مع اقتراب الدخول المدرسي حبيت ننوه لحاجة برك ولي هي وين لازم نكون واصل قبل الدخول ؟ ولا اسك راني روطار ولا نو

رياضيات و الفيزياء و العلوم لازم قبل الدخول تكون مكمل المكتسبات (اذا متقدم في ليكور في الدروس مليحة ولكن سيي استراح شوي لانو مثلا الدوال محور لديسمبر و نتوما تقاو فيه تبقا تتقدم في الدروس بدون خطة مدروسة تعيا برك)

مواد الحفظ هل نحفظ ضك مدام راني في العطلة و نحي عليا دروس و لا نو : المواد هذو كن تحفظ درس برك كل سمانة تلقا روحك منا للباك معاود البرنامج 4 مرات + من غير المنطقي تقرا مواد ادبية و نتا نزلت الأساسيات تاع المواد الأساسية مزلت مقريتهمش للجماعة لي مهيش مراجعة
الممتازين تبعو الليسي عندكم كل سمانة درس في الليسي تروحوا تحفظوه منها تراجعوا للفروض و الاختبارات منها للباك

اللغات كيف كيف اذا نتا عندك مشاكل مع المواد الأساسية متبداهمش ضك
الممتازين عندك كل سمانة تريفيزيو القواعد بشوي مبعد كي تكملوا توليو كل سمانة سيجي باك
++++ الدخول مزالو ايام معناها لي مزال مبداش في المكتسبات غير يبدا ( النظاميين ) اما الاحرار مزال الحال شوي
و ربي يوفق الجميع ❤️

#برنامج_الرياضيات تاع عام الباكالوريا بالنسبة لشعبة علوم و الرياضي و التقني رياضي باش تعرفو وين دورو ❤️
ملاحظة قبل ما نبدا برنامج الرياضيات تاع لباك ردوه جايح لي يطبق كثر يدي كثر و مايعتامدش على ذكاء الشخص .
كاين 4 محاور
1/ الدوال
2/ المتتاليات
3/ الاحتمالات
4/ الاعداد المركبة
نبداو بالدوال مقسمين
#الدوال_العددية نقدر نقوللكم هي تذكير للمكتسبات
- دوال أسية
- دوال الوغاريتمية
- الدوال الاصلية و حساب المساحات لي هي فالحق محور وحدو
#الدوال_الاسية_و_اللوغاريتمية يديولكم وقت اكثر من الدوال الاصلية و حساب المساحات خطكش جي فقط في جزء من المسألة اما الدوال الاسية او اللوغارتمية فهوما اساسا اساس المسألة ✅ يجيو في تمرين عليه 7 نقاط
اذا قدرت تتمكن من الدوال الاسية الدوال اللوغارتمية مايديولكش كثر من 15يوم و تتمكن منهم 100%
بالنسبة #المتتاليات مقسمة الى:
- المتتاليات الهندسية
- المتتاليات الحسابية
ماهمش صعاب تقريبا نفس الافكار راح نلقاوها في جميع التمارين اسمط حاجة فيهم المجاميع .. مايدوش وقت طويل باه تتمكنو منهم و يقدرو يدمجولكم بينو وبين الدوال في حزء بسيط تستمعمل فيه الدالة المرفقة يجيو في تمرين عليه بين 4 او 5 نقاط .
#الاحتمالات
اسهل اسهل محور في الرياضيات عندك شوييييية قوانين شوية كلمات نفهمهم مثلا في ٱن واحد مثنى مثنى الى ٱخره و تخدم راسك برك باش تفهم وش حب يقول التمرين و مبروك عليك و يجيو في تمرين علي بين 4 الى 5 نقاط فالباكالوريا
#الاعداد_المركبة فيهم جزئين :
- حسابي
- هندسي
الجزء الحسابي ماهوش صعيب نهائيا ساهل ڨاطو قانون طبقو يخرجلك النتيجة عادي جدا+ الحاجة لمليحة لي فيهم هو انو الدرس اصلا تمرين ماكانش افكار هك ولا هك لي تقدر تخلطك ملخر اما بالنسبة للجزء الهندسي لي يخلطو بزاف فيه خطكش كاين فيه بزااااف افكار لكن شوي مخلط يعني لازم تركز مليح مليح و تحل بزاف تمارين باه ترسخهم في ذهنك يجي في تمرين عليه 4 او 5 نقاط فالباكالوريا ✨
التقنيين و الرياضي عندكم محور اضافي الاعداد و الحساب و هو الحلو كامل فيهم انا نعتبره كلعبة كي نجي نحلو مهوش ساهل و مهوش صعيب لازملو بزاف تمارين كاين الجزء الاول تفيقلو كيفاه يتحل جميع التمارين رح يتحلو بنفس الطريقة و انت العب بالبواقي و بدل كيما تحب
هادي فكرة عامة على برنامجكم تاع الرياضيات تاع الباك ..
الدوال(لواحد جديد) تقريبا ممكن شهرين يتخلص منهم متتاليات شهر و نص احتمالات شهر اعداد مركبة شهرين يعني 6شهور و نص تقريبا مارس تكون تمكنت منها كليا كان تبدا في سبتمبر و تقدر بعدها مباشرة تنطلق في حل المواضيع حاول انك تقراها من قلبك خطكش هي اسهل مادة علمية و تقدر تضمن فيها 18 يعني تضمن بيها لباك 🤍