რუსეთის სახვითი ხელოვნების აკადემიის პრეზიდენტს, მხატვარს, მოქანდაკესა და არქიტექტორ ზურაბ წერეთელს საქართველოში 23 აპრილს ჩამოასვენებენ, სამოქალაქო პანაშვიდი კი, 24-25 აპრილს გაიმართება.

ზურაბ წერეთელს 26 აპრილს დიდუბის პანთეონში მეუღლის, ინესა ანდრონიკაშვილის გვერდით დაკრძალავენ.

რუსული მედიის ცნობით, მას მოსკოვში 23 აპრილს გამოემშვიდობებიან, ცერემონია კი, მაცხოვრის ტაძარში შედგება.

ზურაბ წერეთელი 91 წლის ასაკში, 22 აპრილს, საკუთარ ბინაში გარდაიცვალა. ამის შესახებ რუსული მედია წერს.

წერეთელი ხუთიათასზე მეტი ნამუშევრის ავტორია. მათ შორის, მისი შექმნილია 35-მეტრიანი, ბრინჯაოს მოოქრული წმინდა გიორგის მონუმენტი, რომელიც 2006 წლის 23 ნოემბერს თავისუფლების მოედანზე აღმართეს და მონუმენტი "საქართველოს მატიანე" თბილისის ზღვასთან.

ზურაბ წერეთლის ნამუშევრებს შორის არის ასევე, მისი ახლო მეგობრისა და მოსკოვის ყოფილი მერის ქანდაკება "იური ლუჟკოვი, როგორც სპორტსმენი"; ასევე, ვლადიმირ პუტინის სკულპტურა, რომელიც წლების განმავლობაში, მისი სახლის ეზოში იდგა. თუმცა, თავად ავტორი ჯიუტად ამბობდა, რომ ეს არა პუტინის ქანდაკება, არამედ არის სკულპტურა, სახელწოდებით "ჯანსაღ სხეულში ჯანსაღი სულია".

სტამბოლში მომხდარი მიწისძვრის შედეგად, 151 ადამიანი დაშავდა. ამის შესახებ მედია რეგიონულ ხელისუფლებაზე დაყრდნობით იუწყება.

საუბარია შემთხვევებზე, როდესაც პანიკაში მყოფი ადამიანები დიდი სიმაღლიდან ხტებოდნენ. ისინი საავადმყოფოში გადაიყვანეს, მათ სიცოცხლეს საფრთხე არ ემუქრება. მსხვერპლი არ ყოფილა.

ამავდროულად, დღევანდელი მიწისძვრების შემდეგ, თურქმა სეისმოლოგმა ნაჯი გერურმა განაცხადა, რომ მოსალოდნელია განმეორებითი ბიძგები, რომელმაც შეიძლება, 7.0 მაგნიტუდას მიაღწიოს.

"მიწისძვრა მოხდა კუმბურგაზის რღვევის ზონაში. ეს ნაპრალი იბლოკება და ენერგიას აგროვებს. დროდადრო, მცირე მიწისძვრებს იწვევს... ფრთხილად უნდა ვიყოთ. კუმბურგაზის რღვევა სტრესის ქვეშაა.“ - წერს ის თავის X-ანგარიშში.

სტამბოლში მოსალოდნელი მიწისძვრების შესახებ, გერური ჯერ კიდევ 2023 წლის თებერვალში აცხადებდა, მას შემდეგ, რაც ქვეყნის სამხრეთში სეისმურმა კატასტროფამ 50 000-ზე მეტი ადამიანის დაღუპვა გამოიწვია.

‼️ გიორგი ბაჩიაშვილის ლიკვიდაციის საფრთხე — ადვოკატები საჯარო განცხადებას ავრცელებენ

⚠️ ადვოკატები აცხადებენ, რომ თანაინვესტირების ფონდის ყოფილი დირექტორი გიორგი ბაჩიაშვილი საფრთხის წინაშეა.

მათი თქმით, საქმე ეხება შეთქმულებასა და ფიზიკური ლიკვიდაციის შესაძლო მცდელობას, რის გამოც დაცვის მხარე საერთაშორისო გამოძიების დაწყებას და დაცვის მექანიზმების გააქტიურებას მოითხოვს.

💬 „ჩვენი დაცვის ქვეშ მყოფი პირის სახიფათო სიტუაციიდან გამომდინარე, ბ-ნი ამსტერდამის იურიდიულ გუნდს სხვა გზა არ აქვს, გარდა იმისა, რომ ეს განცხადება გაავრცელოს და მოუწოდოს სამართალდამცავ ორგანოებს საერთაშორისო დონეზე, უზრუნველყონ ბატონი ბაჩიაშვილის დაცვა და გამოიძიონ ისინი, ვინც ამ სავარაუდო შეთქმულების უკან დგანან“ — ნათქვამია განცხადებაში.

📌 დამატებითი დეტალები ამ ეტაპზე არ საჯაროვდება, თუმცა დაცვის მხარე აცხადებს, რომ ბაჩიაშვილის ფიზიკური უსაფრთხოება რეალურად საფრთხის ქვეშაა.

📍 პრეისტორია:

2024 წლის 4 მარტს, გიორგი ბაჩიაშვილმა, რომელიც წარსულში ბიძინა ივანიშვილის მჭიდრო მოკავშირე იყო, განაცხადა, რომ საფრთხის გამო იძულებული გახდა ქვეყანა დაეტოვებინა.

„უდიდესი წუხილით და უსამართლობის განცდით ვაცხადებ საქართველოდან ჩემი იძულებითი წასვლის შესახებ“, — წერდა ის ფეისბუქზე.

მისი ინფორმაციით, მას აკრძალული ჰქონდა ქვეყნის დატოვება და ჩამორთმეული ჰქონდა საქართველოსა და რუსეთის მოქალაქის პასპორტები. უცნობია, სად და რა გზით დატოვა ქვეყანამ.

ბაჩიაშვილი წერდა, რომ ჰქონდა „სანდო ინფორმაცია“ მის სიცოცხლესთან დაკავშირებულ რეალურ საფრთხეებზე, რაც, მისი თქმით, „დღევანდელ საქართველოში შეიძლება სასიკვდილო აღმოჩნდეს“.

გიორგი ბაჩიაშვილს ბრალად ედება ორი საქმე:

▪️ ბიტკოინის მითვისების საქმე, რომელშიც პროკურატურა ივანიშვილის მიმართვით მას 39 მილიონ დოლარზე მეტი ოდენობის კრიპტოვალუტის მითვისებას ედავება

▪️ „მტკვარი ჰესის“ საქმე, რომელშიც მას ბრალი წარედგინა 2025 წლის 25 თებერვალს

ბაჩიაშვილს ორივე შემთხვევაში გირაო შეეფარდა:

🔸 2.5 მილიონი ლარი — ბიტკოინის საქმეზე
🔸 50,000 ლარი — ჰესის საქმეზე

„ივანიშვილის რეჟიმი სამართლისა და დემოკრატიის პრინციპებიდან სრულიად გავიდა. ჩემი წასვლა არა უკან დახევა, არამედ ერთადერთი საღი გამოსავალია,“ — წერდა ბაჩიაშვილი.

#გიორგიბაჩიაშვილი #ლიკვიდაციისსაფრთხე #ბიძინაივანიშვილი #თანაინვესტირებისფონდი #პოლიტიკურიდევნა #საერთაშორისოგამოძიება #პროკურატურა #ბიტკოინისმიტაცება #მტკვარიჰესი #გირაო #დემოკრატიისკრიზისი #საქართველო2025 #სამართლიანობაზემესჯელობა

ვწუხვართ, რომ საქართველო ევროპულ გზას შორდება. ქართველ ხალხს მათი მთავრობის გადაწყვეტილებებში არ ვადანაშაულებთ. ამის შესახებ პოლონეთის საგარეო საქმეთა მინისტრმა, რადოსლავ სიკორსკიმ პოლონეთის პარლამენტის (სეიმის) წინაშე სიტყვით გამოსვლის დროს განაცხადა.

“უკრაინის წინააღმდეგ რუსეთის ომის შედეგი მომავალი წლებისთვის განსაზღვრავს ჩვენი რეგიონის უსაფრთხოებას. ის განსაზღვრავს, მაგალითად, საბოლოოდ ჩაეფლობა თუ არა ბელარუსი “რუსკი მირში”, თუ მოახერხებს თავისი ავტონომიის ბოლო ნაკუწების შენარჩუნებას. ის ასევე ამოსავალი წერტილი იქნება მოლდოვის, საქართველოსა და სომხეთის ევროპული მისწრაფებებისთვის…

ვწუხვართ, რომ საქართველო ევროპულ გზას შორდება. ქართველ ხალხს მათი მთავრობის გადაწყვეტილებებში არ ვადანაშაულებთ. რეპრესიებისთვის პასუხისმგებელ პირებს სანქციები დავუწესეთ. თუმცა, [ევროპული] საზოგადოების წევრობა პრივილეგიაა, არა ვალდებულება. ეს გააზრებული გადაწყვეტილებაა, რომელსაც ქვეყანა და მისი თავისუფალი მოქალაქეები იღებენ.” - განაცხადა სიკორსკიმ.

ჩვენ უკრაინაში დაუყოვნებლივ, სრულ და უპირობო ცეცხლის შეწყვეტას ვითხოვთ. ამის შესახებ უკრაინის პრეზიდენტი ვოლოდიმირ ზელენსკი სოციალურ პლატფორმა X-ში წერს.

„ეს ზუსტად ის წინადადებაა, რომელიც მიმდინარე წლის 11 მარტს აშშ-მა წამოაყენა. ეს შესაძლებელია, მაგრამ მხოლოდ იმ შემთხვევაში, თუ რუსეთი ამას დათანხმდება და მკვლელობებს შეწყვეტს. ჩვენ ცეცხლის დაუყოვნებლივ შეწყვეტისთვის მზად ვართ და ეს არაერთხელ განვაცხადეთ. ადამიანების სიცოცხლის შენარჩუნება ყველა პარტნიორისთვის მთავარი პრიორიტეტი უნდა იყოს.“ - წერს ვოლოდიმირ ზელენსკი.

მისი თქმით, უკრაინა ნებისმიერ ფორმატში მონაწილეობაზეა თანახმა, რომელიც „ცეცხლის შეწყვეტისა და რეალური მშვიდობის მიღწევას“ გამოიწვევს.

„ჩვენს პარტნიორებთან შეხვედრა პარიზში უკვე იყო. დღეს მოლაპარაკებები ლონდონში გრძელდება. მკვლელობების დასრულება ნომერ პირველი პრიორიტეტია. ყველას მადლობელი ვარ, ვინც ამ მიზნის მიღწევისკენ ისწრაფვის და გვეხმარება, რომ ომი დავასრულოთ.“ - აღნიშნავს უკრაინის პრეზიდენტი.

ზელენსკის განცხადება ყირიმის რუსულად იურიდიულად არაღიარების შესახებ, "ძალიან საზიანოა" რუსეთთან სამშვიდობო მოლაპარაკებებისთვის. ამის შესახებ დონალდ ტრამპმა განაცხადა.

მან ასევე თქვა, რომ "უკრაინის მდგომარეობა საშინელია".

"ზელენსკი The Wall Street Journal-ის პირველ გვერდზე იკვეხნის, რომ „უკრაინა ლეგალურად არ აღიარებს ყირიმის ოკუპაციას. აქ სალაპარაკო არაფერია".

ეს განცხადება ძალიან საზიანოა რუსეთთან სამშვიდობო მოლაპარაკებებისთვის, რადგან ყირიმი მრავალი წლის წინ დაიკარგა პრეზიდენტ ობამას ეგიდით და განხილვის საგანიც კი არ არის. არავინ სთხოვს ზელენსკის ყირიმის რუსეთის ტერიტორიად აღიარებას, მაგრამ თუ მას ყირიმი უნდა, რატომ არ იბრძოდნენ ამისთვის 11 წლის წინ, როცა ის რუსეთს გადასცეს გასროლის გარეშე? ამ რაიონში ასევე მდებარეობდა მსხვილი რუსული წყალქვეშა ბაზები მრავალი წლის განმავლობაში, "ობამას მიერ გადაცემამდე".

სწორედ ზელენსკის მსგავსი წამქეზებელი განცხადებები ართულებს ამ ომის დარეგულირებას. მას არაფერი აქვს საამაყო! უკრაინის მდგომარეობა მძიმეა. მას შეუძლია ჰქონდეს მშვიდობა, ან შეუძლია, იბრძოლოს კიდევ სამი წელი, სანამ მთელ ქვეყანას დაკარგავს. მე არაფერი მაქვს საერთო რუსეთთან, მაგრამ ბევრი რამ მაქვს საერთო იმის სურვილთან, რომ გადავარჩინო კვირაში საშუალოდ ხუთი ათასი რუსი და უკრაინელი ჯარისკაცი, რომლებიც უმიზეზოდ იღუპებიან.

ზელენსკის დღევანდელი განცხადება, „მკვლელობის ველის“ გახანგრძლივების გარდა, სხვა არაფერს გააკეთებს და ეს არავის უნდა! ჩვენ ძალიან ახლოს ვართ გარიგებასთან, მაგრამ კაცმა, რომელსაც "სათამაშო კარტი არ აქვს", ახლა საბოლოოდ უნდა გააკეთოს ეს. მოუთმენლად ველი შესაძლებლობას, რომ დავეხმარო უკრაინას და რუსეთს, გამოვიდნენ ამ სრული, ტოტალური უწესრიგობიდან, რომელიც არასდროს დაიწყებოდა, მე რომ პრეზიდენტი ვყოფილიყავი!” - წერს დონალდ ტრამპი სოციალურ ქსელში.