رغم الحال الونسة بتقوي المناعة ….

يوميات #علوب …!!

نحن حالفين بالمشاعر …!!!

( مؤيد ) و( صابر ) متلمين ليهم على شلة كدا في الجامعة اغلبهم جايين من ( بلاد بره ) هم لطيفين والله لكن طبعا يحاولو أن يتأقلموا على الأوضاع ….!!

كدي النعرفكم عليهم

اولا ( أسيل )
( أسيل ) دي جايه من ( جدة ) أبوها جراح في مستشفي الملك فيصل التخصصي
وامها دكتورة في جامعة الملك عبد العزيز …!!

( حديد لافى جديد )

و ( سهى ) ….!!
سهى دي من بنات أيرلندا ولازالت الأسرة هناك دفع بها والدها من صقيع ( دبلن ) الي شوايات ( أم درمان ) ليقوى عودها …!!

( معز ) من الرياض العاصمة ….مولود في السعودية …
لسا بشجع النصر السعودي ….وبقول السيارة غرزت

( سماح ) دي من هولندا اهلها هناك ساكنين في مدينة اسمها ( زفولة ) ( zowlle ) فيها زي مية كنيسة كدا
قالو مرات بقت لما تحلف بقت تقول وحات ( جيسس ) …!!😳
طوالي قالو تمشي تتم قرايتا في السودان

( رؤي ) من هنا …من الخرطوم دي …لكن لم تسمع بأن هناك منطقة إسمها ( جنوب الحزام ) …..!!
جنوب الحزام شنو …لم تعبر اجواء ( الجحفان ) ولو على سبيل الترانزيت …
وجنوب الحزام حاجة تمام

( عمار ) من أولاد ( دبي ) ليهم سبعطاشر سنة هناك
( بلبس جلابيتن ) ….

نجي لي ( مؤتمن )
…( شوف الاسم ) 👋
أهلوا في ( ويلز ) …
عندهم بيتين في ( لندن ) وبيت في ( كاردف )
أبوهو اختصاصي النسا والتوليد شايل كم جائزة كدا
عندو حاجه كدا في الولادة دي مسجله بي اسمو

الخواجيات ديل نصهم ولدن هو …..!!
واحده مره اهدت ليهو عربية ( بينتلي )
هي من بنات العز الإنجليزيات ديل من النبلا

( إطناشر ) سنة ما ولدت …عالجا ( الشفت ) دا …!!

ذكرتني دكتور كدا كان فلقو في ( الدايات ) إحتجاجاً على
مولودة بت جات لي وحد عندو خمسة بنات ..!!😅😅😰

بالنسبة لي أولادنا المشاركين في المجموعة
( مؤيد ) دا من أولاد ( العرضة شمال ) أبوهو كان شغال في البوستة وهسا معاش ….
لحدي قبل سنتين كل يوم جايبنو من الشارع مضارب ليهو زول ….!!
بتلب الحيطة بالليل عادي يحضر الحفلات
ليهو زمن سايق ليهو ( ركشة ) ناس بيتهم ما عارفين
قال بطلع بيها مصاريفو ….!!

( صابر ) دا أهلو من ( مدني ) قاعد هنا مع خالتو ….
بطقطق الكورة دي طقطيق الجن ….لعاب شديد …..مشهور في ( بانت ) مراتٍ بسمسر في العربات

هو ذاتو قيافة كدا …!!
لما يعلق صورتو في ( الفيس ) ….البنات بعبرن عن شعورن 😍

أها دي ياها الشلة ….يجمع بينهم الوطن واللغة وحوش الجامعةً

( مؤيد ) دا غايتو إسمو دا دخلو في الشلة دي …..
و ( صابر ) أصلًا صاحبو ….وجاهتو دي برضو أكل بيها عيش وسط منتخب كاس العالم دا …..!!

يازووول ناس مؤيد وصابر ديل قاعديييين في نص الشلة دي ومشاركين في كل برامجا ….ومرات ميتين بالضحك
لاختلاف الثقافات والتوقيت …!!

يعني مره ( أسيل ) دي قالت هي ما نفسعا الا تاكل ( أجاشي ) يعنى قصدها ( أقاشي ) قالت طول عمرها بتسمع ليهو لكن ما شافتو

صابر قال لي مؤيد …..!!
هسا ( الأقاشي ) عارف إنو ( أسيل ) دي بتسأل منو …..!!؟؟😳

(الأسماء دي بيجيبوها من وين الناس ديل !!؟🤔)

عاين دا هسا ….( أسيل) ….🥰😍

( أسيل غزال فوق القويز )

( صفا ) بت جيرانا ساكت غايتو بقولو ليها صفا إسمها
في الشهادة ( الجدولية ) …!!

المهم مره كدا الشلة دي قرروا يمشو رحلة …!!
منها ترويج ومنها يستكشفو بعض المناطق والآثار…

وقع الاختيار على ( جبل أوليا ) ….!!

أول حاجه المكالمات الهاتفيه مع الأهل والتدابير
والاحترازات والإقناع أصلًا بمبدأ الرحله أخد ليهو زي ( خمصتاشر ) يوم كدا

ورسلو صور للسواق الحيسوقم مرفقة بنشرة جنائية كامله …
وأسماء كل الماشين والمرافقين …!!
ودرجات الحرارة المتوقعة هناك ..وهل في أمراض مستوطنة وإمكانية وجود قوارض …
وقفو عند صورة ( صابر ) شوية ما بكذب عليكم …
عندو كم آثار ضربة كدا في الوش …..وفي ( زرارة ) مقطوعة في واحدة من الصور …..

المهم بعد مرافعات واستيضاحات وتحريات
تم التصديق ،..

سايقم عمك ( التجاني ) بالكريز ….🚐
أول ما ركبو ( سماح ) قالت ليهو الحقنا بالتكييف ياعمو دايرين نموت ….!!
ومات هو من الضحك …😂😂
وكلمة ( عمو ) دي حسا بيها زي مسخرة كدا

طبعاً دي أول مره زول يقول ليهو ( عمو ) في حياتو …!!

( ولدو ذاتو بقول ليهو التجاني …) 😳

قالت ليهو ما عندك CD في العربية دي ….!!
عمك قال لي صابر سيدي دا منو كمان …!؟؟
نحن سيدنا الله

( صابر ) قال لي يعني مسجل …!!
عمك تاني اتفنقل من الضحك 😂😂
قال ليه بتصدق ياصابر المكنة بتاعة العربية دي أول حاجة ما حقنا شايلتها من عربية تانية …..!!

والعربية دي دركسونا يمين قلبنا شمال …!!

والشاسي مفتول استعدلنا بي يا الله ويا امين
تقول لي ( سيدي ) …

( غايتو البنات ديل لو عرفو التلاعب في الجينات الحصل في العربية دي كان تلبن ) ….!!

لكن البديل دائمآ حاضر ….!!
كل واحده طلعت ليها سماعة شكل ولون التقول لاعبين في ( باريس سان جيرمان ) ….!!
( صابر ) خلاص يعني الود داير بعمل ليهم ( جدعة ) كدا قدام الجكس ….!!😍
قال لي ( مؤيد ) صدق نسيت ما جبت سماعاتي …!!

( مؤيد ) قال ليهو ولا يهمك أنا عندي تلاته هنا

طلع مشتريهم من بتاع
إشتغلت …إشتغلت …!! ما اشتغلت ولا ترجعا ولا عندي ليك حاجه داك ) ..!!

صاير داير يموت من تطمينات مؤيد دي بس الكويس زول ذاتو عرف ديل ذاتم شنو مافي سماعات ولا حبال ولا شنو ديل أصلًا….!!

( العربية كلها بلوتوث فضل ليها تطير )

رغم إنو ( سهى ) زعلانة قالو كانت دايره تجيب ( كوبي ) معاها ( أنا قايلو أخوها )
كوبي دا طلع ( كلبا ) …لكن قالو عيان شويه …!!😳😳

طبعا أول مره في حياتنا نعرف إنو الكلاب بتعيا ….!!
البنعرفو قال كلاب الحزام ( بتزنق ) 🎼🎹 🥰😂

المهم أخيراً وصل الوفد إلى ( جبل أوليا ) ……!!

والله يا اخوانا البنات ديل التقول حطن أرجلهن على القمر
يازووووول فرحة أم شهيق ديك…!!🎉

جرن على الرملة دي زي الفراشات 🦋

وناس لندن ديلاك مساعدتها بي amazing

وناسنا طبعا الطيبة كلها واللذادة استقبلوهم احلى استقبال 😍🥰😘

وسيد المركب دا راجلاً طيب كدا ولطيييف …..
بجيب على كل الاسئلة والاستفسارات بجمال وصبر
ولطافة ….!! إسمو الصديق ،،

غايتو الليلة لو أهلهم عرفو إنهم راكبين في ( مركب ) لشهدت حركة الطيران حجوزات كثيفة إلى الخرطوم للاطمئنان على هذا التهور …!

رغم إنو كلهم بيعرفو يعومو …..
( الشلة دي كلها تربية حمامات سباحة )

وناس ( مؤيد ) و ( صابر ) ديل بطفرو عادي من الكبري في البحر …

المهم ( أسيل ) قالت ياسلااااام مفروض يكون في
Tourism
هنا …!!
وقد صدقت البنيه ….لكن هو نحن فاضين من الكراسي
قالت لي مؤيد
إ تز …أن ….بليفابل …..it’s unbelievable 😳

مؤيد قال إنت البنات ديل مالن هسا …!!؟
ماجبل اوليا والسمك …
في شنو ؟؟؟؟

و ( سهى ) سألت عمك الصديق بتاع الموكب قالت ليهو إنت ليه ياعمو ( البوت ) بتاعك مافيهو machine
ولا انت قاصد تمارس التجديف …..!!

( صابر ) ترجم لي عمك داير يموت من الضحك …
قال ليهو قول ليها المركب دا هو العملو

( نار وشرار ياخ ) 🔥🔥✌️✌️🔥

والناس في بلدي يصنعون الحب ….!! 🥰

( مؤتمن ) في نص الأجواء دي نطا في الموية وسط هلع الحضور لكن جا راجع المركب قايلا ( شواطئ برايتون )

( حظو كويس ما كان في ( قرموط ) لافي …!! كان نشفو ) ⚡️⚡️💥

المهم جو راجعين الشاطئ والفرحة لا تسعهم ….
يتأملوا بصدق جمال هذا البلد وأهله..!!

جا ( شافع ) كدا لافي بي حلاوة وبسكويت ونبق ودوم وحاجات زي دي …
اتلمن فيهو البنات ديل
( سهى ) قالت دايرين دوم ونبق بي أربعة الف جنية…..الولد ذاتو اتخلع ..😳
( ياربي دايرا تصدرو ….) …!!🤔
وبكل صدق الدنيا قال ليها دي والله بالقروش دي الا نديك العربية دي كلها ….!!

وأحس الصغير بنقص معلومات الشراء والتفاوض
فتولي هو العمليه بنفسه وكفاهن شر القتال
وكفاهن كلهن ومعاها هدايا مجانيه …!!🎊🎉

( إنه البهاء ) ….!!

أخدو معاه سيلفي ….!!
ماعارف إنو صورتو دي حتمشي خمسة عواصم …
وهو هايم هنا على وجهه في هذا المكان ….وصورته راسخة فيه … يبيع الفرح ويشتري المجهول ..!!
أقرانه في صف الدراسة …وصورته وصلت الي قلب لندن …!!🤭


بعد شويه جو أولاد كدا مارين حاولو يخففو دمهم مع البنات
( مؤيد ) قال لي ( صابر ) بي صوت عالي كدا في رسالة موجهة ..واياك اعني فاسمعي يا جارة …!

اقال ليهو والله الناس شنو حقو تحترم بعض ومافي داعي
( للكوماج ) ( الطقطقة ) دي نحن أسيادا
واحسن تكسرو الحنك ..ولا كمان بنوريكم كتاب ….!!

جماعتك فهمو الرساله والحارة فيها ( مكنات ) ..
وانسحبو في هدوء ….وكان تدخل صريح للكوماندوز
ديل ..ناس ( سهى ) والمعاها حسن بي عظمة كدا

( عمار ) ذاتو متدرب فنون قتالية ( ديل ناس دبي )
عمل ليهو كم حركة كدا جماعتك قربو يصفقو ….!!

وناس ( مؤتمن ) ذاتو سألو في شنو …!! ؟؟
عايزين يتدخلو …( شغل انجليز كمان تحسبو لعب )

قالو ليهم لا لا مافي حاجة شوية ( مجمجه ) كدا وحسمناها ….!!
واضح إنو الحتة دي ما عناها علاقة بالمكان دي جوانا
الكل كان جاهز للحسم ….والجنس سوداني 💪


( معز ) قال كان بتناقش مع أبوهو قبل يومين في إنو هل مفترض يسكن في شقة براهو …ولا أفضل مع آخرين ..!!؟

أبوهو شايف إنو يكون مع آخرين وهو عكس الفكرة
قال ما وصلنا لي نتيجه لكن أجلنا النقاش …!!

( مؤيد ) قرص ( صابر ) بي تحت مدمع من الضحك قال ليه قالو أجلو النقاش …!!😂😂😂

( صابر ) قال لي خلي التأجيل ….!!
أنا داير اعرف أساساً هم يعني كيف بتناقشو مع أبهاتن ديل …!!؟؟
😳😳
قال ليهو انا المره الوحيدة الإتناقشت فيها مع ( الحاج )
كنت ماسك ليهو السرير وهو بصلح فيهو ..!!

مرات بقول لي شد عليك ومرات بقول لي ترخي
دا آخر حوار …!
وفي النهايه فكاني بالزردية لاني رخيت من غير ما يقول لي ….!! تقول لي نقاش ….!!

( مؤيد ) قال ليهو إنت احسن زردية وبتروح …!!

قال هو مره جا من حفلة وتلب بالحيطة ….
قال وكت راسو ظهر بطرف الحيطة كان ( أبو ) برضو ظهر على الأرض…!! 😳

قال ليه شايفك باود الحرام لكن على بالطلاق أنا وإنت ما ما بنبيت الليله سوا ….والبيت دا ما يشيلنا نحن الاتنين دحين أرجع محل جيت بيت مع الصعاليق الكنت معاهم ديل ….!!

( شوف الشفافية دي ..!!)

قال لي والله بنعاين لي بعض بالليل داك أنا معلق في الحيطة وهو تحت بس الغزالة والأسد في
( ناشونال جيوغرافيك )

وفكاني بي حاجه كدا لو ما زغتا كان شال رقبتي ..!!

قال مشيت ( بتا ) عند ناس خالتي في الثورة
لقيت ( جيرانم ) عاملين حفلة نجاح ( ولدم ) في بيتم عشان حوشم كبير …كتلت معاهم الحفلة نار بس 🔥
واقفين قنا ..
🕺💃🕺

( عليك الله شوف السودان دا حلو كيف😍)

المهم زي الساعة خمسه كدا عمك ( التجاني ) عمل
إعلان قال لازم نرجع لأنو ما ضامن الأنوار…!!

قلتا لي بس عليه الله بس ياعم ( التجاني )
انا دايرك تقول لي حاجة وااااحدة في العربيه دي انت ضامنا …!!؟؟؟

قال لي ( البوري ) ….!!!!

والله ضحكنا ضحك انا وهو
😂😂😂😂

وانحشرنا من جديد في سيارته العتيقة واستلقينا في كراسي ( الكريز ) وقد استبد بنا التعب …!!

يوم كان لذيذ وحافل وممتع والناس كلها مبسوطة

تاني كل واحده ركب سماعتو ….!!
طبعا جوا بكون مدور طرب خليجي على غربي …..على سوداني 🎼🎼

المهم طبعاً سماعة ( مؤيد ) الضاربه دي مسربه الصوت
عامل فيها بسمع في أغنيه رومانسيه
وأنا سامع ليك …النقدو الطير أنا قايلو حي ….
ورجلو تحت ترفس …!! فضحنا فضيحة ….!!

بتصدقو سهى نامت ….!!😌
زي الملايكة ما شاءالله 🎈🎈
بتكون نامت على أنغام ( أليسا ) ….😍

مشاعر اختي في عرس رباب بت خالتنا تلاته يوم ما نامت ومستلمه الجرتق ….!!😳

ياربي ما خده مورفين !!؟

نومي يا ( سهى ) …!! نوم العوافي واحلمي بسودان سعيد جميل يجمعنا كلنا ونستريح فيه …بأمن وسلام حتي
لو داخل ( كريز ) …..!!

السودان دا مهما خليتو هو ما بخليك
محفور جواي وجواك ….مرات بجي عليه غبار ومرات جليد بمجرد ما تمسحو بظهر رسمو الغالي واسمو العالي
وسوداني الجوه وجداني بريدو …!!😍🥰

ولا شنو يا أسيل…!!🎉🌹

سبتكم أخدر ..

#اشياءبسيطة ..

وأبقى عايش للعوينات الوفية💙

كان شرط العلاقات الثابت منذُ الأزل حتى الآن قائم على وجود الطمأنينة، أي علاقة لا يتخلّلها الأمان باطلة، ستظل تخسر فيها كل شيء حتّى نفسك .

‏⛔⛔ "دي العسكرية الدايرنها؟!"

خلال شهرين بس من الإنقلاب.. عاد التضخم بقوة.. ورجع السوق الأسود.. رجع الفرق بين سعر البنك وسعر السوق الأسود.. وفقد ميناء بورتسودان 90% من دخله.. اتخربت بيوت كانت عايشه عليهو.. وانضرب الإقتصاد السوداني في مقتل..
تضاعف سعر الكهرباء 500%..
‏وزادت فترة قطوعاتها.. إختفى الدقيق المدعوم.. ورجعت صفوف العيش، والغاز، والبنزين.. رجعت الديون.. ومنح مليارية من البنك الدولي كانت مخصصة لدعم الإقتصاد.. تم إلغائها..
خرست كل الألسن الكانت بتقول "دي المدنية الدايرنها".. وبتتباكي على تدهور الإقتصاد زمن الحكومة المدنية..

‏رجع قمع الأجهزة الأمنية المستقوية على شعبها الأعزل.. إنحطاط أخلاقي لا يصدق.. قتل للشباب العزل، وإغتصاب للفتيات في الشوارع، وإختطاف المواطنين، مداهمة البيوت وترويع الآمنين في بيوتهم..
خرست كل ألسن دعاة الدين الكانت بتقول "دي المدنية الدايرنها".. وبتتباكى على ضياع أخلاقنا الحميدة..
‏زمن الحكومة المدنية..
تُرست الكباري بالحاويات، والسلك الشائك المكهرب بالأيام..
خرست كل الألسن الكانت بتقول "دي المدنية الدايرنها".. وإختفت القصص الحزينة عن المرضى البموتوا في الطرقات بسبب المتاريس.. سكتت الألسن الكانت بتشتم لجان المقاومة و "الشباب الصايع" البقفل الطرق بالحجار، ‏ويعطل مصالح الناس..
أيوه دي كانت المدنية الدايرنها..
كانت دولة عدالة وحقوق وإحترام لحق الإنسان.. كانت دولةبتحترم مواطنها، وبتتيح حرية التعبير حتى لمعارضيها.. كانت مدنية بتتقبل شتم حكومتها بطيب خاطر بدون ماتتعرض للإعتقال والترويع.. أو تخاف على حياتك..
كانت المدنية الدايرنها فعلاً..
‏كان عندنا دولة لأول مرة.. وحكومة محترمة عالمياً، منذ سنوات من القطيعة والإنعزال..
دولة طامحة بيطلع رئيس وزرائها يقول للشعب، ما تشكروني على شغلي.. قوموني وانتقدوني..
كانت دولة مدنية بتنصاع لشعبها.. وتُقيل وزرائها عند الضغط الشعبي، ومطالبة الشعب بإقالتهم..
كانت دولة عدالة، تنسمنا عبيرها لأول مرة منذ تاريخ ممتد.. حتى جاء العسكر ذات ليل، وأفسدوا - كعادتهم- كل شئ..
ومن أجل مصير(5)أفراد مذعورون من القصاص والمحاسبة، إختطفوا مصير شعب كامل.. ودمروا إقتصاده.. ورهنوا سيادته لدول المحاور..

‏خليني أسالك نفس سؤالك:
دي العسكرية الدايرنها؟!..

مهند رحمة

وتظنُّ أنك حُرمت ، والحقُ أنك رُحمت."وذكر فإن الذكرى تنفع المؤمنين"💛🌻

- سُبحان الله💛 .
- الحمدلله 💛 .
- لا إله إلا الله💛 .
- اللهُ أكبر 💛.
- سُبحان الله و بحمدهِ💛 .
- سُبحان الله العظيم💛 .
- استغفر الله و أتوبُ إليهِ💛 .
- لا حول و لا قوة إلا بالله💛.
- اللهُم صل على نبينا محمد 💛.
- لا اله الا انتَ سبحانك💛.
اني كنت من الظالمينَ💛.
- حسبي الله لا اله الا هو عليه💛 .
توكلت وهو رب العرش العظيم💛 .
-اللهم ارزقني من حيث لااحتسب💛 .
-اللهم ثبت قلبي على دينك💛.
- يارب رضاك والجنه💛.
-اللهم احسن خاتمتي💛 .
-اللهم اجرني من عذاب النار💛 .
- اللهم قني عذابك يوم تبعث عبادك💛 .
- اللهم أحينا على رضاك وأمتنا على رضاك💛 .
-اللهم صل وسلم على نبينا محمد 💛..

تبت يد القتله والعسس الرمم🍃

#الردة_مستحيلة
#لا_لحكم_العسكر

لا المدامع وقفتنا..
ولا الحكايات الحزينة.. 💙🌸

#لا_لحكم_العسكر..
#الردة_مستحيلة..

تمت الحوجة جزاكم الله خير.. 💙

وأسافر في سواد عينيك...
واخاف أنا من عيوني عليك

❤️❤️❤️❤️❤️

باكِر سنين الهم تروح..
والفرحة تبقى مسيطرة ✌️🏻💛

#مليونية17يناير
#لا_لحكم_العسكر

السلام عليكم ورحمة الله وبركاته
حوجة مستعجلة شديد ..
خالتنا مريضه وعندها علاجات مفترض تواصل فيهم طواالي وخلصو من عندها
الأدوية ب 9 ألف
من لها؟

للمساهمة:
0965390066
0995916668
0129510123
بنكك:
2727533
خلود محمد يونس

فضلا إرسال الإشعار🌸

اغضب..
فإنك ان ركعت اليوم سوف تظل تركع آلاف السنين..
الخط الامامي للثوار..✌️

#يسقط_حكم_العسكر ..
#الردة_مستحيلة..
#كلنا_غاضبون

وتظنُّ أنك حُرمت ، والحقُ أنك رُحمت."وذكر فإن الذكرى تنفع المؤمنين"💛🌻

- سُبحان الله💛 .
- الحمدلله 💛 .
- لا إله إلا الله💛 .
- اللهُ أكبر 💛.
- سُبحان الله و بحمدهِ💛 .
- سُبحان الله العظيم💛 .
- استغفر الله و أتوبُ إليهِ💛 .
- لا حول و لا قوة إلا بالله💛.
- اللهُم صل على نبينا محمد 💛.
- لا اله الا انتَ سبحانك💛.
اني كنت من الظالمينَ💛.
- حسبي الله لا اله الا هو عليه💛 .
توكلت وهو رب العرش العظيم💛 .
-اللهم ارزقني من حيث لااحتسب💛 .
-اللهم ثبت قلبي على دينك💛.
- يارب رضاك والجنه💛.
-اللهم احسن خاتمتي💛 .
-اللهم اجرني من عذاب النار💛 .
- اللهم قني عذابك يوم تبعث عبادك💛 .
- اللهم أحينا على رضاك وأمتنا على رضاك💛 .
-اللهم صل وسلم على نبينا محمد 💛..

نفّض هدومك وإنتشي..
شتِّت ملح فوق النزيف..
كل المسافه بتتمشي..
بس إنت شد حيلك وأقيف.. 🇸🇩✌🏽

#لا_لحكم_العسكر..
#الردة_مستحيلة..

والله من يوم الرحيل
لا شوفتك السمحة إتلقت..
ولا ضقنا من بعدك حلا.. 💔
17/1/2013

بين رحيل ورحيل ، بين الكلمات الجميلة والأخلاق الحميدة ،بين حقبة زمنية وأخرى ، بين آلم وآخر ، بين فقد وفقد يبقى ١٧ يناير رابط بين تلك الأشياء
١٧ يناير رحيل إنسان ، سطر تاريخا" سيظل خالدا" في الذكرى ، إنسان يحمل من طيب القلب والمحبة ما يجعله يسكن القلوب دون إستئذان ، إنسان رافقته البسمة إينما حل،
تغنى بالعديد من الكلمات التي لامست شعورنا ،
عشقه الجمهور فكان أسطورة ، تراه بين رفاقه كأخ بين إخوته و والد بين أبناءه


رحل الأسطورة وما زال إسمه يتردد بيننا ، تراه هنا بين الشباب ، وهناك بين الأطفال ،


بين من غنى : كوني النجمة ، الممشى العريض ، في عيونك ، سافر ، المسافة ، الحزن النبيل ، أسئله ليست للإجابة ، لمحتك،عم عبدالرحم ، والعديد من الروائع
وبين من غنى : ساب البلد , اتفضلي ، شوق العيون ، غزال القوز ، لهيب الشوق ، اقمار الضواحي ، مع السلامة ، والكثير من الكلمات التي يعجز اللسان عن وصفها
بين هذا وذاك يبقى 17/1 الرحيل المر ،

رحلوا وما زالوا بداخلنا ،يا الله طيب مرقدهم ،إرحمهم برحمتك الواسعة ،


الذكرى السنوية لرحيل المبدعين :
مصطفى سيد أحمد
محمود عبدالعزيز


#مريوومة

١٧ يناير..
الرحيل المُر..💔

كيف تبدو الذكريات؟
كيف يبدو طعم أيام الشجن؟..
من يعلم ذكرياتي كل أشكال التداعي؟
والرحيل المر دوماً حين يصطدم المدى بالمآسي واحتضار الأغنيات ..💔

ألف رحمة ونور..💙

#يسقط_حكم_العسكر..
#الردة_مستحيلة..
#مليونية17يناير..