმა კაია კალასმა ბაქოში გამართულ პრეს-კონფერენციაზე განაცხადა.

„ეს პარტნიორობა უნდა აიგოს ურთიერთპატივისცემაზე, მათ შორის, ევროკავშირის წევრი სახელმწიფოების მიმართ პატივისცემაზე, ასევე, ისეთ ფუნდამენტურ პრინციპებზე, როგორიცაა კანონის უზენაესობა და ადამიანის უფლებები.“ - განაცხადა მან.

კალასის თქმით, ევროკავშირსა და აზერბაიჯანს დიდი ხნის პარტნიორობა აკავშირებთ. კერძოდ, ევროკავშირი აზერბაიჯანის უდიდესი სავაჭრო პარტნიორი და მისი უმსხვილესი ინვესტორია.

„ევროკავშირი ასევე მნიშვნელოვან მხარდაჭერას უწევს აზერბაიჯანში განაღმვით სამუშაოებს, რაც ხელს უწყობს კონფლიქტის შედეგების აღმოფხვრას და ადამიანების სიცოცხლის გადარჩენას. ჩვენს თანამშრომლობას დიდი პოტენციალი აქვს შემდგომი განვითარებისთვის.“ - განაცხადა კალასმა.

რომის პაპ ფრანცისკეს დაკრძალვის ცერემონიას მიხეილ ყაველაშვილი ესწრება.

დაკრძალვის ცერემონია ვატიკანის წმინდა პეტრეს მოედანზე მიმდინარეობს.

მიხეილ ყაველაშვილი, დელეგაციასთან ერთად, რომში 25 აპრილს ჩავიდა.

ცოტა ხნის წინ პაპის ცხედარი წმინდა პეტრეს ბაზილიკიდან წმინდა პეტრეს მოედანზე გამოასვენეს.

მანამდე, ბაზილიკაში, პაპის მიმართ პატივისცემის გამოსახატად, მსოფლიო ლიდერები, მათ შორის, აშშ-ის პრეზიდენტი დონალდ ტრამპი და გაერთიანებული სამეფოს პრინცი უილიამი იმყოფებოდნენ.

პაპის დაკრძალვის ცერემონიაზე დასასწრებად მივიდა უკრაინის პრეზიდენტი ვოლოდიმირ ზელენსკიც, რომლის გამოჩენასაც წმინდა პეტრეს მოედანზე აპლოდისმენტები მოჰყვა.

ცერემონიას ათასობით ადამიანი, მათ შორის სხვადასხვა ქვეყნების ლიდერები ესწრებიან. წმინდა პეტრეს მოედანზე იმყოფებიან : აშშ-ის პრეზიდენტი დონალდ ტრამპი, გაერთიანებული სამეფოს პრემიერ-მინისტრი კირ სტარმერი, იტალიის პრემიერ მინისტრი ჯორჯია მელონი და პრეზიდენტი სერჯო მატარელა, ბრაზილიის პრეზიდენტი ლუის ინასიუ ლულა და სილვა.

წირვის დასრულების შემდეგ, ფრანცისკეს ცხედარს რომში, სანტა მარია მაჯორეს ბაზილიკაში გადაასვენებენ, სადაც დაკრძალავენ.

რუსეთის სამხედრო ძალებმა კურსკის ოლქის უკრაინის შეიარაღებული ძალებისგან გათავისუფლების ოპერაცია დაასრულეს. რუსეთის პრეზიდენტის პრეს-მდივნის, დმიტრი პესკოვის თქმით, ამის შესახებ რუსეთის შეიარაღებული ძალების მთავარსარდალმა ვალერი გერასიმოვმა პუტინს მოახსენა.

ასევე, გერასიმოვის განცხადებით, უკრაინის შეიარაღებული ძალების წინააღმდეგ კურსკის ოლქში მიმდინარე ოპერაციაში, ჩრდილოეთ კორეის სამხედრო ძალებმა რუს სამხედროებს დახმარება გაუწიეს.

კოსმოსური ბირთვული იარაღის პროგრამასთან დაკავშირებული საიდუმლო რუსული თანამგზავრი „კოსმოს-2553“ მწყობრიდან გამოვიდა. - ინფორმაციას Reuters-ი ავრცელებს.

სააგენტო წერს, რომ თანამგზავრი რუსეთის ფედერაციამ უკრაინაში სრულმასშტაბიან შეჭრამდე რამდენიმე კვირით ადრე გაუშვა და შესაძლოა, ბოლო ერთი წლის განმავლობაში, უკონტროლოდ ბრუნავდა. ის დედამიწიდან, დაახლოებით, 2000 კილომეტრში, კოსმოსური გამოსხივების ისეთ წერტილში მდებარეობდა, რომელსაც სათვალთვალო ან საკომუნიკაციო თანამგზავრები, ჩვეულებრივ, გვერდს უვლიან.

ეს თანამგზავრი რუსული დაზვერვისთვის განკუთვნილ რადიოლოკაციურ თანამგზავრად ითვლება. ასევე, ის რადიაციული ტესტირების პლატფორმას წარმოადგენს. სწორედ „კოსმოს-2553“ ფიგურირებდა გასულ წელს აშშ-ის მიერ რუსეთის წინააღმდეგ წაყენებულ ბრალდებებში, რომლებიც ბირთვული იარაღის დამუშავებას ეხებოდა და რომლის მიხედვითაც, მთელი თანამგზავრული ქსელების, მაგალითად SpaceX-ის Starlink სისტემის განადგურება იყო შესაძლებელი. თუმცა, კრემლი ამ ინფორმაციას უარყოფს.