كذلك ورة التسجيل المكتب يكلك اكو خدمات عدنا اللي هية السكن والنقل وفتح الملف و....وتكلفتها 1000$ وبالواقع هاي الخدمات ترة مجرد راح يستقبلك بالمطار وياخذك لفندق ويفتر بيك حول الشقق المتوفرة وياخذك للمحكمة توقعون العقد مال الشقة ومن تريد تفتح ملف راح يدزولك واحد يجي وياك وبس(وهاي كلها متكلف 600$) فصراحة الطلاب اللي يدرسون بإيران ميحتاجون هاي الخدمات لإن الشقق منا تكدر تحصلهن عن طريق الدكتور هشام الفنجان يوفر شقق عنده كروب وينزل بيه الشقق المتوفرة فتكدر تتفق انته ومجموعة وياك على السكن وتتواصلون وية دكتور هشام ومن توصلون هناك تلكون شقتكم جاهزة ومن تريد تفتح ملف اكو هواي معقبين هناك يسويلك فتح الملف وهو فتح الملف ميكلف غير 150$ او 200$ تقريبا ف من وجهة نظري خدمات المكتب عوفوها لإن المبلغ اللي يطلبوه مبالغ بيه. (وجهة نظري الشخصية)

وانتبهوا طلاب للأسعار اللي توفرها المكاتب ترة اكو مكاتب مباشرةً تضيف خدماتها على سعر القسط الرسمي مال الجامعة يعني فرضا اذا القسط 45ورقة راح يكلولك مثلا 55 ورقة فانتبهوا لهاي النقطة واذا تحبون اني المكتب اللي سجلت عن طريقهم كلش اوادم وينطون السعر الرسمي لقسط الجامعة بدون إضافة الخدمات ومن تخلص همة يخيروك تريد خدماتنا او لا ف إذا تحبون راسلوني علخاص علمود انطيكم عنوانهم.
للعلم القناة هاي ما تابعة لمكتب معين او عن طريق هاي القناة جاي اسويلهم دعاية إطلاقا وانما اني جاي انبهكم لا أكثر وهمة لإن خوش ناس كلت أفيد الطلاب بس.

هسة راح انزل أسعار بعض الجامعات الإيرانية:
🔺جامعة طهران:
1-الطب العام 5000$
2-طب الأسنان 3000$
3-الصيدلة 2500$

🔺جامعة إيران:
1-الطب العام 4500$(فرع برج ميلاد وفرع شهر قدس) و4000$فرع رسول أكرم
2-طب الأسنان 3000$
3-الصيدلة 3000$

🔺جامعة شهيد بهشتي :
1-الطب العام 4000$
2-طب الأسنان(لم يتم التحديد)
3-الصيدلة 2500$
4- تقنيات التخدير 1750$

🔺جامعة تبريز:
1-الطب العام 4000$
2-طب الأسنان 4000$
3-الصيدلة 4000$

🔺جامعة ارومية:
الطب العام 4200$
أكو جامعات هواي غير هذني الجامعات بس البقية تصنيفهن أقل.

الأسعار هذني من قِبَلْ الجامعات يعني مو تسعيرة مكاتب إضافة إلى ذلك ترة الأسعار مو ثابتة غالبا وأكثر شي جامعة تبريز تغير أسعارها بين فترة وفترة واهم شي ترة هاي أسعار السنة الأولى اما باقي السنين فتكون أقل دائما وغالبا ما تكون أقل ب 500-900$

السلام عليكم شباب بالنسبة لإمتيازات القبول بالخارج مال المتميزين وحملة الشهادات العليا وذوي الشهداء ف اكو قرار علساس تنلغي كل هاي الإمتيازات بس لسة مو أكيد ولحد هسة محد يعرف لإن تسألهم يكلولك اي تكلهم وين الكتاب الرسمي يكلولك ماكو كتاب لسة هذا الشي بس كلام

السلام عليكم شباب. فدوة اروحلكم انتبهوا لشغلة أقساط الجامعات ترة اكو هواي مكاتب ومعقبين جاي يسوون هاي الطريقة اللي هية كبل يضيف سعر خدماتهم على القسط الرسمي ويكلك هذا القسط وهوة بالواقع مو هيج هواي طلاب راسلوني طالبين منهم على جامعة ايران للعلوم الطبية 5500$ او 6000$ وهوة بالواقع قسطها 4500$فرع برج ميلاد وشهر قدس و4000$ فرع رسول أكرم فإنتبهوا لهاي النقطة فدوة اروحلكم.

والنقطة الثانية جاي يسوون بوجهكم عملية فتح الملف و الإقامة والبطاقة البنكية والسيم كارت الإيراني (إيرانسيل) وبقية الأمور صعبة كلش على الطالب علمود يخلوكم تخافون او تشعرون انه هذا الشي صعب كلش عليكم وانتوا بغربة ومن هاي الأمور وكبل توافقون على خدمات المكتب اللي هية قدرها 1000$ بينما هذني الأمور الذكرتهن اني فوك كلهن ميتجاوزن ال 300 او 400$ وأهم شي انتوا تسووه انه تحصلون قبول وتضبطون امور سكنكم اما الباقي كله امور ثانوية تكدر تسويها ورة شهرين وثلاث شهور من تاريخ قبولك

دفعة 2024 الوزارة عدها عداوة شخصية وياكم لو شنو؟

القرار رسمي شباب معدل فتح الملف للطب العام 95% والصيدلة وطب الأسنان 85% اما الجامعات اللي ضمن تصنيف شنغهاي لأول 500 جامعة صارت 90$ للطب العام و80% للصيدلة وطب الاسنان.كذلك جبر الكسر انلغى وإمتيازات القبول كلها انلغت لا شهداء ولا متميزين ولا حملة شهادات عليا

خالص العزاء لكم دفعة 2024

🔹إيران :
1-الطب العام 95% وجامعة طهران 90%
2- طب الأسنان 85% وطهران 80%
3-الصيدلة 85% وطهران 80%
4-التخدير والتمريض والعلاج الطبيعي 50%
5- -هندسة النفط أو البترول 50%

🔹الأردن :
1--الطب العام 95%
2- طب الأسنان 85%
3-الصيدلة 85%
4-التخدير والأمن السيبراني وهندسة البرمجيات والذكاء الإصطناعي 50%
5- معهد صيدلة 70%
6-التمريض والعلاج الطبيعي 55%

🔹مصر:
1- الطب العام في جامعة القاهرة 90%( ضمن تصنيف شنغهاي لأول 500 جامعة ) وبقية الجامعات 95%.
2-الصيدلة وطب الأسنان 80% في جامعة القاهرة فقط وبقية الجامعات المصرية 85%.

🔹قبرص التركية:
1-الطب العام 95%
2-طب الأسنان والصيدلة 85%
3-التمريض والعلاج الطبيعي وهندسة النفط وهندسة الذكاء الإصطناعي50%

🔹تركيا:
1-الطب العام 95%
2- طب الأسنان 85%
3-الصيدلة 85%
4-التخدير والتمريض والعلاج الطبيعي 50%

🔹روسيا:
1-الطب العام 95%
2- طب الأسنان 85%
3-الصيدلة 85%
4-التخدير والتمريض والعلاج الطبيعي 50%
5-هندسة النفط أو البترول 50%

🔹الصين:
أغلب جامعاتها ضمن تصنيف شنغهاي لأول 500جامعة لذلك تقبل طب عام بمعدل 90% وصيدلة وطب اسنان بمعدل 80%

المصادر موثوقة 100% مع كامل مودتي واحترامي لكم وكل الإمتيازات تم إلغائها من متميزين وشهداء وحملة شهادات عليا وأطباء.

شباب للتوضيح ترة بمصر بس جامعة القاهرة ضمن تصنيف شنغهاي لأول 500 جامعة اما الباقي لا يعني بس جامعة القاهرة تقبل 90 %طب عام و80%صيدلة وطب أسنان كذلك مصر متنطي نقل يعني لازم تكمل هناك ال6سنين للطب وال5سنين للصيدلة والأسنان

أقساط جامعة القاهرة وجامعة عين شمس وجامعة الإسكندرية:
1-الطب العام 8000$
2-طب الأسنان 8000$
3- الصيدلة 6000$

ترتيب الدول من حيث تكلفة الدراسة والعيش كالآتي (من الأقل إلى الأعلى):
1-إيران
2-تركيا
3-مصر
4-روسيا
5-قبرص
6-الصين
7-الأردن
تم الأخذ بعين الإعتبار تكاليف الدراسة والعيش والنقل بالترتيب أعلاه.

السلام عليكم شباب اكو نصيحة مهمة اخذوها مني.
للطلاب اللي متأكدين راح يدرسون بإيران او بالخارج بشكل عام خلي من هسة يرتبون وضعهم ويحولون فلوسهم للدولار ونصيحتي هية خلي يروحون للبنك المركزي من هسة ويصرفون على ال 135 لإن من تريدون تسجلون راح يصير لود قوي ومتلحكون والقبول يطلع بسرعة وأول ميطلع القبول لازم تدفعون القسط لذلك جهزوا أموركم من هسة وإذا تريد تعرف شكد تصرف كم ورقة تعال خاص وكلي شنو ناوي تقدم حتى أكلك شكد.

السلام عليكم شباب..
خبر سار عودة جامعة طهران ضمن تصنيف شنغهاي لأول 500 جامعة يعني جامعة طهران الآن تقبل طب عام بمعدل 90 وتقبل صيدلة وطب اسنان بمعدل 80 قسطها حاليا 50 ورقة للطب و25 صيدلة وطب اسنان بس اكيد راح يصعد لإن رجعت للتصنيف لذلك اذا تريدون تسجلون استعجلوا واذا تريد نصيحة علتسجيل مني تعال خاص

شباب بمناسبة عودة جامعة طهران ضمن تصنيف شنغهاي لأول 500 جامعة ولإن الوزارة عدها عداوة وياكم ما اعرف ليش😂ف الوزارة حاليا صدرت كتاب بإيقاف كل إمتيازات القبول اللي كان معمول بيها سابقا واللي تشمل تصنيف شنغهاي وإحتساب درجة الدور الأول وكذلك درجة الفرنسي وقانون جبر الكسر أثناء التقديم وعلى ضوء كلام اللي بالوزارة خلال اسبوع علساس ينزل كتاب جديد اما يبقوهن او يلغون جزء منهن او يلغوهن كلهن .طبعا الكلام ينطبق مو بس على جامعة طهران وانما على التقديم بشكل عام للدراسة بالخارج.

(أمنيتي اعرف دفعتكم شمسوين مكسورة وية الوزير بحيث هيج قافل عليكم)

السلام عليكم شباب بالنسبة للإمتيازات اللي أعلنوا عليها ف حاليا بس ذوي الشهداء رسميا الهم 5 درجات دون الحد الأدنى للقبول وكذلك احتساب درجة الدور الأول أما بالنسبة لجبر الكسر والفرنسي تم إلغائها .أما شنغهاي وامتيازات المتميزين ف لسة ماكو خبر رسمي صحيح يوضح إلغائها او إحتسابها بس أغلب الأخبار تكول الغاء شنغهاي وإحتساب 5 درجات للمتميزين بس كخبر رسمي وأكيد ماكو لسة.
شباب هاي الإمتيازات فقط للتقديم للدراسة في الخارج أما في حال العودة بعد اكمال السنة الأولى والتقديم للجامعات العراقية سواء الحكومية او الأهلية فيتم احتساب درجة الدور الأول ودرجة الفرنسي ايضا.