يوميات #علوب 97 .....اللوترى..!!!

غايتو هى من ناحية سمحه ...النصييحة .. سمحه ...!! لكن كمان شا يفا روحا ومشخته ليك لى اولاد الحله ديل بالصف ...!! والله كان ليها مراد ماتقعد معانا هنا ذاتو ..بالله شوف الموهومة دى ...!! ديل ما اولاد حلتك ...!!!والله حلتتتتنا وبنريدا .. عم (يس ) ياخ سيد الدكان وسيد كل شى ...قدرة الفول دى قاعدة كده متكيه تطمن ....!! والشفع داقين دافوري ذي الدافوري ....وعمك التوم يوزع فى الابتسامات كما التسالى ...الا انتى ياشيطان مكه .....!! لاويه بوذك فينا ... ويادنيا مافيك الا انا ...
سالت حنان بت خالتى مره قلت ليها انت (الليدى ديانا) (دي طبعا ده الاسم الفاكينو فيها ) فوق ام كم رافعه القزاز بتاعا ده كده ...!!! ومكتره التظليل ....!! لقيت ليك الجكس ذاتو شاميها ...!!! مره لاقيتا ليك كده على المواصلات قلت أخفف دمى ونكسر الحيطة دى شويه ....!! قلت ليها انتو كمان بتركبو معانا المواصلات ...!!؟ والله كأنو مافى زول بتكلم معاها ..!! ولا عبرتنى بى نص كلمه ....!!! غايتو أكلتها فى حنانى لكن هردت كبدتى من جوه ..!!! قلت والله ياعلوب البت دى انا لازم أفهما حاجه وأوريها مقاسا...!!!
عندى اصحابى كده (شفوووت ) قلت ليهم عايزكم تطلقو الخبر انو علوب جاهو اللوتري وماشى أمريكا وعايز يعرس وسايقا طوالى ...!! (وانا عاااارف زولتى دى قاعده معانا فى الحلة دى وراسا ده مامعانا.... تحضر فى (ذَا فويس ) (وزي ألوان )...وتقرا فى سيدتى وزهرة الخليج ...خاتا روحا مع المنتخب ده ..!!! عايزة تحترف ..). المهم الجماعة طلقوا الخبر ...وقلت لى حنان عايزك توصليهو فى أسرررع وقت ..وحنان طبعا ماكضبت ..كبتو وذاعت النشرة ...!!!!
بس اليوم التانى ربطت ليها من الصباح ..وعملت نفسى لاقيتا صدفه ..واصلو مااشتغلت بيها ...برااااها نطقت ....والناس الماشين أمريكا مابسلمو....!!! ( أممممك ... أمانة ماوقعت حمامة ...). قلت بس دى فرصتك ياعلوب ترد اعتبارك وماتعبرا ...!!! هى لكن وييين مع قلبى الهبابة ده ...!!ماصدقت انها اتكلمت معاى ...!! والله كان مشينا السما ياهو القمر قاعد معانا هنا...!!! اتخيلو ده كان ردى ...!!ابتسمت كده ويبدو ان انها استعادت الثقة ورجعت للمساخة ...والله كويس على الأقل تنضف شوية ..!! بالله شوفو جنس الحالة دى ..!!! انضف ليه شايفانى وسخان ...(الرد ده طبعا فى سري ...!! ). هى ذاتا اتحسست شوية كده وخففت العيار ...قالت لى بختك غايتو نحن نرجى الرى ...!!قلت ليها والله انت وزارة الرى ذاتا ...!!وقلت ياعلوب استغل الفرصة وامشى لى قدام ...قلت ليها طوالى أتفضلو معانا أمريكا ذاتا لاقياكم وين ..!! قالت لى غايتو الكلام ده أبقى قدرو ...ومشت !!! خلتنى ليك بين السما والواطة وحاسى بى دوشه كده وشحتفة روح .....!! طوالى جريت البيت جرى... وفى الطريق غشيت ناس خالتى لاقيت حنان قلت ليها شوفى انا عايزك فى موضوع مهم اللييييله قبل بكره تمشى ناس اميرة (طبعا ده اسمها الحقيقي ) الليله المسا تقولى ليها والله علوب ده ذي بفكر يتقدم ليك وكدا ....واوعك تنسى (ذي ) دى اهم حاجا نحن برضو ناس عندنا وضعنا وما مدفقين ...!!! اها حنان الكلام ده جاها فى حتتا لانو ده نوع الشمارات المفضل لديها ...بس المغربيه كده لفحت توبا ومشت ليهم وانا واقف منتظر تحت العمود ذي الثعلب ...!! المهم بعد مده كده جاتنى حنان قالت لى لا لا لا اصلو مابصدق ...!! اهاااا... ...الحصل شنو !!؟ قالت لى كلمتها قالت لى والله علوب طبعا شاب طموح وود ناس ...بس ادينى فرصة أفكر ....!! انا هنا الفينى كملت ...صنقرت فى الواطه دى ...وشغال الحمد لله الحمد لله..!! تحلف تقول عقدت ...!! وعزمت ليك الشباب فوله كااااربه عند عمك يس ومعاها بيبسى وده طبعا ماعادة بحصل لمن
(اليسع ) صاحبى قال لى انت صدقت قصة أمريكا دى ولاشنو ...!! بس (كابستو ) ليك عايز أدي بنية خايف الكلام يشيلو الهوا ...!! لكن ليس الهوا وحده هو من يلفح الكلام ...!!! شالتو خالتى اللفيفة دى ودتو ذي ماهو ....لاقت ام أميرة فى بيت البكا قالت ليها والله علوب امبارح قطع مصارينا بالضحك قال حلمان جاهو (الروترى ) حق أمريكا ده وهو اصلو اى حلم بشوفو بتحقق ...!! قلت لى اجى ... بقيت شيخ ونحن ماعارفين ...!!! اتخيلو بهذا الوصف (الركيك) كلمت المره ...وبعد تلاته دقايق ونص وصل الخبر الى الأميرة .....!!!
لاقتنى تانى يوم ...يشهد الله كأنها مابتعرفنى ...!!! لا وكمان أدتنى واحده خلتنى بين الحياة والموت قالت لى والله بختك ياعلوب مونس روحك ...!! وبالمناسبة نتيجة اللوترى باقى ليها تسعة شهور الحق عرس عشان تسوق ولدك معاك واخدت ليها ضحكة كده من النوع البوجع المصارين داك ..!!! ومشت ...!!! الله لاكسبك يااميرة هنا مبكيانا...!! وفى أمريكا مبكيانا ...!!!طوااالى مشيت على عمك (يس )شربت لى قزازة (شامبيون ) باااارده لمن عيونى ديل دايرات يتقلعن ...!! قال الجواك بطل قال ..!!! والله انت جواك بصل وحنضل ياعل

وب ...!!! انتو بالمناسبة التقديم لى اللوترى بدا ....!!

#اشياء_بسيطة..

يوميات علوب 98 ...قناة علوب الفضائية

شلتنا فى الجامعة ايام زمان عملو ليهم قروب كده فى الواتس سموهو ..عيون الجامعه ...اها يازول قلتا والله والنعم على الأقل الزول يرجع الذكريات الحلوه مع الشباب الحلوين ديل ...ونعرف اخبارم ...اها لقيت ليك البنات زميلاتنا ديل والشباب كل واحد فى بلد ارقام تلفونات ذي الدليل شى صفرين اربعتين وشى صفرين ستتين تسعة ..ديل بنعرفهم ياها لندن والسعوديه وواحدين كده صفرين تلاته تسعة تلاته ...وصفرين اربعه تمنيتين حتات ذاتا ماعرفتها ذاتا وطبعا صفر تسعة دى ماتديك الدرب بالكوم ... ...المهم قروب كده ظريف وونسات ..وجماعة بقولو شعر ..وواحدين برسلو صور ..ونكات..!! وواحدين شغالين حكم ومواعظ وجماعة مدورين غنا ..المهم القصة ماشه ...يوم صحيت ليك من الصباح لقيت ليك القروب ده مقلوب ....ياعلوب انت ياخ ماعقلتا ...!! وتعليق تانى ياخ ماتحترم نفسك ..!!! والله لو مابنعرفك كان لزيناك رميناك من القروب ده ...!!! وواحدين بس اكتفو بى 😂😂😂😂😂😂😂 وتعليق بي هناك غايتو بس بالغتا معانابنات هنا ياخ ...يازول راسى ده ذاتو شطب ...فى شنو ياخوانا هسه انا عملتا شنو ..!!؟ الحاصل شنو ...!!؟ داير اكتب استفسر كده ...قلتا ياعلوب كدى راجع القروب ده شوف هو فى شنو ذاتو ...يازول بديت ارجع ليك ورا مالقيت اى حاجه ...اها وماااشى اقرا وأراجع .....!! ماف حاجه ...!! بس فجاة كده ألقي ليك تعليق كاتبو انا ذاتى ....مكتوب فيهو...
...غايتو انا حاسى انى مرتاح ليك ..لكن خلينا نشوف بعض فيس تو فيس بدل الفيس ...ومعاها ضحكه كده كمان نهاية التعليق ...هههههه ....!!! يازول راسى ده ضرب ...صحى انا كتبت الكلام ده ..لكن الجابو هنا شنو ..!! لاحول الله بس طوالى رجعتا ورا شديد فى الدردشة ...بس ألقى ليك الكلام ده ...

شكرًا انك وثقتى فينى واديتينى رقم الواتس ...الفيس بوك ده ذاتو حركتو تقيله ....!! بس أعاين ليك التعليق البعدو

نحن برضو ساكنين فى بحرى يامحاسن الصدف .....!!! ده كلام شنو ...بس بعدو ألقي ليك واحد من شلتنا دى مرسل ليهو نكات كده ...!! بعديها طوالى ألقى ليك ..علوب ..(إللى هو انا) كاتب ...

(لا لا دى بالغتى فيها والله ...حب كده من اول نظرة ...!! ياخ انا كاظم الساهر ...والله رفعتى معنوياتنا ..!!! ). اها بعد تعليقى ده ألقى ليك تعليق كده من الشله ....علوووب انت جنيت ولا شنو بتتكلم مع منو ....!!؟ و خشت واحده
تانيه برضو ...!! ياخوانى ماتشوفو علوب ده الحاصل على شنو ...شنو الكلام المامفهوم ده ...!!!
وانا لِسَّه براجع فى الكارثة دى ..ألقى ليك علوب ..وياهو خط واتسابى المابغبانى واقرا ليك ....
(لا أرجوك ماتفكرى بالطريقة دى انت قايلانى من الأولاد المراهقين ديل ...انت والله ذاتك لو ماعجبتينى ولا بطلب منك رقم الواتس ..لكن انتى بالجد شديده ياخ ......) لا حولا بتصدقوا انا كنت بتكلم مع البت دى فى الواتس ...وبرد عليها هنا فى القروب ...سجلتا رقما فى الواتس ...ام عيون ...وقروبنا ده اسمو ...عيون الجامعة ...اها انا اشيل وارد هنا قايلا دى هى ...!! والله محل ادخل ماعرفتا ....غايتو ياعلوب السويتا مابتتصلح ..هسه ديل أقول ليهم شنو ..انا أسف كنت سكران ...!! ولا معاكم الكاميرا الخفيه ....!! ولا بس اتصرف كيف ...!!؟ رجعتا اقرأ تانى
قلتا النشوف نهاية الماساة دي بس اقرأ ليك بالخط العريض ...

غايتو انا ماحصل حبيت لكن حاسى كده انى وقعتا وماسميت ...ياخ عيونك ذاتا فيها شى كده عجيييب ..عجيييب
واقرا ليك التعليق البعد كلامى ده لى واحد من شلتنا دي ...
ياعلوب ياخ اختشى القروب ده فيهو بنات ...!! (هو انا جايب ليك خبر) ...بس طوالى البعدو
اخ منك اخ ...طلعتى لى من وين انت ..من وين ..من وين (الود شاعر وفظيع ) غايتو لمن قريت ده ..حيلى برد ...!!! بس اقرأ ليك التعليق البعدو من هناية ديك من الشله
ياخوانا علوب ده ودوهو الضل ...الزول ده مانصيح ....وواحد تانى معلق .....علوووووووووب... ده شنو !!!
وانا مركز مع ام عيون ...!!! بس قريت اخر واحد ...اوكى من الليله انتى عمرى وحياتى ...ياعسسسل ....!!!

اها عقلى اتشلا ورسايلى لى ام عيون طلعت منقوله على الهواء وبث مباشر لكل الاخوان والاخوات داخل وخارج السودان عباره عن قناة علوب الفضائيه ....والبقت بقت ...عاينتا كداااا ...اعمل شنو ..!!؟ واقول شنو ذاتو ..!! وأبرر أقول شنو ...والله انا كنت قاصد ام عيون بالغلط كتبتا فى عيون الجامعة !!!؟ ياخ قوم لف كده ..!!!.مافى اى حل غير طجيتا ليك بكل قوتى ...وظهرت ليهم كلهم وااااضحه ...left group علوب ....فى أسرع دخول وخروج فى تاريخ الواتس ..!!!

#اشياء_بسيطة..

الناس الحلوين ازيكم ..الليلة حيكون يوم استثنائي شان اعز الناس البجو بسالو كتير من علوب ..وحتنزل حلقة تانية من علوووب ..يعني الليلة 3 حلقات..😍

يوميات #علوب 99 ...علوب يكتب ...!!!

مره قعدت أفكر كددده .....!! قلت شنو ياعلوب البخليك زول مشهور وعندك وضعك وانت مازول حاره ....يعنى شغلانية كده خفيفة وظريفه ...
اها يوم بحضر فى الكورة كده قلت ياخوانا الناس القاعدين فى المقصورة ديل فايتنك بى شنو ياعلوب بالعكس انت ذاتك كنت بتلعب فى الحلة زمان ...وحنكك سنين ...وزول علاقات ...لكن ياربى المدخل شنووو ....!!! ايوووووا أتذكرت ليك ودخالتى (الريح ) زول بتاع حركات وعامل فيها شخصية كده وبعرف الواطه دى كلها ...ده ممكن ينفعنا فى القصة دى وعلاقاتو واسعة ..!! ضربت ليه تلفون قلت ليهو عليك الله يالريح يااخوى انت زول طبعا (رقم ) ..!! (طبعا الكلمة دى بتخليهو طاير.. ودخالتى وبعرفوا) ....ياخ ماتعرفنا على ناس الكورة ديل انا داير اشوف النجوم ديل من قريب ...!!! هو طوالى على الخط كبر لى اللفة كده وادانى احساس انو الناس ديل ناس كبار مابلاقو الناس كده من طرف ...قلت ليه ياخ انا عازمك سمك الليله خلينا نتفاهم وبعد داك نشوف ...!! اها انا عارف سنارتى دى بتغمز...!!! طوالى اتنحنح كده وقال لى خلاص خلاص كدى نشوف لى بعدين !!! ...انا عملت ميت شوية وقلت ليه خلاص البتشوفو ...!! تانى رجعنى لى موضوع السمك ..!! ( يضحك السمك ).. قال لى خلاص كدى نتفاهم بعدين فى العشا ...!! وقفلنا على كده ...!!قلت ياعلوب سمكة سمكتين ماخساره ...المهم نصل الحيتان الكبار ديل ....!! وفعلا بعد العشوة دى وعدنى اجيهو تانى يوم فى المحل ...هو عندو محل موبايلات كده عاملو صالون فنى ورياضى بجوه الجماعة ديل كلهم ...الداير ليهو تطبيق جديد ..!! والماسح سوفت وير ..!! والداير لى شاشه...!! والعاوز ينزل ليهو برنامج جديد ...!! وقصص ذي دى ...!! وهو ذاتو شيطان فى الحاجات دى وبتاع حركات كده...!! خاتى ليهو هندى فى المكان قال ده خبير موبايلات اجنبى ...وهو كان شغال فى مطعم فى دبى ...!! المهم غايتو الناس دى واثقة فيهو ...!! فعلا يازول جيت ...لقيت ليك ناسى ذااااتم..!! هى ده ما الزول بتاع التلفزيون داك ...!! بعد شويه جاو واحد تانى...!! هى ياخوانا ده ما هناى داك بتاع المريخ ...!! لاحولا..معقولة علان شخصيا ...!! المهم يازول بى موبايلى ده اخدت لى معاهم كم لقطة كده... مره واقفين...!! ومره قاعدين... !! ومره بنتونس ...!! وشتتنا مشينا ...!! ودى كانت الخطوة الاولى نحو النجومية ...!! ولان من كد وجد ...جاتنى (الكده )الحقيقيه في محلتى ...فعندى صاحبي كده شاف صورتى مع هناى داك قال لى انت بتعرفوا الزول ده...!!؟ قلت لى صاحبى شديد...فرده عدييل ....!! يازول قال لى خلاص مانعمل معاك لقاء صحفى تدينا رأيك فى الأوضاع لكن لازم ننزل الصورة دى فى اللقاء ...!! قلت لى يازول قشة ماتعتر ليك ....انا ذاتى عندى راى فى البحصل ده ...!! وبس تانى يوم ألقى ليك صورتى كبيرة فى الجرايد مع زولى داك والعنوان ...علوب يدلى بالجديد المثير ...!! والله انا بقرا فى الخبر انا ذاتى صدقت روحى ....!! (نصيحتى للاتحاد العام ان يبتعد عن الصغائر ويلتفت لبناءكيان رياضى قوى) ...(ولد دا )...!!وتصريح تانى لى علوب فى زاوية كده ...(لو كنت رئيسا للهلال لما ترددت فى شطب فلان داك ...!!). المهم يازول أصحابنا فى الحلة احتفلوا معاى باللقاء ده وهم عارفين انو فهمى فى الكورة ذي فهم الجزار فى عملية القلب المفتوح مع الاعتذار للجزارين طبعا لانو حتى بتاع القلب المفتوح ده اتحداه يشيل (الالتى ) من المرارة كما يفعلها هؤلاء ....!!!
..المهم خلّوونا من ده كلو ...انا حسيت الان أننى امام واقع جديد ...!! وفعلا اتصلت بى قناة كده طلبت منى المشاركة فى ندوة عن تدهور الكورة السودانية الأسباب والحلول ..!! وفعلا جيت وأدليت بى (جردلى ) وبقيت مارق ...!! غايتو دى ذاكرت ليها واستشهدت بالتجربة البرازيلية وربنا يحفظ عّم Google ماقصر معاى ادانى فكرة عن الموضوع ...ويازول خلاص الفكرة ركبت لى شديد وبقيت اصرح واصفق وأعلّق ....!! وكانت القفلة عندما طلب منى كتابة زاوية فى احدى الصحف الرياضية ...!! اهااا قلت ياعلوب أمانة ماوقعت دى حتعملا كيف ..!!؟؟يازول قلت ليهو ادونى فرصة أفكر لانى مشغول شوية ..!! وبقيت كل يوم اجيب ليك الجرايد دى افرشها واشوف الناس دى بتكتب شنو ...!! لقيت ليك القصة أسهل منها مافي ..!! اول حاجة تخت ليك هدف قدامك من الجماعة الكبار ديل وتنزل فيهو ردم شديد بالفيهو والمافيهو لما هو ذاتو يفهم حاجه ويضطر يقول ده منو ده ...!!! اول مايقول كده انت خلاص اتفتحت عليك ..!! لانو بظهرو ليك ناس عندهم مصلحة في ضرب هذا الهدف اها ديل بفتحوا ليك الشارع
ويزيدو ليك المحلبية عشان تنطلق...!!! وده الحصل ...لميت ليك فى زعيط داك نتفت ريشو نتف ...!! وقلت ليهو انت ذاتك شن فهمك ...!! ولأنى اتوفقت فى الاختيار وعزلت لى كبش سمين ..!! كان العيد كبير ودعم الشامتين اكبر ...وانا سايق ...والله الشارع فاااضي وزول بسألك مافى....!!!
واهم ح

اج

ة ماتطلع من الهلال والمريخ الباقى ده كلو مابوديك لى قدام ...!! تحفظ اسماء الحداشر لاعب ديل وأسماء مجلس الادارة وتلعب بى 4 2 4 يعنى تخت أربعة فى راسك .. تخليهم حبة كده ..ترجع تقزقز بى الاتنين ترجع تانى للأربعة ...والله قونك مضمون .....المشكلة الكبيرة وين ....!!!؟ انو انا صدقت القصة دى ...والله زول يقول لى انت شن فهمك فى الكورة تانى الا ادخلو فى التشكيلة دى ....اعملوا حسابكم ...!!
بالله شوفوا العنوان ده ......علوب يكتب ..!!
والحاجة البطمن انو اذا صحيت من الصباح وشتمت الاتحاد... ونبذت الكورة ...وردمت مجالس الإدارات كده من غير سبب ...!!مية واحد حيقول ليك اى والله كلامك فى محلو .. ..!!! وفى حب ياخوانا اكتر من كده ...!! صبرت ونلت ياعلوب ..فعلا مدوره ومجنونه..

#اشياء_بسيطة..

ﻋﻠﻤﻲ ﻋﻴﻮﻧﻲ ﺍﻟﺴﻔﺮ ..
ﻣﺎ ﺍﻟﺒﺴﺎﻓﺮ ﻓﻲ ﻋﻴﻮﻧﻚ
ﺳﻜﺘﻪ ﺑﺘﺒﻘﻲ ﺍﻟﺴﻼﻣﺔ ..
ﻳﻨﺴﻲ ﺃﺣﺰﺍﻧﻪ ﻭﻳﻌﺮﻑ
ﺍﻟﺪﻧﻴﺎ ﺟﻤﺒﻚ ﺇﺑﺘﺴﺎﻣﺔ ..
ظللي ﺍﻟﻨﺎﺱ ﺑﻲ ﺣﻨﺎﻧﻚ
ﺃﺑﻘﻲ ﻟﻴﻬﻢ ﺿﻞ ﻏﻤﺎﻣﺔ ..

سفريتك ميها الفي النيه ..
و ميها الكانت محريه ..

و بلادً احبها .. ❤️🔛

‏⁧ سافرت في مهمة لمدة ثلاثة أيام وفور وصولي للدولة الأخرى اتصلت لأطمئن على زوجتي وابني، فأنا لم أتعود فراقهم ولم يتعودوا غيابي،، ثلاث سنوات هي عمر زواجي
ولكن للأسف لم يرد على مكالماتي أحد!
ومضت ثلاثة أيام وهاتفي لم يفارق يدي .. اتصل بدون مبالغة كل ربع ساعة أو نصف ساعة ولا أجد جواباً !

جُنّ جنوني واتصلت بأخي وأختي ليتفقدوا أحوال أسرتي الصغيرة .. فطمأنوني!! ولم أصدقهم

واتصلت بأم زوجتي(عمتي) فطمأنتني.. وأخبرتها أنني أنتظر اتصالهم
ولكن طال انتظاري ولم يتصل أحد!!

مرت الأيام الثلاثة كثلاثة شهور طويلة.. وكنت في داخلي أفور من الغضب حيناً .. وحينا أتعجب وأحاول معرفة السبب!
وفي كثير من الأحيان يوسوس لي الشيطان بوساوس مرعبة

مرت الأيام .. ورجعت فيها إلى بلادي .. وما إن وطأت قدماي أرض الوطن حتى طرت إلى المنزل .. ومن شدة خوفي أخذت أطرق الباب بيدي حيناً وبالجرس أخرى ..حتى فتحت لي زوجتي الباب .. ولشدة المفاجأة !
فقد كانت في كامل زينتها وأناقتها وأستقبلتني بكل حفاوة وبأبهى حلة !

ومن ورائها طفلي وعيناه تتراقص فرحاً يركض لاحتضاني !

وأنا كالمخدّر .. لا أعرف ما السبب!

وسرعان ما بدأ الغضب يحل محل الدهشة
فسألت زوجتي عن سبب هذا التجاهل وقد كدت أقطع سفري وأسرع بالعودة فقد كانت الظنون تأخذني يمنة ويسرة

فأجابت زوجتي بكل هدوء : هل اتصلت بوالدتك

أجبتها ولم أفهم شيئاً: لا أدري ربما؟... لا لا اتصلت بوالدتك لأطمئن عليكم

قالت: وقد أصابتني في المقتل " رأيت كيف كان شعور قلبك في هذه الأيام ؟ هو نفسه شعور والدتك .. حين تنسى الاتصال بها بالأيام .. ولا تسمع صوتها.. إلا حين تبادر هي بالاتصال بك .. بعد أن يلهبها الشوق .. ويجرفها الحنين وتأخذها الوساوس إن طال الغياب
حاولت كثيراً تنبيهك !! ولكن دون فائدة .. فلم أجد أفضل من هذه الطريقة لأوصل لك الرسالة يا زوجي العزيز

طأطأت رأسي خجلاً من زوجتي الكبيرة عقلاً .. الصغيرة عمراً .. وقد فهمت الدرس جيداً
وجدتها تناولني مفتاح سيارتي وتهمس في أذني:"جنّتك تنتظرك"

وانطلقت إلى حبيبتي الأولى "أمي"
بعد أن علمتني زوجتي الحكيمة درساً لن أنساه مدى الحياة
وأنا ممتن لها أن جعلتني أتدارك نفسي والأيام قبل أن لا ينفع الندم

شكراً لهذه الزوجة الحكيمة الذكية
شكراً لأمها التي ربتها فأحسنت تربيتها
شكراً لأمي التي أحسنت اختيارها لي

وشكراً وحمداً لله تعالى الذي رحمني وأيقظني من غفلتي

أمي وأمهاتكم .. جنتنا في الدنيا
لا تنسوا وصلهم ولو بمكالمة كل يوم وهذا أقلّ القليل فقلوبهم تنتظرنا وتدعو لنا وتفكر فينا كل حين
ورقة قلوبهم وحنانهم تمنعهم من الاتصال بنا كل حين خوفاً من إزعاجنا

أشعر زوجتك .. وأشعري زوجكِ .. أنّ أمهاتكم هي كنز حياتكم وجنتكم حتى يعينوكم على برّهم
ولا يصرفوكم عنهم

أعينوا أزواجكم وزوجاتكم على برّ والديهم .. فهذا البرّ سيعود عليكم وسترونه في أبنائكم
ودقائق معدودة في اليوم لن تفعل بك شيئاً.

منقول ..

#3mr

" ﻫﻞ ﺗُﻠﺒﺲ ﺍﻷﻗﺮﺍﻁُ ﻓﻲ ﺍﻟﻌﻴﻨﻴﻦ ! ﻣﺎﻟﻲ ﺃﺭﺍﻫﺎ ﺗﺮﺗﺪﻱ ﻳﺎﻗﻮﺗﺔً ﻓﻲ ﻛﻞ ﻋﻴﻦ ."
❤️©

جات داخله زي مرقة غضب من جوف حليم ..
رمت السلام زي شنطه من كتف المسافر بي تعب ..

حميد ..

رامياني الجبنة .. ❤️🔛

خلق الله كلها عاد تكش .. ساعة يرد ذكر الجنوب. وانا ما بجيب سيرة الجنوب.. 💔🔛

الاطفال يافاطمه بغنو ..
الافراح لاااابد من ترجع ..


#3mr

بعد الصلاة الأحضان والأيد تسالم الإيد
كل البيوت بيتنا جاري القريب وبعيد 😍😍
بمحنة نتقالد والكل بشوش وسعيد
وما أظن في في الدنيا زي عيدنا في السودان ❤️..

‏" لا تسمح لأي مخلوق أن يحبطك،
لا فكرياً و لا عملياً و لا عاطفياً!
لا تسمح لهم أن يأخذونك لزاوية التعساء! "
.
.
#مالكوم_إكس

السفر جفوة مواسم ولوعة للزول البريد ..