ព្រឹកថ្ងៃទី១៤ ខែសីហា ឆ្នាំ២០២៥ ខ្ញុំបាទ រួមជាមួយអភិបាលរងខេត្ត អភិបាលស្រុក និងក្រុមការងារ បានចុះសួរសុខទុក្ខ និងនាំយកអំណោយ ថវិកាឧបត្ថម្ភជូនក្មួយស្រី ទន ម៉ីសៀង អាយុ១១ឆ្នាំ និងក្មួយស្រី ទន ម៉ារីណា អាយុ៨ឆ្នាំ ដែលត្រូវជាកូនៗរបស់វីរកងទ័ពលោក ចែ ម៉ាញ និងលោកស្រី ភួង ស្រីណាក់ ជាកងកម្លាំងនៅអង្គភាពវរៈ២ កងពលតូចអន្តរាគមន៍លេខ១ ដែលកំពុងឈរជើងការពារទឹកដីយ៉ាងអង់អាចក្លាហាន នៅខេត្តព្រះវិហារ។

ពេលឪពុកម្ដាយជាប់បំពេញភារកិច្ចជូនជាតិ ក្មួយស្រីទាំងពីរបានមកស្នាក់នៅជាមួយជីដូនឈ្មោះ ភួង ស្រីអន អាយុ ៦៧ឆ្នាំ នៅភូមិថ្លុកឫស្សី ឃុំសេដ្ឋី ស្រុកសាមគ្គីមានជ័យ ប៉ុន្តែជីដូនរបស់ក្មួយៗមានជំងឺ បានចូលសម្រាកព្យាបាលនៅមន្ទីរពេទ្យ ឪពុកម្ដាយបានផ្ញើក្មួយៗឲ្យស្នាក់នៅជាមួយអ្នករាប់អានគ្នា។ ខ្ញុំ និងក្រុមការងារក៏បានមកសួរសុខទុក្ខ និងឧបត្ថម្ភថវិកាជូនមីង ភួង ស្រីអន ដែលកំពុងសម្រាកព្យាបាលនៅមន្ទីរពេទ្យបង្អែកកំពង់ត្រឡាចផងដែរ។

ខ្លួនខ្ញុំផ្ទាល់ និងក្រុមការងារទាំងអស់ នឹងបន្តយកចិត្តទុកដាក់មើលថែទាំសុខទុក្ខក្មួយៗ និងជីដូន ជូនវីរកងទ័ពលោក ចែ ម៉ាញ និងលោកស្រី ភួង ស្រីណាក់។

សារលិខិតគោរពជូនពរសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសនៃខួបចម្រើនជន្មាយុ នៅថ្ងៃទី១៥ ខែសីហា ឆ្នាំ២០២៥

យើងខ្ញុំទាំងអស់គ្នាសូមបួងសួងដល់គុណបុណ្យ​ព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក សូមជួយប្រោះព្រំនូវសព្ទសាធុការពរ សិរីសួស្តី ជ័យមង្គល វិបុលសុខ​ បវរមហាប្រសើរ ជូនចំពោះ សម្តេចកិត្តិសង្គហបណ្ឌិត និងក្រុមគ្រួសារ សូមបានប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សារលិខិតអបអរសារទរ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានក្រុមប្រឹក្សាភិបាលអង្គការស្នាមញញឹមកម្ពុជា ទទួលបានពានរង្វាន់ “Smile Asia Philanthropic Visionary Award” ក្នុងកម្មវិធី “Smile Asia Charity Gala 2025” នាថ្ងៃទី១៤ ខែសីហា ឆ្នាំ២០២៥។

ថ្ងៃទី១៦ ខែសីហា ឆ្នាំ២០២៥ ខ្ញុំបាទ បានចូលរួមអមដំណើរសម្តេចមហាមន្ត្រី គុយ សុផល ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង ប្រធានក្រុមការងារគណបក្សចុះមូលដ្ឋានស្រុកបរិបូណ៌ និងលោកជំទាវ អញ្ជើញជួបសំណេះសំណាល សួរសុក្ខទុក្ខ និងនាំយកអំណោយឧបត្ថម្ភជូនគ្រួសារកងទ័ពនៅសមរភូមិមុខ ចំនួន ៦៧គ្រួសារ នៅតាមបណ្ដាឃុំក្នុងស្រុកបរិបូណ៌ ខេត្តកំពង់ឆ្នាំង។

បន្ទាប់មក សម្តេចមហាមន្ត្រី បានបន្តអញ្ជើញចុះសួរសុខទុក្ខ និងនាំយកអំណោយឧបត្ថម្ភជូនប្រជាពលរដ្ឋជួបការលំបាក នៅក្នុងឃុំចក ចំនួន ៥០គ្រួសារ និងឃុំពន្លៃ ចំនួន ៥០គ្រួសារ។