حط في دماغك كويس جدًا إنك مش مطلوب منك تنافس حد .. ولا تقارن نفسك بأي شخص مهما كان في تشابه بينكم.

لما بنتكلم عن رمضان إنه سباق بيكون مجرد دلالة معنوية لحث النفس على السعي في طريق الله عز وجل .. لكن عمره ما كان معناه إنك تحاول تعرف طريقة سعي كل واحد وتقارنه بنفسك أو بطريقة سعيك .. قارن نفسك بنفسك .. قارن عمل النهاردة بعمل امبارح .. حالك القلبي في صلاة الظهر بحالك في صلاة الفجر مثلا .. استغلالك للساعتين اللي بعد العصر قارنهم بالتلات ساعات اللي بعد الظهر .. حتى لو هتقارن الدقيقة دي بالدقيقة اللي فاتت.

لكن ماتقارنش صلاتك بصلاة حد كما ولا كيفًا .. ماتركزش مع اللي جنبك في صلاة التراويح وتقارن خشوعه - فيما يبدو لك- بعدم تركيزك .. ماتحاولش تشوف خيط المصحف عند حد من أسرتك وصل فين لمجرد إنك تقول لنفسك إنه أحسن منك وسبقك في الختمة .. ليه بقول الكلام دا؟

لأن كل واحد ظروفه مختلفة .. وطبيعة يومه وتنظيمه ليه مختلف .. والعبادات اللي ربنا سبحانه وتعالى فاتحها على كل واحد فينا بردو مختلفة .. أعرف ناس على مقدرة تبارك الله يختموا في رمضان ١٠ ختمات بمنتهى اليسر ومايقدروش يصلوا قيام يتجاوز الساعة مثلا .. وعلى النقيض أعرف ناس القيام اللهم بارك متيسر معاهم لدرجة إنهم بيقيموا أكتر من نص الليل في رمضان .. وأكتر من مرة ممكن يجيبوا الجزء على ركعتين بس تبارك الله .. ومايقدروش يصبروا على طاعة الصيام تماما وممكن النهار كله يروح وهم مش بيعملوا أي حاجة أو نايمين .. وأعرف نماذج كتير عَ نفس النمط.

عشان كدا لازم تعرف إنك لو ماكنتش بتنتظم عَ السنن الرواتب وبدأت في رمضان تنتظم بفضل الله وخرجت بعد رمضان ثابت عليها .. دا كفاية يثبتلك إنك فزت برمضان .. لو ماكنش ليك ورد تدبر ثابت وبقا ليك وطلعت من رمضان وإنت مكمل بفضل الله .. دا كفاية.

بلاش مثالية في التعامل مع رمضان .. رمضان موسم تستغله قدر المستطاع ولو بطاعة واحدة ماكنتش بتقدر تعملها أو تكمل فيها .. وربنا أعانك عليها في رمضان وقدرت بحول الله وقوته تثبت عليها بعد رمضان إن شاء الله .. وتبقى أساسية بالنسبة لك .. إنت كدا تبقى كسبان.

هون علىٰ نفسك.

#مشروع_قدسية

كل أخت بتوهم نفسها إن أهلها ممكن يموتوها لو لبست الزي الشرعي ..كل أخت بتلبس شيء لا يُرضي الله عز وجل علشان ترضي أهلها ( لو محضرتش الفرح _ لو مقلعتش النقاب اليوم الفلاني _ لو ملبستيش زي مشعارفه مين _ لو مقعلتيش الخمار في الشبكه ..إلخ إلخ إلخ

تعرفي خالد بن سعيد بن العاص رضي الله عنه .. !!

عارفه أسلم إزاي !

إسلامه كان بسبب رؤيا رآها ..أول ما النبي صلى الله عليه وسلم ..ظهر ..

رأي كأنه واقف علي شفير النار ، وفي حد بيدفعه فيها ، والنبي صلى الله عليه وسلم يلتزمه لئلا يقع ، ووقتها فزع من نومه ، وكان عارف إن الرؤيا دي حق ، فحكها لسيدنا أبي بكر رضي الله عنه

فقال له : أُريد الله بك خيرًا ..هذا رسول الله صلي الله عليه وسلم فاتبعه ، فذهب إليه وأسلم .

كل دا حلو ..وجميل ..لكن إلا مش عادي مدي المعاناه إلا شافها بعد كدا في سبيل إنه يثبت علي كلمه الحق !

طبعًا أخفي إسلامه خوفًا من أبيه ، لكن أباه علم لما رأي كثره تغيبه عنه ، فبعث إخواته (لم يكونوا قد أسلموا بعد )

فجيء به ، فأنَّبه وضربه بمقرعه أو عصا كانت في يده حتي كسر ها علي رأسه ..!!

ثم حبسه بمكه ، ومنع إخواته من الكلام معه ، وحذرهم من عمله ، ثم ضيق عليه الخناق فأجاعه ، وقطع عنه الماء ثلاثه أيام ، وهو صابر محتسب ..

ثم قال أبوه : واللهِ لأمنعنك القوت
فرد خالد : إن منعتني فإن الله يرزقني ما أعيش به ، وانصرف إلي رسول الله صلى الله عليه وسلم فكان يكرمه ، ويكون معه ، ثم رأي أنه يهاجر إلي الحبشه مع من هاجر إليها من المسلمين في المره الثانيه ..

هذه جزء من تضيحاتهم علشان الدين ...! أين تضحيتك .. !

كل ما تضحي كل ما هيعلي قدرك عند الله عز وجل علي قدر التضيحه ..تأتي النتيجه !

أهلك أنتِ قطعه من قلوبهم محدش فيهم هيأذيكي ..بالشكل إلا ممكن يوهمك بيه الشيطان .

كل ما يمر علينا ..

ونقرأه قدر وليس صدفه الله عز وجل قدر لكِ هذا أسألك باللهِ أنا واللهِ لكِ ناصح أمين أسألك بالله أن تخشي علي نفسك من الوقوف بين يدي الله عز وجل بحجه فارغه !

قدمي عذر يرضاه الله منك
ويرضاه منكِ رسول الله صلى الله عليه وسلم

هل سنكون ممن سيقبل عليهم أم ممن سيعرض عنهم ويقول " سحقًا سحقًا "

ألم الكلمه وألم تخيل الموقف يجعلك تسعي جاهده لفعل شيء يُرضي الله عز وجل عنكِ .

بالله لا تقولي أهلي الكل سيحاسب وحده لن يأتي أحد ويدافع عنك أمام الله عز وجل قالها النبي صلى الله عليه لفاطمه رضي الله عنها

" يا فاطمه لن أغني عنكِ من اللهِ شيئًا "

#مشروع_قدسية

فقررت أجاهد للمرة السادسة إن أشغل أغلب أوقاتي بسماع القرآن .. وأنا لسة صاحية بروح مشغلة قرآن بصوت عالي عَ ما أقوم وأتوضي وأحضر حاجتي للكلية .. وأنا ماشية في الشارع أو وأنا بتمشي جوا الجامعة نفسها بين المحاضرات .. وأنا راجعة في العربية مجهدة وماعنديش طاقة أعمل حاجة .. وأنا بحضر حاجتي في الأوضة للمذاكرة .. وأنا بنقل المحاضرات للكشكول وبرتبها ومش محتاجة تركيز أوي .. وأنا فاتحة نت وبراسل الناس .. وفي أي وقت الهاند فري في ودني .. ومجرد ما ألاقي مافيش فرصة إني أعمل حاجة محتاجة تركيز جامد أدوس على الهاند وأكمل سماع قرآن.

لاحظت مع الوقت بقا فيه بركة عجيبة في يومي .. وبدأت العصبية تقل تمامًا في تعاملي مع كل اللي أعرفهم وأولهم أهلي بفضل الله .. ولاحظت توفيق في إتمام المهام جدا ببركة القرآن .. غير قراءتي اللي اتحسنت كتير .. وسبحان الله فُتِح عليا في فهم القرآن من وقتها أضعاف ما كان قبلها .. وبقا ممكن رصيد السماع اليومي يصل لأكتر من ٥ أجزاء الحمد لله .. بعد ما كنت في الأول بختم كل شهرين .. بقيت أختم سماع كل أسبوع تقريبًا بفضل الله.

وجت تحكيلي من إنها أصابها إحباط شديد من أول رمضان .. عشان كانت متحمسة لصحبة القرآن في رمضان جدا .. وحاضت في أول يوم فكل تخطيطها للقيام فشل كدا .. فذكرتها إنها من سنتين لما شافت مقطع لختم القرآن في سبع ساعات ونصف اتفاجئت وقالتلي : هو ممكن حد يقعد يسمع قرآن المدة دي كلها .. أنا لو قعدت أسمع أكتر من نص ساعة هبقا نمت.

فنصحتها تقيم الليل بسماع القرآن .. وتشوف إذا كانت تقدر تسمع السبع ساعات ونص ولا لأ .. وتحكيلي مشاعرها بعدها .. والنهاردة بعتتلي :

حبيت أفرحك إن من أول رمضان لحد النهاردة ختمت المقطع ٧ مرات سماع بفضل الله .. يعني كل يوم ختمة الحمد لله.

كنت ببدأ من بعد المغرب ع الساعة ٧ .. وبخلص ع ميعاد السحور الساعة ٣ مثلا .. وباقي اليوم بشوف اللي ورايا براحتي.

- مش عارفة أعلق أقول إيه بصراحة .. غير إن أنقل التجربة بكل تفاصيلها.

#مشروع_قدسية

الدروس اللي ذكرت في المنشور :

• درس د.أحمد عبدالمنعم عن كيفية معايشة سورة من كتاب الله عز وجل.

• فيديو تلخيص في دقائق للخطوات.

• درس م/ علاء حامد بعنوان صاحبي القرآن.

• درس الشيخ محمد خيري عن مصاحبة القرآن في رمضان

• مقطع ختم القرآن الكريم سماعًا في سبع ساعات ونصف.

لا أنصح به غير الخاتمين لكتاب الله عز وجل .. لأنه بطريقة الحدر .. ولا أحبذها لمن لم يتقن الترتيل أولًا.

#مشروع_قدسية

راقت لي^^
#مشروع_قدسية

خلينا نستغل التهاب الأحداث وندل الناس علي مصادر يفهموا منها اللي بيحصل ويكونوا علي وعي بالقضية الفلسطينية عشان مش يومين وتلاتة والمسلمين يناموا تاني ..

استغلوا الأحداث دي وفوقوا للقضية وانشغلوا بيها .. ابحثوا واقرأو واعرفوا إيه اللي بيحصل وازاي نواجهه وإيه دورك في الموضوع .. لازم تخلي ليك وقت حتي لو أسبوعي تقرأ فيه أو تسمع عن أمتك .. النبي صلي الله عليه وسلم قال « من لم يهتم بأمر المسلمين فليس منهم » .. دول إخواتنا .. لحمنا ودمنا .. لازم نفهم ازاي ننصرهم ودا مش هنعرف نعمله غير بعد وعي لأبعاد القضية ..

حالا هات ورقة وقلم وحدد هتختار كتاب إيه أو درس إيه هتبدأ تتعرف علي تاريخ أمتك من خلاله .. وحدد وقت ثابت من اللحظة دي .. وخليها عادة ليك أسبوعيا .. دلوقتي فلسطين وبعدها هات تاريخ الأندلس عشان التاريخ بيعيد نفسه .. وبعدها ابدأ شوف إيه اللي بيحصل في سوريا وبورما والشيشان والإيغور والمسلمين في كل مكان ..

انشروا البوست دا في كل مكان وخلي شباب الأمة يفوقوا .. لعل حد يشوف عن طريقك ويفوق وهو اللي يفتح الأقصي علي إيده .. جاهدوا معهم ما استطعتم.

بوست تلخيص لقصة فلسطين:
https://t.me/Mashro3_kodoseiia/3674
كتب ودروس وسلاسل عن قضية فلسطين:
https://t.me/Sawteyyat_Mashro3_Kodoseyya/3739
#مشروع_قدسية