ავსტრალიაში სნაიპერებმა შვეულმფრენებიდან, ხელისუფლების ბრძანებით, 700-ზე მეტი კოალა მოკლეს. - ინფორმაციას Sky News Australia ავრცელებს.

დასავლეთ ვიქტორიაში მდებარე „ბუჯ ბიმ“-ის ეროვნულ პარკში ასობით ცხოველი დაიღუპა. ხელისუფლებამ ეს გადაწყვეტილება მიიღო მარტში გაჩენილი ხანძრის შემდეგ, რომლის გამოც ბევრი კოალა მძიმედ დაშავდა, დეჰიდრატაცია განიცადა ან შიმშილის ზღვარზე იყო.

შტატის პრემიერ-მინისტრმა ჯასინტა ალანმა კოალების დახოცვას მხარი დაუჭირა და თქვა, რომ "ცხოველები ძალიან ცუდ მდგომარეობაში იყვნენ" და მათი მოკვლის გადაწყვეტილება "ყოველმხრივი შეფასების" შემდეგ იქნა მიღებული.

ამ ინციდენტს ქვეყნის მცხოვრებთა და ცხოველთა უფლებების დამცველთა მძაფრი რეაქცია მოჰყვა.

ცხოველთა დამცველი პარტიის დეპუტატმა ჯორჯ პერსელმა თქვა, რომ დახოცვამ შეიძლება ზიანი მიაყენოს ჩვილებს: „როდესაც ვერტმფრენებიდან ესვრით კოალაებს, არავინ ამოწმებს, ჰყავთ თუ არა მათ ჩვილი ჩანთაში“.

ესტონეთი რუსეთის საზღვართან სამხედრო ბაზას ააშენებს. - ინფორმაციას ERR-ი ავრცელებს.

ესტონეთის თავდაცვის ძალების გენერალური შტაბის უფროსის, გენერალ-მაიორ ვაჰურ კარუსის განცხადებით, სამხედრო ბაზა ნარვაში განთავსდება.

"ჩვენ მივცემთ ქალაქის მოსახლეობას მკაფიო სიგნალს ესტონეთის სახელმწიფოს არსებობის შესახებ. ნარვას მცხოვრებლები შეძლებენ შეეგუონ იმ ფაქტს, რომ სამხედროები მათი ყოველდღიური ქალაქური ცხოვრების ნაწილია და გარკვეული გაგებით, ეს ნაბიჯი იქნება დემონსტრირება იმისა, რომ ნარვა ესტონეთის განუყოფელი ნაწილია." - თქვა კარუსმა.

ნარვაში 200-250 კაციანი შენაერთი განთავსდება. ესენი იქნებიან აქტიური სამხედრო მოსამსახურეები, წვევამდელები და რეზერვისტები.

ცნობისთვის, 2021 წლის ესტონეთის აღწერის მიხედვით, ნარვაში 53 955 ადამიანი ცხოვრობს; ქალაქის მოსახლეობის 87.0% რუსია, რაც იმას ნიშნავს, რომ ესტონეთში მცხოვრები რუსების 14.9% ნარვას მკვიდრია.

თუ შეერთებული შტატების ხელმძღვანელობით მოლაპარაკებები ჩაიშლება, უკრაინა მომავალში უფრო უხერხულ მდგომარეობაში აღმოჩნდება და რუსეთისგან უფრო მკაცრი სამშვიდობო პირობების წინაშე აღმოჩნდება. ამის შესახებ აშშ-ს სახელმწიფო მდივანმა, მარკო რუბიომ განაცხადა.

ასევე, რუბიომ ჩრდილოატლანტიკური ალიანსის სამომავლო პერსპექტივაზეც ისაუბრა.

მისი თქმით, ნატო უნდა იყოს ნამდვილი თავდაცვითი ალიანსი და არა ალიანსი შეერთებულ შტატებსა და უმცროს პარტნიორებს შორის, რომლებიც არ ასრულებენ თავიანთ როლს.

აშშ აღარ შეიძლება იყოს ევროპის უსაფრთხოების გარანტი. ამის შესახებ პენტაგონის ხელმძღვანელმა პიტ ჰეგსეთმა განაცხადა.

„გავიდა დრო, როდესაც შეერთებული შტატები ევროპის უსაფრთხოების ერთადერთი გარანტი იყო.“ - აღნიშნა მან.

ომის დასასრულებლად, უკრაინამ თავისი ჯარები ლუგანსკის, დონეცკის, ზაპოროჟიესა და ხერსონის ოლქებიდან უნდა გაიყვანოს. ამის შესახებ დმიტრი პესკოვმა Le Point-თან ინტერვიუში განაცხადა.

ასევე, კრემლის პრეს-სპიკერის თქმით, ტრამპისა და პუტინის შეხვედრისთვის მოსამზადებელი სამუშაოები მიმდინარეობს.

პესკოვის განცხადებით, „პუტინი პატივს სცემს ტრამპს და ისინი თანხმდებიან, რომ დიალოგზე უარის თქმა აბსურდია“.

Le Point-თან ინტერვიუში პუტინის პრეს-მდივანმა ასევე აღნიშნა, რომ ტრამპს უკრაინაში ცეცხლის შეწყვეტის დამყარების ვადა არ დაუდგენია და რუსეთიც არ მიიჩნევს მიზანშეწონილად ვადების დაწესებას.

რამზან კადიროვის ვაჟი, 17 წლის ადამი, ჩეჩნეთის უშიშროების საბჭოს მდივანი გახდა. ამის შესახებ უწყების ოფიციალური ვებ-გვერდი იტყობინება.

როგორც Kavkaz.Realii-მ აღნიშნა, ეს უკვე ადამ კადიროვის მეექვსე პოზიციაა.

იგი ასევე არის გუდერმესში მდებარე ეგრეთ წოდებული სპეცდანიშნულების უნივერსიტეტის კურატორი, ხელმძღვანელობს თავდაცვის სამინისტროს ორ ბატალიონს, რესპუბლიკის შინაგან საქმეთა სამინისტროს მთელ სტრუქტურას და მამის უსაფრთხოების სამსახურს.

ევროპა არ დაუჭერს მხარს მშვიდობას უკრაინის ტერიტორიული მთლიანობის პატივისცემის გარეშე.

ამის შესახებ AFP-ი საფრანგეთის პრეზიდენტ ემანუელ მაკრონის კანცელარიის განცხადებაზე დაყრდნობით წერს.

ტრამპი უკრაინას არ სთხოვს ყირიმის რუსეთის ნაწილად აღიარებას. ამის შესახებ თეთრი სახლის პრეს-მდივანმა კეროლაინ ლევიტმა განაცხადა.

"არავის უთხოვია მათთვის (რედ: უკრაინისთვის) ამის შესახებ (ყირიმის რუსეთის ფედერაციის ნაწილად აღიარება). ის (ტრამპი) სთხოვს ხალხს, დასხდნენ მოლაპარაკებების მაგიდასთან." - აღნიშნა მან.

ამასთანავე, ლევიტმა განაცხადა, რომ ვოლოდიმირ ზელენსკი პრესის საშუალებით ცდილობს სამშვიდობო მოლაპარაკებების წარმოებას. "ეს მიუღებელია, მოლაპარაკებები დახურულ კარს მიღმა უნდა წარიმართოს." - თქვა თეთრი სახლის პრეს-მდივანმა.

„პრეზიდენტის (ტრამპის) ეროვნული უსაფრთხოების გუნდმა, მისმა მრჩევლებმა მნიშვნელოვანი დრო, ენერგია და ძალისხმევა დახარჯეს ამ ომის დასასრულებლად. ამერიკელმა გადასახადის გადამხდელებმა გადაიხადეს (...) ამ ძალისხმევისთვის. საკმარისია.

პრეზიდენტი ტრამპი იმედგაცრუებულია. მისი მოთმინება იწურება. მას სურს, გააკეთოს ის, რაც სწორია მსოფლიოსთვის. მას სურს, დაინახოს მშვიდობა. მას სურს, შეაჩეროს მკვლელობები. მაგრამ იმისათვის, რომ ეს მოხდეს, კონფლიქტის ორივე მხარე მზად უნდა იყოს ამისათვის.“ - აღნიშნა ლევიტმა.

უკრაინაზე სარაკეტო თავდასხმა მიმდინარეობს. განგაში მთელი ქვეყნის მასშტაბით გამოცხადდა.

კიევის დაბომბვის შედეგად, დაიღუპა ორი და დაშავდა 54 ადამიანი. ნანგრევების ქვეშ, შესაძლოა, ხალხი იყოს.

კიევის მერის ცნობით, კიევში 21 ადამიანი ჰოსპიტალიზებულია.

ცნობილია, რომ მათ შორის სამი ბავშვი და ორსული ქალია.

აფეთქებები ისმოდა ხარკოვშიც.

საჰაერო სივრცეში აღმოჩენილია რუსული "კალიბრის" სისტემის რაკეტები. გარდა ამისა, მონიტორინგის არხებმა განაცხადეს Tu-95MS ბომბდამშენების აფრენის შესახებ.

უკრაინის შეიარაღებული ძალების ცნობით, უკრაინის საჰაერო სივრცეში ახალი რაკეტები შედიან - სამხრეთიდან სამხრეთ-დასავლეთისკენ, აღმოსავლეთიდან - სუმის ოლქში.

მონიტორები იუწყებიან რაკეტა "კინჯალ"-ის მატარებელი MiG-31K-ის თავდასხმის შესახებაც.

ხარკოვზე რუსების თავდასხმის შედეგად, ქალაქის თავზე კვამლი ამოდის.

ხარკოვის მერის, იგორ ტერეხოვის ცნობით, ქალაქს 19-ჯერ დაარტყეს. დაბომბვა განხორციელდა 7 ფრთოსანი რაკეტიდან და 12 „შაჰედ"-ის ტიპის კამიკაძე-დრონიდან. მალევე, ხარკოვში აფეთქებების ხმა კვლავ გაისმა.

ამ დროისთვის ცნობილია, რომ დაშავდა ორი ადამიანი.

ტრამპის თქმით, ლონდონის მოლაპარაკებებმა "კარგად ჩაიარა".

მან ასევე თქვა, რომ არც უკრაინის პრეზიდენტი ვოლოდიმირ ზელენსკი და არც რუსეთის ლიდერი ვლადიმირ პუტინი არ არიან მისი ფავორიტები და მას უბრალოდ, „სურს ომის დასრულება“.

"თუ ორივე კმაყოფილი იქნება, ორივე მოაწერს ხელს შეთანხმებას, მე არ მყავს ფავორიტები. არ მინდა მყავდეს ფავორიტები. მინდა, რომ გარიგება შედგეს." - თქვა ტრამპმა.

🔴 ლაშა ჩხარტიშვილი დაკავების მოლოდინშია – შსს-მ პატიმრობის შუამდგომლობით სასამართლოს მიმართა

🔴 როგორია სასამართლოში დაშავებული გურამ ღონღაძის ჯანმრთელობის მდგომარეობა?

🔴 ნიუ ჯერსიში მასშტაბურ ტყის ხანძარს ებრძვიან

👉ახალ ამბებს ქეთი გაბრიაძე გაგაცნობთ👇

https://heretifm.com/akhali-ambebi-09-00-saathze-638/

#ახალიამბები

დაპირისპირება თეთრ სახლში: მასკი და ბესენტი საგადასახადო სამსახურის გამო იბრძვიან

თეთრ სახლში აშშ-ის მთავრობის ეფექტურობის დეპარტამენტის (DOGE) ხელმძღვანელ ილონ მასკსა და ფინანსთა მინისტრ სკოტ ბესენტს შორის კონფლიქტი გაჩაღდა. Axios-ის ცნობით, დაპირისპირება მაღალი თანამდებობის პირებისა და პრეზიდენტ ტრამპის თანდასწრებით დაიწყო.

უთანხმოება აშშ-ს საგადასახადო სამსახურმა გამოიწვია. წყაროების თანახმად, ბესენტმა მასკი გადაჭარბებულ დაპირებებსა და სამთავრობო ხარჯების არაეფექტურ შემცირებაში დაადანაშაულა. საპასუხოდ, მასკმა მინისტრს „სოროსის აგენტი“ უწოდა და საინვესტიციო კომპანიის მართვის ჩავარდნა დააბრალა.