ზელენსკი:
"ყირიმის სტატუსის განხილვა მხოლოდ ცეცხლის სრული შეწყვეტის შემდეგ არის შესაძლებელი"

უკრაინის პრეზიდენტმა ყირიმის ანექსია ძალადობრივ ოკუპაციად შეაფასა და განაცხადა, რომ ნახევარკუნძული დროებით ოკუპირებულ ტერიტორიად რჩება.

მან აღიარა, რომ უკრაინას ნამდვილად არ აქვს საკმარისი იარაღი ყირიმის ძალით დასაბრუნებლად, თუმცა ხაზგასმით აღნიშნა, რომ ქვეყანას ჰყავს არმია და მისი მთავარი რესურსი ხალხია.

ზელენსკის თქმით, უკრაინა მზადაა ნებისმიერი მოლაპარაკებისთვის, ნებისმიერ ფორმატში და ნებისმიერ დროს, მაგრამ მხოლოდ რუსეთის ფედერაციის მხრიდან სრული და უპირობო ცეცხლის შეწყვეტის შემდეგ. მხოლოდ ამის შემდეგ იქნება შესაძლებელი ტერიტორიული საკითხების განხილვა და დიპლომატიური, სანქციებისა და ეკონომიკური ზეწოლის ბერკეტების გამოყენება.

"მხოლოდ უკრაინის ხალხი წყვეტს, რომელი ტერიტორიები ეკუთვნის უკრაინას." - განაცხადა ვოლოდიმირ ზელენსკიმ.

მისი თქმით, ტრამპის განცხადებაზე კომენტარს არ გააკეთებს, თუმცა ხაზგასმით აღნიშნა, რომ კიევის პოზიცია უცვლელი რჩება, - ყველა დროებით ოკუპირებული ტერიტორია, მათ შორის ყირიმი, უკრაინის საკუთრებაა. ეს გათვალისწინებულია როგორც კონსტიტუციით, ასევე საერთაშორისო სამართალით.

ნატოსთან დაკავშირებით, ზელენსკიმ აღნიშნა, რომ გაწევრიანება მოკავშირეებზეა დამოკიდებული, თუმცა კიევი კვლავაც მოითხოვს უსაფრთხოების გარანტიებს, რომლებიც შეერთებული შტატების მიერ ისრაელისთვის გაცემული გარანტიების მსგავსია. უკრაინა ასევე ევროპელი პარტნიორების მხარდაჭერას ელის, მათ შორის, კონტინგენტების შესაძლო განლაგებისა და ინფრასტრუქტურის განვითარების საკითხებში.

პრეზიდენტის თქმით, აშშ-ს მხრიდან „უკუკავშირი“ სულაც არ ნიშნავს სამხედრო ყოფნას. ეს შეიძლება ეხებოდეს კიბერთავდაცვას და საჰაერო თავდაცვის სისტემებს.

გაეროს ლტოლვილთა სააგენტომ ფრონტის ხაზიდან ევაკუირებული უკრაინელებისთვის დახმარება შეუმცირა. - ინფორმაციას Reuters-ი ავრცელებს.

მიზეზი არის აშშ-ის დახმარების გაყინვა, რომელიც ბიუჯეტის 40%-ს შეადგენს და ასევე, - სხვა დონორებისგან დაფინანსების შემცირება.

8.2 მილიონი უკრაინელის მხარდასაჭერად საჭირო 3.32 მილიარდი დოლარიდან, მხოლოდ 25% შეგროვდა. კერძოდ, შემცირებულია საგანგებო ფინანსური დახმარება და ფსიქოსოციალური მხარდაჭერა.

23 აპრილს სტამბოლში მომხდარი ძლიერი მიწისძვრის შემდეგ, თურქეთში განმეორებითი მიწისქვეშა ბიძგები გრძელდება. სულ 200-ზე მეტი განმეორებითი ბიძგი დაფიქსირდა. მათ შორის, გუშინ ყველაზე ძლიერი, 4.6 მაგნიტუდის მიწისძვრა მოხდა.

დღეს კი, ქუთაჰიის პროვინციაში, ერთმანეთისგან სამი საათის ინტერვალით, კიდევ ორი, ​​4.6 და 4.5 მაგნიტუდის სიმძლავრის მიწისძვრა მოხდა. ორივე შემთხვევაში, წყარო 10 კილომეტრის სიღრმეზე იყო განთავსებული.

მიმდინარე სეისმური არასტაბილურობის ფონზე, ექსპერტები რეგიონულ კატასტროფას პროგნოზირებენ, - ძლიერ მიწისძვრას სტამბოლის რაიონში, რომელიც მარმარილოს ზღვის მთელ რეგიონს მოიცავს. ეს კი, აღნიშნულ ტერიტორიაზე მცხოვრებ 25 მილიონზე მეტ ადამიანს შეეხება.

„არა მხოლოდ სტამბოლი, არამედ ბურსას, ჩანაქკალეს, თეკირდაგის, ქოჯაელის, იალოვას პროვინციებიც. ამ პროვინციების, განსაკუთრებით, სანაპირო რაიონების მცხოვრებლები მიწისძვრისთვის მზად უნდა იყვნენ.“ - განაცხადა სტამბოლის მუნიციპალიტეტის მიწისძვრების მეცნიერთა საბჭოს წევრმა, ჰალუკ ეიდოგანმა.

შეგახსენებთ, რომ 2023 წელს, სამხრეთ-აღმოსავლეთ თურქეთის კაჰრამანმარაშის პროვინციაში დამანგრეველი მომხდარი მიწისძვრის შემდეგ, სეისმოლოგებმა ასევე იწინასწარმეტყველეს ძლიერი ბიძგები, რომლებიც თითქმის, მთელ სტამბოლს გაანადგურებდა. კიდევ უფრო ადრე, 2006 წელს, პროფესორმა ოკან ტუისუზმა, რომელიც მაშინ სტამბოლის ტექნიკური უნივერსიტეტის ევრაზიის გეომეცნიერებების ინსტიტუტის დირექტორი იყო, სტამბოლის ტერიტორიაზე დამანგრეველი მიწისძვრის გარდაუვალობაზე ისაუბრა.

დაბოლოს, მიმდინარე 23 აპრილს, სტამბოლში 6.2 მაგნიტუდის სიმძლავრის მიწისძვრა მოხდა. თურქეთის ხელისუფლების ცნობით, მსხვერპლი ან მნიშვნელოვანი ნგრევა არ არის, თუმცა 236 ადამიანი დაშავდა. სეისმოლოგები აცხადებენ, რომ საყურადღებო ბიძგები კვირების განმავლობაში გაგრძელდება.

საქართველოში უწყვეტი პროტესტის 150-ე დღისთვის, ამერიკელი კონგრესმენებისა და სენატორების ორპარტიული ჯგუფი ქართველი ხალხის მხარდამჭერ წერილს აქვეყნებს.

შესაბამისი განცხადება აშშ-ის ჰელსინკის კომისიის ვებ-გვერდზეა გამოქვეყნებული.

განცხადებაში აღნიშნულია, რომ “ქართული ოცნება” ქვეყანას იზოლაციაში აქცევს და საქართველოს რეპრესიის მომავლისთვის წირავს.

ამასთან, კონგრესმენებისა და სენატორების წერილში ნათქვამია, რომ თუ საქართველო გააგრძელებს ავტოკრატიისკენ სვლას, „ჩვენ დავკარგავთ მოკავშირეს, რომელიც ჩვენი საერთო უსაფრთხოებისა და დემოკრატიული ღირებულებების მყარად ერთგულია“.

ისინი მოუწოდებენ ტრანსატლანტიკურ პარტნიორებს, შეუერთდნენ საქართველოში თავისუფალი და სამართლიანი არჩევნებისა და ყველა პოლიტიკური პატიმრის გათავისუფლების მოთხოვნას.

“ხვალ საქართველოში მშვიდობიანი დემონსტრაციების ზედიზედ 150-ე დღეა, მათი ქვეყნის თავისუფლებისა და დამოუკიდებლობისადმი ქართველი ხალხის მყარი ერთგულების არაჩვეულებრივი გამოხატულება. ამაყი ვართ, გვერდში ვედგეთ ქართველ ხალხს, როდესაც ისინი უარს ამბობენ დაუთმონ თავიანთი დემოკრატიული მისწრაფებები არალეგიტიმურ რეჟიმს….

“ქართული ოცნება” ძალაუფლებას ებღაუჭება ქართველებისთვის უფლებებისა და თავისუფლებების ჩამორთმევით, რომლებიც ძვირფასია დემოკრატიული საზოგადოებებისთვის. დამოუკიდებელი მედიის, ოპოზიციური პოლიტიკური პარტიებისა და მშვიდობიანი დემონსტრანტების რეპრესირებით, “ქართული ოცნება” ქვეყანას იზოლაციაში აქცევს ტრანსატლანტიკური საზოგადოებისგან და საქართველოს რეპრესიის მომავლისთვის წირავს, რუსეთთან, ჩინეთთან და ირანთან კავშირში.

საქართველოს ცოცხალმა დემოკრატიულმა სულისკვეთებამ, თავის დროზე, ის რეგიონში იმედის შუქურა გახადა. თუ საქართველო გააგრძელებს ავტოკრატიისკენ სვლას, ჩვენ დავკარგავთ მოკავშირეს, რომელიც ჩვენი საერთო უსაფრთხოებისა და დემოკრატიული ღირებულებების მყარად ერთგულია. ამავდროულად, თავისუფლებისთვის ათწლეულების განმავლობაში ბრძოლის შემდეგ, ქართველებს რუსეთის მიერ კონტროლირებული ავტორიტარული მთავრობის პირობებში ტანჯვისთვის მივატოვებთ. ჩვენს ტრანსატლანტიკურ პარტნიორებს მოვუწოდებთ, შემოგვიერთდნენ საქართველოში თავისუფალი და სამართლიანი არჩევნებისა და ყველა პოლიტიკური პატიმრის გათავისუფლების მოთხოვნაში. ამის არგაკეთება არა მხოლოდ მილიონობით ქართველის იმედებსა და ოცნებებს უღალატებს, არამედ მნიშვნელოვნად შეამცირებს თავისუფალი, უსაფრთხო და აყვავებული სამხრეთ კავკასიის შესაძლებლობას.” - ნათქვამია წერილში.

წერილის ხელმომწერები არიან აშშ-ის ჰელსინკის კომისიის ორპარტიული წევრები: სენატორი როჯერ უიკერი (კომისიის თავმჯდომარე, რესპუბლიკური პარტია), კონგრესმენი ჯო უილსონი (კომისიის თანათავმჯდომარე, რესპუბლიკური პარტია), სენატორი შელდონ უაითჰაუსი (დემოკრატიული პარტია), კონგრესმენი სტივ კოენი (დემოკრატიული პარტია), კონგრესმენი რიჩარდ ჰადსონი (რესპუბლიკური პარტია) და სენატორი ჯონ კორნინი (რესპუბლიკური პარტია).

თუ უკრაინაში მიმდინარე ომთან დაკავშირებით შეთანხმებას ვერ მიაღწევენ, ტრამპი მზადაა, მომავალ კვირას სამშვიდობო მოლაპარაკებები დატოვოს. - ინფორმაციას The Times-ი ავრცელებს.

გამოცემა იუწყება, რომ ტრამპი აპირებს, მკაცრად დაუჭიროს მხარი იმ პირობებს, რომელთა მიხედვითაც რუსეთი უკრაინაში ოკუპირებულ ტერიტორიებზე კონტროლს შეინარჩუნებს.

სპეციალურ წარმომადგენელ სტივ ვიტკოფთან დაახლოებული წყაროების ცნობით, „ეს პოზიცია პირდაპირ ქვაზეა ამოკვეთილი“, - მოსკოვი დაკავებულ მიწებს შეინარჩუნებს.

„ტაიმს"-ი აღნიშნავს, რომ ტრამპი კიევზე სულ უფრო მეტ ზეწოლას ახდენს, რათა ზელენსკი აიძულოს, „იძულებითი მშვიდობის“ პირობებს დაეთანხმოს.

როგორც სტატიაშია ნათქვამი, აშშ-ის პრეზიდენტი მიიჩნევს, რომ უკრაინის ლიდერს „რეალური არჩევანი არ აქვს“ და ვიტკოფის მიერ შემოთავაზებულ გარიგებას უნდა დაეთანხმოს.

ტრამპმა ზელენსკი აშშ-უკრაინას შორის სასარგებლო წიაღისეულის შეთანხმების ჩაშლაში დაადანაშაულა.

„ზელენსკის ხელმძღვანელობით, უკრაინამ შეერთებულ შტატებთან იშვიათი მიწიერი ელემენტების შესახებ ძალიან მნიშვნელოვანი შეთანხმების საბოლოო დოკუმენტებს ხელი არ მოაწერა. ეს, სულ მცირე, სამი კვირით დაგვიანდა. იმედი მაქვს, რომ მას დაუყოვნებლივ მოაწერენ ხელს. რუსეთსა და უკრაინას შორის საყოველთაო სამშვიდობო შეთანხმებაზე მუშაობა შეუფერხებლად მიმდინარეობს. წარმატება, როგორც ჩანს, ჯერ კიდევ წინ არის!“ - დაწერა თეთრი სახლის ხელმძღვანელმა Truth Social-ში.

ამერიკელი უფლებადამცველი ვირჯინია ჯუფრე, რომელმაც წარსულში დიდი ბრიტანეთის პრინცი, ჰერცოგი ენდრიუ სექსუალურ ძალადობაში დაადანაშაულა, ავსტრალიაში მდებარე საკუთარ სახლში გარდაცვლილი იპოვეს, მან თავი მოიკლა. ამის შესახებ NBC News-ი ნათესავებზე დაყრდნობით იუწყება.

ვირჯინია ჯუფრე 41 წლის იყო.

პრინცი ენდრიუ დიდი ბრიტანეთის მეფე ჩარლზ III-ის ძმა და ელისაბედ II-ის ვაჟია. 2021 წელს ჯუფრემ მის წინააღმდეგ სარჩელი შეიტანა, სადაც ამტკიცებდა, რომ 2001 წელს, როდესაც თავად 17 წლის იყო, სამჯერ აიძულეს, ენდრიუსთან სექსი ჰქონოდა.

ჯუფრე ამტკიცებდა, რომ ის ამერიკელი ფინანსისტის, ჯეფრი ეპშტეინის მსხვერპლი გახდა, რომელიც პრინც ენდრიუსთან მეგობრობდა. ეპშტეინს სექს-ტრეფიკინგში წაუყენეს ბრალი. 2019 წელს, პატიმრობაში ყოფნისას, ეპშტეინმა თავი მოიკლა.

ბრალდების შემდეგ, პრინც ენდრიუს, რომელიც ბრალდებებს უარყოფდა, ჩამოერთვა სამხედრო წოდება და სამეფო მფარველობის მოვალეობები და სამეფო დაცვა. თუმცა, ჩარლზ III თავისი ძმისთვის კერძო დაცვის დაფინანსებას დათანხმდა.

2022 წლის თებერვალში პრინცმა ენდრიუმ ჯუფრესთან სასამართლოს გარეშე შეთანხმებას მიაღწია. ჰერცოგი ქალს საქველმოქმედო მიზნებისთვის „მნიშვნელოვან შემოწირულობას“ დაჰპირდა. ჯეფრემ შექმნა ფონდი „მსხვერპლები უარს ამბობენ დუმილზე“, რომელიც ძალადობით დაზარალებულებს ეხმარება. The Telegraph-ის ცნობით, პრინცი ადამიანის უფლებათა დამცველს, კომპენსაციის სახით, 16,2 მილიონი დოლარის გადახდას დაჰპირდა.

ყოფილმა დედოფალმა ელისაბედ II-მ ჯუფრის ფონდს 2 მილიონი ფუნტი სტერლინგი (დაახლოებით 2.7 მილიონი დოლარი) შესწირა მას შემდეგ, რაც პრინცმა ენდრიუმ სასამართლოს გარეშე შეთანხმებას მიაღწია.

აშშ-ის პრეზიდენტმა განაცხადა, რომ მოსკოვი და კიევი, შეთანხმების ხელმოწერის მიზნით, მაღალი დონის შეხვედრასთან ახლოს არიან.

„კარგი დღეა რუსეთთან და უკრაინასთან მოლაპარაკებებისა და შეხვედრებისთვის. ისინი ძალიან ახლოს არიან შეთანხმებასთან და ორივე მხარე ახლა ძალიან მაღალ დონეზე უნდა შეხვდეს „მოლაპარაკებისთვის“. ძირითადი პუნქტების უმეტესობა შეთანხმებულია. შეწყვიტეთ სისხლისღვრა ახლავე. ჩვენ იქ ვიქნებით, სადაც საჭიროა, რათა ხელი შევუწყოთ ამ სასტიკი და უაზრო ომის დასრულებას!“ ტრამპმა ამის შესახებ Truth Social-ში დაწერა, რომში რომის პაპ ფრანცისკეს დაკრძალვაზე ჩასვლისას.

მანამდე, ტრამპმა აღნიშნა, რომ რომში, პაპ ფრანცისკის დაკრძალვაზე ვიზიტის დროს, „შესაძლოა“, ზელენსკის შეხვდეს.

ამავდროულად უკრაინის პრეზიდენტმა საღამოს ვიდეომიმართვაში განაცხადა, რომ უახლოეს დღეებში, შესაძლოა, ძალიან მნიშვნელოვანი შეხვედრები გაიმართოს, რამაც უკრაინაში მშვიდობა უნდა მოიტანოს.

„ჩვენ გვჭირდება რეალური ზეწოლა რუსეთზე, რათა მათ მიიღონ ან ამერიკული წინადადება ცეცხლის შეწყვეტისა და მშვიდობისკენ სწრაფვის შესახებ, ან ჩვენი წინადადება, - ნებისმიერი წინადადება, რომელიც ნამდვილად იმუშავებს და უზრუნველყოფს საიმედო, დაუყოვნებლივ და უპირობო ცეცხლის შეწყვეტას, შემდეგ კი, მშვიდობისა და უსაფრთხოების ღირსეულ გარანტიებს. დიპლომატია უნდა მუშაობდეს. და ჩვენ ყველაფერს ვაკეთებთ იმისათვის, რომ დიპლომატია გახდეს ნამდვილად მნიშვნელოვანი და საბოლოოდ იმუშაოს.“ - წერს პრეზიდენტი.

ცენტრალური სადაზვერვო სააგენტოს დირექტორის მოადგილის, მაიკლ გლოსის ვაჟი, რომელიც რუსეთის არმიის რიგებს შეუერთდა, უკრაინაში დაიღუპა. ამის შესახებ რუსული ონლაინ გამოცემა „ვაჟნიე ისტორიი“ იტყობინება.

მაიკლის დედა, ჯულიან გლოსი, აშშ-ის საზღვაო ფლოტში სამსახურის შემდეგ, დაახლოებით 30 წლის განმავლობაში დაზვერვაში მუშაობდა. ბოლო ექვსი წელი მან კარიერა ცენტრალურ სადაზვერვო სააგენტოში (CIA) განაგრძო, სადაც 2024 წლის თებერვალში ციფრული ინოვაციების დირექტორის მოადგილე გახდა.

მაიკლის მამაც აშშ-ის საზღვაო ფლოტში მსახურობდა. ამჟამად ის კიბერუსაფრთხოების კომპანიაში მუშაობს, რომლის კლიენტებს შორის აშშ-ის და ნატო-ს სხვა ქვეყნების
თავდაცვის უწყებებია.

მაიკლ გლოსი „ჰიპი“ იყო და მონაწილეობდა კლიმატის ცვლილების საწინააღმდეგო საპროტესტო აქციებსა და აბორტის თავისუფლების მცარდამჭერ აქციებში. გარკვეული პერიოდის განმავლობაში, იგი კოლეჯში სწავლობდა, მაგრამ ვერ დაამთავრა და მოგზაურობა დაიწყო.

როგორც ჩანს, მან შეერთებული შტატები 2023 წლის ზამთარში დატოვა. გლოსი იტალიაში წავიდა, სადაც ფერმებში მუშაობდა. შემდეგ მაიკლმა ისრაელში შესვლა სცადა, დაჩაგრული პალესტინელი ხალხის უფლებებისთვის საბრძოლველად, მაგრამ მესაზღვრეებმა ის კვიპროსში გადაასახლეს. იქიდან მაიკლი „ცისარტყელას კლუბის“ ბალკანურ შეხვედრაზე წავიდა, რომელიც ომის საწინააღმდეგო და ჰიპური მოძრაობების არაფორმალური ასოციაცია იყო.

ბალკანეთის ნახევარკუნძულიდან, ახალგაზრდა ამერიკელი თურქეთში გაემგზავრა. იმ დროს მასთან ურთიერთობის მქონე პირები ამბობდნენ, რომ მაიკლ გლოსი ანტიამერიკულ პოზიციებს გამოხატავდა. მას სჯეროდა, რომ დასავლური ქვეყნების ჰეგემონია დასასრულს უახლოვდებოდა და მათ BRICS-ის ბლოკი შეცვლიდა.

გასული წლის აგვისტოში მაიკლ გლოსი რუსეთში აღმოჩნდა. მან მოინახულა ვლადიკავკაზი, ტაგანროგი, ვოლგოგრადი და მოსკოვი. სექტემბრის დასაწყისში მან სოციალურ ქსელში დაწერა, რომ ვიზა რამდენიმე დღეში ეწურებოდა და ვენაში ან ბრატისლავაში საცხოვრებლის ძებნა დაიწყო. თუმცა, უკვე 5 სექტემბერს, მაიკლ გლოსის სახელი მოსკოვის სამედიცინო მონაცემთა ბაზაში გამოჩნდა. უფრო მეტიც, მის საცხოვრებელ მისამართად მითითებულია რუსეთის არმიაში საკონტრაქტო სამსახურისთვის გაწვევის პუნქტი იაბლოჩკოვას ქუჩაზე.

მოგვიანებით, გლოსი სოციალურ ქსელ VKontakte-ზე ჰამზა ალის სახელით დარეგისტრირდა. იქ მან გამოაქვეყნა ვიდეო, სახელწოდებით „პუტინმა დამოუკიდებელი პალესტინის შექმნის აუცილებლობა გამოაცხადა“ და ასევე, - ვიდეო ისრაელიდან, რომელზეც გლოსმა შემდეგნაირი კომენტარი გააკეთა: „როგორ ესროლა ტანკებიდან ისრაელის თავდაცვის ძალებმა ისრაელელ მშვიდობიან მოსახლეობას კიბუც ბეერის რაიონში! ეს არის, რაც გვაქვს 7 ოქტომბრის მსხვერპლთა შესახებ სიმართლესთან ყველაზე ახლოს მდგომი სურათი."

არაუგვიანეს 2024 წლის 23 სექტემბრისა, სასწავლო ნაწილი, რომელშიც გლოსი მსახურობდა, სამხედრო ნაწილს გადაეცა.

ჟურნალისტები მის ერთ-ერთ კოლეგას ესაუბრნენ, რომლის თქმით, გლოსს სჯეროდა, რომ მას შეეძლო სასარგებლო ყოფილიყო ფრონტზე, საინჟინრო დანაყოფებში, რადგან კოლეჯში მშენებლობასა და ინჟინერიას სწავლობდა. თუმცა, როგორც ჩანს, გლოსი თავდასხმის რაზმში გაანაწილეს.

მაიკლ გლოსი 2024 წლის 4 აპრილს დაიღუპა. ამის შესახებ მისმა ოჯახმა ოფიციალურ ნეკროლოგში განაცხადა.

გარდაცვალების ზუსტი გარემოებები უცნობია. ჟურნალისტების ცნობით, რუსეთის ხელისუფლება ამერიკელის ოჯახს დაუკავშირდა და შეატყობინა, რომ ის უკრაინაში გარდაიცვალა.

მაიკლ გლოსი შეერთებულ შტატებში 2024 წლის 21 დეკემბერს დაკრძალეს.