يوميات #علوب ..67...خاتم المني ..

جيت لقيت ليك الحله دي مقلوبه فوق تحت والقيامه قايمه الظاهر انو فوزيه وسنيه اشتبكوا مع بعض في خلاف علي ما يبدو عميق ....!!! ولمن لايعرف فوزيه وسنيه فأحب أقول ليكم في كلمتين انو فوزيه وسنيه هن من يصنع ويحرك الأحداث في حلتتا دي ....نقطة سطر حديد ...
قلتا لي مشاعر هو الحاصل شنو ..!!؟ قالت لي ابدا كانو في أمانتي الله قبل يومين مشو المستشفي يزورو سعاد جارتنا دي ولدا عملو ليهو عملية زايده راقد في ( الأطبا ) وأمي كانت معاهم
ومافي اي حاجه ..!! الظاهر فوزيه قالت لي سعاد ...يطرشنا والله مافي زول كلمنا ...!! اها سنيه نطت من هناك قالت ليها
كلممتك يافوزيه ....حتي قلتا ليك العملية يوم الاتنين ...!! (الكلام ده كلو قدام سعاد ...) ...!!! فوزيه بلعتا ..!! بس طلعتن من المستشفي قالت ليها تعالي هنا ياسنيه ....انتي في شنو ..!!؟؟ يعني قصدك تحرجيني مع المرا ولا قصتك شنو ...!!؟ ....وحدثت ملاسنة ..!! تطورت الي مخاشنه...!!! تحولت الي مطاعنه ...!!! كلمه من هنا ...واحده من هناك ... انتي الفعلتي ...وانت التركتي ...النار قامت ...ووقعت الواقعة وفشلت كل المحاولات في احتواء الأزمة ......!!!
قلتا لي مشاعر ... وشنو يعني مايتشاكلن ...!!! بكره برجعو.... المشكله وين ...!!؟ قالت لي والله انتا متفائل شديد...!! انت عارف انو الحلة دي هسه منقسمة نصين ....نسوان مع فوزيه وفريق مع سنيه ..!! انتا هل تعلم انو اول ردود الأفعال فوزيه شالت الكلام لي ( أمونه الشيطونه ) ..!! قالت ليها سنيه قالت انتي ( منفسنه ...) ...!! ياها ديك أمونه متيمنه وحالفا تدق سنيه وتحلق ليهاصلعه ....!! واشترت ليها سوط ....!!! (اتخيلتا سنيه بالصلعه والتوب بتزلق .....!!!) ضحكتا ضحك ...😂
علوب انتا ماجايب خبر ساي ديل نسوان متقدرات ...!! انتا متخيل في نسوان لحدي هسه ماقادرين يحددو موقفن من الأزمة ...!!! ياهن ديك برجفن اي واحده فيهن خايفه تكون أدت ليها ( سر ) لي واحده من النساوين ديل ...
قلتا لي مشاعر والله انا بعرف ( البيوت اسرار ) لكن (الحلة اسرار) دي جديده علي ....!!! (اتاري الحله دي محكومه ونحنا ماجايبين خبر...) ...!! طيب ماتكلمي( الحاجه ) تتدخل لاحتواء الأزمة ...!! قالت ياحليلك ....!! اتدخلت زماااان ورفعت يدها نهائي ...مشت لي فوزيه قالت ليها العني الشيطان ...فوزيه قالت ليها اعوذ بالله من سنيه الدنيه ....!! اها ده زول بتكلمو معاهو تاني ....!!.....قلتا ليها طيب سنيه ما تعتذر او تقول ماقاصده ....!!! قالت لي سنيه قالت هي فعلا كانت ماقاصده ...لكن هسه قاصده ...!! ( ابو الزفت ) ..( الترسانة النوويه داخل الحله في خطر ...) ...المشكلة انو سنيه نشيطه في (الواتس ) وقروباتا اكبر ...!! وفوزيه ماشغاله بي القصة دي ..!! وده طبعا يعتبر تقدم نوعي يؤهلها للتفوق في المنظومة الدفاعية ...وميزان القوة ....!!!
المهم فشلت كل المحاولات في تقريب وجهات النظر ولابد من ظهور مستفيدين ...!! اها اي واحده عندها مشكله مع واحده فيهن
استثمرت الأزمة ....!! وولعت النار ...!!! وناس ملكه دخلو في النص ....(ملكه وكدا) ... بتتذكروها....!! اها ملكه قادت مبادره غبية كده قالت يجيبو ست الموضوع ذاتو (سعاد ام الولد العملو ليهو العمليه ...) ويقولو ليها بي سببك حصلت مشكله ...!! وكدا
....(الصفقه لي ملكه ) ....( ياخوانا مافي ودحلال يقنع ملكه دي تسكت ...!!! ) ....
هسه المشكلة برضو انو الوضع الاقتصادي داخل الحلة في خطر ...!!! لانو فوزيه وسنيه هن الماسكات (الصندوق) ...اها نسوان الحلة المشتركات فيهو يدهن في قلبن ...!! لولا خروج تصريحات مقتضبه من فوزيه انو الصندوق لن يتاثر بما حدث ...!! حتي شويه قلبن ده برد ...!! رغم قرار سنيه الانسحاب من الصندوق نهائيا .... !!! (ولم يتأخر الرد كثيرا ) ....!! فوزيه قالت في ستين ...!!! انا بدخل بي اسم بتي محلها ...!! (وريتينا لكن ) ....يبدو ان الميزان التجاري في صالح فوزيه ...!! لكن وين مع الواتس ده ... الإعلام كلو في يد سنيه ...!!
اها مشاعر قالت لي ...بتصدق (سنيه) في عز الأزمة دي رمت ليها كلام كده هسه الحله دي كلها متوترة .....!!! قلتا ليها.... قالت شنو ..!!؟؟ قالت لي ....قالت والله انا مانوع النسوان البرمو الكلامات ساكت أمشو لي فوزيه القالت هي عارفا الرجال المعرسين بالدس في الحلة دي منو ...!!! ( والله انا علوب المامعرس ده خفتا ... !! ) وانا أقول مالم الرجال في صلاة الجمعه الاخيرة دي بتلفتو كتير كده ...!!! بالله ده كلام ده ...!! في داعي ياسنيه تستخدمي القنابل الفسفورية دي ...ماعارفاها محرمه دوليا ....!!
غايتو يامشاعر كان دايرا نصيحتي حقو تلحقو النسوان ديل القصة دي لو استمرت الحله دي بتتشلع ...!! قالت لي وانا من قبيل بقول ليك في شنو ....!!! قلتا ليها هسه يعني مافي اي بوادر انفراج .....!!! قالت لي في مبادرة اخيرة ان شاء

الله تنجح ....!! (ياربي يكون ده الوسيط الأفريقي) ...!!! قالت لي ود اخت فوزيه طوالي خاطب بت أهل ناس سنية ديل ...!! بعد علاقة خمسه سنين ...!!! اها هسه هم بحاولو يعالجو الموقف ده لانهم عارفين انو علاقتم دي ممكن تتنسف بي نيران صديقة .. ..!!! حال استمرار الأزمة ...!!!
...المهم انا طلعتا ونسيت الموضوع ...!! اها جيت بالليل داخل ...بس جاتني ليك مشاعر جاريه...!!! قالت لي الحق ياعلوب فوزيه وسنيه وقعوا اتفاق السلام ...!!! اتذكرتا الموضوع ...!!! قلتا ليها والله سلامه كبيره ....!! الحصل شنو .....!!؟؟ قالت لي كمال ...(ده خطيب البت) .. ساق فوزيه اللي هيا خالتو قال ليها عازمك ...وبي هناك سناء خطيبتو ساقت (سنيه ) قريبتا قالت ليها عازماك ...!! وكمال وسناء متفقين يجمعوهم مع بعض من غير مايكونو عارفين ....!!! اتلاقو في محل دهب ...!! اها لمن (سنيه) لقت (فوزيه ) في المحل اتجننت قالت مابتقعد دقيقه ...المهم بعد تحانيس كمال قال ليهم كدي اصبرو احنا عايزين نصالحكم بالدهب...!!! لانو علاقتكم أغلي من الدهب .....!!!
سنيه فصلت ....!!!
وفوزيه ساعدتا بي بسمه ....!!!
اشترو لي كل واحده خاتم ...!!
اتقالدن ذي المافي حاجه ...وقعن الاتفاق ...وكبن الدموع ...!! قالن دموع الندم ..والله كان تحلفن لي بكره دي ( دموع الختم ) .....!!
....مشاعر قالت لي سنيه جات لي أمي كلمتا بالقصة دي
قالت ليها ...والله انا فوزيه لو وزنوها لي دهب ماكنتا رجعتا ....!!! بس عشان خاطر سناء وكمال ديل ماعندهم ذنب ...!!! مبروك ياكمال خاطرك طلع عيار تمنتاشر...!!!
...قلتا لي مشاعر ...الود ده مفروض يستعجل سريع يعرس البت دي ...انا خايف النسوان ديل يدورن تاني يكونن قافلات علي غوايش ...
انا غايتو بعرف (خاتم سليمان) لكن (خاتم كمال ) دي اول مره ....!!!
ياربي يكونن مفبركات القصة دي كلها للموضوع ده ...!!!؟؟؟مابعيده عليكن يا ثنائي ( اللغم ) ....الحمد لله ( رعده وعدت ) ..

#اشياءبسيطة ..

ﺑﻬﺎﺟﺮ ﻟﻴﻚ ﻋﺸﺎﻥ ﺍﻟﻘﺎﻙ
ﻓﻲ ﻟﻮﻥ ﺍﻟﺼﺒﺎﺡ ﻭﺍﺭﺗﺎﺡ
ﻭﻓﻲ ﺿﻲ ﺍﻟﺴﻨﻴﻦ ﺍﻟﻐﺎﺏ
ﺷﻘﺎﻫﺎ ﻭﻃﻞ ﺑﻌﺪﻭ ﺻﺒﺎﺡ ..

ﻣﺎ ﺧﺎﻳﻒ ﺍﻟﻤﻄﺮ
ﻳﺘﺤﺎﺷﻰ ﺍﻟﻀﻬﺎﺭﻱ ﺍﻟﺮﺍﺟﻴﺔ ﻗﻮﻟﺔ ﺧﻴﺮﺍ
ﻭﻻ ﺧﺎﻳﻒ ﺍﻟﻤﻄﺮ
ﻳﻤﺸﻲ ﻋﻠﻰ ﺍﻟﺼﺤﺎﺭﻱ ﺗﻠﻤﻮ ﻓﻲ ﺑﺸﻜﻴﺮﺍ
ﻭﻻ ﺧﺎﻳﻒ ﺍﻟﻌﺸﻢ
ﻳﺘﻨﺎﺳﻰ ﺍﻟﻌﺸﺎﻣﻰ ﻭﻧﻴﻤﺎ ﻳﺎﻛﻞ ﻧﻴﺮﺍ ..

ﻭﻻ ﺧﺎﻳﻒ ﺍﻟﻨﻔﺲ
ﺗﺘﺬﻛﺮ ﻧﻔﺴﻬﺎ ﻭﺗﻨﺴﻰ ﻳﻮﻡ ﺣِﺪّﻳﺮﺍ
ﺧﻮﻓﻲ ﻋﻠﻰ ﺍﻟﺒﻠﺪ
ﺍﻟﻄﻴﺐ ﺟﻨﺎﻫﺎ ﻭﻗﻤﻨﺎ ﻓﻲ ﺧُﺪﻳﺮﺍ
ﺷﺎﺣﺪﻙ ﻳﺎ ﻛﺮﻳﻢ
ﻻ ﺗﺤﺼﻞ ﺧﺮﺍﺏ ﻻ ﺃﺭﺟﻰ ﻳﻮﻡ ﻭﺩّﻳﺮﺍ ..

ﻋﻴﺎﻝ ﺑﺘﺴﺮﺡ ﻟﻠﻤﺪﺍﺭﺱ ..
ﻭﺍﻟﻔﻄﻮﺭ ﻧﺠﻤﺎً ﺑﻌﻴﺪ .
ﺑﻨﻮﺕ ﺑﺘﺠﺮﻱ
ﻋﻠﻰ ﺍﻟﺨﻄﺎﻃﻴﺐ ﺍﻟﺨﻄﺎﻃﻴﻒ
ﺍﻟﺒﺘﺠﺮﺡ ..
ﻭﺍﻟﻌﺮﻳﺲ ﻧﺠﻤﺎً ﺑﻌﻴﺪ ..

ﺍﻟﺪﻛﺎﻛﻴﻦ ﺍﻟﺘﻤﻼ ﺗﻔﻀﻲ،
ﺍﻟﺴﻤﺎﺳﺮﺓ ﻳﺴﻤﺴﺮﻭﺍ،
ﻭﺍﻟﺒﺴﻔﻮ ﺍﻟﻄﻴﻦ ..
ﻳﺴﻔﻮﺍ،
ﻭﺍﻟﺒﺤﺘّﻮﺍ ﺍﻟﺮﺍﺏ ..
ﻳﺤﺘّﻮﺍ..

ﻭﺍﻟﺒﻨﺎﻃﻠﻴﻦ ﻟﻴﻬﺎ ﺳﺴﺘﻢ،
ﻭﺍﻟﻘﻮﺍﻧﻴﻦ ﻟﻴﻬﺎ ﺳﺴﺘﻢ،
ﺍﻟﺒﻨﻮﻙ ﺍﻟﻔﻴﻬﺎ ﺑﺴﺘﻢ ..
ﻣﻦ ﺳﻮﻳﺴﺮﺍ ﻭﻟﻲ ﻣﺎﻟﻴﺰﻳﺎ
ﺑﺎﻟﺴﻔﺎﺭﺍﺕ
ﻭﺍﻟﻌﻤﺎﺭﺍﺕ
ﻭﺍﻟﺨﺒﺎﺭﺍﺕ ..

ﺍﻧﺎ هووووي انا
انا هوووي ﻛﻨﺖ ﻣﺘﻐﻄﻲ ..
ﻭﻣﺘﺪﻓﻲ،
ﺍﻟﻌﻤﺔ ﻣﻠﻮﻳﺔ،
ﻭﺍﻟﺸﺎﻝ ﻋﻠﻰ ﻛﺘﻔﻲ ..

ﺳﻮﺩﺍﻥ ﻭﻛﺎﻥ ﻣﺎ ﻛﺎﻥ
ﺳﻮﺩﺍﻥ ﻋﻠﻲ ﻛﻴﻔﻚ
ﺍﻟﺴﻜﺔ ﺳﺎﻋﺔ ﺇﻳﺪ
ﻭﺍﻷﺭﺽ ﻣﺮﻭﻳﺔ
ﻭﺍﻟﻨﺎﺱ ﺣﻨﺎﻥ ﻭﻇﺮﺍﻑ
ﻭﺍﻟﺮﺍﺡ ﻳﺠﻴﻚ ..
ﻟﻠﺤﻮﻝ
ﻭﺍﻟﺨﺪﻣﺔ ﻣﻈﺒﻮﻃﺔ
ﻣﻈﺒﻮﻃﺔ ﻣﺪﻧﻴﺔ
ﻭﺍﻟﺪﻧﻴﺎ ﺣﺮﻳﺔ ..

و ﺍﻧﺎ ﻣﺎﺑﺠﻴﺐ ﺳﻴﺮﺓ ﺍﻟﺠﻨﻮﺏ ..

ﺍﻟﻐﺒّﻮﺍ ﻋﺮﻓﻮﻫﻮ
ﻭﺍﻟﻌﺮﻓﻮ ﺳﻮّﻭﻫﻮ
ﻭﺍﻟﺴﻮﻭﺍ ﺑﻠﻘﻮﻫﻮ ..

ﺃﺻﺒﺤﺖ ﺯﻱ ﺍﻟﺰﻭﻝ
ﻗﺎﺩﻝ ﺑﻮﺳﻂ ﺍﻟﺴﻮﻕ
ﺳﺮﻭﺍﻟﻮ ﻧﺼﻠﻮﻫﻮ
ﻟﻮ ﺍﻟﻌِﺮﻕ ﻣﺴﺮﻭﻕ
ﺃﻭ ﻗﻠﺒﻲ ﻧﺸﻠﻮﻫﻮ
ﻃﻌﻢ ﺍﻟﻜﻀﺐ ﻣﺴﻠﻮﻕ
ﻣﺎﺳﺦ ﺗﻀﻮﻗﻮﻫﻮ ..

ﻟﻮ ﻓﻤﻲ ﻣﺎ ﻣﻄﻠﻮﻕ
ﺃﻭ ﻛﻤﻲ ﻏﺴﻠﻮﻫﻮ
ﻳﺎﻧﻲ ﺍﻟﺒﺴﻮﻱ ﺍﻟﻘﻮﻕ
ﻗﻮﻟﻲ ﺍﻟﺒﺘﺎﺑﻮﻫﻮ
ﻣﺎﻋﻨﺪﻛﻢ ﺩﻣﻲ
ﻣﺎ ﻋﻨﺪﻫﻢ ﺩﻣﻲ
ﻣﻦ ﺩﻣﻲ ﻻ ﻻ ﻻ
ﻣﺎﻗﺪﺭﻭﺍ ﻓﺼﻠﻮﻫﻮ ..

ﻭﺍﻧﺎ ﻣﺎ ﺑﺠﻴﺐ ﺳﻴﺮﺓ ﺍﻟﺠﻨﻮﺏ
ﻗﻮﻝ ﺍﺳﺘﻘﻞْ ..
و ﺍﻧﺎ ﻓﻲ ﺻﻔﻮﻑ ﺍﻟذﻭﻕ
ﻭﺍﻗﻒ ﻣﻊ ﺍﻟﻮﺍﻗﻔﻴﻦ ﻣﺰﻧﻮﻕ ﺑﻬﻨِّﻴﻬﻮ
ﻭﻳﻬﻨﻮﻫﻮ
قووول ﺍﺳﺘﻘﺎاااﻝ ..
ﻭﺩﺍ ﺃﻭﻝ ﺍﻷﺣﺰﺍﻥ
ﺃﻭ ﻗﺎﻟﻮﺍ ﺑﺎﻋﻮﻫﻮ
ﻭﺩﺍ ﻳﺎﻫﻮ ﻗﻄِّﻴﻊ ﺍﻟﻘﻠﻮﺏ..

و ﺃﻧﺎ ﻣﺎ ﺑﺠﻴﺐ ﺳﻴﺮﺓ ﺍﻟﺠﻨﻮﺏ،
ﻓﺎﻟﺴﻴﺮﺓ ﻛﻤﻴﻦ ﺃﻟﻒ ﻋﺎﻡ
ﻟﻮﻧﻲ ﺍﻟﻤﺤﺮﻕ ﻣﻨﺪﻭﻛﻮﺭ
ﻭﺷﻜﻠﻲ ﺷﻜﻠﻴﻦ
ﺷﻜﻞ ﻣﻨﻘﺔ ﻭﺷﻜﻞ ﺗﻮﺭ
ﺩﻣﻲ ﺍﻟﻤﺸﺘﺖ ﻣﻦ ﻗﺒﺎﻳﻞ ﻧﻮﺡ ﻭﺣﺎﻡ
ﺷﻌﺮﻱ ﺍﻟﻤﻘﺮﻗﺪ ﺯﻱ ﺣﺼﺎﻳﺎ
ﺍﺗﺸﺘﺖ ﻓﻮﻕ ﺍﻟﺪﺭﻭﺏ
ﻛﺘﻔﻲ ﺍﻟﻤﻬﺪﻝ ﺑﺎﻟﻌﻴﻮﺏ ..

ﻭﺍﻧﺎ ﻣﺎ ﺑﺠﻴﺐ ﺳﻴﺮﺓ ﺍﻟﺠﻨﻮﺏ
ﺃﺻﻞ ﺍﻟﺒﻘﺖ
ﻣﻦ ﺳﺎﺱ ﻭﺳﺎﻳﺲ ﺃﻭ ﻳﺴﻮﺱ
ﻳﺎﻫﺎ ﺍﻟﺒﻘﺖ
ﺧﻠﻮﻧﺎ ﻣﻦ ﺣﺮﺏ ﺍﻟﺒﺴﻮﺱ
ﺍﻟﻔﺎﺿﻠﺔ
ﺗﻜﻔﻴﺮ ﺍﻟﺬﻧﻮﺏ
ﺍﻟﻔﺎﺿﻠﺔ ﻟﻤﻠﻴﻢ ﺍﻟﺒﺸﺎﺗﻦ
ﻭﺍﻟﻤﻌﺎﻃﻦ
ﻭﺍﻟﺨﺒﻮﺏ
ﺍﻟﺒﺎﻗﻲ
ﻣﺎﻳﺨﻤﻮﻛﺎ ﺗﺎﻧﻲ ﻋﻠﻰ
ﺍﻟﺪﻓﺎﻓﻴﺮ ﻭﺍﻟﻜﻨﺎﺗﺮ ﻭﺍﻟﺤﺮﻭﺏ ..

ﺍﻟﺒﺎﻗﻲ ﺗﻌﻈﻴﻢ ﺍﻟﺘﻤﺎﺳﻚ
ﻓ ﺍﻟﺨﻄﻮﺏ
ﻻ ﻧﺎﻓﻊ ﺍﻟﺸَّﺪﺓ ﺍﻟﻌﻠﻮﻕ
ﻭﻻﻧﺎﻓﻊ ﺍﻟﻤﺒﻘﻮﺹ ﻳﺤﻮﻕ
ﻻ ﺑﻨﻔﻌﻚ ﻋَﺮَﻕ ﺍﻟﺰﻧﻮﺝ
ﻭﻻﺑﺮﻗﻌﻚ ﻟﺒﻦ ﺍﻟﻌﺮﻭﺏ
ﺇﻻ ﺍﻟﻮﻗﻮﻑ ﺃﻟﻔﺎً ﺿﻜﺮ
ﻭﺍﺣﺪ ﺑﺮﺍﻙ
ﻓﻲ ﺍﻟﺸﻴﻤﺔ ﺗﻠﻔﺤﻚ ﺍﻟﻬﺒﻮﺏ
ﺍﻟﻐﻴﻤﺔ ﺗﺪﻳﻚ
ﻟﻠﺴﻔﺎﺳﻒ
ﻭﺍﻟﻌﻮﺍﺻﻒ
ﻭﺍﻟﻤطر

ﺑﺮﻃﻊ ﻣﻊ ﺍﻷﻓﻌﺎﻝ
ﻭﺍﺩﺧﻞ ﻋﻠﻰ ﺍﻟﺘﺎﺭﻳﺦ
ﻳﻐﻠﺐ ﺃﺟﺎﻭﻳﺪﻙ
ﻣﻦ ﻗﺮﻗﺮﻳﺐ ﻋﻮﺳﻚ
ﺍﺧﺮِﺝ ﻣﻦ ﺍﻟﺘﺎﺭﻳﺦ
ﺷﻴﺨﻚ ﻭﻋﺮﺑﻴﺪﻙ
ﻻ ﻧﺎﻓﻌﻚ ﺍﻟﺘﻜﻔﻴﺮ
ﻭﻻﻧﺎﻓﻌﻚ ﺍﻟﺘﻮﺑﻴﺦ
ﻓﺎﻣﺸﻴﻪ ﻭﺣﻴﺪﻙ ..

ﻭﺍﻣﺮﻕ ﻋﻠﻰ ﺍﻟﺘﺎﺭﻳﺦ
ﺗﻠﻘﺎﻩ ﻓﻲ ﺍﻟﺴﻬﻼﺕ
ﻣﺴﺘﻨﻲ ﻛﻤﺴﻴﺪﻙ
ﻻ ﺑﻴﻈﻠﻢ ﺍﻟﺘﺎﺭﻳﺦ
ﻭﻻ ﻳﺮﺣﻢ ﺍﻟﺘﺎﺭﻳﺦ
ﺇﻳﺎﻩ ﻋﻮﺱ ﺍﻳﺪﻙ ..

ﻛﺎﻧﺖ ﺟﺎﻟﺴﻪ ﻋﻠﻲ ﺑﻌﺪ ﻗُﺒﻠﻪ ﻣﻨﻪ
ﻳﺘﺒﺎﺩﻻﻥ ﺍﺭﻭﻉ ﻛﻠﻤﺎﺕ ﺍﻟﺤﺐ ﻭﺍﻟﻐﺮﺍﻡ
ﺍﺭﺑﻜﺘﻪ ﺑﺴﺆﺍﻝ ﻟﻢ ﻳﺘﻮﻗﻊ ﻃﺮﺣﺔ ﻗﻄﻌﺎ ..
ﻗﺎﻟﺖ : ﻣﺘﻲ ﺳﺘﺄﺗﻲ ﻟﺨﻄﺒﺘﻲ ؟
ﺧﻴﻤﺖ ﻋﻠﻴﻬﻤﺎ ﺳﺤﺎﺑﻪ ﺩﺍﻛﻨﻪ ﻣﻦ ﺍﻟﺼﻤﺖ
ﻟﻢ ﻳﻨﻄﻖ ﻫﻮ ﺑﻌﺪﻫﺎ ﺑﻜﻠﻤﺔ ..
ﺟﻤﻌﺖ ﻫﻲ ﻣﺎ ﺗﻨﺎﺛﺮ ﻣﻦ ﺍﻣﻨﻴﺎﺗﻬﺎ
ﻭﻟﻢ ﺗﻜﻠﻒ ﻧﻔﺴﻬﺎ ﻋﻨﺎﺀ ﺍﻟﻨﻈﺮ ﻟﻠﻮﺭﺍﺀ
ﺍﺛﻨﺎﺀ ﺭﺣﻴﻠﻬﺎ..
#قمر_الأنبياء.. ™